Read Varisi Luka 2 Bible Online

Luka 2 - Varisi bible

Luka 2

¹Torana ṉalu nae batu lavata Aqustus i vazao seko ne qira, osiqira basoero iri koego deni miasoka go, go tarina karo vitoṉo qira mana tina qana qira go.

²Kenaqana qana niri vae bana ne qira go, torana ara ko nivae go Quirinus, ni batue go Siria.

³Osiqira basoero ne, tarina zae so komala ria tanuqira, go tarina qana qira go.

⁴Josepo gonae i reqe me komala Nazaret tepa Qalili, i zae Judia kaki komala iri vitoṉo ze Betelema, komala ia Davita. Josepo izae Betelema tanego ia i reqe me sinaqe ia Davita.

⁵Mana i lulu ne Maria, ni pui bana ne go tina qole ia ni pala sale go, go tina za karo tavise vitoṉo na.

⁶Mana torana to zako iru vae go Betelema, Maria i doka to ṉalu ia tina vapodo sale ne.

⁷Gonae i vapodo sale valeke kenaqa ia, i kade ze poga ne mana iva kekele ze ia moki iri ura go, tanego i kaega to kade tataqalana ka pade, go tarina za koego.

⁸Garogaro na deni gogo ne, iri koe kavia vano miasoka sipi, iri miasoka go sipi ro ria loborona sasaniqa deni sagare go, torana kuse nigogo ne.

⁹Aqelo ia Batu ne, ilama sadaka qira mana tatavata ia Batu ne i lama damara qira, mana iri lete sareki.

¹⁰Do aqelo ne i sine ne qira igo, “Kasi sareki! Gata, Era qa lama go dena, qa pala me de qamu koego ramu Tarama Velaka sivala. Tina vakula qamu ramu mana kero ne basoero napu go.

¹¹Ninidena to tepa komala ia Davita, ia tina vakavele qamu i podo, iato Kristo Batu ne!

¹²Iato dena lala go tamuna za mia rove ze go ia, muna za mia sale medara ne, iri kade ze poga ne, i kekele go loborona moki iri ura go.”

¹³Iki umata so kaega, topu ria aqelo ro na rani ne iri lulu ne aqelo ne, iri kera vazaka God.

¹⁴“Vazaka God ikoego zakazaka ne, mana dalo ina koe pua ne, de iri koego ria basoero i kula ne qira go.”

¹⁵Ṉalu aqelo ro ne iri kasi ne qira, iri popoka za rani, vano miasoka sipi iri vari sine ne, “Mata zae Betelema go mata za mia pataro ni sadaka go, ni sine go Batu ne.”

¹⁶Gonae iri katikili za mana iri za soba qiru Maria mana Josepo, mana iri mia sale medara ni kekele go loborona moki iri ura go.

¹⁷Ṉalu iri za mia go sale ne, iri pepeua so pataro ni sine bana ne qira go aqelo ne, sauna sale dena.

¹⁸Mana osiqira ria iri gata go, iri lete nureke sasakata ne, pataro iri sine go vano miasoka sipi ne.

¹⁹Maria i nanao tarua osina pataro, dena, mana i nanao vamazale go.

²⁰Vano miasoka sipi iri ule mana iri kera vazaka God, sauna osina pataro iri gata go mana iri mia go, gerena so deni sine bana ne qira go aqelo ne.

²¹Taramuzina kavitu musaqara, iri pala za sale medara ne go tarina kosia go, mana iri tekene vitoṉo na, iri vitoṉo ze Jesu. Gerena so ni sine bana go aqelo ne tarakenaqana kakate nivae nego sinana.

²²I lama doka to ṉalu Maria mana Josepo tiruna vatabo go sale riru, gerena so ni koego Tamana ia Mosese. Iago iru pala vazao ze Jerusalema sale ne, go tiruna za tavatavara ne zaqe Batu ne.

²³Ni karo banae go Buka tabo ia Batu ne, “Osina sale valeke kenaqa ne tarina tavatavara bana ne zaqe so God.”

²⁴Iru pala karua tunana kurukuru, go tiruna sosovolomo nego sauna tavatavara ne, ni ko banae go Tamana ia Batu ne.

²⁵Torana ṉalu nae, iko kameka valeke vitoṉo na Simion ikoe Jerusale-ma. I valeke velaka mana i vaogote God, mana i piri neso ṉalu God tina vakavele qira basoero na Izirel. Spirit tabo ne ikoe de ikoe ia.

²⁶Spirit tabo ne iva rove bana ze dekoe Simion, mana ia tiniki mazala kaega le, go za doka so ṉalu tina miasoba go Kristo Batu ne.

²⁷Spirit tabo ne ituri ne Simion go izae go Pade Lotu ne. Torana so nae Josepo mana Maria iru za lulu me Jesu go tiruna va lulu zego vatovato ikoego tamana ne.

²⁸Simion i sua ze karisina sale ne, mana i seko velaka zaqe God

²⁹Nimdena Batue, seko aro qo pui bana nego ilama ogoto mana ninidena qo mazala to vamao nava era seka aro, ma ziṉoe to dalo aro.

³⁰Tanego karua mataqu tanuqu era qa mia to valeke qo turi ne mego, tina vakavele qemu go.

³¹Iato qo vanama bana go aro, tarakenaqa qira basoero ne,

³²Ia i tatavata tina vasadake nanao mu aro, go tina va tatavata ne qira vano iriki Jiu go kaega mana va zakazaka qira basoero na Izirel.”

³³Tamana mana sinana, iru lete nureke ne seko ro ia Simion ni sine go, sauna sale ne.

³⁴Simion i vatabo qiru mana i sine ne Maria ni sinana go. “Sale dena i vivine bana iaso God tina vasakata qira basoero topu, mana tina vakavele qira basoero topu. Iato tina lalana God mana topu na basoero ne tarina seko tolia ia, go nanao pupuika ria basoero ne tinara sadaka me.

³⁵Mana maqata tina gere go bele zogoto tinara paqo go puṉumu.”

³⁶Iko napu kaki qole propeta i nanaro vitoṉo na Ana, sale qole ia Panuela i sinaqe ia Asa. Ia i busi so torana kavitu ave, mana torana dena ne, i zaluṉaulu kavasi to ave na.

³⁷Ia iki kasi ne so kaega Pade Lotu ne, kuse musaqara go i vazaka so God, i qaniqani mana pene go.

³⁸I vavoto napua so ṉalu nae propeta Ana i lama doka, mana i seko velaka zaqe God, mana i pepeu ne qira ria iri piri nego God tina vakavele go Jerusalema.

³⁹Ṉalu Josepo mana Maria iru valupo to zazu na vatovato ni koego Tamana ia Batu ne, iru gado ule zato komala ria Nazaret tepa Qalili.

⁴⁰Sale ne i lavata mana i moqere, ia i purake tarove mana vari miasoka ia God, ikoe de ikoego ia.

⁴¹Osina to ave vanovano ia Jesu iri zae Jerusalema, iri teṉo ne musaqara lavata ria, sauna kelo na Pasova.

⁴²I manoga karua to avena Jesu, iri zae Jerusalema, sauna teṉo na musaqara lavata iri za zazu bana ne go.

⁴³Ṉalu iri valupo to teṉo na musaqara lavata ria ne, iri gado ule to komakomala ro ria, do sale valeke Jesu iza ko sivala me Jerusalema. Vanovano ia iruki rove kaega.

⁴⁴Iru nanao bana i lulu ne qira so kakiaro basoero iri zaza go, iru go, mana iri zaza torana kameka musaqara do raravi na to ia, iru ara vatupia tataqiena de iri koego vanovano ria mana vakitaka ro ria go.

⁴⁵Iruki miasoba kaega, iago iru ule napu zato Jerusalema.

⁴⁶Vapisana to musaqara, iru za soba ze loborona Pade Lotu ne, iza koloku tavisi qira vano tarove na tamana i gatagata mana i tana ne qira kavia ro tana go.

⁴⁷Ria iri gata go seko ro ia ne, iri lete nureke sivala ne tarove ia Jesu, mana de go iva taule ne qira go seko ro ria.

⁴⁸Vanovano ia iru nureke napu, pasi iru miasoba go ia, mana sinana i sine ne ia, “Tuqu, avigo tane qo zazu ne go iadena, deqaru koego raru? Raru tamamu qaru lete maqata qaru taqi go aro.”

⁴⁹Iva taule ne qiru igo, “Avigo tane qaburu taqi ava go era? Qaburu ki rove kaega, era tuna ko banae so pade ia Mamae.”

⁵⁰Do iruki nanao rove so kaega talupasana pata ni sine ne qiru go Jesu.

⁵¹Jesu i lulu ne qiru, goto nae iri gado ule za Nazaret, mana iza osaka ne qiru, mana sinana i babana ze so puṉuna osina to seko ro ni gogo ne.

⁵²Jesu izaza popoka tokamana mana torove ia. God mana basoero go iri kula ne ia.