Read Varisi Luka 4 Bible Online

Luka 4 - Varisi bible

Luka 4

¹I purake Spirit tabo, Jesu i kasine Jodan mana Spirit i kenaqa ne ia, iva zao ze ia loborona de iki koe kaega ka basoe na.

²Gonae Satana i pada ne ia torana vasiṉaulu musaqara. Ṉalu nae Jesu iki ṉaṉa so kaega. Va lupolupo na to nae Jesu i lete saqo.

³Gonae Satana i sine ne Jesu, “Ṉalu aro qo sale ia God, sine ne aro ipaka dena mara kavala go mara bureri.”

⁴Do Jesu iva taule ne Satana, “Buka tabo igo, ‘Basoe iki too ne so kaega miki bureri!’ ”

⁵Gonae Satana i lulu vazao ze Jesu de i lete zakazaka ne, mana iva mia ze ia osina dia kolabana pua ne.

⁶Mana Satana i sine ne Jesu igo, “Era tuna teke nigo aro karaputa mana osina vavagado ro dena tanego osina pataro dena i teke bana nava era, mana qa mazala so teke nena kakia basoe qa soko ze go.

⁷Iago ono va batu ava era, mana osina pataro dena tina ke aro lupo so.”

⁸Do Jesu i sine ne Satana igo, “Buka tabo ne igo, ‘Ono va Batua so God Batu aro mana ono osaka ne so tanuna!’ ”

⁹Gonae Satana i pala vazao ze Jesu Jerusalema, mana iva degere ze ia de i lete zakazaka sivala na Pade Lotu ne, mana i sine ne Jesu igo, “Ṉalu aro qo sale ia God, ono soru za dona.

¹⁰Tanego Buka tabo ne igo, ‘God tina sine ne qira aqelo ro ia tarina miasoka go.’

¹¹Mana igo napu dena, ‘Tarina toqo va zakazaka goe karisi qira, niki go vae ne ze makemu ipaka ne.’ ”

¹²Do Jesu iva taule ne Satana igo, “Buka tabo ne igo dena, ‘Oniki pada ne God Batu aro.’ ”

¹³Ṉalu Satana i pada lupo ne Jesu osina zuka ro dena i kasi ne ia mana zaza tekere.

¹⁴Gonae Jesu i ule za Qalili, mana karaputa ia Spirit tabo i kotavise ia. Mana osina tarama na ia igoe lupoe kena igogo ne.

¹⁵Jesu iza mana i vari vatatana loborona pade pepeu ria vano Jiu mana osiqira iri vazaka ia!

¹⁶Jesu gonae izae Nazaret de i lavate go, mana ṉalu musaqara Sabat izae Pade Lotu gerena de igogo bana mego. Iago i degere mana toere Buka tabo ne.

¹⁷Iri teke ne Jesu buka ia propeta Isaia. I papaqa vivolo na pepa ne mana i soba de ni karo bana ego sekoro dena.

¹⁸“Spirit ia Batu ne ikoe de qa koego era tanego ivine bana ava era tuna pala me Tarama Velaka de iri koego vano situ. I turi nava era tuna sine ne qira vano iri koego bara ne tarina siporo! Talupasa, mana ria iri kodo go tarina mimia napu mana va velaka qira ria iri va sasakata ne qira go.

¹⁹Mana sine vasadake, ṉalu i lama to, Batu ne tina va kavele qira basoero ia.”

²⁰Jesu igo nae, i vivolo vaule pepa ne i teke vaule ne valeke izazu e go Pade Lotu ne, mana i koloku. Osiqira ria iri koego Pade lotu ne iri reṉa vale ne so ia.

²¹Gonae Jesu i sine ne qira igo, “Ninidena seko dena i lama ogoto, gerena qa toere ne qamu iato qamu gata go.”

²²Osiqira iri lete kula, mana iri go napu dena, “Valeke dena sale ia Josepo?”

²³Do Jesu i sine ne qira, “Pata ogoto qa rove tamuna teke nava era seko vapadapada dena valeke vari vole mo va velaki go tekere tanumu. Mana tamuna vane napu ava era dena, mo zazu ne ze komala aro dena pataro qimu gata bana zigoe qo zazu bana ne ze Kapanaum.”

²⁴Ma sine ne qamu pata ogoto igo Jesu, “Kaega kaki propeta iri soko zego komala ia tanuna.”

²⁵Gatava era igo Jesu, “Pata ogoto topu ria qole ro nanaro iri koe Izirel torana ko ivae go propeta Ilaiza, ṉalu iki nare kaega torana kapisa ave mana kaonomo inaqa mana saqo lavata ipala lupo osina dia vudu.

²⁶Gonae tane do, Ilaiza iki zae kaega de koe basoero Izirel, do ia izae so de ikoego qole nanaro na Zerepat kaki komala tepa kena na Saidon.

²⁷Mana torana ko ivae go propeta Elisa, topu ria vano i pala qira voremake iri koe Izirel, do kaega kaki kameka ria dena iva velake go, tanuna so Neman valeke na Siria.”

²⁸Ṉalu Jesu i sine seko dena, osiqira ria iri koego Pade Lotu ne iri lete muma.

²⁹Gonae iri tapa degere iri raqasa vasipore Jesu, mana vazao ze ia kubolo ikoego komala ria ne, go mara ria vasoru zaqe Jesu baba ne iri go.

³⁰Do Jesu igoe so vari lobori qira basoero ne mana i zaza.

³¹Gonae Jesu izae Kapanaum kaki kameka komala na Qalili, iva tatana qira basoero ṉalu Sabat.

³²Osiqira basoero iri lete poloso ne de igogo vari vatatana ia, tanego i lulua karaputa.

³³Loborona Pade Lotu ria vano Jiu ikoe kaki valeke isiqane manuru sakata, ikoru va lavata,

³⁴“Ke! Ava patana tanego qo soko qemue go remu, Jesu na Nazaret? Avigo qo lama ne vasakata qemu remu? Era qa rove go aro qo kameka valeke Tabo ia God.”

³⁵Jesu i seko lavate manuru ne igo, “Kasi seko, mo kasi ne valeke nae.” Gonae manuru ne i vana va soru ze valeke ne tarakenaqa qira basoero ne, mana i paqa siporo za, do iki vapaleka kaega valeke ne.

³⁶Basoero ne iri lete nureke sakata mana iri vari sine ne tanuqira, “Avigo tatalina tane seko ro dena? Seko i sine go valeke dena i koe mazala mana karaputa, go manuru sakata ro ne iri siporo go.”

³⁷Gonae tarama na Jesu i liqutu e kena igogo ne.

³⁸Jesu gonae i kasi ne Pade Lotu ria vano Jiu mana izae pade ia Saimon, torana nae ravana Saimon, i pala mokoso poloqotoro gonae iri sine ne Jesu go mara tavisi ne ia.

³⁹Jesu iza mana i degere rikisina vesu ia qole ne mana i kakale mokoso ne, mokoso ne i kasi ne ia, qole ne i katikili degere mana i vanama ne qira ria pata gege.

⁴⁰Taramuzina zununa saṉa osiqira ria iko go vakitaka ro ria i pala qira soso mokoso ro ne, iri pala qira me de ikoego Jesu, ia i siba nogonogoto qira, mana iri velaka lupo so go.

⁴¹Manuru sakata napu to go iri kasi ne qira basoero topu ne. Gonae iri koru va lavata iri go dena, “Aro qo Sale ia God!” Jesu i muma ne qira manuru ro, i vakaega qira tarina seko go, tanego iri rove ia i Kristo.

⁴²Iara tavuara me ia, Jesu i kasine pade ne mana izae kaki dia i kaega go ka basoe na. Do basoero ne iri taqia Jesu, mana ṉalu iri za soba ia iri vakaega ze ia go mara kasi kasine qira iri go.

⁴³Do Jesu i sine ne qira igo, “Era tuna vari vatatana bana ne so Tarama Velaka ia God de iri koego kero ne komala, tanego sauna to ia igogo ne God ituri nava era tuna zazu nego.”

⁴⁴Iago Jesu i zaza mana i tamanae loborona pade teṉoteṉo ro ria vano Jiu, tepa Judia.