Read Varisi Luka 17 Bible Online

Luka 17 - Varisi bible

Luka 17

¹Jesu i sine ne qira disipoloro ia, “Pataro tina mazala go va soru qirae vasakata pata basoero ne tinara sadaka me, do makuru lavata sivala tina soba basoe niva sadake go pataro igogo ne.

²Basoe iva soru ze vasakata pata kameka sale suka iva ogoto ava go era, basoe nae i vasakata pata, itora so basoe nae mara ria doki ze kameka ipaka lavata kokolina mana vazunu zaqe masi ne.

³Iago ramu muna miasoka va velake pataro qamu zazu ne go!” Jesu i sine napua, “Ṉalu kaki togamu, i vasakata pata, muma ne ia mana ṉalu ia i maqata ne kebu ro ia, ono nanao ule ne ia.

⁴Ṉalu ia iva sasakata nigo aro kavitu ṉalu loborona kameka musaqara, mana kavitu zaza napu i ule me mana igo, ‘Era qa maqata ne kebu era?’ I velaka aro ono nanao ule ne ia.”

⁵Apostoloro ne iri sine ne Jesu, “Valavate va ogoto remu.”

⁶Batu ne i vataule, “Ṉalu ramu tara kone qamu vaogoto i gere go lavata na paturu na mastad ne, qamu mazala so sine ne moki dena, ‘Ono tarapusu mana za podoe masi dona,’ mana ia tina va ogoto qamu so.”

⁷Jesu i sine napu ne qira, “Ṉalu kakia ramu tara kone valeke zazu ia, iza zazue barue, ba i miasoka sipi. Ṉalu ia igado ule me barue ne, avigo tono sine ne ia, katikili za ṉaṉa tono vane ba?

⁸Kaega! Tono sine ne ia, ‘Vanama nava pata gege era. Ono vakeba ne roku meno mana valame pata gege mana besi era go, taramuzina to nae tono ara mazala go za ṉaṉa.’

⁹Valeke batu ne iki ara seko velaka ne kaega valeke zazu ia, tanego ia i zazu neso pata i soko go batu ia.

¹⁰I gere napua so ramu ṉalu qamu zazu lupo ne osina ro pata iri sine ne qamu go, muna sine, ‘Ita qata vano zazu so, qata zazu neso zazu ro ita.’ ”

¹¹Loborona zaza ia Jesu i vele zae go Jerusalema, ia i zuka goe varikuto na pua Samaria mana Qalili.

¹²I lama garogaro to kameka komala, ilama soba qira manoga basoe iri ko vokara ne mokoso i pala go kapotona tokama qira. Iri degere va laqalaqa meso.

¹³Mana iri koru, “Jesu! Batu! Ono nanao ule ne qemu!”

¹⁴Jesu i mia qira mana i sine ne qira, “Za mana za mia qira patere ro go mara toere qamu.” Ṉalu iri za iri velaka lupo so.

¹⁵Kaki kameka ria ne i mia tokamana ni velaka go. I ule me i koru va lavata i vazaka God.

¹⁶I sorue pua ne, tarakanaqana makena Jesu mana i seko velake ia. Valeke dena ne ivaleke Samaritano.

¹⁷Jesu igo, “Manoga basoe tane qamu velaka go. Ade iri qoe to ria taraia ne?

¹⁸Avigo tane valeke kakavata dena so iule me mana ilama seko velake go God?”

¹⁹Mana Jesu i sine ne ia, “Degere mana zaza to aro, vaogoto aro iva velaki go.”

²⁰Kakiaro vano Parisio iri tana ne Jesu, ava ṉalu tina lama doka go Too ikoego vari miasoka ia God. Jesu iva taule ne qira, “Lama na Too ikoego vari miasoka ia God iki gere kaega lama na pataro qamu mazala go mia zena mata qamu.

²¹Kaega ka basoe tina sine, ‘Mia, iato dena,’ ba ‘Iato dona,’ tanego Too ikoego vari miasoka ia God ikoe loboro qamu ramu.”

²²Conae i sine ne qira disipoloro ia, “Kaki kameka ṉalu tinara lama go, ramu tamuna lete soko to mia ava era Tuna basoe, do tamuniki miasoba so kaega.

²³Tina ko kakiaro basoero tarina vane qamu dena, ‘Mia, iato dona,’ ba ‘Mia iato dena,’ do muniki za taqia.

²⁴Ṉalu tina kapi go mana tatavata i damare go zakazaka ne, reqe kaki tepa mana za dokae kene tepa gogo ne. Tina gere napua so ṉalu era Tuna basoe tuna za lama go.

²⁵Do kenaqana ne ia tina pala vokara mana ria basoero dena tariniki soko kaega ia.

²⁶Pataro i sadaka bana go ṉalu ia Noa, tina sadaka gere napua so ṉalu era Tuna basoe tuna za lama go.

²⁷Osina basoero ne iri ṉaṉa mana ge loka go, valeke ro mana qolero iri busi, go iza doka so, rialu Noa ikeba za koluka ia, mana kiale lavata i lama mana vae vale lupo qira go.

²⁸Tina gere napua so ṉalu ia Lote, basoero ne iri ṉaṉa mana ge loka taru so iri volia mana iri volivoli ne go, iri leleba mana zazu pade go.

²⁹Do musaqara na ṉalu Lote i kasi ne Sodom, nako lavata i soru me tepa rani mana i lama vae vale lupo qira.

³⁰Tina gere to musaqara ro nae ṉalu era Tuna basoe tuna za lama go.

³¹Musaqara nae tina za lama go, ka basoe iza koego popoko na pade ia, tiniki mazala kaega ule za pade ia, go tina za pala patapata ro ia. Gerena napu so ka basoe iza koego barue ne tiniki ara ule napu za kaega pade iago tina za pala go patapataro ia.

³²Muna nanao tarua de igogo qole ia Lote.

³³Ka basoe i soko go vakavele na too ia, tiniki pala kaega, mana ka basoe iva vana ne too ia, tinara va kavele too ia.

³⁴Ma sine ne qamu, kuse nae karua basoe tiruna kamukue kameka vesu, kaki kameka tarina lama pala vakuziki ne, kameka so tina ko sivala go.

³⁵Karua qole tiruna vae sila, kaki kameka tarina pala vakuziki ne mana kameka tina ko sivala go.

³⁶Karua valeke tiruna koe barue, kaki kameka tarina pala vakuziki ne, mana kameka tina ko sivala.”

³⁷Ria disipoloro ia iri tana ne, “Ade tepa tina sadaka me go pata dena na Batu?” Jesu i vataule, “De ikoego sinara na basoe, pale kilukapa ro tarina lama teṉoe de igogone.”