Read Varisi Matiu 21 Bible Online

Matiu 21 - Varisi bible

Matiu 21

¹Ṉalu Jesu mana disipoloro ia iri za garogaroe Jerusalema, iri dokae komala Betipezi, niko garogaro go Kubolo na Olivi. Gonae Jesu i turi ne qiru karua disipolo ia tiruna za kenaqa,

²mana i sine na qiru, “Za komala qaburu mia zaqe dona, mana ṉalu taburu na za doka go ne, taburuna mia kameka donki iri qolo taru ne, mana tunana i ko tavise go, buru na lupase mana lulu me dena go.

³Mana ṉalu kaki basoe i tana ne pata qaburu zazu ne go sine ne ia, ‘Batu ne tane i soko go’, mana valeke ne tina vamao ne qaburu donki ia.”

⁴Ia dena i sadaka go, go seko i sine bana go propeta ne tina lama ogoto, igo,

⁵“Sine ne qira basoero na Zaion, Mia, Batu lavata ramu, i garetu ne qamu. I va qoqore tanuna, mana i age so donki, mana donki sale nae to iage mego ia.”

⁶Iago karua disipolo ne iru za mana lulua so pataro i sine ne qiru go Jesu.

⁷Iru lulu valame donki ne mana tunana ne go mana iru zakapa ze poqa riru popoka donki ne, mana Jesu i kolokue popokona go.

⁸Topu ria basoero iri zakapa ze poqa ro ria zuka ne mana kakiaro ria iri puta uguruna ro moki, mana iri zakapa napu ze zuka ne go.

⁹Gonae basoero iri zaza kenaqa ne Jesu mana ria vano iri muzi ne ia gogo ne, iri koru valavata, iri go, “Vazaka Tuna Davita! God vatabo valeke dena, ia i lama ego vitoṉomu aro! Vazaka God ikoe go rani ne!”

¹⁰Ṉalu Jesu i keba za komala lavata Jerusalema, osiqira basoero ne iri teteṉe me mana lama reṉa go, iri lete vari vaiqi go iri tana rosu so, “Akena tane valeke dena?”

¹¹Ria basoero iri lulu mego Jesu iri go, “Valeke dena vitoṉona Jesu, iato propeta i reqe mego Nazaret tepa Qalili.”

¹²Gonae Jesu i keba za loborona Pade Lotu ne, mana i kakale vasiporo qira basoero iri volivoli nego patapataro ro ria mana vano iri volivoli ego de igogo ne go. I tubele vatudu qira tevolo ro ria vano iri sosoka kesa go, mana i tubele vatudu napua pata kolokoloku ria vano iri volivoli nego kurukuru ro go,

¹³mana i sine ne qira, “I karo bana ego Buka tabo ne, God igo, ‘Pade era tarina vitoṉo ze Pade Lotu,’ do ramu qamu vagere ze de ko pipika ria vano sikosiko!”

¹⁴Ṉalu nae vano kodo mana vano i taveqo go makeqira iri zae pade lotu ne mana Jesu i va velaka lupo qira.

¹⁵Batu ria patere ro mana vano vari vatatana na Tamana ro iri mia zazu mazala ro i zazu nego Jesu. Mana iri gata napua salero ne iri koru ego Pade Lotu ne iri go, “Vazaka Tuna Davita!” Iago iri lete muna ne Jesu,

¹⁶mana iri tana ne ia, “Avigo qo gata aro tane pata iri sine salero ne?” Jesu ivataule, “Ove to qa gata, avigo qamuki toere kaega Buka tabo ne? Igo, ‘Aro qo vatatana qirae salero mana sale ro medara go tarina zazu ne go vazaka i lete velaka go.’ ”

¹⁷Gonae Jesu i kasi ne komala lavata nae mana i zae komala Betani, i za kamuku e go.

¹⁸I sarusaruku lolotoro me ia, Jesu i ule napu za komala lavata ne, mana i saqo go.

¹⁹I mia zaqe kameka tokama moki piqi i degere go rikisina zuka ne gonae i za, do i kaega ka urena miki uguruna so ikoego. Iago Jesu i sine ne moki ne, “Aro toniki ara ure to kaega.” Goso nae ia moki piqi ne, i nala lupo uguruna ro mana i le go.

²⁰Ṉalu disipoloro ne iri mia pata idoka go moki ne, iri lete poloso sakata, iago iri tana, “Avigo tane moki piqi dena i le katikili go?”

²¹Jesu gonae i vataule ne qira, “Ma sine ne qamu pataogoto, ṉalu qamu vaogote God, mana i kaega ne qamu nanao ruama go, qamu mazala so zazu ne na pata qa zazu ne ze go era moki piqi dena. Mana iki ianae so kaega, do qamu mazala sine ne kubolo suka dona, ‘Degere mana za vana zigoe tanumu masi ne,’ mana tina mazala so.

²²Ṉalu qamu vaogote God, mana qamu pepene de i koego ia gogone, ia tina mazala so teke ne qamu pata qamu pene go.”

²³Jesu i ule napu me Pade Lotu lavata ne, mana i vatatana qira basoe ro ne, batu ria patere ro mana vano kazigarata ro iri lamae de ikoego Jesu mana iri tana ne, “Ava karaputa na tane qo pala go aro, go qo zazu nego pataro nae? Mana akena tane i teke nigo karaputa igogo ne?”

²⁴Jesu i vataule ne qira, “Era do matana ne qamu kameka tana dena, ṉalu tamuna biru meto ramu tana era, ṉara sine ne qamu ava karaputa tane qa pala go, go qa zazu nego pataro igogo ne.

²⁵Akena tane i teke nego karaputa Jon, go ni bapitema qira basoero ne? God, ba, basoe?” Iri vari vatanatana tanuqira, “Avana tatana sine go? Ṉalu qata go ‘God,’ ia tina go, ‘Avigo qamuki vaogote go kaega Jon?’

²⁶Do ṉalu qata go ‘basoe,’ ita tatana miasoka, tane basoero ne iri vaogote Jon i kaki propeta.”

²⁷Iago iri vataule ne Jesu, “Remu qimuki rove kaega.” Jesu gonae i sine ne qira, “Era do tuniki sine napu ne qamu kaega, ava karaputa na tane qa pala go, go qa zazu nego pataro igogo ne.”

²⁸Jesu i sine ne qira, “Avana to qamu nanao go? Iko kameka valeke i kone karua sale valeke. I sine ne ke lavata ne, ‘Sale era, za mana za zazue barue ne nini dena.’

²⁹Sale valeke ne i vataule, ‘Qa kasiqu,’ do taramuzina i kavale nanao na mana i za zazu e barue ne.

³⁰Gonae i sine napu ne varuana sale ia seko i sine bana ne go ke kenaqa ne, i vataule, ‘Ove naza igo’, do iki za kaega.

³¹Iago, ade ke riru tamakena dena, iru zazu nego pata i soko go tamaqiru?” Iri vataule, “Ke lavata ne,” iri go. Jesu i sine ne qira, “Masine ne qamu pata ogoto, vano palapala takisi mana qolero iri volivoli ne go tokamaqira sauna too sakata ro, tarina za kenaqa ne qamue ramu de ikoego vari miasoka ia God.

³²Tanego ramu qamuki vaogote kaega Jon i vari va bapitema go, ṉalu ia i lama vasadaka ne qamu go vatovato totoloṉo tamuna lulua go. Do vano palapala takisi mana qolero iri volivoli ne tokamaqira sauna too sakata ro, iri vaogote ia. Do ramu qamu mia pataro dena, do qamuki kavale so kaega nanao qamu, go tamuna vaogote ia.”

³³Jesu igo, “Gata napua varuana seko vapadapada dena, Iko kameka valeke i leba barue vino ia, i zazu bara e rikisina ne, mana i sola bolu go tina puqo ze vino ia, mana i zazu ne pade sadere iago. Goto nae ia, i va vamao ne qira kakiaro basoero tarina vazazua barue vino ia ne, gonae valeke ne i kasi ne komala mana za koe tekere de kakavata go.

³⁴I doka to ṉalu tarina vae go urena vino ne, valeke ne i turi vazao qira vano zazu ia de iri koego vano iri vazazua go barue ne, go tarina za pala todo na.

³⁵Do vano iri vazazua go barue ne, iri pala qira seka ro ne, kakia iri vae ze moki, kakia iri vae vale mana kakia iri vana ze ipaka go.

³⁶Taramuzina nae valeke ne, i vazao napu qira topu ria vano zazu ia sivala ne qira ria iri za kenaqa go, do vano iri vazazua go barue ne, iri vagere napu qirae so, de iri vane qira go ke kenaqa ro ne.

³⁷Valupolupo valeke ne i turi neto sale ia igo, ‘Kadego tarina mia vamazale sale era!’

³⁸Do ṉalu vano iri vazazua go barue ne, iri miasoba zaqe sale ia valeke ne, iri vari sine ne tanuqira, ‘Iato nae sale ogoto ia valeke i toṉove go barue ne, aria mata vae vale ia, go mata toṉove patapata ro ia ne!’

³⁹Iago iri toqo raqase ia, iri va siporo kasi ne ze ia barue vino ne mana iri za vae vale go.”

⁴⁰Gonae, Jesu i tana ne qira, “Ṉalu valeke i toṉove go barue vino ne, tina za gado ule mego, ava tina vane qira to basoero iri vazazua go barue ne?”

⁴¹Ria iri vataule, “Tina lete vasasakata qira to basoero nae mana tina vae vale qira go. Mana tina vamao napu ne qira basoero kakavata tarina vazazua go barue ia ne, ria tarina teke ne ia todo na, ṉalu tarina vaego urena vino ne.”

⁴²Jesu i sine ne qira, “Avigo qamuki toere so kaega pata i sine go Buka tabo ne? ‘Ipaka iriki soko go kaega vano zazu pade ne, iato i ipaka mazala sivala go. Pata dena to i zazu ne God, mana i lete mimia velake mata qita ita go.’

⁴³Iago ma sine ne qamu, Too ikoego vari miasoka ia God, tarina pala vakuziki ne qamue, mana teke ne qira basoero kakavata go tarina mazala teke zaqe God pata i soko go.”

⁴⁴

⁴⁵Ṉalu batu ro ria patere ro mana vano Jiu iri gata seko vapadapada ia Jesu, iri rove i vapala qirae.

⁴⁶Iago iri pada ne pala na ia. Do iri sareki ne qira basoero ne, tanego basoero ne iri vaogote Jesu i kaki propeta.