Read Varisi Luka 13 Bible Online

Luka 13 - Varisi bible

Luka 13

¹Ṉalu nae, kakia ria basoero iri lama sine ne Jesu sauqira kakiaro vano Qalili. Pilato ivae vale qira torana iri ara zazu nego komakoma ria de i koego God.

²Jesu iva taule ne qira, “Qamu nanao le ria vano Qalili nae iva sadake ria to iri vasakata pata sivala ne qira kero ne vano Qalili?

³Kaega! Masine ne qamu, ṉalu qamu ki manava sakata ne kaega vasakata pataro ramu, osiqamu tamuna le gere napu qira so ria.

⁴Avigo manoga kazalu basoero iri le go Saelom, ipatu qira go pade ne? Qamu nanao iva sadaka ogote ria to dena iri lete sakata sivala ne qira ria iri koego Jerusalema?

⁵Kaega! Do masine ne qamu. Ṉalu ramu osiqamu qamuki vana ne kaega vasakata pata ramu, osiqamu tamuna le gere napu qira so ria nae.”

⁶Jesu i sine ne qira vapadapada dena, “Kaki valeke i podoe barue ia kameka tokama karukae. Gonae iza taqia urena, do iki soba so kaega kaki kameka.

⁷Gonae i sine ne valeke i miasoka go barue iane, igo, ‘Vapisana to ave dena qa lama taqia go urena karukae dena, do kaki kameka qaki soba so kaega. I tora ono qeto mana vanaqe, niki go ge volome so pua velaka dena.’

⁸Do valeke i miasoka go barue ne igo, ‘Batu mo tarua tekere torana kameka napu ave, era ma sola kolo ze pua mana puluma ze vosuvosu go mara morumoru pua nego tina ṉaṉa velaka go.

⁹Bana go ara ure so ave i lama go, nalu iki ure to kaega ia nara qeto vanaqe go.’ ”

¹⁰Kaki kameka musaqara Sabat, Jesu iva tatana qira basoero ne loborona kaki Pade Lotu ria vano Jiu.

¹¹Kaki kameka qole ikoe de gogo ne i siqane manuru sakata, mana iva mokose ia torana manoga kazalu ave. I makure degere totoloṉo.

¹²Ṉalu Jesu i mia qole dena i koru zaqe mana sine ne, “Vasakata pata ro aro iri talupasa.”

¹³Mana i sapu ze karua karisina qole ne, mana qole ne i degere totoloṉo va sivala so, mana ivazaka God.

¹⁴Ṉalu valeke batu na Pade Lotu ne i mia Jesu iva velake go qole ne musaqara Sabat i lete muma i koru me, mana i sine ne qira basoero ne igo, “Iko bana so kaonomo musaqara qata mazala go zazu, iago muna lama musaqara ro nae go mara vole qamu, do musaqara Sabat kaega.”

¹⁵Batu Jesu iva taule ne ia igo, “Ramu qamu vano tatakiu, topu ramu dena pata volomo musaqara Sabat, ramu bulumakao ba donki ro ramu qamu za teke ne qira besi.

¹⁶Do qole dena i podoe sinaqe ia Abra-am mana Satana i qolo ia manoga kazalu ave. Iago avigo i sakata lukase na mokoso ia ṉalu Sabat?”

¹⁷Seko ia Jesu iva agava lupo qira vano iri kana ne go ia. Do ria basoero ne iri lete kula ne pata velaka sivala ro i zazu nego Jesu.

¹⁸Jesu i tana ne qira basoero ne, “Avana i gere go Too ikoego vari miasoka ia God? Ava patana tuna vagere zego.

¹⁹I gere paturu suka na Mastad. Kaki valeke i pala mana leba ze barue ia. Ṉalu i podo me i gere kameka moki lavata, palero iri lama zazu kubasae paqarana rone.”

²⁰Jesu igo napu dena, “Ava patana tuna vagere napu ze go era Too ikoego vari miasoka ia God?

²¹I gere kaki qole i pala de suka isti mana i robe palu ze manoga kima palava, iki umata kaega i keba mana puraka me, palava ne.”

²²Jesu i zaza sivale komala lavata ro, mana komala suka ro. Iva tatana qira basoero mana iza dokae Jerusalema.

²³Kaki basoe i tana ne Jesu igo, “Batu avigo kavia so ria basoero tarina kavele go ba?” Jesu iva taule ne qira igo,

²⁴“Ramu muna lete pada ne keba za na siporaṉa suka nae, tanego topu ria iri pada ne, do tina makuru qira keba za na loboro.

²⁵Ṉalu valeke batu na pade i degere i kokoqua siporaṉa ne, ramu tamuna degere me peka ne mana kekeqere siporaṉa ne mana tamuna sine me, ‘Papaqa siporaṉa ne batu,’ Do ia tina vane qamu dena, ‘Era qaki rove kaega kade qamu reqe mego.’

²⁶Ramu tamuna vataule ne ia mana tamuna go, ‘Remu to qimu ṉaṉa mana qe besi tavisi go aro. Mana aro to qo va tatana qemue go komala remu.’

²⁷Do ia tina go napu dena, ‘Era qaki rove kaega kade qamu reqe mego. Kasi nava era tanego too ramu i lete sakata.’

²⁸Ramu tamuna dae mana vari kizakiza ne saqe qamu, ṉalu tamuna mia Abra-am, Aisak mana Jekop mana propeta ro iri koego Too ikoego vari miasoka ia God. Do ramu tarina kakale vasiporo qamue komala nae.

²⁹Vano iri reqe mego tepa kebana saṉa mana zununa sana, mana osina dia kolabana pua go tarina koloku tavise go ṉaṉa lavata na Too ikoego vari miasoka ia God.

³⁰Ṉalu nae basoero iri kenaqa go ninidena tarina za muzi mana ria iri muzi go ninidena tarina za kenaqa.”

³¹Kameka ṉalu na so nae kakia ria vano Parisio iri lamae de ikoe Jesu mana iri sine ne ia, “Aro ono kasi ne to dena mana zae kaki dia. Tanego batu lavata Erode isoko vae vale go aro.”

³²Jesu iva taule ne qira igo, “Muna za sine ne sika piru nae, ‘Era tuna kakale qira manuru sakata ro mana vole qira basoero, ninidena bakubaku, mana vapisana musaqara so tunara valupo go zazu era muna za sine ne.’

³³Do ninidena bakubaku mana musaqara ro iri kome go ne era tuna lulua so zuka era. Iki tora kaega tarina vae vale ze go propeta de kakavata do Jerusalema so.

³⁴Jerusalema! Jerusalema! Aro to qo vae vale qira go propeta ro, mana qo vana ze ipaka vano palapala seko ro ia God ituri ne me deqo koego! Topuna ṉalu qa lete soko pada ne opo qamue karisiqu gerena kokorako iopo qira tunaro polana babalakuru na, do aro qo sida nava.

³⁵Iago, God tina siporo kasine pade tabo ramu. Qa sine ne qamu ramu tamuna mia ava kaega era go tina doka go ṉalu ramu tamuna sine go, ‘God iva tabo ia i reqe mego vitoṉo na Batu ne.’ ”