Read Varisi Matiu 17 Bible Online

Matiu 17 - Varisi bible

Matiu 17

¹Taramuzina kaonomo musaqara Jesu i lulu qira Pita, tamakena Jemisi mana Jon mana iri popoka za kaki kubolo zakazaka, de go iri za ko vamikie.

²Ṉalu ria tarapisa iri mia zaqe ia, tokamana Jesu i kavala, tarakenaqana i damara gere saṉa ne mana poga ia i lete sivala neto pata i kakasa go.

³Gonae kapisa disipoloro ne iri miasoba Mosese mana Ilaiza iru seko tabe Jesu.

⁴Iago, Pita i seko me mana i sine ne Jesu, “Batu! I lete velaka sivala tane qata koego dena, ṉalu to soko go aro, era ma zazu ne kapisa pade kavakava kameka ke aro, kameka ke ia Mosese mana kameka ke ia Ilaiza go.”

⁵Torana so iara sekoseko go Pita, i lama kameka toba i ilete damara go, mana kameka ovaṉa i reqe me loborona toba ne igo de, “Iato dena kameka Sale valeke era, qalete mamaligara ne mana qa kula ne go, muna gata ia!”

⁶Ṉalu kapisa disipolo ro ne iri gata ovaṉa dena, iri lete sareki mana iri rabavakapate pua ne.

⁷Do Jesu i lamae de iri koego i siba qira mana i sine ne qira, “Degere, muniki sareki!”

⁸Ṉalu iri reṉa qe, iriki mia kaega ka basoe, do tanuna so Jesu iri mia go.

⁹Goto nae iri qoqoro ule me tepa kubolo ne, mana Jesu i sine vamoqere ne qira, igo, “Muniki sine ne ka basoe sauna pata qamu mia go, go na doka so ṉalu era Tuna basoe tuna too ule napu me tepa le ne.”

¹⁰Ria tarapisa disipolo ne iri tana ne Jesu, “Avigo tane ria vano vari vatatana na Tamana ne iri go Ilaiza tina za lama kenaqa go?”

¹¹Jesu i vataule igo, “Pata ogoto, Ilaiza i lama kenaqa go, go tina vatotoloṉe osina pataro.

¹²Do ma sine ne qamu, Ilaiza i lama bana to, do basoero ne iriki mia rove kaega ia, mana iri vasasakata ne ia, lulua so soko ria tanuqira. Mana tina gere napua so de tarina vane ava era Tuna basoe go.”

¹³Goto nae, kapisa disipoloro ne iri nanao rove, Jesu i seko ne Jon na bapitema.

¹⁴Ṉalu iri za ule me de iri koego basoero ne, kaki kameka valeke ilama e de ikoego Jesu, i koluku tutuṉu mana i vane de Jesu,

¹⁵“Batu! Nanao ule ne sale era! Tanego mokoso i pala go ne, i vasoru tarua mana iva tapudoke go. Mokoso ne i lete vasakate ia, mana topu na ṉalu i va soru zaqe ia nako ne, mana loborona besi go.

¹⁶Qa lulu me era de iri koego ria disipoloro aro, do i makuru qira tarina va velake go ia.”

¹⁷Jesu i vataule ne ia, “Ke! Ramu basoero na ninidena, too ramu ilete sakata sivala, mana qamuki vaogote kaega God go. Ava tina goto ka lete umata na ṉalu tuna ko tavisi qamu go? Ava tina goto umata na riqo tuna vae ne qamu go? Lulu valame ze dena sale valeke nae.”

¹⁸Gonae Jesu i seko lavate manuru sakata ne, gonae i kasi ne sale valeke ne, mana torana so nae sale ne i velaka to.

¹⁹Taramuzina nae, ria disipoloro ia iri lama vamiki mana iri tana ne ia, “Avigo tane i makuru qemu go kakale na manuru sakata ne?”

²⁰Jesu i vataule ne qira, “Tanego vaogoto ramu iara lete suka so. Masine ne qamu pata ogoto, ṉalu vaogoto ramu tara gere lavata na paturu na moki mastad, qamu mazala so sine ne kubolo dena, ‘Kasi ne dena mana za koe dona go kubolo ne tina ziki so, mana qamu mazala so zazu ne na topu na pata go.”

²²Ṉalu osiqira disipoloro iri lama kameka ko lupoe Qalili, Jesu i sine ne qira, “Era Tuna basoe i garogaro tarina pala vazao ve de iri koego basoero ne,

²³go tarina vae vale ava, do taramuzina kapisa musaqara era tuna too ule napu me tepa le ne.” Pasi nae disipoloro ne iri lete maqata sakata.

²⁴Ṉalu Jesu mana disipoloro ia iri dokae Kapanaum, ria vano iri palapala takisi ne go Pade Lotu ne, iri lama tana ne Pita, iri go, “Avigo valeke vari vatatana ramu i volia tane takisi na Pade lotu ne?”

²⁵Pita i vataule ne qira, “Ove to, i volia.” Ṉalu Pita i dokae pade ne, Jesu i tana kenaqa ne Pita, igo, “Saimon, avana to nanao aro? Ria batu lavata na ro vudu pua dena akena tane iri mazala pala qirae takisi, basoero kakavata ba basoero na vudu ria?”

²⁶“Basoero kakavata,” igo Pita. “Velaka sivala,” igo Jesu, “Iato go sale ro ia batu lavata ne iriki volia kaega takisi.

²⁷Do ita qatiki soko kaega basoero tarina muna ne qita. Iago ono zae masi pipika ne, ono za tatava, iṉana tono toqo kenaqe go, ono papaqa saqe na mana tono soba ze kesa loborona. Ono pala kesa nae mana za voli ze takisi ituru go.”