Read Varisi Maka 13 Bible Online

Maka 13 - Varisi bible

Maka 13

¹Ṉalu Jesu i siporo kasi ne go Pade Lotu ne kameka disipoloro ia i vane dena Jesu, “Reṉa me so valeke vari vatatana, Mia so menomeno na ipaka lavata ro iri zazu ne zego pade ro dena!”

²Jesu igo, “Qo mia, pade lavataro dena tina tapero lupo barina mana tina kaega to kaki kameka ipaka suka tina ko sivale go de iri ko banae go dena.”

³Jesu i kolokue Kubolo na Olivi, nae iri mia totoloṉo me so deni koego go Pade Lotu ne. Gonae Pita, Jemisi, Jon mana Aduru iri lama mia vamikia so Jesu, mana iri vane dena,

⁴“Sine ne qemu, ava ṉalu to tina lama sadaka go pataro dena, mana avana lalana go tina sadaka go timuna mazala go mia rove zego remu lama sadaka na pataro nigogo ne.”

⁵Jesu i sine qira, “Muna miasoka mara kasi vaqalo qamu.

⁶Tanego topu basoero tarina vazazua vitoṉoqu era mana tarina sine, ‘Era to qa Kristo!’ Mana tarina pala vasoru qira basoero topu.

⁷Do ramu muniki sareki ṉalu qamu gata go nakina kana ro iri ko garogaro qamu mana taramana kana ro iri ko laqalaqa mego. Pataro dena tina sadaka bana so, do ia dena iki talukase kaega vudu ne i garogaro to lama lupo.

⁸Vano na kaki komala tarina varitarae de iri koego basoero na kene komala. Basoero na kaki vudu tarina varitarae kene vudu. Nunu lavata ro tina lama vizua go osina dia pua ne, mana saqo lavata tina lama pala qira go basoero ne. Pataro dena tina gere vokara na sale ni vele podo go.

⁹Ramu muna miasoka qamu, tanego basoero ne tarina pala vazao qamue varitanae mana tarina zavae qamue Pade Lotu ria vano Jiu. Tarina vadegere qamue tarakenaqa qira vano batu ro mana vano batu lavata ro ne, sauna vitoṉoqu era. Do ṉalu nae ramu muna nanao avaso era mana tarama ne Tarama Velaka de iri koego basoero nae.

¹⁰Tanego Tarama Velaka tina tamana qirae osina basoero ne, ia tinara lama go lupo na vudu pua dena.

¹¹Iago, ṉalu iri pala vazao qamue go varitanae, kasi poro nanao na ava tamuna sine go, torana iara kaebo go lama doka na ṉalu. Do ṉalu tina lama doka qamu go ṉalu nae, ramu tamuna sine to pata ni koego nanao qamu ni za reqeme mego karaputa ia Spirit tabo ni koe de qamu koego.

¹²Basoero ne tarina vazao qirae kaeqira de iri koego vano iri kana ne qira, go tarina vae vale qira, mana igo napu so tamaqira salero ne, tarina vazao napu qira so sale ro ria, go tarina vae vale qira, mana sale ro ne tarina vazao napu qira so vanovano ria go tarina vae vale qira go.

¹³Basoero ne tariniki soko qamu kaega, tanego qamu basoero era. Do basoe i degere vanadu go, mana za dokae valupo lupo na gogo ne, God tina vakavele too iago.”

¹⁴Jesu i sine napu ne qira, “Ramu tamuna mia kaki pata sakata tina degere de iki torago kaega degere na loborona Pade Lotu ne. Basoe i toere go seko dena mara nanao rove talukasana pata dena. Ṉalu nae basoero iri koego kena Judia tanna paqa mana za pipikae kubolo ro ne.

¹⁵Basoe ikoe popokona pade ia, niki ara nanao za pala na patapata ia, ikoego pade ia ne.

¹⁶Basoe iko mego barue ia, niki ara gado ule za pade ia, go na za pala roku ia.

¹⁷Ṉalu nae qolero kakate mana ria iara lete medara go sale ro ria, tarina lete soba makuru.

¹⁸Do ramu muna pene God, go mara kasi lama doka qamu pataro dena ṉalu na lolomu nae.

¹⁹Tanego makuru ro nae, tina lete lavata sivala ne makuru ro iri rove bana mego, vano basoe na vudu pua pasi me ṉalu God iva zaria go vudu pua, go ilama dokae go ṉalu ninidena. Do ṉalu muzi tiniki ara lama doka napu kaega makuru igogo ne.

²⁰Ṉalu God tariki vine bana me kaega vapusina ṉalu makuru nae, kaega to kaki basoe na vudu pua dena tara kavele go. Do sauqira to basoero ne tarina kavele iago, God ivapusia so ṉalu na makuru ro dena.

²¹Iago, ṉalu ka basoe i sine ne qamu, ‘Mia, Mesia to dena.’ Ba igo, ‘Mia iato dona,’ ramu muniki vaogote ia.

²²Tanego Mesia poqepoqe ro mana propeta ro go, tarina lama sadaka mana zazu ne topuna ro pata van vapoloso mana lala ro, go tarina vasoru qirae basoero tavine ia God.

²³Ma sine kenaqa bana ne qamu, muna miasoka! Topu pataro tarinara za lama.”

²⁴Jesu i sine napu ne qira, “Taramuzina makuru ro dena, saṉa tina rodoko mana inaqa tiniki damara kaega.

²⁵Domiri ro iri ko mego rani ne, tarina soru me pua ne mana pataro iri koego varioka ne tarina kasine zuka zuka ro ria.

²⁶Ṉalu nae era Tuna basoe, tuna sadaka lulume popokona toba ne, tina lulua go karaputa mazala ia God.

²⁷Ṉalu nae era tuna turine qira aqeloro, tarina zae osina dia kolabana vudu pua, go tarina pala teṉo me qira basoero ia God iri koego kavasi maqana vudu pua ne.”

²⁸Jesu i sine napu ne qira, “Muna nanao rove zaqe so, ṉalu moki piqi ni sisiri mana i luqu me igogo ne, ramu qamu rove i vele zavarata to.

²⁹I gerena napu so, ṉalu qamu mia go pataro dena tina sadaka go, muna rove, Too ikoego vari miasoka ia God i garogaro to lama.

³⁰Nanao tarua osina pataro dena tina sadaka me ṉalu basoe ro dena tarinara too go.

³¹Rani mana pua tina lupo, do osina sekoro era tiniki rove kaega lupo.”

³²Jesu i sine napu ne qira, “Kaega ka basoe i rove go ṉalu na ba aoa tina lama doka go osina pata. Patavolomo aqeloro na rani ne mana Era Tuna do, qimuki rove so kaega, tanuna so Mamae i rove go.

³³Iago muna miasoka, vanama so osina ṉalu, tanego qamuki rove kaega ṉalu tina lama go osina pata ro dena.

³⁴Tina gere valeke i vele kasi ne pade ia, i vanama ne qira vano zazu ia soso zazu ro tarina zazu ne go. Ṉalu i teke lupo ne qira to zazu ro ria, i sine ne valeke i miasoka go siporoṉa na pade ne, ina mimia taru so osina ṉalu.

³⁵Gerena so pata dena, ramu do muna miasoka, tanego qamuki rove kaega ṉalu tina za lama go valeke ni toṉove go pade ne. Kadigo tina zalama raravi ba loboro kuse ba sarusaruku lolotoro ba kebana sana.

³⁶Iago, muniki kamuku, niki go lama vapoloso qamu.

³⁷Pata qa sine ne qamu go dena, qa sine napu ne qira basoero topu ne, osiqamu muna miasoka!”