Read Varisi Matiu 12 Bible Online

Matiu 12 - Varisi bible

Matiu 12

¹Taramuzina nae, kaki musaqara Sabat Jesu mana disipoloro ia iri zuka sivale loborona barue sila ne. Gonae disipoloro ia iri lete saqo, iago iri pala kaviaro sila mana iri ge go.

²Ṉalu vano Parisio iri mia qirae go, iri sine ne Jesu, “Qo mia! I taboe Tamana ita pata iri zazu nego disipoloro aro, iri vae sila musaqara Sabat?”

³Gonae Jesu i vataule ne qira, “Avigo, qamuki toere kaega pata i zazu nego Davita, ṉalu tanuna mana basoero ia i pala qira go saqo?

⁴Ṉalu nae Davita i keba za Pade Lotu tabo ia God, mana i za ge bureri tabo ne. Do Tamana ne, i va tabo tarina ge go bureri nae, tanuqira so patere ro iri mazala go ge na.

⁵Avigo qamuki toere ze kaega Tamana ne sauqira patere ro? Osina musaqara Sabat patere ro iri zazue go pade tabo nae iri vae Tamana na Sabat, do iriki kebu kaega.

⁶Masine ne qamu pata ogoto, kaki pata i lete sivala ne pade tabo nae ne, i kogo to dena.

⁷Buka tabo igo de, ‘Era qaki soko kaega komakoma, do qa soko basoero ne mara ria vari nanao mana manava sakata ne vasakata pata ro ria.’ Iato dena seko qamuki rove velake go kaega talupasana. Ṉalu go tamu rove velake go talupasana seko dena, i makuru tamu zazu ne ze vivine de ikoego basoe iki kebu go kaega.

⁸Tanego era Tuna basoe qa batu ne go musaqara Sabat.”

⁹Jesu i kasi ne de go mana i za napue kaki Pade Lotu ria vano Jiu.

¹⁰Mana kaki valeke i le karisina, i koe loborona de go. Kakiaro basoero ne iri taqia zuka go mara va sorua Jesu irigo. Iago iri tana ne ia, “Avigo Tamana ia Mosese i vamao va velake na basoe musaqara Sabat?”

¹¹Gonae Jesu i vataule ne qira, “Ṉalu kakia ramu dena, tara soru za bolu kameka sipi ia, musaqara Sabat, avigo ki mazala kaega na za va sipore?

¹²Basoe i mazala sivala ne sipi, iago Tamana i va mao so zazu ne na pata velaka i mazala go tavisi ne basoe musaqara Sabat.”

¹³Taramuzina Jesu i vane de valeke ne, “Kazara ne karisimu!” Valeke ne i kazara ne karisina mana i velaka to gere so kene karisina ni velaka bana go.

¹⁴Pasi nae vano Parisio iri siporo za mana iri taqia zuka go tarina vae vale zego Jesu iri go.

¹⁵Jesu i rove kakiaro basoero iri nanao vae vale na ia, iago i kasi ne de go. Topu basoero iri lulu muzi ne ia, mana i vatavoisi qira basoero iri mokoso go.

¹⁶Mana i sine va moqere ne qira, tariniki pepeu ne kakia basoe sauna tanuna.

¹⁷I zazu ne iadena, go seko ia God i va zuka ze go propeta Isaia tina lama sadaka ogoto, igo,

¹⁸“Valeke dena ne, iato qa vine bana go era, tina basoe zazu era go, mana iato qa lete mamaligara nego, mana qa lete kula ne go. Era na turine Spirit era go na kotavise ia, mana tina vasadaka ne qira basoero na kolabana pua vatovato totoloṉo.

¹⁹Ia tiniki vari valegu kaega ba koru valavata kaega, ba seko valavate kaega zuka lavata ro ne.

²⁰Ia tina va meloto ne qira vano iri pela go, mana tina manava ne qira ria i pela go nanao qira mana too ria go. Tina goso nae goza doka so ṉalu osiqira basoero ne tarina zazu ne vatovato totoloṉo ro.

²¹Mana basoe nae to, basoero na kolabana pua ne tarina taru ze ruqe ria.”

²²Taramuzina nae, basoero ne iri valame ne Jesu kaki valeke kodo i makure seko, tanego manuru sakata i siqane ia. Jesu iva velake valeke ne, go iara malumua go seko mana iara mimia go.

²³Osiqira basoero ne iri nureke ne pata i zazu nego Jesu. Iri go, “Kadego valeke dena to i Tuna go batu lavata Davita.”

²⁴Do ṉalu kakiaro vano Parisio iri gata tarama dena, iri go de, “Batu Belzebul tane i teke ne go ia karaputa, go i kakale ze go manuru sakata ne.”

²⁵Jesu i rove pata iri nanao go vano Parisio, iago i sine ne qira, “Ṉalu basoero na kaki vudu iri tavota mana varitara napu so tanuqira, vudu nae tina za sakata to. Mana ṉalu kaki tatamana ro ba basoero na kaki komala iri varitara napu so tanuqira, ria tariniki ko velaka kaega go.

²⁶Igere napua so, ṉalu basoero iri koego vari miasoka ia Satana iri tavota mana varitara napu tanuqira, gogo ne, iri vasadake iri tavota bana to, mana vari miasoka ia tiniki loda kaega go.

²⁷Ramu qamu go, era qa va zazua karaputa ia Satana, go qa kakale vakuziki ne qira manuru sakata ro. Ṉalu go i ogoto, ava karaputana tane iri vazazua go basoero ramu, go iri kakale ze go manuru sakata ro na? Iago basoero napu ramu so iri vasadake sekoro qamu sine go, i poqe.

²⁸Ba era karaputa ia Spirit ia God tane qa kakale qirae go manuru sakata ro ne. Ianae i vasadake Too ikoego vari miasoka ia God i lama bana ne qamu to.

²⁹Ṉalu ka basoe i soko keba za na pade ia kaki valeke karaputa go mara za siko igogo ne, kenaqana tina qolo taru ne tekere valeke karaputa nae, goto nae iara mazala go siko na pataro i koe go loborona pade nae.

³⁰Ka basoe iki luluava kaega era, basoe nae ki soko ava kaega. Mana ka basoe iki tavisi nava kaega, go tina pala qira me basoero ne de ikoego God, basoe nae i kakale qira basoero ne go tariniki lamae kaega de ikoego God.

³¹Iago masine ne qamu pata i ogoto, osina vasakata pata mana seko sakata ro iri sine go basoero ne, God i mazala nanao ule ne qira, do basoe i seko sakata go Spirit tabo, God tiniki nanao ule ne kaega.

³²Mana ka basoe i seko sakata va era Tuna basoe, God i mazala nanao ule ne ia. Do ka basoe i seko sakate zazu ia Spirit tabo, God iki mazala to kaega nanao ule ne ia, pasi ninidena ba ṉalu iara ko mego.”

³³Gonae Jesu i sine ne qira, “Moki i too velaka go tokamana, tina ure velaka, ba moki ki too velaka go kaega, tiniki ure velaka kaega. Tanego osina moki ne qata mazala mia rove ze na ure na ro.

³⁴Qamu gere dole ne, i makuru qamu to sine na kaki pata velaka tanego nanao qamu i purake nanao sakata. Pataro i purake go puṉuna basoe tane i vasadake go ṉalu i seko go.

³⁵Basoe velaka i ko ne nanao velaka, izazu ne vatovato velaka go. Do basoe sakata i ko ne nanao sakata mana i zazu ne so vatovato sakata go.

³⁶Iago masine ne qamu, musaqara ṉalu God tina zazu nego varitanae ia, de koe basoero na kolabana pua ne, ria tarina vasadaka ze tarakenaqana God talukasa seko volovolomo ro iri sine go.

³⁷Tanego sauna to sekoro qamu vasadake go, God tina vazazu ze go vivine ia, avigo qamu totoloṉo ba qamu kebu go.”

³⁸Gonae kakia ria vano vari vatatana na Tamana mana vano Parisio go iri seko me, iri go, “Valeke vari vatatana remu qi lete soko miana, ono zazu ne kaki zazu mazala.”

³⁹Do Jesu i vataule ne qira, “Ke! Basoero na ninidena, too ramu i sakata, qamuki osaka ne kaega God, go qamu soko go miana zazu mazala ro. Tuniki vasadaka ne qamu kaega, do ke qamu mazala go miana, iato ke ia Zona.

⁴⁰Loborona kapisa musaqara mana kuse Zona i koe loborona sopana kameka iṉana lavata, tina gere napu ava era Tuna basoe, tuna koe loborona pua kapisa musaqara mana kuse go.

⁴¹Ṉalu musaqara God tina zazu ne vivine ia, basoero na Ninive tarina sine vasadake kebu ria basoero na ninidena, tanego basoero na Ninive iri vana ne too mana vatovato sakata ro ria ṉalu Zona i tamana e de iri koego. Do masine ne qamu i kogo dena kaki pata i lete sivala ne Zona.

⁴²Ṉalu musaqara God tina zazu nego vivine ia, qole batu na Seba tina degere mana sine vasadake ramu basoero na ninidena qamu lete kebu, tanego qole batu na Seba i lete ko valaqalaqa, do ia i lama mana igata seko tarove ro ia batu lavata Solomon, do masine ne qamu i kogo dena kaki pata i lete lavata sivala ne Solomon.”

⁴³Gonae Jesu i sine ne qira, “Ṉalu manuru sakata ne i kasi ne kaki basoe, ia igo za de kadala ro i taqia kade tina koego. Ṉalu iki soba kaega,

⁴⁴tina vane de tanuna, ‘Era ma ule za pade era.’ Iago, i ule mana mia pade ne i kakaere, i dalo, mana osina pata i ko totoloṉo lupo.

⁴⁵Gonae i za lulu napu qira me kavitu manuru sakata sivala ro mana tanuna to go ne iri lama koe basoe nae. Pasi nae basoe nae i lete sakata sivala, sivala ne de igo bana go. Iago, iadena to pata tina doka qamu go ramu basoero na ṉalu ninidena tanego i lete sakata go too mana vatovato ramu.”

⁴⁶Ṉalu Jesu iara seko tabe qira basoero ne, sinana, mana kaena ro Jesu iri lama doka, iri degere meso peka ne mana iri lete soko seko tabe na ia.

⁴⁷Gonae kaki valeke i vane de Jesu, “Sinamu, mana kaemuro iri soko seko tabe go aro.”

⁴⁸Do Jesu i vane dena valeke ne, “Akena to i kanae go, ba kaequ ro na?”

⁴⁹Gonae i susuku qira disipoloro ia mana igo de, “Mia! Ria to de kanae ro, mana kaequ ro go!

⁵⁰Ka basoe i zazu ne pata i soko go Mamae ikoego rani ne, basoe nae to i kanae, i vavaniqu, mana i kaequ go era.”