Read Varisi Luka 6 Bible Online

Luka 6 - Varisi bible

Luka 6

¹Kaki kameka ṉalu Jesu i zaza sivala e barue vuiti ne, gonae ria disipoloro ia iri pala vuiti iri zagale mana iri ge,

²kakiaro ria vano Parisio iri go, “Avigo tane qamu zazu nego, pata iki vamao kaega Tamana na zazu ne go ṉalu musaqara Sabat na?”

³Jesu iva taule igo, “Avigo qamu ki toere kaega pata izazu nego Davita, ṉalu tanuna mana ria iri lulu nego iri saqo go?

⁴Davita i zae loborona Pade Lotu ia God, i za pala bureri na sosovolomo ne, ige mana i tekene qira basoero ia, do Tamana ne i vatabo. Kaega kaki basoe tina ge bureri dena, do ria so vano patere tarina ge go.”

⁵Gonae Jesu i sine ne qira, “Era to Tuna basoe qa batu ne go musaqara Sabat.”

⁶Kaki musaqara Sabat napu, Jesu i zae loborona Pade Lotu ria vano Jiu, i vari vatatana. Kaki valeke i le karisi matauna iko tavisi ṉalu nae.

⁷Kakiaro ria vano tarove na Tamana mana vano Parisio iri mia tarua Jesu, ṉalu go tina va velake go ia ṉalu na Sabat, tanego iri taqia kaki pata go tarina vakutama ze, go tarina va makuru ze Jesu irigo.

⁸Do Jesu i rove nanao qira, mana i sine ne valeke i le go karisina, “Degere mana lamae loboro dena,” valeke ne i tapa degere mana i za degere de igogo ne.

⁹Gonae Jesu i sine ne qira igo, “Era ma tana ne qamu ramu. Ava na tane i vamao go Tamana ita tatana zazu ne go ṉalu Sabat? Tavisi ba, vasakate na basoe? Vakavele na too ia basoe, ba vae vale na basoe?”

¹⁰Jesu i reṉa ne qira basoero ne, mana i sine ne valeke ne, “Kazara ne karisimu.” Valeke ne i kazara ne karisi na, gonae velaka to igo.

¹¹Iri lete muma sasakata, mana iri za pepeu tanuqira, iri taqia kaki pata go tarina zazu ne ze go Jesu.

¹²Ṉalu igogo ne Jesu i popoka za kaki kubolo go tina za pene, mana lodana kuse nae ia i pene God.

¹³I doka to musaqara Jesu i koru qira disipoloro ia mana i vine qira manoga karua ria, i vitoṉo qirae apostoloro.

¹⁴Saimon, i vitoṉo ze Pita mana kaena ia Aduru, Jemisi, mana Jon, Pilipi mana Batolomeu.

¹⁵Matiu mana Tomasi, Jemisi sale ia Alepiasi mana Saimon, ia i tavisi ne qira ria iri soko ne kakale na qavuna na Rom.

¹⁶Jiudas sale ia Jemisi, mana Jiudas Iskariot, ia i va besa ne go Jesu.

¹⁷Ṉalu Jesu i qoqoro me kubolo ne, i lulu qira apostoloro ia, i za degere kaki dia i nabo mana topu ria disipoloro ia iri ko tavisi de go. Topu sasakata basoero iri koe de igogo ne, iri reqe me osina dia tepa Judia mana Jerusalema, mana karua komala iri koe rikisi masi, Taia mana Saidon.

¹⁸Basoero iri lama go, iri soko gata na seko ia Jesu, mana iri soko napua ia, go tina vatavoese soso mokoso ro i pala qira, mana ria i pala qira go manuru sakata ro, iri lama napu so, mana iri velaka lupo.

¹⁹Osiqira basoero ne iri lete soko sibana Jesu, tanego karaputa isipore de ikoe ia i vavelaka lupo qira.

²⁰Jesu i reṉa ne qira disipoloro ia mana igo dena, “Kula ramu qamu situ go, Too ikoego vari miasoka ia God i ke ramu.

²¹Kula ramu qamu saqo go ninidena, taramuzina tamunara kuma, tanego God tinara teke ne qamu pata gege! Kula ramu qamu dae, taramuzina tamunara kari!

²²Kula ramu iriki soko qamu go kaega basoero ne, iri sila qamu, iri seko sakata qamu, mana iri vagere qamu e vano vatovato sakata, tanego i sauqu era.

²³Kula ṉalu i doka go pata ro nae, muna veqa mana kula go. Tanego voli qamu i lete lavata e tepa rani ne. Ia dena to de iri gogo vano kazigarata ria, de iri vane qira go ria propeta ro ne.

²⁴Do manava sakata de qamu koego ramu qamu vavagado go, qamu pala bana to kulakula ramu ninidena!

²⁵Manava sakata ramu qamu kuma go ninidena, tamunara saqo. Manava sakata ramu qamu kari go ninidena, tamunara maqata mana dae go!

²⁶Manava sakata de qamu koego ramu ṉalu basoero iri go ramu qamu vano velaka, kakazigarata ṉalu bana do, iri sine napua so seko velaka de, de iri koego propeta poqepoqe ro ṉalu bana ne.”

²⁷Jesu i sine napu ne qira, “Do! Ma sine ne qamu, ramu qamu gata go seko era dena, muna mamaligara ne qira ria iri va sasakata ne qamu go, mana va velaka ne qira vano iriki soko qamu go kaega.

²⁸Pene God mara va makaolo ne qira ria iri tulaṉa ne qamu mana pene ne qira ria iri va sasakata ne qamu go.

²⁹Ṉalu kaki basoe i posare kameka tepa paparamu, vamao ne ia mara posara napua kene papara. Ṉalu kaki basoe ipala zigoe poga loda aro, vamao napu ne ia mara pala napua roku aro.

³⁰Ṉalu kaki basoe i pene zigoe kaki pata, ono teke ne. Ṉalu kaki basoe i pala zigoe kakia patapata aro, oniki pene vaule ze.

³¹Ramu muna zazu ne ze de iri koego kero ne basoero ne, pata qamu soko go, mara zazu ne ze de qamu koego tanuqamu.

³²Ṉalu qamu mamaligara ne qira so ria iri mamaligara ne qamu, avigo tamuna pala go makaolo ia God? Tanego vano vasakata pata do iri mamaligara ne qira so ria iri mamaligara ne qira go.

³³Mana ṉalu qamu va velaka ne qira so ria iri va velaka ne qamu, avigo tamuna pala go makaolo ia God? Vano sakata do iri va velaka napu ne qira so ria iri va velaka ne qira go.

³⁴Mana ṉalu qamu teke ne kaki pata de iri koego basoero qamu rove go, tarina teke vaule napu ne qamu kaki pata, avigo tamuna pala go makaolo ia God? Vano sakata do iri vari teke napu ne so tanuqira vano sakata, tanego iri rove tarina teke vaule napu ne qira so.

³⁵Mamaligara ne qira ria iri va sasakata ne qamu mana va velaka ne qira, soso ne mana kasi nanao tamunara pala vaule. Ṉalu nae voli qamu tina lete lavata, mana ramu tamuna salero ia God ni lete zakazaka sivala go. Tanego God i manava ne qira basoero, patavolomo iriki vavelaka ne kaega ia ba vatovato ria i sakata go.

³⁶Muna varinanao mana manava sakata ne qira kero ne basoero, gerena Tamaqamu ikoego rani ne.”

³⁷Jesu i sine napu ne qira, “Kasi toere na too ia kene basoe, go God tiniki toere go kaega too ramu, kasi vapala ze na kaki pata basoe ne, go God tiniki vapala qamue kaega kaki kapata. Nanao ule ne qira basoero ne, go God tina nanao ule ne qamu go.

³⁸Muna soso ne qira basoero ne, go God tinara teke ne qamu. Pata ogoto, tina gere valeke i vapurake kuza ia, i patu vaqoqoro zaqe mana i vizua go i puraka sosoru. Tina go to nae de tina teke ne qamu go God, tanego deqamu soso ne go tina gere napua so de i tamuna pala vaule go.”

³⁹Mana Jesu i sine ne qira vapadapada dena, “Kameka valeke kodo iki mazala kaega tina kenaqa ne kene valeke kodo, ṉalu igogo nae, osiqiru tiruna soru za bolu ne.

⁴⁰Kaega kaki sale sikulu i sivala ne valeke ivatatana go ia, do ṉalu sale sikulu ne i valupo sikulu ia mana i pala tarove go, tinara gere go valeke i vatatana bana go ia ne.

⁴¹Avigo tane qo toere go ragu ni koego matana kaemu, do qoki mia kaega veqolo ikoego matamu tanumu?

⁴²Avigo tono sine ne go kaemu, ‘Ke kaequ va mao nava aro go ma vakuziki ne ragu ikoego matamu.’ Do era qa go, veqolo lavata ikoego matamu qoki mia kaega. Qamu vano poqepoqe, pata kenaqa, vakuzikine tekere veqolo ikoego matamu mana ṉalu ono mimia velaka to ia, tono ara pala vakuziki ne go ragu i koe go matana kaemu.”

⁴³Jesu i sine napua, “Kaega kaki moki velaka i ure sakata go, mana kaega kaki moki sakata i ure velaka go.

⁴⁴Osina moki qamu mazala so mia rove zena urena. Qoki mazala kaega pala zena urena karukae de ikoego lozo, mana urena vino, de ikoego qolo paqo.

⁴⁵Valeke velaka i vasadake pata velaka ro ikoego loborona puṉuna, valeke sakata i vasadake pata sakata ro i taru ze de i koego, tanego saqe i sine so pataro i purake go puṉu.”

⁴⁶Jesu i sine napua, ‘Avigo tane qamu koru ve era, ‘Batu, Batu,’ do qamuki zazu ne kaega pata qa sine ne qamu go era?

⁴⁷Basoe i lama e de qa koego era, mana i gata seko ro era, mana i lulua go, era ṉara va padapada ze ia pata i gere go.

⁴⁸I gere valeke i zazu nego pade ia, i sola va zunua kutamana mana iva kekele ze popoko na ipaka ne, gonae i kiale me uguru, i lama vae pade ne do iki vizu kaega, tanego pade ia i degere vanadu.

⁴⁹Do basoe i gata seko era do iki lulua kaega, i gere valeke i vadegere ze pua pade ia, iki sola vazunua kaega kutamana, gonae kiale ne i lama va sorua pade ne, mana i lete pabala vasakate pade iago.”