Read Varisi Luka 18 Bible Online

Luka 18 - Varisi bible

Luka 18

¹Jesu i sine ne qira disipoloro ia vapadapada dena, go ria tarina pene taru so mana mara ria kasi pela go.

²“Kaki kameka komala ikoe kameka valeke batu varitanae, valeke dena iki sareki ne so kaega God mana iki va kapata qira so kaega basoero ne.

³Mana komala igogo ne iko napu kameka qole nanaro. Qole nanaro nigogo ne iza tarue so de ikoego valeke batu varitanae ne, mana iza pene ia igo, ‘Tavisi nava mana va totoloṉo nava pata makuru ro dena, de ikoego ria kana ro era,’

⁴I lete umata sakata to valeke batu varitanae ne, i kasina zazu ne na pata ni sine ne go qole nanaro ne, do taramuzina i vane dena tanuna, ‘Pata volomo era qaki sareki ne kaega God ba va mazala qira kaega basoero ne do,

⁵era ma tavisi neto ia sauna va totoloṉo na pata ni soko go. Tanego ṉalu tuniki zazu ne kaega era, iane tina poro lama taru so, gogo tina ara vasakate to nanao qu era!’ ”

⁶Jesu i sine napua, “Ramu qamu gata to pata ni sine go valeke batu varitanae ne.

⁷Iago avigo qamu nanao God tiniki va totoloṉo kaega makuru ro ria vano i vine qira go, iri dae taru zaqe ia nogotona kuse mana musaqara? Avigo qamu nanao God tiniki tavisi katikili ne qira kaega?

⁸Ma sine ne qamu. Ia tina tavisi katikili ne qira va totoloṉo na makuru ro ria. Do era Tuna basoe, avigo tuna soba ze kolabana pua dena vano iri vaogoto go, ṉalu tuna za lama go?”

⁹Jesu gonae i sine napu ne qira seko vapadapada dena, tanego kakiaro basoero iri go, iri lete totoloṉo, mana iri mia va qoqoro qira kero ne basoero ne.

¹⁰“Kaki kameka ṉalu, karua valeke iru zae Pade Lotu go tiruna na za pene, kameka valeke Parisio varuana ne valeke palapala takisi go.

¹¹Valeke Parisio ne i degere mana i pene, igo ‘Batu! Qa seko velaki go, tanego qaki valeke ṉaṉa siko kaega, qaki poqepoqe kaega, qaki taunata kaega gere qira basoero topuro ne, qa seko velaki go, tanego qaki gere kaega valeke palapala takisi ni ko mego taramuzi dona.

¹²Qa qaniqani karua musaqara nogotona kameka vuiki, mana kaki takoboro suka na vavagado era qa sosovolomo ne go,’

¹³Do valeke palapala takisi ne, iza degere va laqalaqa me so, iki kadeka qe kaega rani ne, do ipuda bebenuna mana i sine, ‘God, nanao ule nava me, era qa valeke vasakata pata,’

¹⁴Ma sine ne qamu pata ogoto, valeke palapala takisi dena i gado ule za pade ia, mana i lete totoloṉoe matana God, ba valeke Parisio dena ne, kaega! Tanego ka basoe i vazaka tanuna, God tinara va qoqore ia mana ka basoe iva qoqore go tanuna, God tinara va popoka ia.”

¹⁵Kakiaro basoero ne iri pala me salero ria de ikoego Jesu go tina, taru ze karisina kuzuku qira mana vatabo qira go. Ṉalu disipoloro ne iri mia iadena, iri muma ne qira basoero ne.

¹⁶Do Jesu i koru qira salero ne mana igo, “Valame qira salero de qa koego era, mana kasi va kaega qira, tanego Too ikoego vari miasoka ia God ike ia ka basoe i gere qira go salero dena.

¹⁷Nanao tarua iadena! Ṉalu ka basoe iki soko kaega toṉove na Too ikoego vari miasoka ia God, gerena sale suka, basoe nae tiniki ara keba za kaega.”

¹⁸Kaki kameka valeke batu ria vano Jiu i tana ne Jesu, “Valeke vari vatatana vtlaka!” igo, “Avana to tuna zazu ne go era, go tuna pala go too iki rove go kaega lupo?”

¹⁹Jesu i tana ne ia, “Avigo qo koru ve go era velaka? Kaega ka basoe i velaka go, do tanuna so God, ni velaka go.

²⁰Qo rove bana so Tamana ne, oniki taunata, oniki vae vale basoe, oniki siko, oniki sine pata poqe de iri koego kero ne basoero, vamazala qira tamaqamu mana sinaqamu ro.”

²¹Valeke ne ivataule, “Pasi qara suka mego mana lama doka to ninidena gogo ne, era qa vaogoto lupo so Tamana ro nae.”

²²Ṉalu Jesu i gata pataro dena, i sine ne ia, “Kameka so pata iara ko ni go, tono zazu ne. Ono volivoli ne osina pataro qo toṉove go mana ono teke ne qira vano situ, kesa na patapataro aro, mana aro tono ara pala vavagado tepa rani, mana lama luluava era.”

²³Do ṉalu valeke ne igata seko ro dena, i lete maqata sivala, tanego i lete vavagado.

²⁴Jesu i reṉa ne ia, ilete maqata mana i sine ne ia, “I makuru ria vano iri vavagado tarina keba zago Too ikoego vari miasoka ia God.

²⁵I makuru sivala napu kamolo tina surae go talopana nila sisira, do ilete makuru sivala ne basoe vavagado tina keba zago Too ikoego vari miasoka.”

²⁶Basoero iri gata go pataro i sine go Jesu iri tana ne ia, “Akena go to tina za kavale?”

²⁷Jesu ivataule ne qira igo, “Pataro ni makuru qira go basoero zazu nena, i lete malumua so God zazu nena.”

²⁸Gonae Pita i tana ne Jesu, “Mia avigo remu, remu qi kasi ne komala remu, patapataro remu mana qi lulu go aro.”

²⁹Iago Jesu i sine ne qira, “Masine ne qamu pata ogoto, ka basoe i tarua, qole ia, ba togana, ro ba vanovano ia, ba salero ia sauna Too ikoego vari miasoka ia God.

³⁰God tinara teke ne ia topuna pata velaka torana dena, mana ṉalu muzi ia tinara pala too iki rove kaega za lupo.”

³¹Jesu i pala vamiki qira ria manoga karua disipoloro ia mana i sine ne qira, “Gata! Ita mata zae Jerusalema, de igogo ne osina seko ro iri sine bana go ria propeta ro ne, tina lama sadaka ogoto.

³²Tarina vazao ve era de iri koego ria vano iriki Jiu go kaega go tarina vakari nava, tarina damu ava, tarina suelapava,

³³tarina simava, mana vae vale ava, do taramuzina kapisa musaqara, era tuna too napu me tepa le.”

³⁴Do disipoloro ia iriki nanao rove so kaega talupasana pata ni sine go Jesu, tanego i pipika ne qira, iago iriki rove so kaega talupasana pataro ni sine go Jesu.

³⁵Jesu i lama garogaro to Jeriko, de igogo ne ikoe kameka valeke kodo i kolokue rikisina zuka mana i pene kesa, ba pata gege, de iri koego basoero iri zaza sivala ego zuka ne.

³⁶Ṉalu i gata qira basoero ne iri lama sivala, i tana ne qira, “Avana tane i sadaka go?”

³⁷Basoero ne iri sine ne ia, “Jesu na Nazaret, i lama sivala za go nae.”

³⁸Valeke kodo ne i koru valavata igo, “Jesu, Tuna Davita! Nanao ule nava era!”

³⁹Basoero iri koego kenaqana ia ne, iri muma ne ia mana iri sine ne mara duduli. Do ilete koru valavata napu igo, “Jesu! Tuna Davita! Nanao ule nava era!”

⁴⁰Go nae Jesu i noto mana i sine ne qira, tarina lulu valame valeke kodo ne de ikoego tanuna, ṉalu valeke kodo ne i lama garogaro, Jesu i tana ne ia,

⁴¹“Avana tane qo soko ve go era tuna zazu ni goe na?” Valeke kodo igo, “Qa soko ma mimia napu qa go.”

⁴²Jesu i sine ne ia, “Mimia to aro! Vaogoto aro iva velaki go.”

⁴³Katikili so valeke kodo ne i mimia napu, i lulua Jesu mana ivazaka God. Ṉalu basoero ne iri mia pata dena, iri vazaka God.