Read Varisi Maka 3 Bible Online

Maka 3 - Varisi bible

Maka 3

¹Kaki kameka ṉalu napu Jesu i ule za Pade Lotu ria vano Jiu, gonae kameka valeke i le karisina iko tavisi napue de gogo ne.

²Kakiaro ria iri koe de gogo ne iri soko pala zena Jesu kaki pata tina vakebua go mara ria vasakate ia iri go. Iago, iri lete mia luluse to ia, ṉalu tina va velake go valeke i le go karisina musaqara Sabat ne.

³Pasi nae Jesu i korua valeke i le go karisina igo, “Lama mana degere tarakenaqa dena, ivane.”

⁴Gonae itana ne qira basoero ne igo, “Avana tane Tamana ita iva mao go zazu nena ṉalu Sabat? Tavisi nena basoe ba va makurena basoe?” Do ria iriki sine so kaega kapata.

⁵Iago Jesu ilete muma ne qira mana ireṉa vale ne qira. Do i nanao ule ule napu ne qira, tanego i makuru bana to tarinara kavale go nanao qira, iago i sine ne valeke ne, “Ono kazara ne karisimu.” Ṉalu i kazara ne, karisina valeke ne i velaka napu to.

⁶Gonae vano Parisio iri kasi ne Pade Lotu ne mana iri za soba qira vano mazala ro ia batu lavata Erode. Ria iri za kameka vatovato mana vanama neto vae vale na Jesu.

⁷Jesu mana disipoloro ia iri kasi ne komala nae mana zae masi pipikana Qalili, mana topu sasakata basoero iri zaza muzi nego ia. Basoero dena iri reqe me karua kena, Qalili mana Judia.

⁸Kakiaro iri reqeme komala lavala Jerusalema mana komala garogaro na Idumea mana kene kavana uguru Jodan mana komala ro iri koego kena iru kome go karua komala lavata Taia mana Saidon. Basoero dena iri lama, tanego iri gata pataro izazu neze go nae Jesu.

⁹Iri lete topu sasakata basoero ne, iago Jesu i sine ne qira disipoloro ia, mara ria vanama kameka koluka go tina za kolokue go tariniki lama iki ago kaega, igo.

¹⁰Iva velaka qira basoero iri mokoso mana vano mokoso nae iri vari tutubele ne kadigo mara ria lama siba ia iri go.

¹¹Vano isiqana qira go manuru sakata rone, ṉalu iri lama mia go Jesu iri koloku tutuṉe tarakenaqana ia mana iri koru, iri go, “Aro to qo Tuna God!”

¹²Jesu i seko lavata qira manuru ro ne go mara kasi sine vasadake na akena tane tanuna ne igo.

¹³Gonae Jesu i popoka za kameka kubolo mana i koru qira ria i soko qira go. Ṉalu ria iri lamae de ikoego,

¹⁴ia i vine qira manoga karua basoe i koru qirae apostoloro ne. Jesu i sine ne qira igo, “Era qa vine qamu ramu tamuna luluava, iago era tuna turi ne qamu ramu go tamuna za tamana ne seko ro ia God.

¹⁵Mana ramu tamuna pala karaputa go tamuna kakale vakuziki ne qira manuru sakata ro ne go.”

¹⁶Iato dena vitoṉo qira manoga karua basoe i vine qira go. Saimon, Jesu i teke napu ne kene vitoṉona Pita.

¹⁷Jemisi mana Jon karua sale ia Zebedi, Jesu i teke ne qiru vitoṉo Boanezi talukasa na basoe i mumuma katikili.

¹⁸Aduru, Pilipi, Batolomeu, Matiu, Tomasi, Jemisi sale ia Alepiasi, Tadio, Saimon, valeke i poro babara ne vudu ia.

¹⁹Mana Jiudas valeke iva besa ne go Jesu go.

²⁰Gonae Jesu i gado ule za pade ne. Pasi nae topu sasakata basoero iri lama teṉokolo go ia. Gonae ria disipoloro ne mana tanuna Jesu go i kaega ne qira to ka ṉalu go tarina ṉaṉa go.

²¹Ṉalu vanovano ro ia Jesu iri gata go seko ro ria basoero iri sine, “I bulaṉoe to tane Jesu,” iri go. Iago iri soko za luluna ia.

²²Kakia ro ria vano vari vatatana na Tamana iri za reqeme Jerusalema iri go dena, “Valeke dena Belzebul tane isiqane go tokamana. Iago karaputa ia batu ria manuru ro dena tane i teke ne go ia karaputa go i kakale ze go manuru ro ne.”

²³Iago Jesu i koru qira mana i sine ne qira vapadapada ro dena, “Avigo qamu nanao Satana tina mazala kakale napu na Satana ba?

²⁴“Ṉalu kaki kameka vudu iri tavota soso degere mana varitara iri gogo ne, vudu nae tina tapero mana tariniki kameka kaega.

²⁵Mana ṉalu kaki sinaqe iri varitara napu tanuqira, sinaqe nae tariniki ko velaka napu kaega go.

²⁶Iago ṉalu Satana i varitarae de ikoego tanuna mana de iri koego basoero ia gogo ne, vari miasoka ia tiniki nadu kaega mana ko loda kaega go.

²⁷Kaega kaki basoe i mazala go kebae na pade ia valeke karaputa go tina za pala go patapata ia ikoego loborona pade ia nae, do ṉalu tina qolotaru ne so valeke karaputa nae tinara za pala go patapata ikoego pade ianae.

²⁸Era ma sine ne qamu pata ogoto, God tina nanao ule ne qira basoero iri vasakata pata go mana pata sakata ro iri sine go.

²⁹Do basoe i sine ne go seko sakata de ikoego Spirit tabo, God tiniki nanao ule ne kaega vasakata pata ia. Tanego vasakata pata ianae tina kotarue de koe ia, mana doka to gadokutona i kaega.”

³⁰Jesu i seko gogo dena, tanego kakiaro basoero iri go, “Manuru sakata tane ikoe go de ikoe go ia.”

³¹Gonae sinana Jesu mana kaena ro iri lama doka. Iri degere me tepa siporaṉa peka na pade ne, iri vazao ne so seko Jesu go mara siporo me peka ne iri go.

³²Iago basoero topu iri koloku kolo go Jesu iri sine ne ia, “Valeke! Sinamu, kaemu ro mana vavanimu ro go iri koe peka dona iri soko mia aro.”

³³Jesu itana ule ne qira basoero ne, igo, “Ake ria tane iri kanae, kaequro mana vavaniqu ro gogo era?”

³⁴I reṉa ne qira basoero iri koloku kolo go ia mana igo dena, “Mia! Ria to dena kanaero, kaequru, mana vavaniqu go era.

³⁵Basoe izazu ne to pata isoko go God tarina kanae ro, kaequro mana vavaniqu ro go.”