Read Varisi Matiu 23 Bible Online

Matiu 23 - Varisi bible

Matiu 23

¹Gonae Jesu i sine ne qira basoero ne mana disipoloro ia, mana igo,

²“Vano vari vatatana na Tamana mana vano Parisio, i ko ne qira karaputa sauna sine vasadake na talupasana Tamana ro ia Mosese.

³Iago osina pata iri sine go ria, muna vaogote mana lulua go. Do too mana vatovato ria muniki lulua. Iri vari vatatana ne topu na tamana, do tanuqira iriki lulua so kaega.

⁴I gere ṉalu iri taru ze avarana basoe topuna pata maqata go na vagore go, do tanuqira iriki kaega vagoro tavisi na pata maqata nae.

⁵Iri zazu ne topu pata go basoero ne tarina mia qirae go, pata i qolo ego Tamanaro iri qolo ze go tokama qira iri lete valavate. Mana qolo i idoke go tumutumuna roku ro ria, i lete lavata go. Iri zazu ne iadena go tanuqira iri lete mamaligara ne God mara vane qira basoero iri go.

⁶Ṉalu na kelo mana ṉalu na lotu gogo ne, iri soko so kolokue na vesu vela velaka ro.

⁷Ṉalu iri zae go loborona de iri vari va volivoli ego, iri soko basoero mara vamazala qira, tarina koru qirae vano vari vatatana.

⁸Do ramu muniki vamao ne qira basoero ne, tarina koru qamue vano vari vatatana. Kameka basoe so i valeke vari vatatana ramu, mana ramu qamu tamakenaro so go.

⁹Muniki koru ze kaki basoe na vudu pua dena, tamaqamu, kameka so basoe i Tamaqamu go, iato ikoego rani ne.

¹⁰Mana basoe ne mara kasi koru qamue batu tanego kameka so basoe i Batu go, iato era to Mesia,

¹¹ia i lete lavata sivala e de qamu koego, mara gere valeke zazu ramu.

¹²Ka basoe iva zakazaka go tanuna, God tinara vaqoqore ia, do ka basoe i vaqoqore go tanuna, God tinara vazakazaka ia.”

¹³Jesu igo napu dena, “Ramu vano vari vatatana na Tamana mana ramu vano Parisio, muna miasoka! Qamu vano poqepoqe, tanego ramu to qamu midiki ne qira go basoero ne keba zana Too ikoego vari miasoka ia God. Ramu tanuqamu do qamuki nanao bana so kaega keba zana, mana qamu midiki ne qira basoero iri pada ne go vele keba zana go!

¹⁵Ramu vano vari vatatana na Tamana mana vano Parisio, muna miasoka! Qamu vano poqepoqe, qamu goe masi mana piqata kava e sasaniqa go mamu soba ka basoe i soko go mara basoe Jiu qamu go. Mana ṉalu basoe nae i lama basoe Jiu, qamu lete vatora zeto ia zae na nako ne gere qamu so ramu, mana tina lete sakata sivala ne qamu ramu.

¹⁶Ramu qamu kenaqa ne qira go basoero ne, muna miasoka! Qamu lete kodo, tanego qamu vatatana qirae basoero ne, qamu go, ‘Ṉalu kaki basoe i vanadua nanao na mana i odo odo e Pade Lotu, i pata volomo so qamu go, do ṉalu i vanadua nanao na mana i odo odo ne qolu i koego Pade Lotu, ianae to niki ara vae go basoe i zazu ne go odoodo ia,’ qamu go.

¹⁷Qamu vano bulaṉoe! Adeke tane i lete mazala go, qolu ba Pade Lotu go i va tabo go qolu ne?

¹⁸Qamu vari vatatana napu ne, ‘Ṉalu kaki basoe i vanadua nanao na, mana i odo odo ne sara ipaka ne, i patavolomo so qamu go. Do ṉalu i vanadua nanao na mana i odo odo ne sosovolomo ro ikoego popoka sara ipaka, ianae to niki ara vaego basoe i zazu ne go odoodo ia,’ qamu go.

¹⁹Qamu vano bulaṉoe! Adeke tane i lete mazala go, sosovolomo ne, ba sara ipaka i vatabo go sosovolomo ne?

²⁰Iago, ka basoe i vanadua nanao na mana i odo odo ne sara ipaka ne, i gere napua so i odo odo napu neso sosovolomo ro ikoego sara ipaka ne,

²¹mana ṉalu ka basoe i vanadua nanaona mana i odo odo ne pade lotu ne, i gere napua so i odo odo ne Pade Lotu ne mana, vitoṉona God ikoego loborona ne go.

²²Mana ṉalu ka basoe i vanadua nanaona mana i odo odo ne rani ne i gere napua so i odo odo ne de ikoego God mana i odo odo ne God go.

²³Ramu vano vari vatatana na Tamana mana vano Parisio, muna miasoka, qamu vano poqepoqe! Qamu teke zaqe God osina vamanoga na, pata suka ro i gagaemana velake go patagege ne, qamu pala zego barue ro ramu. Do qamuki vaogote so kaega vari vatatana ia Tamana ro, gere na varitara ne pata ni ogoto, varinanao mana vatovato velaka. Pata suka ro dena to tamuna zazu kenaqa ne, do muniki nanao kasupe ne pataro lavata go.

²⁴Ramu qamu kenaqa ne qira basoero ne, qamu lete kodo, qamu kima vakuziki ne pata babauku suka ro ikoego loborona dao ramu, do kamolo lavata ne, qamu kalakunu neso.

²⁵Ramu vano vari vatatana mana ramu vano Parisio, muna miasoka! Qamu vano poqepoqe, qamu va dalo kakamuna kapu mana ebata ro ramu, do loborona ne i purake poṉo, ianae i gere to too ramu tanego qamu vaqalo qira basoero ne mana qamu soko pala na topuna pata sauna tanuqamu go.

²⁶Ramu vano Parisio qamu lete kodo sakata, vadalo kenaqe loborona kapu ne, go kakamuna kapu ne, do tina dalo napu go.

²⁷Ramu vano vari vatatana na Tamana mana vano Parisio, muna miasoka, qamu vano poqepoqe! Qamu gere kukubo iri peda va kakase go, i mia velavelaka go kakamuna, do loborona i purake uri mana tokama noli na basoe i le go ikoego loborona bolu ne.

²⁸I gere napua so de qamu gogo ramu, tanego pataro qamu zazu ne, i mia velaka qira to basoero ne, do loborona nanao qamu i purake de go poqepoqe mana vasakata pata go.”

²⁹Jesu igo napu dena, “Ramu vano vari vatatana na Tamana mana vano Parisio, muna miasoka! Qamu vano poqepoqe, qamu zazu va velavelake kukubo qira propeta ro mana qamu malemale kukubo qira basoero i velaka go too ria,

³⁰mana qamu go ṉalu tamu ko tavisi go torana ko iri vaego vano ṉalu bana ro ramu qamu go, tamuki mazala kaega tavisi gere qira ria, iri vae vale qira go propeta ro ne.

³¹Iago ramu qamu lete vasadake, qamu sinaqe bana ria vano iri vae vale qira go propeta ro ne.

³²Iago, zazu soma ne mana valupo pata iri zazu bana mego vanovano bana ro ramu!

³³Qamu gere dole ne, tuna ro dole pani! Avigo? Tamuna paqa nego ramu kimata ia God i vanama ne qamue go nako ne?

³⁴Masine ne qamu, tuna turine qamu me kakiaro propeta, vano tarove mana vano vari vatatana go, do kakiaro ria tamuna vae vale qira, mana kakiaro tamuna paqipaqi qirae koluse, kakiaro tamuna sima qirae loborona pade pepeu mana Pade Lotu, mana kakiaro ria tamuna kakale qira e komakomala ro ramu go.

³⁵Urena ianae, God tina vakimata qamu ramu, sauna le qira basoero velaka ia, tupi me valeke totoloṉo Ebolo, lama dokae le na Zakaria, tuna Beretia qamu vae vale ze ia vari lobori na Pade Lotu mana sara ipaka ne.

³⁶Ma sine ne qamu pata ogoto, God tina va kimata lupo qamu, tanego sauna vatovato sakata ro qamu zazu ne go ramu mana vanovano ṉalu bana ramu go!”

³⁷Jesu igo napu dena, “Ke Jerusalema, Jerusalema! Qo vae vale qira propeta ro mana vano palapala sekoro i turi ne qira atu go God! Topu ṉalu qa soko bara nigoe karisiqu, gere kokorako i opo qira e tuna ro polana babalakuru na, do aro qoki soko ava kaega!

³⁸Iago God, tina siporo kasi ne Pade Lotu nae, go tina kakaere, mana tina kaega kapatana.

³⁹Mana ma sine ne qamu, pasi dena tamuniki mia napu ava kaega era, go na doka so ṉalu osiqamu tamuna sine, ‘God i va makaole valeke dena i reqe mego vitoṉo na Batu ne.’ ”