Read Varisi Luka 24 Bible Online

Luka 24 - Varisi bible

Luka 24

¹Sarusaruku lolotoro na musaqara Sade, qolero ne iri zae leṉa ne, iri pala za pata inonoli velaka go iri vanama bana go.

²Ṉalu iri za dokae leṉa ne iri za mia ipaka iri kokoqu ze go siporaṉa na leṉa ne i kuziki bana,

³gonae iri keba za loboro ne, do iriki miasoba kaega tokamana Jesu.

⁴Iri degere mana iri lete nureke ne pata ni doka go, iri ara goso nae ria lama sadaka so iru go kaki karua valeke iru va keba ne poga ni lete damara go, iru lama degere de iri koego.

⁵Pasi nae qolero ne iri lete sareki, gonae iri tudu mana reṉa za pua ne, karua valeke ne iru sine ne qira qolero ne, “Avigo tane qamu taqi ze go basoe too de iri koego vano le ne?

⁶Iki koe kaega dena, ia itoo napu me tepa le ne. Muna nanao tarua pata ni sine bana ne qamu go, ṉalu ni ara koego Qalili.

⁷Ni sine go, ‘Era Tuna basoe ne tarina vazao ve de iri koego vano vasakata pata mana tarina vae vale ava, do taramuzina kapisa musaqara era tuna too napu me tepa le.’ ”

⁸Qolero ne iri nanao soba zaqe to sekoro dena, ni sine bana go Jesu.

⁹Iri kasi ne leṉa ne mana iri za sine ne qira ria manoga kameka disipoloro ne, mana osiqira ria iri koego de igogo ne ṉalu nae.

¹⁰Qolero ne, ria to Maria Madalena, Joana mana Maria sinana Jemisi, ria de mana kero ne qolero, goto iri za sine ne qira apostoloro ne tarama dena.

¹¹Do apostoloro ne iri nanao pataro iri sine go qolero dena iki ogoto kaega, iago iriki vaogoto qira so kaega.

¹²Do Pita i degere mana i teteṉe za, i tudu za mana i miasoba zaqe poga ni koego leṉa ne, do kapata napu kaega. Gonae i gado ule za komala ne mana ilete poloso sivala ne pata ro ni sadaka go.

¹³Kameka musaqara na so ṉalu ni gogo ne, kaki karua basoe iru lululu ne Jesu, iru vele zae kaki komala iri vitoṉo ze Emaus, kavitu mael laqalaqa na, ṉalu reqe go Jerusalema.

¹⁴Mana iru vari sine ne deni gogo osina pata ro ni sadaka go.

¹⁵Pasi iru pepeu mana vari sine ne pata ni gogo ne, Jesu i lama mana i lulu ne qiru.

¹⁶Iru mia ia do, iruki mia rove kaega ia.

¹⁷Jesu i tana ne qiru, “Avana tane qaburu vari sine ne go zaza qaburu vae go na?” Gonae iru noto mana iru mimia lete maqata.

¹⁸Kaki kameka riru vitoṉona Kilopasi i tana ne ia, “Avigo tanumu so aro tane qo koego Jerusalema qoki rove go kaega pataro ni sadaka go musaqara ni sivala za go ba?”

¹⁹‘Avapatana?” igo Jesu. Iru vataule, iru go, “De iri vane go Jesu na Nazaret, valeke dena i kaki propeta, osina zazu ro ia mana seko ro ia i lete velaka sivala e tarakenaqa na God, mana de iri koego basoero topu go.

²⁰Do ria batu ro ria patere ro remu mana vano kenakenaqa ro remu, iri vazao ze ia varitanae mana iri vae vale ze ia koluse ne.

²¹Mana remu qi nanao iato tina bauru ne go basobasoe na ro Izirel qi go! Do ninidena i kapisa to musaqara ni sivala nego pataro ni sadaka go.

²²Kakiaro qolero qi kameka zazu go, iri va poloso qemu, pasi iri za ule me leṉa ne sarusaruku lolotoro nini,

²³iriki za mia kaega tokamana Jesu. Iri lama sine iri go, qi miasoba aqelo mana i sine ne qemu Jesu i too bana.

²⁴Kakiaro basoero qi kameka zazu go iri za mana iri za mia so osina pata, gere so iri sine go qolero ne, do iriki miasoba kaega Jesu.”

²⁵Gonae Jesu i sine qiru, “Avana to ka bulaṉoe qaburu, i makuru qaburu vaogoto katikili na osina pataro iri sine go ria propeta ro ne!

²⁶Avigo iki tora kaega Mesia tina vokara ne pataro dena go tina ra keba za go Too ikoego vari miasoka ia God?”

²⁷Gonae Jesu i vatalupasa ne qiru, pataro iri sine go sauna tanuna loborona Buka tabo ne, tupi e buka ia Mosese mana osina karo ria propeta ro.

²⁸Iru lama garogaro to komala iru vele zae go ne, Jesu i gere kapata i vele zaza sivala go,

²⁹do iru koru vaule ia mana iru sine ne, “Ko tavisi qaru raru, i vele kuse to dena, gonae i za ko tavisi qiru to.”

³⁰Ṉalu iri koloku, go tarina ṉaṉa go, Jesu i pala bureri, mana ivatabo, gonae i pasia mana i teke ne qiru.

³¹Pasi nae to mata qiru iara papaqa to, mana iru ara mia rove ia, do i zaga eso de iru koego.

³²Iru vari sine ne tanuqiru, “Avigo iki gere kaega nako ni subi ego de qaturu koego, seko tabe nivae ne qituru go loborona zuka ne, mana sine lupasa nivae ne qituru go Buka tabo ne?”

³³Iru tapa degere meto mana iru gado ule za Jerusalema de iru za soba qirae manoga kameka disipoloro, iri teṉo tavisi qira ria kero ne basoero ria,

³⁴iri vari sine ne, “Pata ogoto bana, Batu ne i too napu me, iza sadaka banae de ikoego Saimon!”

³⁵Gonae ia riru ne iru ara sine vasadake to pataro ni sadaka bana ego loborona zuka ne mana de go iru ara mia rove go Batu ne, pasi ni pasia go bureri ne.

³⁶Ṉalu iru ara pepeu ne qira ria kero ne sauna pataro ni sadaka go, iriki rove so kaega ria, i lama sadaka eso de iri koego tanuna Batu ne, mana i sine ne qira, “Dalo ina koe de qamu koego.”

³⁷Iri lete poloso mana lete sareki go, iri nanao, iri mia manuru.

³⁸Do Jesu i sine ne qira, “Avigo tane qamu lete sareki go? Avigo tane i ruama go nanao qamu?

³⁹Mia me, karua karisiqu mana karua makequ go, era so dena, muna sibava, go tamuna vaogoto ava go, tanego manuru i kaega ka urina mana manuna, gerena qamu mia, era iko nava go dena.”

⁴⁰I sine iadena mana iva mia qirae karua karisina mana karua makena.

⁴¹Ria disipoloro ne iriki vaogote so kaega, do iri lete kula mana iri va zazao so nanao qira. Gonae Jesu i tana ne qira, “Avigo iko ne qamu pata gege?”

⁴²Gonae iri teke ne ia takoboro na iṉana moza.

⁴³I pala mana i ge ze tarakenaqa qira.

⁴⁴Mana i sine ne qira, “Iato dena pataro tina sadaka go gerena so qa sine bana go, torana qako tavisi qamu go, osina pataro sauqu era ni karo ego Tamana ia Mosese, pataro iri karo go ria propeta ro, mana buka na Kera ne tina lama sadaka ogoto lupo so.”

⁴⁵Gonae i va papaqa nanao qira, go tarina nanao rove de go zazao na Buka tabo ne.

⁴⁶Mana i sine napu ne qira, “Iato dena pata ni sine go Buka tabo ne, Mesia ne tina pala vokara mana tina le, taramuzina kapisa musaqara ia tina too napu me tepa le ne.

⁴⁷Mana loborona vitoṉo na ia, seko na nanao maqata na vasakata pata ro, mana nanao ule na vasakata pata gogo ne, tina vari vatatana ze osina dia kolabana pua ne, tina tupi e Jerusalema.

⁴⁸Ramu to tamuna seko ne go pataro dena.

⁴⁹Era tanuqu tuna turine me pata i pui bana ne go Mamae, do ramu muna piri eso komala lavata ne, go tina doka so ṉalu karaputa na zakazaka ne tina lama koe de qamu koego.”

⁵⁰Gonae Jesu i lulu qira ria disipoloro ia, iri kasi ne komala lavata ne mana iri zae komala Betani, gonae i kazara ne karua karisina mana i va tabo qira.

⁵¹Ṉalu i vatabo lupo qira, Jesu i kasi ne qira mana God i pala va popoka zaqe ia rani ne.

⁵²Iri vazaka ia, mana iri gado ule za Jerusalema iri lete kula sivala.

⁵³Osina to ṉalu iri za koe Pade Lotu ne iri seko velaka mana iri vazaka God.