Read Varisi Luka 8 Bible Online

Luka 8 - Varisi bible

Luka 8

¹Taramuzina ṉalu nae Jesu i goza komala lavata ro mana komala suka ro, i vari vatatana ne Tarama Velaka na Too ikoego vari miasoka ia God. Ria manoga karua disipoloro ia,

²mana kakiaro qolero iri lulu ne ia. Qolero dena Jesu i kakale bana ze tokama qira manuru sakata ro, mana soso mokoso ro ria iva tavoesi bana qira go, kakia Maria Madalena, kavitu manuru sakata iri siporo banae ia.

³Joana qole ia kaki kameka valeke batu na pade ia Erode vitoṉo na Tuza, mana Suzana, kakiaro napu ria go. Iri va zazua so pataro iri toṉove go tanuqira go mara tavisi ne Jesu mana disipoloro ia iri go.

⁴Basoero ne iri poro lamae so dekoe Jesu, iri reqe me komakomala ro ria, ṉalu basoero ne iri lama teṉo lupoe deni koego, Jesu i sine ne qira seko vapadapada dena,

⁵“Kameka basoe iza go mara za leba pata lebaleba ia igo, gonae iza repene paturu ia loborona barue ne, kakia ro iri sorue zuka mana iri kube qira mana palero iri lama ge go.

⁶Kakiaro iri sorue pua i ipaka me polana, ṉalu iri podo me, iri le, tanego pua ne iki boma kaega.

⁷Kakiaro paturu ne iri sorue de ikoego qolo paqo ro iago ṉalu iri podo me, qolo ne i pipisi vale qira.

⁸Mana kakiaro iri sorue pua velaka, iri podo velaka mana iri ure velaka go, kakiaro i kameka vasa to urena.” Mana Jesu i sine napua igo, “Gata! Ṉalu go iko qeqele qamu.”

⁹Disipoloro ia iri tana ne Jesu, “Avana tane qo va talupasa ze go vapadapada dena.”

¹⁰Jesu iva taule ne qira igo, “God iva malumu ne qamu tamuna rove go pata pupuika mana pata ogoto na de ikoego vari miasoka ia God, ba de iri koego basoero ne, era qa sine go vapadapada dena, go tarina mia, do tariniki mia rove kaega, tarina gata, do tariniki gata rove kaega.”

¹¹Jesu i sine napu ne qira, “Iato dena talupasa na seko vapadapada ne, paturu ne iato i seko ia God.

¹²Keni sorue go zuka ne, ria to basoero iri gata go seko ia God do ṉalu i lama Satana, i lama pala vakuziki ne ze puṉuqira, go tariniki vaogoto mana za kavele go kaega.

¹³Paturu ni sorue pua ni koe ipaka ne, i gere qira to ria iri gata go seko ia God, mana iri kula ne, do iki lete zunu za kaega loborona nanao qira, iri vaogoto zaqe so kaki tora na. Do ṉalu pada i lama e, de iri koego, iriki nanao vamazale to kaega seko ia Batu ne.

¹⁴Paturu ro i soru ego de i podo ego qolo paqo ro ne, i gere to basoero iri gata go seko ia God, do iri nanao vokara ne pata vavagado na ro pua dena, mana kero ne pataro i vakula qira go. Iago seko ia Batu ne, iki ure kaega de iri koego.

¹⁵Paturu iri sorue go pua velaka ne i gere qira to ria iri gata go Tarama Velaka ia God, mana iri soti va velaka ze puṉu qira, go za doka so ṉalu iza ure go.”

¹⁶Jesu i sine napua, “Kaega ka basoe iva kamua pazi mana i taru zaqe polana sau ba polana parepare. Kaega! Ia tina taru bana zeso de vavaidoko na pazi, go basoero tarina mia tatavata ṉalu tarina keba me.

¹⁷Kapata iko pipika go, taramuzina tinara lamae de tatavata. Pataro iri takuma pika go tinara sadaka me, go basoero ne tarina ara rove go.

¹⁸Muna miasoka ṉalu qamu vavaroṉono ne go pata, tanego ka basoe i kone go, God tina teke vatopu napu ne, do ka basoe i kaega ne, pata volomo de suka i kone go, God tina pala vakuziki lupo ne.”

¹⁹Sinana mana kaena ro Jesu iri lamae de ikoego ia, do i makuru qira lama garogaro tanego topu sasakata basoero iri koego de i koego Jesu.

²⁰Kakia basoe ivane dena Jesu, “Sinamu mana kaemu ro iri lama koe pekapeka ne iri soko mia go aro.”

²¹Do Jesu i vane qira dena, “Kanae mana kaequ ro go, ria iri gata go seko ia God mana iri va zazua go.”

²²Kaki kameka ṉalu Jesu mana disipoloro ia iri goe kameka koluka, Jesu i sine ne qira igo, “Ita mata kava za kedo tepa na masi pipika.” Iago iri zaza to.

²³Loborona zaza iri vae go, Jesu i kamuku, gonae kameka seva lavata i kikiuru katikili me masi pipika ne, mana koluka ne i tupi purake loka ne mana iri vele zunu.

²⁴Disipoloro ne iri lete sareki mana iri za va dogare Jesu, “Batu! Batu!” iri go, “Ita qata garogaro to vele le.” Do Jesu i degere mana i sine ne sokoro mana oba go mara bule, mana i bule to go.

²⁵Goto nae i sine ne qira disipoloro ia, “Ade to vaogoto ramu?” Do iri lete nureke mana sareki go, mana iri vari sine ne, “Akena tane valeke dena? I teke tamana qira sokoro, oba mana iri vaogote ia.”

²⁶Jesu mana disipoloro ia iri goe koluka ne mana iri zae tepa Gerasa, kene tepa na masi pipika na Qalili.

²⁷Jesu i kasi ne koluka ne mana i siporo za rikisi ne, i soba kameka valeke na komala ni gogo ne, valeke ni gogo ne i siqane manuru sakata. I umata sakata to valeke dena iki va baribari so kaega, mana iki koe so kaega komala ne, do loda na ko ivae go ne, ia iza koe so de vari vou ne.

²⁸Pasi i miasoba Jesu, i dae valavata mana i sorue tarakenaqa na makena Jesu, i koru valavata igo, “Jesu Sale ia God ni lete zakazaka go, avana tane qo soko ve go era? Qa pene go oniki va kimata ava.”

²⁹I sine iadena tanego Jesu i teke bana ne tamana manuru sakata ne go tina kasi ne valeke ne. Topu na ṉalu manuru ne i pala tarua so ia, basoero ne iri qolo taru ze seni karisina mana makena loborona pade ne, do ia i korote so mana manuru sakata ne i pala vazao ze ia de iki koe kaega ka basoe.

³⁰“Akena vitoṉomu?” igo Jesu. Valeke ne iva taule, “Era vitoṉoqu ‘Topuna,’ ” tanego topuna ro manuru iri koe de i koe ia.

³¹Manuru ro ne iri pene va moqere Jesu go mara kasi vana qira qe nako lavata ne.

³²Topu sasakata boko ro iri za ṉaṉae tepa kubolo ne, ria manuru ro ne iri pene Jesu go mara vazao qirae de iri koego boko ro ne, gonae Jesu iva mao ne qira.

³³Manuru ro ne iri siporo e to valeke ne mana iri zae de iri koego boko ro ne, pasi nae osina boko ro nae ne iri teteṉe qoqoroe kubolo ne mana iri za soru e loka ne mana iri za le lupo so.

³⁴Ria basoero iri miasoka go boko ne iri mia pata ni sadaka go, iri teteṉe za komala mana iri za pepeu ze komala lavata ro mana komala suka ro.

³⁵Basoero ne iri za go mara za mia pataro nigogo ne iri go, mana ṉalu iri lama dokae de ikoego Jesu, iri za soba valeke ni pala go manuru sakata ne i kolokue tepa makena Jesu, i nanao tarove mana iara va baribari to, mana basoero ne iri lete sareki go.

³⁶Ria iri miasoba go ne, iri pepeu ne qira kero ne basoero de igo Jesu ni va velake go valeke ne.

³⁷Gonae osina basoero na kena igogo ne iri pene Jesu go mara kasi ne komala ria iri go, tanego iri lete sareki, iago Jesu i goe koluka ne mana iri zaza to.

³⁸Valeke i pala go manuru ne, go niva velake go Jesu, i pene, “Era ma lulu go aro,” do Jesu i turi vaule ne ia, i sine ne.

³⁹Gado ule za komala aro mana sine vasadaka ne qira basoero ne pata God i zazu ne, go niva velaki go aro. Valeke ne i goe loborona komala ne, i sine vasadake de go Jesu ivelake go.

⁴⁰Ṉalu Jesu i ule za kene tepa na masi pipika ne, basoero ne iri kula ne ia, tanego iri piri bana ne so ia.

⁴¹Gonae kameka valeke vitoṉo na Jairus iza lama, i kameka valeke batu na Pade Lotu ria vano Jiu, i lama sorue makena Jesu mana i pene va moqere ia go mara zae komala ia igo.

⁴²Tanego kameka sale qole iato, iara manoga karua so ave na i lete mokoso lavata mana i vele le go. Ṉalu Jesu i zaza go ne, topu sasakata basoero iri lulu ne ia mana iri va tutua ia.

⁴³Kaki kameka qole i lulu tavisi ne qira basoero ne, i pala mokoso ria qolero ne torana manoga karua ave, ia i valupo zetu pata vavagado ia de iri koego vano vari vole, go do i kaega soka basoe ni mazala go vamalia na mokoso ia ne.

⁴⁴Qole ne i lama e loboro qira basoero ne, iza gome muzi na Jesu mana i siba za qe tumutumu na roku ia Jesu, mana mokoso ia ne i katikili i malia so go.

⁴⁵Jesu i tana, “Akena i siba va era?” Pasi nae basoero ne iri legu vakaega, gonae Pita i sine ne Jesu, igo, “Batu! Topu sakata basoero iri liqutu kolo go mana iri vari tutubeli, go mara lamae deqo koego aro iri go.”

⁴⁶Do Jesu igo, “Kaki basoe i siba va era, tanego era qa gata rove, karaputa i siporoe deqa koego era.”

⁴⁷Qole ne i rove ni siba go ia, i nenedere, i lama sorue makena Jesu mana i sine vasadaka ze tarakenaqa qira basoero ne, avigo tane ni siba go, mana de go ni malia ne go mokoso ia go.

⁴⁸Jesu i sine ne ia, “Sale qole era vaogoto aro iva velaki go, za loborona dalo mana kasi ara maqata napu.”

⁴⁹Iara sekoseko so Jesu, i lama kameka valeke i lama sine ne Jairus, “Sale qole aro i le to, iago oniki ara va nula ne valeke vari vatatana ne,” igo.

⁵⁰Do Jesu igata soba mana i sine ne Jairus, “Oniki sareki ono vaogoto, mana sale qole aro tina too napu.”

⁵¹Ṉalu iri lama dokae to pade ne, iki vamao ne kaega ka basoe tina keba za go loborona pade ne, do tanuna so Pita, Jon, Jemisi, tamana mana sinana sale ne go.

⁵²Osiqira basoero iri koe go loboro na pade ne iri dae mana iri maqata ne sale ni le go, Jesu i sine qira, “Kasi dae, sale qole ne iki le kaega, i kamuku so.”

⁵³Do ria iri karia ia, tanego iri rove sale ne i le bana.

⁵⁴Do Jesu i pala tarua karisina qole ne i korua ia, “Degere me!”

⁵⁵Too ia sale qole ne i ule me mana i degere me, goto nae Jesu i sine ne qira, “Teke ne sale ne pata gege.”

⁵⁶Vanovano ia sale qole ne iru lete poloso sivala, do Jesu i sine vamoqere ne qiru niki ara pepeu ne ka basoe pataro ni sadaka go.