Read Varisi Maka 12 Bible Online

Maka 12 - Varisi bible

Maka 12

¹Jesu i sine ne qira basoero ne seko vapadapada dena, “Kaki kameka valeke i leba barue vaeni ia mana i zazu ne kameka bara, ikolo ze go. I zazu ne de tina puqo ze go vaeni ne, mana i vadegere ze kameka pade zakazaka go tina za koe basoe tina miatarua go. Lupo nae i vamao ne qira kakia ro basoero barue vaeni, iago tarina vazazua mana teke vaule ne tanuna kadia volina urena nogotona ave, mana tanuna valeke ne i zaza, iza koe kaki dia kakavata.

²I doka to ṉalu iṉara go urena vaeni ne, go tarina pala go, valeke itoṉove go barue vaeni ne, i turi ne valeke zazu ia mara za pala kesa, todona volina vaeni ia ne igo.

³Do ria vano zazu ne iri palatarua valeke ne, iri vae mana turi vaule volomo ne so ia.

⁴Gonae valeke itoṉove go barue vaeni ne ivazao napu kakia valeke zazu ia, do ria iri vae kuzukuna ne mana iri lete vasakate to ia.

⁵Valeke itoṉove go barue ne ivazao napua kakia valeke zazu ia, do vano zazu ne iri vae ia mana iri vasakata ne qira kero ne na, mana kakiaro ria vae vale qira go.

⁶Gonae valeke ne kameka mine na basoe iko sivala go tina vazao go, i sale ia to tanuna. ‘Ṉalu i vazao go, ia i nanao ria tarina vamazale sale ia,’ igo.

⁷Do ṉalu sale ia iza go, ria iri vari sine ne, iri go, ‘Iato dena sale valeke ogoto ia batu ne. Aria mata vae vale ia go tatana tonovo lupo go pata pataro ia dena!’

⁸Iri vari raqasa ne ia mana vae vale vanaqe vakasi ne ze ia barue ne, iri go.”

⁹Gonae Jesu igo, “Avana to tina zazu ne go valeke itoṉove go barue ia ne? Valeke ne tina vae vale qira basoero nae mana va mia soka napu qirae vano kakavata barue ianae.

¹⁰Pata ogoto, ramu qamu toere to Buka tabo ne mana qamu mia to ni sine go, ‘Ipaka iri kasia go vano zazu pade ne, iato ipaka i lete mazala sivala ne qira go osiqira ipaka ro ne.

¹¹Pata dena Batu ne to i zazu ne go mana i lete mimia velaka sivale tarakenaqa qita ita go!’ ”

¹²Vano batu ro ria vano Jiu iri soko palataruna Jesu, tanego iri rove, ia ivapala qirae seko vapadapada i sine go, do tanego iri sareki ne qira basoero ne, iago iri tarua ia mana zaza kasi ne iri go.

¹³Vano batu ro ria vano Jiu iri vazao qira kakiaro vano Parisio mana basoero ia Erode de ikoe Jesu, go mara ria tana va soru ze ia tana dena iri go.

¹⁴Ṉalu iri za lamae de ikoe ia iri vane dena, “Valeke vari vatatana, remu qimu rove pataro qo sine go aro itotoloṉo lupo so, mana qoki tavisi kale ne kaega kaki basoe, do qo vari vatatana ne so pataro mara zazu nego basoero igogo God. Iago, sine ne qemu remu, avigo itotoloṉoe tamana ita, tane tatana volia takisi de ikoego batu lavata Siza, ba kaega?”

¹⁵Do Jesu igata rove tana ria, iago i sine ne qira, “Avigo tane qamu pada nava go era? Valame so kaki kameka kesa siliva nae, go ma mia era.”

¹⁶Iri teke ne ia kaki kameka mana i tana ule napu ne qira ria, “Ake tarakenaqana mana vitoṉona tane ikoego kesa dena?” Iri go, “Siza”.

¹⁷Gonae Jesu i sine ne qira, “Velaka, teke vaule na batu lavata Siza, pata i todo go Siza mana teke vaule ne God, pata i todo go God.” Pasi iri gata go seko ia Jesu dena iri lete poloso sasakata.

¹⁸Gonae kakiaro vano Sadusi iri go, vano iri le bana go tariniki ara too napu me kaega. Iago ria dena iri lamae de ikoego Jesu mana iri lama tana ne ia, iri go.

¹⁹“Valeke vari vatatana, Mosese ikaro bana ne qemu remu tamana dena, ‘Ṉalu kaki valeke ile mana qole ia iko, do kaega ne sale igogo ne, kaena valeke ne tina busi napua go qole nanaro igogo ne, go tina vapodo ze sale ro ia valeke kenaqa ia ni le bana go,’

²⁰Iri ko kaki tamakena taravitu gonae ke lavata ne i busia kameka qole, do ikaega ne sale mana ile.

²¹Iago ke varuana kaena ne i busi napua qole, ne do ile mana ikaega napu ne so sale, mana igerena napu so ke vapisana kaena ne,

²²mana osiqira tamakena taravitu iri busia so kameka qole nae, do osiqira le lupo to mana ikaega ne qira sale, taramuzina qole ne ile napu to go.

²³Aria ṉalu tina doka to osina vano le tarina too napu me tepa le ne, akena to tina busia go qole nae, tanego ria tamakena taravitu dena iri busia so kameka qole dena.”

²⁴Jesu iva taule ne qira, igo dena, “Iato nae tane qamu kebu e go ramu, tanego qamuki rove kaega Buka tabo mana qamuki rove kaega karaputa ia God.

²⁵Ṉalu osiqira basoero tarina za too napu mego tepa le ne, valeke mana qole tiniki ara busi napu kaega, do tarina ko gere qira so aqeloro iri koego rani ne.

²⁶Sauqira vano iri le mana too napu me tepa le ne, avigo qamuki toere ze kaega buka ia Mosese ni pepeua go nako ni subia go sasaniqa ne? God i sine ne Mosese, ‘Era God ia Abra-am, God ia Aisak mana God ia Jekop.’

²⁷Iago, God, i God ria vano too, iki God ria kaega vano le. Ramu qamu kebu totoloṉo so.”

²⁸Kaki kameka valeke vari vatatana na Tamana iko tavisi mana igatagata ṉalu Jesu mana vano Sadusi iri vari seko tabe go. Ṉalu i mia zaqe go pata ivataule ne qira go vano Sadusi Jesu itotoloṉo, iteke ne kameka tana dena Jesu, “Adeke Tamana i lete mazala sivala ne qira go osiqira Tamana ro ne?”

²⁹Jesu iva taule ne igo, “Kameka ke i lete lavata sivala go Tamana ne, iato dena, ‘Gata va velaka me ramu vano Izirel! God Batu ne i kameka bana so, mana i kaega napu kaki god napu go.

³⁰Ono mamaligara ne God Batu aro osina puṉumu, osina madaumu, osina nanaomu mana osina karaputa aro go.’

³¹Varuana Tamana i lete mazala sivala napu go, igo dena, ‘Ono mamaligara ne qira vano kakavata iriki garogaro go kaega, gerena de qo vane go mamaligara nigo tanumu.’ I kaega napu kakia tamana i sivala ne qiru karua Tamana dena.”

³²Valeke vari vatatana na Tamana i sine ne Jesu igo, “Pata ogoto qo sine go, God Batu ne i kameka bana so mana ikaega napu kakia.

³³Iago basoe mara mamaligara neze God osina nanao na mana osina puṉuna, osina madauna, osina karaputa ia mana mara mamaligara napu ne qira vano kakavata gerena i mamaligara ne go tanuna. Luluna karua Tamana dena i lete sivala ne komakoma ro qata tavatavara ne zaqe go God.”

³⁴Jesu i mia rove tarove ia valeke ne, go ni vataule go sekoro ia. Iago i sine ne ia, “Aro qoki laqalaqa ne to kaega Too ikoego vari miasoka ia God.” Taramuzina nae iri sareki napu ne tana ne ia kakia tana.

³⁵Ṉalu Jesu ivari vatatane Pade Lotu ne itana ne qira, igo, “Avigo tane vano vari vatatana na Tamana iri sine go, Mesia tina podo me sinaqe ia Davita?”

³⁶Davita tanuna i teke nanao Spirit tabo go ni sine go, ‘God Batu ne i sine ne Batu era. Ono koloku e tepa matauqu go tina za dokae ṉalu tuna taru lupo qirae kana ro aro polana makemu.’

³⁷Iago Davita ikoru ze Batu ne i Batu ia. Ava tina gogo Mesia tina reqeme go popodo ia Davita?”

³⁸Ṉalu iva tatana qira i vane qira dena, “Muna miasoka qira vano tarove na tamana iri vakeba ne roku loda ria mana iri ara telotelo go, iri soko basoero ne mara vamazala qirae de iri volivoli ne ze go pata ro.

³⁹Mana iri za koe vesu velavelaka ikoego tarakenaqana pade lotu ne mana de kolokoloku velaka ṉalu iri zae go ṉaṉa na kelo ne.

⁴⁰Iri vaqoqo qira qole ro nanaro mana iri pala siko qirae patapataro ria mana ṉalu iri pene go iri vazaka napu ne pene loda ro ria go. Qamu rove lepulepu ria tina lete lavata sivala.”

⁴¹Ṉalu Jesu i koloku garogaro go bokese iri tarutaru zaqe go kesa loborona Pade Lotu ne, i mia qira basoero iri za vana ne zego kesa loborona bokese ne, mana topu ria vano vavagado iri za vana ne topuna kesa.

⁴²Gonae i mia napua kameka qole nanaro ikaega neto kapata, ilete situ, do ilama vana ne karua senti iko sivala ne go.

⁴³Jesu i koru teṉo qira disipoloro ia i vane qira dena, “Ma sine ne qamu pata ogoto, qole nanaro situ dena to itaru zaqe go kesa i sivala ne qira go basoero topu iri vana ne go kesa sosovolomo loborona bokese ne.

⁴⁴Tanego basoero topu dena iri soso zaqe so desuka pata vavagado ria. Do qole nanaro dena i teke lupo zaqe to pata itoṉove go sauna too ia.”