Read Varisi Luka 20 Bible Online

Luka 20 - Varisi bible

Luka 20

¹Kaki kameka musaqara ṉalu Jesu iza va tatana qira basoero ne loborona Pade Lotu ne, mana i tarama ne de go, Tarama Velaka ia God, batubatu ro ria patere ro, vano tarove na tamana, mana vano kazigarata go iri lama.

²Mana iri tana ne ia, “Ono sine ne qemu remu, ava karaputa na tane qo pala go aro, go qo zazu ne pataro dena? Mana akena tane i teke nigo karaputa dena?”

³Jesu i va taule ne qira, “Era do matana napu ne qamu ramu, sine nava.

⁴Avigo, akena tane i teke ne karaputa Jon, goni vari va bapitema nego, ireqe me dekoe God ba dekoe basoero?”

⁵Gonae iri tupi vari valegu tanuqira, avana to tatana sine go, “Ṉalu go i reqe me God tatana go ita ne, ia tina go, Avigo tane qamuki vaogote go kaega Jon?’

⁶Do ṉalu go i reqe me so basoe tatana go ita, ria basoero iri koego dena, tarina vana qitae nini ipaka, tanego basoero dena iri vaogote Jon i kakia propeta.”

⁷Iago iri vataule iri go, “Remu qiki rove kaega kade iza reqe mego.”

⁸Jesu gonae i sine ne qira, “Era napu do qaki mazala kaega tuna sine ne qamu ramu, ava karaputa na tane qa pala go mana qava zazua go dena.”

⁹Gonae Jesu i sine qira basoero ne seko vapadapada dena, “Iko kakia valeke i leba barue vain ia, gonae iva miasoka qirae kakiaro basoero barue vain ia, mana i kasi ne komala ia mana iza ko va umatae de izae go.

¹⁰I lama doka to ṉalu urena vain ne i velaka go, go tarina vae go, ia i vazao, valeke seka ia, go mara za pala todona pata lebaleba ne igo do iriki tekene kaega kapata mana i ule so.

¹¹Gonae iva zao napua kakia valeke seka ia, do vano iri miasoka go barue vain ne, iri vae va paleka ia mana iri vanaqe ia.

¹²Gonae iva zao napua vapisana basoe seka ia, vano iri miasoka go barue vain ne, iri vae va paleka napua ia mana iri vanaqe ia.

¹³Valeke ni toṉove go barue vain ne igo, ‘Avana to tuna zazu ne? Kade go era mava zao to sale era qa lete mamaligara nego, ianae to go tarinara va mazale go ria,’

¹⁴Do ṉalu vano iri miasoka go barue vain ne, iri miasoba ia, iri vari sine ne, ‘Iato dena sale ia valeke ni toṉove go barue vain ne. Aria mata vae vale ia, mana pataro i toṉove go ia tinara ke ita to.’

¹⁵Gonae iri raqasa vakasi ze ia barue vain ne, mana iri za vae vale iago.” Gonae Jesu i tana ne qira, “Avana to tina zazu ne go valeke ni toṉove go barue vain ne, de iri koego vano iri miasoka go barue vain ne?

¹⁶Tina lama mana vae vale lupo qira so ria iri zazue go barue ne, mana tina teke napu ne qira kaki vano napu tarina miasoka go barue vain nae.” Do ṉalu basoero ne iri gata iadena iri go, “Ke kaega!”

¹⁷Do Jesu i reṉa vale ne qira, mana i tana ne qira, “Do avana to tane i talupase go seko ro dena ni koego Buka tabo ne, ‘Ipaka iri soko go kaega vano zazu pade ne, iato ipaka ni lete mazalae go pade ne.’

¹⁸Osina basoero iri soru poka go ipaka dena ne, tarina tatakoboro lupo so, mana ṉalu ipaka ni gogo ne tina soru poka go kakia basoe, basoe nae tina tatamuzala go za lodu so.”

¹⁹Vano tarove na tamana mana batu ria patere ro iri pada ne pala ze Jesu sauna pataro ni sine go, tanego iri rove seko vapadapada dena iva pala qirae tanuqira iri go, do iri sareki ne qira basoero ne.

²⁰Gonae iri piri ne ka ṉalu tina malumu ne qira, gonae iri voli qira kakiaro basoero ria, go tarina gere qira vano velaka, mana iri vazao qirae dekoe Jesu go tarina za tana va sorua ia, go tarina mazala go pala vazao ze ia loborona karaputa mana mazala ia batu lavata na Rom.

²¹Basoero iri voli qira go iri sine ne Jesu, “Valeke vari vatatana remu qi rove, pataro qo sine go aro mana qo vari vatatana nego i velaka lupo so. Qi rove aro qoki tavisi kale ne kaega kakia basoe, do qo sine so pata mara zazu ne basoero, igogu God.

²²Iago, sine ne qemu remu avigo i totoloṉe Tamana ita tane tatana volia takisi de ikoego batu lavata Siza, ba kaega?”

²³Do Jesu i gata rove, tanego iri pada ne ia, gonae i sine ne qira,

²⁴“Va mia ve era kesa ramu. Ake tarakenaqana mana vitoṉo na tane ikoego kesa dena?” Ria iri go, “Vitono na mana tarakenaqa na batu lavata Siza.”

²⁵Jesu gonae i sine ne qira, “Velaka, teke vaule ne batu lavata Siza pata i todo go Siza, mana teke vaule ne God, pata i todo go God.”

²⁶Iago i makuru qira pala na ia sauna seko ivataule ne qira, de koego tarakenaqa qira basoero ne, iriki seko kaega mana iri lete nureke ne, seko niva taule ne qira go Jesu.

²⁷Gonae kakiaro vano Sadusi iri lamae dekoe Jesu. Vano iri vitoṉo qirae Sadusi, vano iriki vaogote kaega basoe tina too napu me tepa le. Iri lama tana,

²⁸“Valeke vari vatatana iri go, Mosese i karo bana ne qemu remu tamana dena, ‘Ṉalu kaki basoe ile mana qole ia iko do i kaega ne sale gogo ne, kaena valeke ne tina busi napua qole nanaro igogo ne, go tina vapodo ze salesale ro ia valeke kenaqa ia ni le bana go.’

²⁹Kaki ṉalu iri ko kaki tamakena taravitu, gonae ke lavata ne i busi, do i kaega ne sale mana i le go.

³⁰Gonae ke varuana ne i busi napua qole ne.

³¹Gonae ke vapisana napu, gogo osiqira to taravitu ne varitora lupo so, iri busia kameka so qole, do osiqira ne i kaega ne qira so ka sale.

³²Valupolupo na, qole ne i le napu.

³³Aria tina lama doka ṉalu osiqira vano le tarina too napu me, akena to tina busia go qole nae, tanego ria tamakena taravitu dena, iri busia so kameka qole nae.”

³⁴Jesu ivataule ne qira, “Valekero mana qolero na ninidena iri busi,

³⁵do valeke ro mana qolero itora qira go tarina too napu me tepa le ne mana tarina koego vudu voru tinara lama go, ria nae tariniki ara busi to kaega.

³⁶Tarina gere qira aqelo ro mana tariniki le kaega, iri salesalero ia God, tanego iri too napu me tepa le.

³⁷Mana Mosese i vasadaka va velaka bana vano le iri too napu me tepa le ne, pepeu na moki ni subi e go sasaniqa ne, Mosese i sine qira, ‘God ia Abra-am, God ia Aisak, mana God ia Jekop.’

³⁸Iago, i God ria vano too, iki God ria kaega vano le, tanego de ikoego ia basoero iri too.”

³⁹Kakiaro ria vano tarove na tamana iri go dena, “Valeke vari vatatana iva taule velaka ne tana nae.”

⁴⁰Mana iriki ara tana napu ne kaega kaki tana napu go.

⁴¹Jesu i tana ne qira, “Avigo tane iri sine go Mesia tina reqe mego popodo ia Davita?

⁴²Do Davita tanuna i sine ze buka na Kera, ‘God i sine ne Batu era, kolokue tepa rikisi matauqu.

⁴³Go era tuna taru qirae vano iri kana nigo polana karaputa aro.’

⁴⁴Davita i koru ze ia Batu, do ava tina goto tane Mesia tinara reqe mego vapopodo ia Davita na?”

⁴⁵Ṉalu basoero ne iri gatagatae de ikoego ia, Jesu i sine ne qira ria disipoloro ia,

⁴⁶“Muna miasoka, de iri koego vano tarove na tamana, iri vakeba nego roku loda ro ria, mana iri ara telo go, iri soko basoero tarina va mazala qirae de iri vari vavolivoli ego, mana iri vine vesu kenakenaqa ṉalu iri zae go Pade Lotu, mana de koko velaka ṉalu iri zae go kelo ne.

⁴⁷Iri va bulaṉoe qira qolero nanaro mana iri pala siko qirae patapataro ria, mana ṉalu iri pene, iri vazakanapu ne pepene loda ro! Qamu rove, lepulepu ria ne tina lete lavata sivala.”