Read Varisi Matiu 20 Bible Online

Matiu 20 - Varisi bible

Matiu 20

¹Gonae Jesu i sine napua, “Too ikoego vari miasoka ia God, i gere kameka valeke i zaza va sarusaruku, i taqi qira basoero tarina zazu e barue ia mana tina voli qira go.

²Iri varitoqe ne tina voli qirae kameka kesa, kesa dena i torato kameka musaqara zazu, iago i turine qira tarina zazue barue ia.

³Torana kaia koloko ia i za napue de iri vari va volivoli ego, mana i miasoba qira kakiaro basoero iri degere volomo so,

⁴Iago i sine ne qira, ‘Lama muna za zazue barue era. Era tuna voli vatora ze zazu ramul’

⁵Iago iri za zazu to. Gonae torana manoga karua koloko mana kapisa kiloko i zazu ne so kameka pata.

⁶I garogaro to kalima koloko, valeke ne i za napue de iri vari va volivoli ego, mana i mia qira kakiaro valeke ro iri degere so de go. I tana ne qira, ‘Avigo tane qamu ko volomo go so tutukununa musaqara dena?’

⁷Iri vataule iri go, ‘Tanego i kaega soka basoe i sine ne qemu ka zazu ia.’ Gonae valeke ne i sine ne qira, ‘Lama mana za zazue barue era go.’

⁸I raravi to ia, valeke itoṉove go barue ne, i sine ne valeke i kenaqa ne qira go vano zazu ne, ‘Koru qira vano zazu ne mana tekene qira voli qira, tupie ria iri lama muzi mana za lupoe ria iri lama kenaqa go.’

⁹Basoero iri tupi zazu go kalima koloko ne i teke qira voli, kameka kesa kameka basoe.

¹⁰Ria iri lama zazu kenaqa go iri nanao kadego tina lavata bago voli qira iri go, do i voli napu qirae so kameka kesa kameka basoe.

¹¹Iri pala kesa voli qira mana iri seko muma e de ikoego valeke i toṉove go barue ne.

¹²Iri go de, ‘Basoero qo pala muzi qira go ne, iri zazu so kameka aoa, ba remu ne, qi le ne to urakana saṉa ne tutukununa na musaqara ne, iado aro qo voli varitora ne qemu so!’

¹³Do valeke i toṉove go barue ne, i vataule ne kaki kameka ria, ne igo, ‘Vakitaka era, era qaki tatakiu nigo kaega, tanumu so qo toqe bana ne kameka kesa kameka musaqara.

¹⁴Iago pala voli mu nae mana zaza go. I soko era tanuqu tane qa voli vari pada ne qamue go ramu basoe iara lama zazu muzi go.

¹⁵Avigo, qo nanao ikaega nava karaputa de qa vane go kesa ro era? Ba qo qora, tanego qa va velaka ne qira era kero ne basoero ne?’ ”

¹⁶Mana valupo lupo na Jesu igo, “Ria iri muzi go ninidena tarina za kenaqa, mana ria iri kenaqa go ninidena tarinara za muzi go.”

¹⁷Ṉalu Jesu i popoka za Jerusalema, i lulu qira so ria manoga karua disipoloro, mana i sine vamiki ne qira so igo,

¹⁸“Gata, ita qata popoka zato Jerusalema, dego era Tuna basoe tarina vazao ve de iri koego batu ria patere ro mana vano vari vatatana na Tamana. Mana tarina toqene vae vale ava era go,

¹⁹mana tarina vazao ve de iri koego vano iriki Jiu go kaega, go tarina va kari nava, tarina sima va mana paqipaqi ve koluse go, do taramuzina kapisa musaqara era tuna too napu me tepa le.”

²⁰Taramuzina nae, qole ia Zebedi mana karua sale, iri lamae de koe Jesu, gonae qole ne i tudu e tarakenaqana Jesu mana i pene ze ia tavisi.

²¹Iago Jesu i tana ne ia, “Avana tane qo soko go?” Qole ne igo, “Pui nava to aro, go ṉalu aro tono za Batu lavata go, karua sale era dena, kakia mara kolokue tepa mataumu mana kakia tepa gedemu go.”

²²Gonae Jesu i vane de ia, “Pata qamu pene go nae qamuki rove kaega. Avigo, qaburu mazala besi na kapu na vokara qa garogaro go era besi na?” Iru vataule, “Qaru mazala so besi na.”

²³Jesu i sine ne qiru, “Pata ogoto raburu taburu na besi napua so kapu era. Do vine na kaki tina koloku e go tepa matauqu ba tepa gede qu gogo ne, iki era kaega tuna vine go. Mamae so tina teke ne qira de koko igogo ne, de iri koego basoero ivine bana qira tanuna.”

²⁴Ṉalu ria manoga disipoloro ne iri gata seko pene nae, iri muma ne qiru karua tamakena ne.

²⁵Iago Jesu i koru qira osiqira tarina lamae de ikoego, mana i sine ne qira, “Ramu qamu rove bana so, vano iri batu ne qira basoero i ko ne qira karaputa, sivala ne qira basoero ria, mana vano kenakena iri batu ne qira go basoero ne go.

²⁶Do vatovato ra ramu, mara kasi go nae de qamu koego. Ṉalu kakia ramu i soko mara batu igogo ne, ia tina gere valeke zazu ramu

²⁷mana ṉalu kakia ramu i soko kenaqa, ia tina gere basoe seka ramu,

²⁸gere na era Tuna basoe qaki lama ne kaega go basoero tarina zazu nava, do qa lama go tuna basoe zazu ria basoero ne, mana teke too era go tuna voli vaule qirae sauna vasakata pata ro ria.”

²⁹Ṉalu Jesu mana disipoloro ia iri siporo kasi ne komala Jeriko, topu sasakata basoero iri lulu muzi ne qira.

³⁰Gonae karua valeke kodo iru kolokue rikisi na zuka ne iru gata Jesu i lama zuka sivala, iago iru koru me, “Batu! Tuna Davita, nanao ule ne qaru.”

³¹Do basoero ne iri karala pasa qiru mana iri sine ne qiru mara kasi naki. Do iru lete koru va lavata napu, “Batu! Tuna Davita, nanao ule ne qaru.”

³²Gonae Jesu i noto mana i koru qiru, “Avana tane qaburu soko ve era tuna zazu ze de qaburu koego?”

³³Iru vataule, “Batu, qaru soko ono vamimia mataqaru.”

³⁴Iago Jesu i nanao qiru, mana i siba mataqiru, pasi so nae iru mimia to, mana iru lulua iago.