Read Varisi Maka 16 Bible Online

Maka 16 - Varisi bible

Maka 16

¹I sivala to musaqara na Sabat, Maria Madalena, Maria sinana Jemisi mana Salome go, iri za volia pata nonoli velaka go mara ria alu ze tokamana Jesu iri go.

²Sarusaruku lolotoro na Sade torana i ara keba me so sana, iri zae leṉa ne.

³Zaza iri vae go zuka ne iri vari sine ne tanuqira, “Akena to tina ikolo ne qita go ipaka iri kokoqu zego siporaṉa na leṉa ne?” Tanego ipaka iri kokoqu zego siporaṉa na leṉa i lavata.

⁴Do ṉalu iri za dokae go leṉa ne ipaka ne i taikolo va kuziki bana.

⁵Iago ṉalu iri keba zago loborona leṉa ne, iri mia kameka valeke gavere i kolokue tepa matau na leṉa ne, mana roku ia i lete kakasa sivala, mana qolero ne iri lete sareki sasakata.

⁶Do ia i sine ne qira, “Kasi sareki ramu, era qa rove ramu qamu taqia Jesu na Nazaret, iri paqipaqi zego koluse ne. Do ia iki koe kaega dena, itoo napu me to tepa le ne. Qamu mia, de iri taruze to dena do iki koe kaega.

⁷Iago ramu muna ule za mana sine ne Pita mana ria kero ne disipoloro sauna tarama dena. Jesu iza ko kenaqa banae Qalili mana nae to tamuna za soba ze go ia, gerena ni sine bana ne qamu go.”

⁸Iago iri siporo kasi ne leṉa ne, do nanao qira i tutuqu mana tokama qira i nenedere lupo, mana ṉalu iri ule za go iriki sine vasadaka ne kaega kakia basoe, tanego iri lete sareki sasakata.

⁹Ṉalu Jesu i too napu me tepa le ne sarusaruku lolotoro na musaqara kenaqana viuki, ia i sadaka kenaqe Maria Madalena, qole ni kakale vakuziki ne zego kavitu manuru sakata ro ne.

¹⁰Ia i za mana sine ne qira vakitaka ro ia Jesu. Ria iri ko maqata mana dae so iri go.

¹¹Ṉalu iri gata go Maria Madalena i sine ne qira sauna Jesu i too napu me tepa le ne, mana i reṉa paqala ne to igogo ia ne, ria iriki vaogote so kaega.

¹²Taramuzina nae Jesu i sadaka qiru karua disipolo iru zaza kasi ne go komala nae.

¹³Ṉalu iru za ule mego iru lama sine ne qira disipoloro ne sauna tarama riru, do ria iriki vaogote so kaega.

¹⁴Valupolupona sadaka ia, Jesu i sadaka qira manoga kameka disipoloro ia, ṉalu iri ṉaṉa go. I lama seko lavata qira, tanego kuzuku qira i losi sakata nanao rove na pata, iato go iriki vaogote go kaega pata iri sine ne qira go basoero iri mia paqale go ia, ni too napu mego.

¹⁵Jesu i sine ne qira, “Muna zae osina dia kolabana vudu pua mana tamana qirae basoero ne Tarama Velaka era dena.

¹⁶Vano iri vaogote mana bapitema gogo ne God tina vakavele qira. Do vano iriki vaogote go kaega, God tina varitanae ne qira ṉalu muzimuzi.

¹⁷Vano vaogoto, God tina teke ne qira karaputa go tarina kakale qira go manuru ro loborona vitoṉoqu era, mana tarina seko ne sekoro kakavata go.

¹⁸Patavolomo iri siba go dole pani ba besia besi taravalu do tariniki le kaega. Mana karaputa nae ṉalu tarina sapu poka zego karisi qira basoero mokoso ria tarina velaka.”

¹⁹Taramuzina Jesu Batu ne i seko tabe lupo qira disipoloro ia ne, God i pala vapopoka zaqe Jesu rani ne, mana ia iza kolokue tepa matauna God Tamana.

²⁰Taramuzina to nae, disipoloro ne iri za tamana zeto osina dia Tarama Velaka, mana Batu ne i zazu tavisi qira mana tamanaro ria i lama ogoto ṉalu iri zazu ne go topu pata vari vapoloso ro, i reqeme go karaputa ia.