Read Varisi Maka 9 Bible Online

Maka 9 - Varisi bible

Maka 9

¹Jesu i sine ne qira, “Ma sine ne qamu pata ogoto. Kakiaro ramu dena tamuniki le kaega, go tina za doka go ṉalu tamuna miasoba, Too ikoe go vari miasoka ia God tina za lama go.”

²Taramuzina vaonomona musaqara, Jesu i lulu qira Pita, Jemisi mana Jon iri popoka za kaki kameka kubolo zakazaka iri zako vamikie. Iri mia iri go ria tarapisa, tokama na Jesu i kavala, mana poga ia i lete kakasa mana i damara.

³Kaega kaki basoe na vudu pua dena i mazala go saboro vadalo na poga kakasa igogo dena.

⁴Gonae kapisa disipoloro ne iri reṉa ne qiru Ilaiza mana Mosese iru vapepeua Jesu.

⁵Pita i seko tabe zaqe Jesu igo, “Valeke vari vatatana ilete velaka sivala remu qimu koego dena, iago remu mi zazu ne kapisa pade, kameka ke raro, kameka ke ia Mosese mana kameka ke ia Ilaiza.”

⁶Pita i seko go dena iki rove so kaega kapata go i sine go, tanego osiqira tarapisa iri sareki.

⁷Iri ara go so nae ria i lama kameka toba lama sapu lupo qirae so ria dudulena, mana kameka ovaṉa ireqeme go loborona toba ne igo, “Iato dena Sale ogoto era qa lete mamaligara ne go, muna gata pata i sine go!”

⁸Gonae iri mata taqitaqi to ria do ki mia to kaega ka basoe, do tanuna so Jesu iko tavisi qira go.

⁹Ṉalu iri za qoqoro me kubolo ne Jesu i sine vakarapata ne qira ria tarapisa, “Muniki sine ne kakia basoe pata qamu mia go, go tina za doka ṉalu era Tuna basoe tuna za too napu mego tepa le ne.”

¹⁰Iri vaogote to ria tarapisa pata i sine ne qira go Jesu, do loborona ko ria tarapisa iri vari sine ne ria tane sauna pataro dena iri go, “Avana tane koro vatalukasa zego ia too napu me tepa le i sine go?”

¹¹Gonae ria tarapisa iri tana ne Jesu, “Avigo tane vano vari vatatana na Tamana iri go. Ilaiza to tina lama kenaqa iri gogo?”

¹²Jesu i vataule igo, “Pata ogoto Ilaiza to tina lama kenaqa, go tina vanama go osina pata, do avigo tane Buka tabo ne i sine go, ‘Tuna basoe tarina va vokare mana tarina lete vasakata nego igogo?’

¹³Ma sine ne qamu, Ilaiza ilama bana to, do basoero ne iri lete vasasakata ne mana iri lulua so nanao qira tanuqira. Iago pata ni sine go Buka tabo ne i ogoto.”

¹⁴Ṉalu Jesu mana kapisa disipoloro ne iri ule me de iri koego kero ne disipoloro ne, iri mia topu basoero iri lama teṉokolo qira go ria, mana kakiaro vano vari vatatana na Tamana iri vari valegue de iri koego.

¹⁵Ṉalu basoero ne iri miasoba zaqe Jesu iri poloso mana iri teteṉe za soba ia.

¹⁶Jesu i tana ne qira disipoloro ia, igo, “Avana tane qamu vari valegu ne go na?”

¹⁷Kaki kameka valeke iko tavise go de iri koego basoero ne igo, “Valeke vari vatatana, era qa pala me sale valeke era isiqane manuru sakata mana iki va seko kaega go.

¹⁸Ṉalu manuru ne i lama pala go, i vana ne ze pua ne, gonae sale ne i kuqu raporapo mana ivari kizakiza ne saqe mana tokamana itotoqo sivala go. Iago, qa pene qira disipoloro aro go mara ria kakale vakuziki ne manuru sakata ne qa go, do i makuru qira.”

¹⁹Jesu i sine ne qira igo, “Ke basoero, ramu i kaega ne qamu vaogoto de ikoego God! Ava tina go to ka umata na ṉalu tuna ko tavisi qamu, go tamunara vaogoto go. Pala valame sale nae!”

²⁰Iri pala vazao ne Jesu sale ne. Ṉalu manuru ne i reṉa ne Jesu, iva nenedere sale ne, mana i vana ne ze pua ne mana raporo i siporo me saqena sale valeke ne.

²¹Jesu i tana ne tamana sale ne, “Ade torana tane i pala go ia pata dena?” Tamana sale ne igo, “Pasi i suka mego ia pala bana so igo.

²²Topu ṉalu i vasoru zaqe nako ne mana loborona besi, go mara vae vale igo. Iago ṉalu qo mazala go, ke ono tavisi ne qemu mana va velaka nava go.

²³Ove, igo Jesu, aro do qo mazala so, osina pata i malumu so ṉalu basoe i taru ze vaogoto ia de ikoego God?”

²⁴Tamana sale ne i za seko me mana idae, igo, “Iko nava vaogoto, do iki karaputa kaega, iago tavisi nava go mara karaputa vaogoto era?”

²⁵Jesu i mia rove basoero ne iri lete lamae de ikoego, iago i sine vamoqere ne manuru sakata ne igo, “Aro manuru ikiki mana kikibu nae ono siporo kasine sale valeke nae mana oniki ara keba ule napu go!”

²⁶Manuru sakata ne i koru valavata i vana ze sale ne pua ne mana iza siporo me mana pasi nae sale ne igere pata ile, basoero ne iri go, “Ile to sale ne!”

²⁷Do Jesu iza toqo vadegere ze karisi na sale ne, mana sale ne iza degere me to.

²⁸Taramuzina nae Jesu ikeba za kaki kameka pade, gonae disipoloro ia iri tana vamiki ne ia, “Avigo tane remu i makuru qemu go kakale na manuru ne na?”

²⁹Jesu igo, “Qamu rove, pene so i mazala go kakale vakuziki ne manuru sakata igogo dena.”

³⁰Jesu mana disipoloro ia iri kasi ne komala nae mana iri zaza sivala za Qalili. Jesu iki soko kaega basoero ne tarina rove go de ikoego,

³¹tanego ivatatana qira disipoloro ia mana ivane qira dena, “Era Tuna basoe tarina pala vazao ve karaputa ria basoero ne, go tarina vae vale ava go, do taramuzina vapisana musaqara tuna too napu me.

³²Do ria disipoloro ia ne iriki nanao rove so kaega vari vatatana dena, tanego iri sareki ne tana ne na ia.

³³Ṉalu iri lama dokae go Kapanaum iri keba za loborona kaki kameka pade. Nae Jesu i tana ne qira disipoloro ia, “Avana tane qamu vari valegu ne ze go zuka ne lama gata vae go?”

³⁴Do iriki sine ne so kaega ka pata. Tanego, lama iri vae go zuka ne iri vari valegu ne tanuqira, sauna akena tane ilete mazala sivala ne qira go osiqira ne.

³⁵Jesu i koloku mana i koru qira manoga karua disipoloro ia mana i sine ne qira, “Basoe i soko go tina kenaqa ne qamu go, ia mara vaqoqore to tanuna mana tina basoe zazu ria to osina basoero go.”

³⁶Gonae i pala kameka sale suka iva degere ze tarakenaqa qira osiqira ne, mana itaru zaqe karisina avarana sale ne mana i sine ne qira,

³⁷“Ka basoe iva velaka ne go sale suka ro iri gogo dena loborona vitoṉoqu era i velaka nava to era go. Mana ka basoe iva velavelaka nava era, iva velavelaka napu neso ia i turi nava go era.”

³⁸Jon ivane dena Jesu, “Valeke vari vatatana, remu qimu mia kaki valeke iva zazua vitoṉomu aro go i kakale ze go manuru sakata ne, do remu qi sine ne mara mamanava, tanego iki ko tavisi qita kaega.”

³⁹Do Jesu i sine ne Jon mana disipoloro ia, “Kasi vamamanava zena basoe ivazazu zego vitoṉoqu era pata vari vapoloso, tanego basoe nae i makuru tinara seko vasakatava era.

⁴⁰Tanego basoe iki vasakata qita kaega ike ita to.

⁴¹Ma sine ne qamu pata ogoto, Ka basoe i teke ne qamu kameka kapu besi, God tina teke ne ia voli na, tanego ramu qamu disipoloro era.”

⁴²Jesu igo napu dena, “Ṉalu kaki basoe iva mimia qirae go salero suka vatovato sakata go iri vana ne go vaogoto ria, basoe nae itora mara pala kameka ipaka lavata mana doki ze kokolina mana vaqoqoro zaqe loka kurina masi ne.

⁴³Ṉalu karisimu i vakuziki nego vaogoto aro, ono puta vakuziki ne, itora so kameka karisimu mara ko nigo, mana go tono keba zago Too ikoego vari miasoka ia God. Tanego ilete sakata sivala ṉalu isoma go karua karisimu, mana za kebae nako iki rove go kaega le.

⁴⁴

⁴⁵Ṉalu karua makemu i vakuziki ne go vaogoto aro, ono puta vakuziki ne, itora so kameka makemu mara ko nigo, mana go tono keba zago Too ikoego vari miasoka ia God. Tanego ilete sakata sivala ṉalu isoma go karua makemu, mana za kebae na nako iki rove go kaega le.

⁴⁶

⁴⁷Ṉalu karua matamu i vakuziki nego vaogoto aro, ono lobiki vakuziki ne, itora so kameka mata mara ko nigo, mana go tono keba zago Too ikoego vari miasoka ia God. Tanego ilete sakata sivala ṉalu i soma go karua matamu mana za kebae na nako iki rove go kaega le.

⁴⁸Komala nae dodole ro iri ge go tokamana basoe iriki rove kaega le, mana nako ikoego iki rove kaega le, ikamu taru doka to gado kutona ikaega.

⁴⁹God tina vadalo qirae osiqira basoero ne nako, gerena keno iri vadalo ze go pata iri komakoma ne go.

⁵⁰Keno i pata velaka, do ṉalu i kaega go gagaemana na, i makuru go tono ara va velake go. Iago, vazaria keno na loborona ko varikitaki ramu, go tamuna ko bule osina ṉalu.”