Read Varisi Matiu 13 Bible Online

Matiu 13 - Varisi bible

Matiu 13

¹Kameka musaqara na so nae Jesu i kasi ne pade ne mana iza kolokue rikisina na masi pipika mana i vatatana qira basoero ne.

²Basoero iri za qoqoṉo ego de ikoego ia iri lete topu sakata, iago i keba za loborona kaki kameka koluka iza kolukue, mana basoero ne iri degere meso rikisina masi ne.

³Gonae Jesu iva zazua seko vapadapada i vatatana qirae go, ia igo, “Kameka basoe i za go mara za leba pata lebaleba ia igo

⁴ṉalu ia i za repene go paturu ro ia loborona barue ne, kakiaro iri soru e zuka ne, gonae pale ro iri lama mana ge lupo go.

⁵Kakiaro iri sorue pua i ipaka me polana, paturu ro iri podo katikili me tanego pua ne iki lete zunu za kaega.

⁶Iago ṉalu saṉa i lete uraka me, iri katikili so le, tanego rabutuna ro iriki lete zunu za kaega.

⁷Kakiaro paturu iri soru e de ikoego qolo paqo ro, iago ṉalu qolo paqo ro ne iri podo me iri pipisi vale lupo qira so.

⁸Do kakiaro paturu iri sorue pua velaka, iri podo velaka mana ure velaka go, kakiaro i kameka vasa urena, kakiaro onomoṉaulu mana kakia ro pisaṉaulu go.”

⁹Mana Jesu i sine napua igo, “Gata ṉalu go iko qeqele qamu.”

¹⁰Gonae disipoloro ia iri lama tana ne Jesu, “Avigo tane qo vazazua go seko vapadapada ṉalu qo seko e go de iri koego basoero ne?”

¹¹Jesu i vataule ne qira, “De qamu koego ramu God i papaqa bana nanao qamu go tamuna rove pata pipika na Too ikoego vari miasoka ia God, ba de iri koego basoero nae God iki papaqa ne qira kaega.

¹²Tanego ka basoe inanao lupase seko ro era, ia tina rove vatopu napua mana rove velake go. Do basoe iki rove to kaega, basoe nae tina vana neto desuka tarove i ko nego.

¹³Iato go era qa vazazua go seko vapadapada ṉalu qa seko ego de iri koego, tanego iri reṉa, do iriki mia kaega, iri gatagata do iri gata soba kaega mana iriki nanao rove kaega go.

¹⁴Iago seko ia God i vagoe ze propeta Isaia i karo bana go i lama voto qira i sine go, ‘Basoero dena patavolomo tarina gatagata topuna ṉalu, do tariniki nanao rove so kaega, patavolomo tarina poro reṉa, do tariniki mia rove kaega kapata,

¹⁵tanego basoero nae i kokoqu bana nanao qira, mana iri olia qeqele qira mana va kodo mataqira go. Ṉalu tariki gogo kaega, ria tara mimia ne mataqira mana gata pata ne to qeqele qira, mana nanao qira tara ria nanao rove ne to go, mana tabali me de qa koego era mana era qa mazala, va velaka ne qira go.’

¹⁶Do ramu qamu lete maṉana, tanego mataqamu qamu mia zeto, mana qeqele qamu, qamu gata zeto go.

¹⁷Masine ne qamu pata ogoto, topu propetaro mana vano iri lulua go too velaka ia God iri lete soko mia na pata qamu mia go ramu ninidena, do iriki mia kaega, mana gata na pataro qamu gata go ramu ninidena do iri ki gata so kaega.”

¹⁸Gonae Jesu i sine ne qira, “Iago ramu muna gata talupasana seko vapadapada na valeke i leleba go.

¹⁹Ria iri gata go tarama na Too ikoego vari miasoka ia God, do iriki nanao rove kaega, iri gere to paturu i soru ego zuka ne, i lama Satana mana i lama pala vakuziki ne ze puṉuqira.

²⁰Paturu i soru ego pua i koe ipaka polana me, igere to basoero iri kula katikili ne ṉalu iri gata go seko ia God.

²¹Do iki zunu za kaega loborona nanao qira, iago iki ko vaumata kaega. Ṉalu kaki pata makuru i doka qira, mana ṉalu kakiaro basoero iri vasasakata ne qira sauna Tarama Velaka ne, iri katikili so nanao vana ne na seko ia Batu ne.

²²Paturu ro iri soru ego de i podo ego qolo paqo ro ne, i gere to basoero iri gata go seko ia God, do iri nanao vokara ne pata vavagado na ro pua dena, mana kero ne pataro i vakula qira go. Iago seko ia Batu ne iki ure kaega de iri koego.

²³Mana paturu ro iri soru ego pua velaka i gere qira to ria iri gata go Tarama Velaka ia God mana iri nanao rove go, iri ure kakiaro kameka vasa, kakia ro onomoṉaulu mana kakiaro pisaṉaulu go.”

²⁴Jesu i sine napu ne qira kakia seko vapadapada, “Too ikoego vari miasoka ia God i gere ṉalu kaki valeke i leba ze paturu velaka na vuiti loborona barue ia.

²⁵Kameka kuse, ṉalu osiqira basoero ne iri kamuku, i lama kaki basoe iru vari kanae bana, iago i lama leba ze paturu na seuseu loboro qira vuiti ro ne, mana i zaza go.

²⁶Ṉalu paturu velaka ne iri podo me mana tupi ure go, seuseu sakataro ne do, iri podo palu napu me qira go.

²⁷Vano zazu ro ia batu na barue ne, iri lama mana sine ne ia, ‘Batu, paturu velaka so qo leba zego barue aro, do adetepa tane i reqe mego seuseu sakata ro na?’

²⁸Valeke batu na barui ne i vataule igo, ‘Basoe qaru vari kanae tane i zazu ne go pata igogo ne.’ Vano zazu ne iri go napu de, ‘Ṉalu go to vamao go aro remu qi mazala so rapusu vakuziki ne seuseu sakata ro ne.’

²⁹‘Kaega,’ igo valeke batu na barue ne, ‘tanego ṉalu qamu rapusu vakuziki ne seuseu sakata ne, tamuna mazala so rapusu vakuziki napu ne na vuiti ne go.

³⁰Taru qiru mara riru podo so, go na doka so ṉalu tina ṉara go ure na vuiti ne. Ṉalu nae to tuna ara sine ne qira go vano zazu era, tarina rapusu kenaqe seuseu sakata ne mana kameka poke ne qira mana subi zaqe nako ne, taramuzina ṉara vae vuiti ne mana babana ze pade tarutaru pata gege era go.’ ”

³¹Gonae Jesu i sine napu ne qira kakia seko vapadapada, “Too ikoego vari miasoka ia God i gere kaki valeke i pala paturu na mastad mana i leba ze barue ia.

³²Paturu dena iato i suka sivala ne qira osiqira paturu ro, do ṉalu i podo me iato i lavata sivala ne qira pata lebaleba ro ne. I moki lavata mana pale ro iri lama zazu ze kubasa ro ria paqapaqara na ro ne go.”

³³Jesu i sine napua kaki seko vapadapada, “Too ikoego vari miasoka ia God, i gere kaki qole i pala desuka isti mana i robe palu ze kameka bage palava, iki umata kaega i keba mana puraka me palava ne.”

³⁴Osina pata i sine ne qira go basoero ne, Jesu i vazazua so seko vapadapada, kaega ka ṉalu i sine kaki pata tiniki sine ze kaega seko vapadapada.

³⁵I zazu ne ia dena, go seko ia God i vagoe ze kakia propeta ne go tina lama ogoto go, i sine go. “Tuna vazazua seko vapadapada ṉalu tuna seko tabe qira basoero ne. Tuna sine ne qira pataro iki rove go kaega ka basoe, tupi me ṉalu God i vazaria go kolabana pua ne.”

³⁶Gonae Jesu i kasi ne qira basoero ne, mana i keba ule za loborona pade ne, disipoloro ia iri lama go de, “Sine ne qemu remu talupasana seko vapadapada na seuseu sakata na barue ne.”

³⁷Jesu i vataule ne qira igo, “Basoe i leba go paturu velaka ne iato era Tuna basoe.

³⁸Barue ne iato kolabana pua ne, paturu velaka ne ria to basoero na Too ikoego vari miasoka ia God. Seuseu sakata ne ria to basoero iri lulua go Satana.

³⁹Mana basoe vari kanae i leba go seuseu sakata ne, Satana. Ṉalu vuiti i ṉara go, iato ṉalu musaqara muzimuzi, mana vano tarina vaego urena vuiti ne ria to aqeloro ne.

⁴⁰De go tarina pala go seuseu sakata mana subi zaqe nako ne go, ianae tina gere napua so pata tina sadaka go musaqara muzimuzi.

⁴¹Era Tuna basoe tuna turine qira aqelo ro era tarina za pala vakuziki ne osiqira vano iri va soru qirae vasakata pata kero ne basoero, mana basoero i sakata go too ria. Tarina pala vakuziki ne qirae basoero dena, de ikoego Too vari miasoka ia God.

⁴²Mana tarina vanaqe qira qe nako i lete ila sakata go, de go tarina za dae mana vari kizakiza ne saqe qira go.

⁴³Do basoero iri totoloṉe tarakenaqa na God, tarina damara gere saṉa ne loborona too voru de koego vari miasoka ia God. Ka basoe i zari go qeqelena mara gata seko ro era dena!”

⁴⁴Gonae Jesu i sine napua, “Too ikoego vari miasoka ia God i gere, kaki valeke i za soba ze kaki pata vavagado loborona kaki takoboro pua, i sapu vaule zaqe pua ne, mana i lete kula, gonae i za volivoli lupo ne osina pata i toṉove go i ule mana za volia to takoboro pua igogo ne.

⁴⁵Too ikoego vari miasoka ia God, i gere kaki valeke i taqia kuete ro.

⁴⁶Ṉalu i soba ke i lete velaka sivala ne osina ro kuete i mia go, ia i ule mana i za volivoli lupo ne osina pataro i toṉove go, mana i za volia kuete igogo ne.”

⁴⁷I gere napua so, “Too ikoego vari miasoka ia God, igere na so ṉalu vano tatava iri koku ze gabe ria masi ne gonae topu soso ado na iṉana i lama gona gabe ne.

⁴⁸Ṉalu gabe ne i puraka iri toqo za qe rikisi ne mana iri koloku mana vota qira iṉana ro ne, ke velaka ro ne iri roku za qe qalegi ne, do kero iki tora go kaega kapata iri vanaqe.

⁴⁹Tina gere to vapadapada dena ṉalu musaqara muzimuzi ne, ria aqelo ro ia God tarina lama vota vakuziki ne qira basoero sakata de iri koego basoero velaka ro ne,

⁵⁰mana tarina vana qira qe nako ilete ila sakata go, de go tanna dae mana vari kizakiza ne saqe qira go.”

⁵¹Gonae Jesu i tana ne qira, “Avigo qamu nanao rove to talupasa na seko ro qa sine go era ba?” Iri vataule, “Ove to”.

⁵²Iago Jesu igo, “Osiqira vano vari vatatana na Tamana iri lulua go de go vari vatatana na Too ikoego vari miasoka ia God, i gere ṉalu batu na kaki pade i pala vasiporo ze pade ia pata velaka ro mana kakiaro pata voru, mana kakiaro pata bana go.”

⁵³Ṉalu Jesu i valupo sine ne qira seko vapadapada ro dena i kasi ne dego,

⁵⁴mana i gado ule za komala ia. I vari vatatana e Pade Lotu, mana ria iri gata go ia iri nureke, mana iri varitanatana, “Adepa tane i pala ze go tarove mana karaputa i vazazu ze go zazu vari va nureke ro ia dena?

⁵⁵Pata ogoto valeke dena i sale ia so valeka kapeda ne, sinana to Maria, mana iri tamatamakena to ria Jemisi, Josepo, Saimon mana Jiudas go.

⁵⁶Mana vavanina ro iri ko napue so komala dena go. Iago adepa tane i pala ze go osina pataro dena na?”

⁵⁷Iago iri sila ia. Do Jesu i sine ne qira igo, “Propeta ne, basoero ne iri lete vamazale, do basoero na komala ia, mana vanovano ro ia propeta ne iriki vamazale kaega ia.”

⁵⁸Iago, Jesu iki zazu ne ze kaega zazu vari va poloso komala ia nae, tanego basoero ne iriki vaogote kaega ia.