Read Varisi Maka 2 Bible Online

Maka 2 - Varisi bible

Maka 2

¹Taramuzina kavia musaqara i sivala, Jesu i ule napu za Kapanaum. Gonae tarama na ia i zadava bana so, iri gata go basoero ne ilama koego ia komala ne.

²Iago basoero topu iri lama teṉoe pade ikoe ia, mana siporaṉa na pade ne i makuru to tinara siporo kebae go, tanego ilete purake to basoero dokae to peka na pade ne. Gonae Jesu itamana qirae basoero ne seko ia God.

³Kaki taravasi ria iri vagoro me kameka valeke ile lupo tokama na iki vizu kaega, iri soko valame ze na de ikoego Jesu, do gonae ilete topu sasakata basoero iri purake go pade ne.

⁴Iago iri za papata me so abatana pade ne mana iri vaqoqoro totoloṉo me ze so de ikoego Jesu.

⁵Jesu i mia de igogo vaogoto ria ne, iago i sine ne valeke ile go tokamana ne, “Sale era vasakata pataro ara i talukasa.”

⁶Pasi nae kakiaro vano vari vatatana na Tamana iri kotavisi go nae iri vazazao nanao qira, iri go dena.

⁷Avigo tane valeke dena i seko gogo dena? “Valeke dena i seko sakate so God! Tanego tanuna so God i mazala go lukasana vasakata pata ia basoe!”

⁸Jesu i rove nanao qira ria, iago i sine ne qira, “Avigo tane qamu taru ze go puṉu qamu nanao sakata igogo nae?

⁹Adeke seko tane na sine ne go era valeke dena, ‘Vasakata pata aro iri talukasa to,’ ba degere, ‘Pala tobi aro mana zaza?’

¹⁰Ninidena mava rove velaka qamue to ramu, Era Tuna basoe iko nava karaputa pua dena tuna lukase vasakata patalago Jesu i sine ne valeke ile go tokamana ne,

¹¹“Qa sine nigo degere, pala tobi aro mana gado komala aro!”

¹²Gonae iri reṉareṉa to basoero ne, valeke ne i degere i pala tobi ia mana i zaza to go. Pasi nae basoero ne iri lete nureke mana iri vazaka God, iri go dena, “Pata qatiki mia bana mego kaega qatara lama mia to ninidena!”

¹³Jesu i ule napu za tepa masi pipika na Qalili mana iva tupi napua vatatana qira basoero ne.

¹⁴Gonae iza soba Livae valeke palapala takisi, sale ia Alepiasi i kolokue pade de iri lama volivoli zego takisi ria basoero ne. Jesu i vane ia dena, “Lama lulua va era.” Livae i degere mana i lulua to Jesu go.

¹⁵Taramuzina nae Jesu iza ṉaṉae pade ia Livae. Topu ria vano palapala takisi, mana kerone vano vasakata pata go iri ṉaṉa tavise go Jesu mana disipoloro ia.

¹⁶Kakia ro ria vano vari vatatana na Tamana iri vano parisio napu so, iago ṉalu iri mia go Jesu iṉaṉa tavisi qira go vano sakata ro dena, iri vane qira dena disipoloro ia Jesu, “Avigo tane valeke dena iṉaṉa tavisi qira go vano sakata ro dena?”

¹⁷Ṉalu Jesu igata go seko dena i vane qira dena, “Vano iriki mokoso go kaega iriki soko kaega valeke vari vole, do vano mokoso tane iri soko go valeke vari vole. Iago era qaki lama ne kaega koru qira vano iri totoloṉo bana go, do qa lama ne koru qira vano iri vasakata pata go.”

¹⁸Kaki kameka ṉalu vano Parisio mana disipoloro ia Jon go iri qaniqani. Gonae kakiaro basoero iri lama sine ne Jesu iri go, “Avigo tane vano Parisio mana disipoloro ia Jon go iri qaniqani do disipoloro aro iriki qaniqani go kaega?”

¹⁹Jesu ivataule ne qira igo, “Qamu nanao qamu mazala va qaniqani qira basoero iri lama kotavise go ṉaṉa na vari vabusi ne? Kaega! Ṉalu valeke busi ne iara ko tavisi qira go vakitaka ro ia, iki tora kaega ria tarina qaniqani go.

²⁰Do iko ṉalu na tarina pala vakuziki ne ze to ia de iri koego ria, ṉalu nae to ria tarinara qaniqani go.

²¹Iki tora kaega kaki basoe tina pala go taridakana poga voru ne mana sira komu ze go poga bana ne. Ṉalu tina gogo nae ara lete ridake to poqa bana ne.

²²I gerena napu so, kaega kaki basoe i pala vino voru ne mana vapuraka zaqe pata tarutaru vino bana ne. Tanego vino bana ne, mana osiqiru tiruna sakata lupo so. Iago vino voru ne tina vapuraka zaqe so pata tarutaru vino voru ne, go tina velaka go.”

²³Kaki kameka musaqara Sabat Jesu mana disipoloro ia iri zaza sivale barue vuiti ne, gonae disipoloro ia iri vae kakia ro vuiti ikoego barue ne.

²⁴Iago vano Parisio iri mia pata nae, iri sine ne Jesu, iri go, “Mia, valeke! disipoloro aro nae iri vae Tamana na Sabat, tane iri zazu ne go pata nae!”

²⁵Jesu ivataule ne qira igo, “Avigo qamuki toere kaega ramu tane pata izazu ne go Davita mana basoero ia ṉalu iri saqo go ikaega ne qira go pata gege,

²⁶Davita ikeba za loborona Pade Lotu ia God iza pala bureri tabo iri komakoma bana ne zaqe go God, iteke ne qira ria mana tanuna go iri ge go? Pata dena Davita izazu ne ṉalu Abita i batu Patere go, mana tepa ia tamana ita, vano patere so iri mazala go ge na bureri dena.”

²⁷Iago Jesu i sine ne qira, igo dena, “God i tarua Sabat go tina tavisi ne qira basoero, do Sabat kaega tina batu ne qira go basoero ne.

²⁸Iago era Tuna basoe qa Batu ne go Sabat!”