Read Varisi Maka 7 Bible Online

Maka 7 - Varisi bible

Maka 7

¹Kakiaro vano Parisio mana vano vari vatatana na Tamana iri za reqeme Jerusalema mana iri teṉoe de ikoego Jesu.

²Iri mia kakia ro disipoloro ia Jesu iri ṉaṉa ne karisi qira iki dalo go kaega. Iri vatalukasa ze iriki sabore kaega karisi qira, valulu zena pata iri soko go vano Parisio de tina gogo basoero ne iri gogo, vatovato dena go tina lulua go lotu mana vatovato ṉalu bana ria.

³Tanego vano Parisio mana basoero Jiu go iri lulua tamana ro iri pala bana meze go kazigarata bana ro ria. Ṉalu tarina ṉaṉa go, tarina saboro kenaqe karisi qira ia tarinara ṉaṉa go.

⁴Pata gege ro iri za voli zego de iri volivoli ze go pata gege ne, tarina saboro kenaqa ia tarinara ge go. I topu napu tamana ria iri lulua gere saborena kapu, sereke mana ebata go.

⁵Iago, vano Parisio mana vano vari vatatana na Tamana iri tana ne Jesu, “Avigo tane disipoloro aro iriki lulua go kaega tamana ro ria kazigarata bana ro ita, go iri ṉaṉa ne so karisi qira iki dalo go kaega?”

⁶Jesu ivataule ne qira igo dena, “Ramu qamu vano tatakiu! Pata i sine bana go Isaia sauqamu ramu iogoto sivala ne qamu to, ‘God igo, Basoero dena iri vazaka zave so era seko ria, do puṉu qira iri laqalaqa nava so era.

⁷Iri ṉulavolomo ne so vazakava era tanego van vatatana na iri teke ne qira go basoero ne, pata ireqeso tamana ria tanuqira!’

⁸Qamu taru vatarikise tamana ia God, mana qamu lulua so Tamana ṉalu bana na vano basoe.”

⁹Jesu igo napu dena, “Qamu lete rove to ramu tane itana vakakavata na tamana ro ia God, mana luluna tamana ro ramu tanuqamu.

¹⁰Ramu qamu rove bana Tamana ia Mosese i sine go, ‘Muna vamazala qira tamaqamu mana sinaqamu. I sine napua, ṉalu basoe itulaṉa nego tamana ba sinana, basoe nae na vae vale.’

¹¹Do ramu qamu vari vatatana napu ne, ṉalu ka basoe izari ne go kaki pata go mara tavisi ne ze tamana mana sinana, do basoe nae igo, ‘Pata dena qa vanama ne zeto sosone zaqe to God,’

¹²iago basoe nae ne iki tavisi ne to kaega tamana mana sinana.

¹³Vari vatatana qamu teke ne qira basoero igogo dena zazao na, ivakuziki ne to seko ro ia God. Topu na pataro igogo dena zazao na tane qamu zazu ne go ramu.”

¹⁴Jesu ikoru qira basoero ne go mara ria lama vavaroṉono va velaka, igo. Ivane qira dena, “Muna gata vavelaka me go tamuna nanao rove go pataro dena.

¹⁵Pataro i reqe go tepa peka dena mana keba za loborona basoe gogo ne, iki vakore kaega basoe. Do pataro i reqe me loborona basoe mana siporo me peka dena, tane ivakore go basoe.

¹⁶Ka basoe i ko qeqele na mara gata seko ro dena.”

¹⁷Ṉalu i kasi ne qira basoero ne mana keba za loborona pade igo ia, disipoloro ia iri sine ne ia, go mara sine lukasa ne qira talukasana pataro i sine go iri go.

¹⁸Jesu ivane qira dena, “Ramu do ikaega napu ne qamu so nanao rove na pata, gere napu qira so na go? Qamuki nanao rove so kaega ramu tane pata ireqe go tepa peka dena mana keba za saqe na basoe gogo ne iki za vakore kaega basoe.

¹⁹Tanego iki zakoe kaega puṉuna basoe do iza koe salana basoe.” Ṉalu i sine go pata dena Jesu ivatatavata me osina pata gege ivelaka lupo so gena.

²⁰I sine napu ne qira, igo, “Pata i reqeme go nanao na basoe tane ivakore go basoe.

²¹Tanego loborona puṉuna basoe i reqeme go nanao go iara zazu ne go basoe pata sakataro mana go lara siko, vae vale basoe,

²²taunata, sokona pala na osina pata, mana zazu nena soso pata sakataro, poqe, zazu ne na ba sine vasadake na pata ni lete sakata sivala go, qora, pepeu valu na basoe vazakanapu mana zazu nena pata ni lulua go too bulabulaṉoe.

²³Iato osina pata ro dena to i reqeme go nanao na basoe go ni siporo me, mana ivakore go basoe go.”

²⁴Gonae Jesu i kasi ne nae mana izae kena garogaro na komala lavata Taia, iza koe loborona kaki pade tanego iki soko kaega basoero ne mara ria rove go igo, do imakuru to tina pipika go.

²⁵Kaki kameka qole isiqane manuru sakata sale qole ia, igata Jesu ikoego nae, gonae ilama koloku tutuṉe tarakenaqana Jesu.

²⁶Qole dena iki qole Jiu kaega do i podoe Ponisia vudu Siria. I lama pene vamoqere Jesu go mara kakale vakuziki ne manuru sakata isiqane go sale qole ia.

²⁷Do Jesu ivane dena, “Salero ne tane mara ria ge kenaqe go patagege ne. Tanego iki tora kaega tatana pala pata gege ria salero ne mana vanaqe ne qira sika piru ro ne go.”

²⁸“Batu,” igo qole ne, “ipata ogoto sivala to pata qo sine go, sika ro ne, do iri ge so tamuzala ro pata gege iri sorue go, tevolo ne” igo.

²⁹Iago Jesu ivane dena qole, “Tanego sauna to seko raro nae, iago, mo gado ule zato pade aro, mana tono za mia sale qole aro i kasi bana neto manuru sakata ne.”

³⁰Ṉalu qole ne iza doka to pade ia, iza mia sale qole ia i kekele vesu ne do manuru ne i kasi ne to ia.

³¹Gonae Jesu mana disipoloro ia iri kasi ne kena Taia mana iri za dokae komala lavata Saidon. Lupo nae iri za napue tepa kena Dekapolis. Taramuzina iri ara za dokae go masi pipika na Qalili.

³²Nae kakiaro basoero iri pala me kameka veleke i ikiki mana i kikibu go. Gonae iri pene Jesu go mara sapu ze karisina go mara velaka iri go.

³³Iago Jesu ilulu vamikia valeke ne i vakasi ne ze de iri koe go basoero ne, mana i siba zaqe kakaraputuna karua qeqele na valeke ne mana isuelapa karisina i siba zaqe lomena valeke ne.

³⁴Jesu i reṉa pokaqe rani ne mana i pala kameka marapuga lavata sivala, i sine ne valeke ne, igo, “Epata!” Talukasana, “Papaqa!”

³⁵Kameka goso nae qeqele na valeke ne ipapaqa mana kalamiana imalumu to vizu mana iseko to go.

³⁶Jesu iva kaega ne qira basoero ne mara ria kasi pepeu ne qira basoero pata i zazu ne go igo, do ria ara lete pepeu vasadake to iri go.

³⁷Osiqira vano iri gata go tarama na pata dena, iri lete poloso sasakata mana iri go, “Ava pata vari vanureke na izazu ne go valeke dena! Tanego vano kikibu iri seko mana vano ikiki iri gata pata to go!”