Read Varisi Maka 5 Bible Online

Maka 5 - Varisi bible

Maka 5

¹Jesu mana disipoloro ia iri za dokae kene kavana masi pipika na Qalili tepa Gerasa.

²Ṉalu Jesu iara siporo kasi ne me so koluka ne, kameka valeke i lama soba ia. Valeke dena iara za siporo me so leṉa ro iri tarutaru zego sinara qira vano le, mana valeke dena isiqane manuru sakata.

³Iago osina ṉalu ia iza kotarue so kukubo. Kaega to kaki basoe i mazala go qolotaruze na ia seni.

⁴Tanego osina ṉalu iri qolotaruze ia seni do i koroto vana ne so mana aeana iri vanadu ze go karua maekena ipequ vanaqe so go. Iago ikaega to ka basoe ikaraputa sivala ne go ia, go tina vanoto go ia.

⁵Musaqara mana kuse ia i telo taru zaso de ikoego kukubo ro ne, mana i koru taru mana i vae zeso tokamana tanuna ipaka ro ne go.

⁶Ṉalu Jesu iara zako laqalaqa me so valeke ne i miasoba zaqe Jesu i teteṉe me i lama koloku tutuṉe tarakenaqana Jesu mana i koru valavata igo.

⁷“Jesu Tuna God ikoego zakazaka! Ava tono vane ava era aro? Loborona vitoṉona God, era qa peni go oniki vakimata va!”

⁸Ia i seko go dena, tanego Jesu i sine ne ia, “Manuru sakata ono kasi ne valeke nae!”

⁹Jesu i tana ne ia, “Akena tane vitoṉomu?” Valeke igo, “Vitono qu, ‘Topuna,’ tanego remu qimu topu.”

¹⁰Ia i pene vakaraputa ze Jesu, “Oniki kakale vazao qirae manuru ro ne tepa nae.”

¹¹Ṉalu nae i topu boko ro iri ṉaṉae rikisina kubolo nae.

¹²Iago manuru ro ne iri lete pene sasakate Jesu go mara vazao qira qe de iri koe go boko ro ne iri go.

¹³Gonae Jesu iva mao ne qira, iago iri siporo kasi neto valeke ne, mana iri za kebae to boko ro ne. Pasi nae boko ro ne iri teteṉe qoqore kubolo nae mana iri soru za loka ne mana iri za le lupo so. Torana karua mao topu qira boko ro ne.

¹⁴Vano iri miasoka go boko ro ne iri mia patani sadaka go, iri teteṉe za komala mana iri za pepeu ze komala lavata ro mana komala suka ro go. Basoero na komala ro nae iri za, go mara ria mia pata i sadaka go iri go.

¹⁵Ṉalu iri lama dokae de ikoego Jesu iri za soba valeke ni pala go manuru sakata ro ne i kolokue degogo ne iara vabaribari mana nanao na iara tarove to go. Do vano iri mia go iri lete sareki.

¹⁶Vano iri miasoba ia iri za pepeu ne qira kero ne basoero ne de nigogo Jesu ni va velake go valeke ne. Mana iri pepeu napua pata nidoka qira go boko re ne.

¹⁷Iago basoero ne iri sine ne Jesu mara kasi ne to vudu ria iri go.

¹⁸Ṉalu Jesu i age to koluka ne, valeke ni pala bana go manuru ne i velaka go, i pene Jesu, “Era malulu nigo aro igo.”

¹⁹Do Jesu iki toqe ne kaega, mana i vane dena, “Gado ule za komala aro mana za mia qira vanovano aro mana sine ne qira pata ni zazu ni goe God tanego i lete nanao go.”

²⁰Iago valeke ne i kasi ne to nae izaza goe manoga komala ro na tepa Dekapolis, i tarama ne pata ni zazu ne ze go Jesu tanuna. Osiqira basoero iri gata go tarama ia iri lete nureke sasakata.

²¹Jesu mana disipoloro ia iri kava napu za kene kavana masi pipika ne. Ṉalu Jesu i vosoro za rikisi ne topu sasakata basoero iri lama teṉo kolo ia.

²²Gonae kameka valeke vitoṉona Jairus iza lama, valeke dena i batu na Pade Lotu ria vano Jiu. I lama koloku tutuṉe tarakenaqana Jesu.

²³Valeke ne i pene vakaraputa za Jesu sauna sale ia, igo dena, “Sale qole era i lete mokoso mana i garogaro to le, iago qa lete soko go aro mo lama mana sapu ze karisimu go mara too mana velaka napu.”

²⁴Iago Jesu i lulua to valeke ne, mana ṉalu iri zaza go topu sasakata basoero iri lulu muzi napu ne Jesu. Basoero iri lete topu, iago iri vari tutubeli ne go mara ria lamae de ikoe Jesu iri go.

²⁵Kaki kameka qole ikoe de gogo ne i pala mokoso ria qole ro torana manoga karua ave.

²⁶Ia i valupo ze to kesa ro ia de iri koe go vano vari vole, do iki velaka so kaega, mana mokoso ia ne izaza popoka koso igo.

²⁷Qole nae i gata Jesu i za lama, iago i za lamae de iri koego basoero ne, mana i za go me muzina Jesu, ivane dena nanao tanuna,

²⁸“Ṉalu era tuna siba so tumuna roku loda ia, era tuna velaka so igo.”

²⁹Ṉalu i siba so ia roku loda ia Jesu, parasana ne i kameka mamanava so.

³⁰Torana so nae Jesu i gata rove karaputa ia i sipore go tokamana, gonae i tabali ule qira basoero topu ne mana i tana, “Akena tane i siba go roku rera?” igo.

³¹Disipoloro ia iri vataule ne ia, iri go, “Qo mia topu sasakata basoero iri vari tutubeli go dena, iago avigo tane qo tana go?”

³²Do Jesu i taqia basoe ni siba go.

³³Qole ne i rove to pata i doka go, iago i lamae de ikoego Jesu, i sareki mana i nenedere, i lama koloku tutuṉu e tarakenaqana Jesu mana i sine ne ia pata ogoto i doka go.

³⁴Jesu i sine ne ia, “Sale qole era, vaogoto aro iva velaki go, mana kasi ara maqata napu tanego mokoso aro i lupo to.”

³⁵Pasi iara sekoseko so Jesu, iri lama doka to kakiaro basoero iri reqeme pade ia Jairus mana iri sine ne Jairus, “Sale qole aro i le bana to, iago oniki aro vanula ne valeke vari vatatana ne.”

³⁶Ṉalu Jesu i gata soba me pata iri sine go, ia iki vamazale kaega, do i sine ne Jairus, “Oniki maqata do vanadua vaogoto aro.”

³⁷Gonae Jesu iki soko kaega basoero ne tarina lulua go. Do tanuqira so Pita mana Jemisi mana kaena Jon go iri na lulua go.

³⁸Ṉalu iri lama dokae go pade ia Jairus, Jesu i mia qira basoero iri dae qanaqana valavata mana iri maqata.

³⁹Jesu i keba za loborona pade ne, mana i sine ne qira, “Kasi dae, sale qole dena i kamuku so,” igo.

⁴⁰Do basoero ne iri vakari ne ia, iago Jesu i kakale vasiporo lupo qira ria peka ne, mana i lulu qiru tamana mana sinana sale qole ne, mana kapisa disipoloro ia go iri keba za loborona kova i kekele go sinara na sale ne.

⁴¹Jesu i toqo karisina sale ne mana igo dena, “Talita kumi!” Talukasana, “Sale qole, qa sine ono degere!”

⁴²Sale ne i kameka degere me mana i teloteloe loborona pade ne. I manoga karua to ave na sale qole dena ṉalu idoka go pata dena.

⁴³Do Jesu i sine ne qira muniki pepeua pata dena de iri koego basoero ne. Mana i sine ne qiru vano vano ia, “Muna teke ne pata gege go mara ṉaṉa.”