Read Varisi Maka 14 Bible Online

Maka 14 - Varisi bible

Maka 14

¹Karua musaqara to iko go tina doka go musaqara lavata ikaega go isti na. Vano batu Patere ro mana vano vari vatatana na Tamana iri taqia zuka go tarina pala vapipika so Jesu mana vae vale iri go.

²Do iri go, “Mata kasi zazu ne na ṉalu na musaqara lavata dena, niki go basoero topu dena zazu ne kaki pera lavata go.”

³Ṉalu nae Jesu izae Betani mana iza koe pade ia Saimon valeke i pala bana go mokoso voremake ne. Torana so ṉaṉa ivae go Jesu, kaki kameka qole i pala kameka botolo ipaka iri ura go, i purake tala i nonoli meno mana i lete voli makuru. Ia i puake ipaka botolo ne mana i zele ze kuzukuna Jesu.

⁴Kakiaro ria basoero iri kotavisi go iri lete muma sasakata, iri go, “Avana to italukase go qole dena i zele valeqiso nego tala dena?

⁵Pata ni lete voli makuru ni tora go pisavasa kesa ṉalu tara volivoli ne go mana teke ne qira vano situ tara go kesa na ne.” Gonae iri lete seko vasakate to qole ne.

⁶Do Jesu igo, “Tarua kasi seko vasakate na, i pata velaka so i zazu navae go era.

⁷Basoe situ ro iri ko tavisi bana qamu so osina ṉalu, iago ka ṉalu qamu soko go tavisi ne qira, qamu mazala so tavisi ne qira. Do era tuniki ko tavisi qamu kaega osina ṉalu.

⁸Ba qole dena i zazu ne pata velaka, go i zele ze tala dena tokamaqu era, tanego i vanama ne go tarina vovu ava go.

⁹Ma sine ne qamu pata ogoto, osina dia kolabana vudu pua tarina tamana zego Tarama velaka, tarina pepeu napua so pata i zazu ne go qole dena, mana tarina nanao taru napua so iago.”

¹⁰Gonae Jiudas Iskariot kaki kameka ria manoga karua disipolo ne, i zae de iri koego vano batu Patere ro, i soko tina vabesa ne qira Jesu igo.

¹¹Iri kula ne mana toqe ne pata ni sine ne qira go. Iago iri sine ne tarina teke ne kesa. Iago Jiudas i taqia to kaki ṉalu velaka go tina teke ne qira go Jesu.

¹²Musaqara kenaqana to ṉaṉa na bureri ikaega go isti na ne, i musaqara tarina vae vale go sipi ro tarina ge go Pasova ne. Disipoloro ia Jesu iri tana ne ia, “Ade to qo soko ze go aro tatana za vanama ze go ṉaṉa na Pasova aro na?”

¹³Gonae Jesu i turine qiru karua disipoloro ia i teke ne qiru seko dena, “Ṉalu qaburu zae go loborona komala lavata ne, kaki kameka valeke i pala kaboso besi tina soba qaburu, iago lulua ia mana za kebae pade iza kebae go.

¹⁴Mana sine ne valeke itoṉove go pade ne, ‘Valeke vari vatatana igo me dena deqo koego aro, ade to kova tina ṉaṉae go disipolo ia mana tanuna go sauna ṉaṉa na Pasova ne.’

¹⁵Ia tina va mia qabure raburu kaki kova lavata iko lupo banae so osina patapataro ia. Nae to taburu na vanama ze go raburu ṉaṉa ita.”

¹⁶Ṉalu karua disipolo iru zae go loborona komala lavata ne, iru za soba lupo so osina pataro i sine ne qiru Jesu, mana iru vanama ne zeto ṉaṉa na Pasova go.

¹⁷I raravi ia Jesu i lulu me qira manoga karua disipoloro ia.

¹⁸Ṉalu iri ṉaṉa go, Jesu i vane qira dena, “Ma sine ne qamu, kaki kameka ramu dena tina vabesa nava era de iri koego vano iri kana nava go.”

¹⁹Disipoloro ne iri lete poloso mana maqata ne pata i sine go ia. Iago nogonogoto qira iri tana ne ia, “Iki era kaega ba?”

²⁰Do Jesu igo, “I kaki kameka ramu to manoga karua disipoloro i soqe tavisi vego era pata gege na ebata dena.

²¹Era Tuna basoe tuna le bana so, ni puitaru bana mego Buka tabo ne. Do makuru lavata tina dokae go basoe ni vabesa nava go era Tuna basoe. I tora basoe nae mara kasi podo bana me so.”

²²Ṉalu iri ṉaṉa Jesu i pala kameka bureri i seko velaka ne zaqe God. I pasia bureri ne i teke ne qira disipoloro ia mana igo dena, “Muna ge ia dena i tokamaqu era.”

²³Gonae i pala napua kameka kapu i seko velaka ne zaqe God mana i teke ne qira mana osiqira iri besia.

²⁴Jesu igo, “Iadena i parasaqu, i tazele ne vakavele qira osiqira basoero ne, parasaqu dena i vanadua go vari toqe ia God.

²⁵Ma sine ne qamu pata ogoto, era tuniki ara besi napua kaega vino dena go tina za doka go so ṉalu tuna besia go vino voru loborona Too ikoego vari miasoka ia God.”

²⁶Lupo nae ria iri vae kameka kera mana iri zaza siporo za Kubolo na Olivi.

²⁷Jesu i sine ne qira osiqira igo dena, “Osiqamu tamuna paqa kasi nava era, tanego Buka tabo ne igo, ‘God tina vae vale valeke miasoka sipi ne mana sipi ro ne tarina paqa tapero lupo.’

²⁸Do taramuzina tuna too mego era tepa lene, era tuna za kenaqa ne qamu ramu Qalili.”

²⁹Do Pita igo, dena, “Patavolomo ria osiqira tarina paqa kasi nigo aro, era tuniki paqa kasi nigo kaega!”

³⁰Jesu i vane dena Pita, “Masine nigo to pata ogoto, karua dae tina vae go kokorako kuse ninidena aro kapisa sine tono vae ne, qoki rove ava kaega!”

³¹Gonae Pita i seko moqere napu me igo, “Kaega patavolomo ria tarina vae vale palu zave go aro, do era qaki mazala kaega sine na, qaki rove go kaega aro.” Ria kero nena do iri sine napua so kameka seko i sine go Pita dena.

³²Ṉalu iri lama dokae go de iri vitoṉo ze go Qetsemani, Jesu i sine ne qira disipoloro ia, “Kolokue dena ramu, era maza pene.”

³³Do Pita, Jemisi mana Jon so ilulu qira go. Torana nae Jesu iki rove to kaega ka pata, sauna maqata i lama doka go.

³⁴Gonae i sine ne qira ria tarapisa, “Ke! Maqata ikoego puṉuqu dena ilete vasakatava mana i vele vae vale ava. Ramu muna koe dena mana mimia taru go”.

³⁵Jesu gonae izaza valaqalaqa aqe de suka, i sorue pua ne mana i pene, go ṉalu tara mao go God, mara kasi teke ne na vokara dena.

³⁶I pene igo, “Ke! Mamae, osina pata i malumue so deqo koego aro. Pala vakuziki ne kapu i purake go vokara dena, do mara kasi luluna nanaoqu era do mara lulua so nanao raro.”

³⁷Gonae i ule napu me de iri koego ria kapisa disipoloro ne, i lama mia qira iri kamuku. I sine ne Pita, “Saimon, avigo qo kamuku so? Avigo to dogara tavisi ava so torana kameka aoa?”

³⁸I sine ne qira, “Muna miasoka mana pene, go tamuniki sorue go kaega vasakata pata, tanego nanao qamu i soko me, do tokama qamu i pela.”

³⁹I ule napu za mana i pene, i sine napua so pata i sine bana go!

⁴⁰Jesu iza ule napu me de iri koego disipoloro ia ne, i mia qira iri kamuku napu zato mana i makuru qira to dogara mana volana mata qira, mana iriki rove to kaega kapata tarina sine go.

⁴¹Ṉalu iza ule napu me, mana vapisana lama ivae go dena i sine ne qira igo, “I tora to kamuku qamu vae go nae. Dogara, i lama doka to ṉalu, era Tuna basoe iri taruve to karisi qira vano vasakata pata.

⁴²Iago dogara to ramu, mia valeke tina vabesa nava go era, i lama go to dena.”

⁴³Ṉalu Jesu iara sekoseko so, Jiudas kameka napu so ria manoga karua disipoloro ne ilama doka, i lulu me qira topu ria vano varitara, iri paia me pegi loda ro mana kobau varitara ro ria. Basoero dena iri turime qira vano batu ro ria vano patere, vano vari vatatana na Tamana mana kakiaro vano kazigarata ro go.

⁴⁴Jiudas i sine varove bana qira ria seko ia, “Valeke tuna kuna go era, iato valeke qamu soko go to ramu nae.”

⁴⁵Pasi iri zadoka go to ne, Jiudas itotoloṉo zaso de ikoego Jesu. Igo, “Valeke vari vatatana,” Iupo nae ikuna Jesu.

⁴⁶Torana so nae ria iri za palataru vanadua to Jesu.

⁴⁷Do kaki kameka ria disipoloro idegere garogaroe go degogo ne, ipala pegi loda ia, i puta ze qeqele na kameka basoe zazu ia batu ria vano patere ro ne.

⁴⁸Gonae Jesu i sine ne qira igo, “Avigo qamu nanao era qa valeke vae vae tamana, go tane qamu pala mego pegi loda mana kobau ro, pata varitara ro go qamu lama palava go go era?

⁴⁹Era nogotona musaqara ro ne, qa vatatana qira basoero ne loborona Pade Lotu ro ne, do ramu qamuki palava kaega. Do seko na Buka tabo ne ilama ogoto.”

⁵⁰Pasi nae osiqira disipoloro ne iri paqa lupo to.

⁵¹Iri pala Jesu mana iri zaza to, kaki kameka valeke gavere iva baribari ne poga ia i kale muzi ne go Jesu. Iago ria iri soko vele palataru napua na ia.

⁵²Do valeke ne ivana ne baribari ia i sisinaqa mana ipaqa go.

⁵³Gonae iri pala vazao ze Jesu pade ria vano batu Patere ro, vano kazigarata ro mana vano vari vatatanana tamana go.

⁵⁴Pita iza muzine me Jesu, do ilaqalaqa me so, mana ikeba za varitakana vari loborina pade ro ni koego patere batu lavata ne. De gogo ne iza koloku tavisi qira vano soldia iri miasoka go pade mana iza kakasirue nako ikoego nae.

⁵⁵Vano batu patero ne mana vano kazigarata naro pepeu nego iri lete taqi zeto de iri koego basoero ne kaki seko sakata i zazu ne go Jesu go tarina vae vale ze ia iri go, do iriki soba so kaega kaki pata.

⁵⁶Topu ria to basoero iri degere vapala ze Jesu pata poqe ro, do pepeu ro ria iki lama vari pada so kaega.

⁵⁷Gonae kakia ro ria iri degere iri sine seko poqe i sine Jesu iri go,

⁵⁸Mana iri go dena, “Remu qi gata bana i sine go valeke dena, ‘Tanuna ne tina pero vasorua Pade Lotu lavata ne mana tina vadegere napua so taramuzina vapisana musaqara, kameka ke voru tiniki zazu ne kaega basoe,’ ” igo.

⁵⁹Do patavolomo pepeu riria igogo nae do, iki lama varipada so kaega pataro iri sine go.

⁶⁰Batu lavata patere ne idegere tarakenaqana qira osiqira ne mana i tana ne Jesu, “Avigo aro iko nigo kaki pata tono vataule ze go sekoro iri vapala zigoe basoero dena?”

⁶¹Do Jesu i duduli so mana iki sine so kaega kaki seko. Batu lavata patere i tana napu ne Jesu, “Aro to qo Tuna go God iko mego zaza zaka ne ba?”

⁶²“Era to,” igo Jesu, “osiqamu tamuna miava era Tuna basoe tuna kolokue tepa matauna God ni lete moqere sivala mana tuna za lulume toba ikoego rani ne.”

⁶³Batu lavata patere ne i lete ṉiṉiri sasakata itoqo ridake roku loda ia mana igo dena, “I torato dena, ikaega napu to kaki pata tatanara taqi napu ze go kaki basoe go tina lama sine napua go pata ivasakate go valeke dena.

⁶⁴Ramu qamu gata to, ia i seko sakate God. Iago, avana to pata tamuna vine go ramu sauna valeke dena?” Osiqira iri vivine mana iri go, ia tina le to.

⁶⁵Kakiaro ria iri sue lapa to Jesu mana iri pala poga iri kade ze matana ia, mana iri dupo, mana iri sine ne, “Aria sine to aro kake i vaego nae na?” Vano soldia ne iri lapaka napua lago.

⁶⁶Pita iara kolokue so vari loborona pade ikoego batu lavata patere ne, kaki kameka qole zazu la batu lavata ria patere ne i lamae de ikoego Pita.

⁶⁷Ṉalu i reṉa ne Pita ni koloku kakasiru igogo, ia i reṉa vale ne Pita mana i sine ne, “Aro to go kaki valeke qo lulune go Jesu na Nazaret?”

⁶⁸Do Pita i legua, igo, “Era qaki rove kaega pataro qo sine mego nae aro.” Ṉalu i sine lupo seko nae iza degere tarakenaqa ne, pasi torana sonae kokorako idae.

⁶⁹Qole ne i mia napu zaqe Pita iza degere go tarakenaqana ne, i sine napu ne qira vano iri degere tavise go de gogo ne, igo, “Valeke dena to ikaki kameka napu ria ne.”

⁷⁰Do Pita i legu napu so ia, mana igo, “Era qaki rove kaega valeke nae.” Do basoero iri ko tavise go ia in go, “Aro mo kasi poqe, tanego aro qo kaki kameka to ria mana qo basoe na Qalili.”

⁷¹Gonae Pita igo, “Qa odo odo to, God ina vakimata ava era, ṉalu iogoto go qa sine go qaki rove go kaega valeke dena.”

⁷²Pasi torana sonae kokorako ivaruana to dae. Pita inanao zaqe to seko ni sine bana ne go Jesu, igo, “Tarakenaqana kokorako tina karua dae go, aro kapisa to sine tono, go qoki rove ava kaega.” Pasi nae Pita i soru maququru i tudu mana i dae go.