Read Varisi Luka 19 Bible Online

Luka 19 - Varisi bible

Luka 19

¹Uesu iza go sivale loborona komala Jeriko.

²Komala igogo ne, ikoe kaki batu palapala takisi vitoṉo na Zakius, i lete vavagado go.

³Ia ilete soko to miasoba na kake ni Jesu, do tanego iki loda kaega, mana topu sasakata basoero ne, iago i makure tina miasoba zaqe Jesu.

⁴Iago i teteṉe za kenaqa qira basoero ne, mana iza kebae kaki moki iri vitoṉo ze sikamo, go tina mia Jesu tina go sivalae zuka ne igo.

⁵Ṉalu Jesu i lama dokae de igogo ne, i kakadeka mana i sine ne Zakius, “Katikili siporo me Zakius, tanego era ninidena tuna kebae pade aro.”

⁶Gonae Zakius i katikili siporo me mana i lete kula sivala ne ia.

⁷Osiqira basoero iri mia go ia ne iri vatupia to vari nuinui ne ia, iri go, “Valeke dena, iza kebae so pade ia valeke vasakata pata.”

⁸Zakius i degere mana i sine ne Jesu, “Gata! Batu, takoboro na pataiu qa toṉove go, tunara tekene qira vano iri situ go. Mana ṉalu qa siko go patapata ia kaki basoe ne, tuna voli vaule ne ia torana kavasi papala sauna pataro qa siko ze go ia.”

⁹Jesu i sine ne ia, “Ninidena vari vakavele i lama koe pade dena, tanego valeke dena do, i reqe meso sinaqe ia to Abra-am.

¹⁰Era Tuna basoe ne, qa lama zaz ne tuna taqia mana va kavele ka basoe ton i rore go.”

¹¹Ṉalu basoero ne iri gatagata pepeu ro ia Jesu, i sine napu ne qira vapadapada dena. Torana nae ne Jesu i garogaro to za doka ena Jerusalema, iago basoero ne iri nanao Too ikoego vari miasoka ia God i garogaro to lama sadaka.

¹²Iago Jesu i sine ne qira vapadapada dena, “Kameka basoe lavata isoko vele zae na kaki vudu laqalaqa, go tarina za teke ne ia karaputa go tina batu lavata go, mana taramuzina nae ia tinara za ule me, mana tina lama batu lavate go komala ia.

¹³Do tarakenaqana iara zaza go, ikoru qira manoga basoe zazu ia, mana iva nogoto qirae kameka kesa qolu, i sine ne qira, ‘Muna pada ne va zazu va popoka na kesa dena torana zaza tuna vae go era.’

¹⁴Do basobasoero ia iriki soko kaega ia, iago iri vazao qira vano palapala seko ria tarina za sine, ‘Remu qiki soko kaega valeke dena tina batu lavata remu go!’

¹⁵Do valeke ne iza batu lavata to, mana iza gado ule me. Gonae iva zao seko ne qira vano zazu ia tarina lamae go tarakenaqana, tanego i soko rove na ava via to topu na kesa iri va ure go.

¹⁶Kameka valeke i lama kenaqa mana igo, ‘Batu, kameka kesa qolu qo teke nava go, qava zazua mana ninidena, manoga dia kesa to qava ure ze go.’

¹⁷‘Velaka sivala!’ igo batu ne, ‘aro qo valeke zazu velaka! Tanego aro qo va zazu va velake pata suka ro, iago era tunara vamia soka ge aro manoga komala lavata ro.’

¹⁸Varuana valeke zazu ne i lama mana igo, ‘Batu kameka kesa qolu qo teke nava go, qava zazua mana ninidena kalima dia kesa to qava ure ze go.’

¹⁹Dekoe valeke zazu dena, batu ria i sine ne ia, ‘Aro tono miasoka kalima komala lavata.’

²⁰Kakia napu valeke zazu ne, i lama mana igo, ‘Batu, iato dena kesa qolu aro, qa kade ze poga mana qa pika go.

²¹Era qa sareki nigo aro tanego aro qo valeke makuru, qo pala so pata qoki toṉove go kaega, mana qovae so pata qoki leba go kaega.’

²²Batu ne i sine ne ia, ‘Qo valeke sakata, era tuna va zazua sekoro qo sine gonae, tuna valepulepu zigoe, aro qo rove bana so, era qa valeke makuru qa pala pata qaki toṉove kaega, qa vae pata qaki leba go kaega.

²³Avi vae tane qoki vakeba zaqe kaega bana ne kesa era? Go ṉalu tu ule me, tu mazala to lama pala na kesa ne, mana desuka urena go.’

²⁴Gonae i sine ne qira ria iri degere garogaro go, Pala ze ia kesa qolu i pala gonae, mana teke ne valeke ni pala go manoga dia kesa ne.’

²⁵Do iri sine ne ia, ‘Batu, valeke nae i pala bana to manoga dia kesa ne.’

²⁶Ma sine ne qamu igo valeke batu ne, ‘Ria basoero iko ne qira, ṉara teke napu ne qira, do ka basoe i kaega ne, pata volomo de suka ikone go, tina pala vakuziki lupo ze ia.

²⁷Do ria vano iriki soko ava kaega era tuna batu lavata ria, pala me qira mana vae vale qirae tarakenaqa qu era dena.’ ”

²⁸Jesu i sine lupo to pataro dena mana i zaza kenaqa za zuka na Jerusalema.

²⁹Ṉalu iri lama garogaro to Betipezi mana Betani garogaro na tepa Kubolo na Olivi, Jesu iva zao qiru karua disipolo ia,

³⁰i sine ne qiru, “Zae komala ni kome go tarakenaqa qita nae, taburu na zamia tunana donki iri doki taru ne, kaki basoe do iara kaebo so age na, aburu na lupase mana lulu me de qa koego era.

³¹Ṉalu kaki basoe i tana ne qaburu, ‘Avi vae qaburu lupase go tunana donki nae?’ Sine ne ia, ‘Batu ne tane i soko go.’ ”

³²Iru za mana za soba so osina pata gerena so ni sine ne qiru go Jesu.

³³Iru ara lukase so riru qolo na tunana donki ne, valeke ro iri toṉove go iri lama tana ne qiru, “Avi vae qaburu lukase go tunana donki nae?”

³⁴Iru vataule, “Batu raru tane i soko go.”

³⁵Goto nae iru lulu zato tunana donki ne, de ni koego Jesu, gonae iru vana poka ze roku riru popokona tunana donki mana iru tavisi ne Jesu go tina kolokue zakazaka na, tunana donki ne.

³⁶Loborona zaza ia ni age go tunana donki ne basoero ne iri pala poga ro ria mana iri zakapa ze loborona zuka ne.

³⁷Pasi iri lama garogaroe to Jerusalema, totorana kaki zuka i qoqoroe Kubolo na Olivi topu ria disipoloro ia iri tupi seko velaka ne mana vazaka God, sauna osina pata velaka ro iri mia go, mana iri go dena,

³⁸“God ono vatabo Batu lavata ni lamae go loborona vitoṉo mu, Dalo ina koe rani ne, mana ita mata vazaka God.”

³⁹Gonae kakiaro vano Parisio iri ko tavisi go loboro qira basoero ne, iri sine ne Jesu, “Valeke vari vatatana iri go, sine ne qira disipoloro aro mara kasi poro naki!”

⁴⁰Jesu i vataule ne qira igo, “Masine ne qamu, ṉalu go tariniki naki go kaega ria dena, ria tu ipaka ro ne tarina korukoru go.”

⁴¹Ṉalu Jesu i lama garogaro to komala lavata Jerusalema, mana ṉalu i mia zaqe i dae tanego i lete nanao komala lavata ne,

⁴²mana igo dena, “Ṉalu to rove bana go, pata to zazu ne, go to ko ule go, tara lete velaka sivala, do pataro dena i pipika nigo mana qoki mia kaega go.

⁴³Tina lama doka ṉalu vano tarina kana ne qamu, tarina lama vari tara, tarina lama kolo ne qamu, mana koku lupo ne osina dia, go kaega kakia tinara paqa siporo go.

⁴⁴Ria tarina vasakata lupo go, mana osina basoero iri koego loboromu go, kaega kaki kameka ipaka suka tinara ko sivale go de iko banae, tanego aro qoki mia rove kaega ṉalu God tina lama va kaveli go.”

⁴⁵Gonae Jesu i keba za loborona Pade Lotu ne, mana i kakale qira basoero iri vari va volivoli ego loborona Pade Lotu ne.

⁴⁶I sine ne qira, “I karo banae go Buka tabo ne, God igo, ‘Pade era tarina vitoṉo ze pade na pepene.’ Do ramu qamu vagere ze de ko pipika ria vano sikosiko!”

⁴⁷Jesu iza vari vatatana e loborona Pade Lotu ne osina musaqara, do batu ro ria patere ro vano tarove na tamana mana vano kakazigarata ro iri soko vae vale na ia.

⁴⁸Do iriki soba kaega ka zuka go tarina zazu nego, tanego basoero ne iri lama tarue so dekoe Jesu, mana iri gata seko ro ia go. Iriki soko to kaega gata vana ne na kaki desuka, seko ro i sine go Jesu.