Read Varisi Luka 9 Bible Online

Luka 9 - Varisi bible

Luka 9

¹Jesu i koru qira manoga karua disipoloro ia, mana i teke ne qira karaputa mana mazala go iri mazala kakale na manuru sakata ro, mana va velaka qira vano i pala qira go soso mokoso ro.

²Go nae ia i turine qira tarina za mana za vatatavata ne qira basoero ne, de go zazao na Too de ikoego vari miasoka ia God, mana za va velaka qira basoero i pala qira go soso mokoso ro ria go.

³I sine ne qira igo, “Kasi pala na kaki pata ṉalu qamu zaza go, kasi pala na moki sisikolu ramu, kurama, ba pata gege, ba kesa, ba varuana roku ramu go.

⁴Ka pade qamu za kebae go ne za koe so pade nae go tina doka so ṉalu tamuna kasi nego komala nae.

⁵De iri koego basoero iriki soko qamu go kaega, kasi ne komala nae mana tavore pua na make qamu, iadena i lalana kaki pata va banabana de iri koego.”

⁶Disipoloro ne iri zaza goe to komala ro ne, va tatavata ne qira basoero Tarama Velaka ia God, mana iri va velaka qira basoero i pala qira go soso mokoso ro ria go.

⁷Batu lavata Erode ni kenaqa nego Qalili, i gata soba zazao na osina pata ni sadaka go, ivazao to nanao na, tanego kakiaro basoero iri go Jon na bapitema i too napu me.

⁸Kakiaro iri go, Ilaiza i lama sadaka napu mana kakiaro basoero iri go, kakiaro propeta ṉalu bana i za too napu me.

⁹Erode igo, “Kuzukuna Jon, qa kodaka bana, do akena tane valeke dena, qa gata ze go era pataro dena?” Mana i lete soko to mia na Jesu.

¹⁰Apostoloro ne iri ule me mana iri lama sine lupo ne Jesu osina pataro iri zazu ne. I lulu ne qira mana iri zaza vamiki to tanuqira, iri zae kaki komala vitoṉo na Betsaida.

¹¹Ṉalu basoero iri gata de izae go ia, iri kale muzi ne ia, i koru qira mana i pepeu ne qira dego Too ikoego vari miasoka ia God mana iva velaka qira basoero iri soko go velaka.

¹²I vele zunu zato saṉa ne, ria manoga karua disipoloro ne iri lamae dekoe Jesu mana iri sine ne, “Vagado qira basoero dena, go tarina zae komala ro ria mana de ikoego barue ria, go tarina taqia go kapata tarina ge go. Tanego ita qata lama koe de i kaega go pata gege na.”

¹³Do Jesu i sine ne qira, “Ramu to tamuna teke ne qira go kapata tarina ge go.” Iri vataule iri go, “Kalima bureri mana karua iṉana so iko go dena, avigo qo soko remu timuna za volia pata gege ria basoero dena?”

¹⁴Torana kalima mao valeke ro. Jesu i sine ne qira disipoloro ia, “Muna vakoloku qira basoero ne, torana neqo basoero mara kameka ko.”

¹⁵Taramuzina disipoloro ia iri zazu lupo ne de tina gogo koko qira basoero ne.

¹⁶Jesu i pala kalima bureri mana karua iṉana i kakadeka qe rani ne, i seko velaka zaqe God, i pasia mana i teke ne qira disipoloro ia, go tarina kenakena ne qira basoero ne.

¹⁷Osiqira basoero ne iri ṉaṉa mana iri kuma lupo, disipoloro ne iri soqe pata gege niko sivala go, mana torana manoga karua ebata iri va purake go.

¹⁸Kaki kameka ṉalu Jesu i pene vamiki tanuna, gonae disipoloro ia iri lamae de ikoego ia. “Akena tane era iri go basoero ne?” I tana ne qira.

¹⁹“Kakiaro iri go aro Jon na bapitema,” iri vataule. “Kakiaro iri go Ilaiza, kakiaro iri go, kakiaro propeta ro na ṉalu bana me i too napu me.”

²⁰Jesu i tana ne qira, “Do ramu? Akena tane era qamu go?” Pita iva taule ne igo, “Aro qo Kristo, qo reqe me de nikoe go God.”

²¹Jesu i sine vakaraputa qira disipoloro ia, niki ara sine ne kaki basoe sauna pata dena.

²²I sine napu ne qira, “Era Tuna basoe tuna lete vokara, tariniki soko ava kaega vano kazigarata ro, batu ria Patere ro mana vano tarove na tamana, tarina vae vale ava, do taramuzina kapisa musaqara era tuna too napu me.”

²³Mana i sine napu ne qira, “Ṉalu kaki basoe i soko lulu ava era, ia tina va qoqore tanuna mana pala koluse ia osina musaqara mana lulu ava era.

²⁴Tanego ka basoe isoko vakavele na too ia, tiniki pala kaega, do ka basoe iteke ne too ia sauqu era, tinara za pala too velaka ia.

²⁵Avigo ṉalu kaki basoe ikone osina pata velaka na kolabana pua dena mana i va riqo ze too ia, avigo pataro dena iri mazala tavisi ne ia? Kaega to!

²⁶Ka basoe i agava nava era mana vari vatatana ro era gogo ne. Era Tuna basoe, tuna agava napu ne ia, ṉalu tuna lamae go tatavata era mana tatavata ia Mamae mana ria aqelo tabo ro iago.

²⁷Mava nanao taru bana qamue, kakiaro ria iri ko go dena, tariniki le kaega go tina doka so ṉalu tarina mia go Too ikoego vari miasoka ia God.”

²⁸I sivala to kavitu musaqara sine i vae nego pataro dena, Jesu i lulu qira Pita Jon mana Jemisi iri popoka za kaki kubolo mana iri za pene.

²⁹Torana ṉalu iara za pene, tarakenaqana Jesu i kavala, mana poga ia ilete kakasa mana i damara.

³⁰Goso nae ia, iru lama sadaka so karua basoe, iru seko tabe Jesu, karua basoe dena, Mosese mana Ilaiza.

³¹Iru za sadaka me tatavata na rani ne, mana iri pepeu zaqe pataro tina va voto ze go soko ia God sauna ṉalu Jesu tina le go Jerusalema.

³²Pita mana karua vakitaka ia, iri lete kamuku zato, do ṉalu iri dogara, iri miasoba karaputa ia God i damare Jesu mana iri mia napu qiru karua basoe iru degere tavise ia.

³³Iru kasi neto riru ia, ko Pita i vane de Jesu, “Batu, ilete velaka sivala qata koego dena, remu mi zazu ne kapisa pade, kameka ke aro, kameka ke ia Mosese mana kameka ke ia Ilaiza go.” Iki rove so kaega kapata ni sine go.

³⁴Iara sekoseko so Pita i lama sadaka kameka toba i lama sapu lupo qirae dudulena, disipoloro ne iri lete sareki ṉalu toba ne i sapu qira go.

³⁵Kameka naki i reqe mego loborona toba ne igo, “Iato dena Tuqu era, iato qa vine go muna gata pata i sine go ia!”

³⁶Ṉalu naki ne i lupo, Jesu i ko vamiki so tanuna, ria disipoloro ro ne iri sotia so pataro dena, iriki ara pepeu ne kaega kaki basoe sauna pataro iri mia go.

³⁷Kene musaqara ne Jesu mana kapisa disipoloro ia iri qoqoro me tepa kubolo ne, mana topu sasakata basoero iri lama soba ia.

³⁸Kaki valeke iko tavisi qira basoero iri teṉo go i koru valavata igo, “Valeke vari vatatana qa pene go, ono tavisi ne sale era, tanego kameka so dena sale valeke era.

³⁹Kameka manuru sakata ivasakata tarua so ia, iato iva korukoru valavate go, mana manuru nae ne i poro va nenedere tokamana ia mana iva kuqu raporapo saqena go, manuru ne iki kasi neso kaega tokamana sale ne iva sasakata tarua so sale ne.

⁴⁰Qa pene qira ria disipoloro aro go mara kakale manuru ne qago, do i makuru qira.”

⁴¹Jesu ivataule igo, “Ke ramu basoero dena, i kaega ne qamu vaogoto, mana qamu lete kebu sakata go. Ava tina goto ka umata na ko tavisi tuna vae qamu go?” Gonae i sine ne valeke ne, “Lulu me dena sale valeke aro.”

⁴²Pasi i lama za sale valeke ne, manuru sakata ne, ivae va soru ze ia pua ne mana i nenedere go, do Jesu i kakale manuru sakata ne mana iva velake sale valeke ne, goto nae i teke vaule ne tamana.

⁴³Osina basoero ne iri lete nureke ne karaputa lavata ia God. Topu ria basoero ne iri ara nureke ne so osina pataro ni zazu ne go Jesu, gonae i sine ne qira disipoloro ia.

⁴⁴Muniki nanao kasupe ne pata qa vele sine ne qamu go, “Era Tuna basoe tarina pala va zao ve karaputa ria basoero ne.”

⁴⁵Do disipoloro ia iriki nanao rove so kaega, avana tane iva talupasa ze go seko ni sine ne qira go Jesu. Tanego God i pika ne qira, sauna pata dena, tarina gata, do tariniki rove kaega talupasana, mana iri sareki napu ne tana ne na avana tane talupasana seko ia i sine go.

⁴⁶Ria disipoloro ne iri vari valegu tanuqira, sauna akena tane i kenaqa ne qira go.

⁴⁷Jesu i rove nanao qira, gonae i pala kameka sale suka, iva degere ze rikisina,

⁴⁸Mana i sine ne qira, “Ka basoe iva velaka ne sale suka dena loborona vitoṉo qu era, ia iva velaka nava era, mana ka basoe iva velaka nava era, iva velaka napu neso ia ni turi nava go era. Tanego ia i lete sukae to de qamu koego ramu, iato i lete mazala sivala ne qamu go.”

⁴⁹Gonae Jon igo dena, “Remu qi mia kaki valeke iva zazua vitoṉo mu aro ni kakale ze manuru sakata, do qi sine ne mara mamanava, tanego iki ko tavisi qita kaega.”

⁵⁰Do Jesu i sine ne Jon mana disipoloro ia, “Muniki va mamanava ze, tanego ka basoe iki va sasakata ne qamu go kaega, i ke ramu to.”

⁵¹I lama garogaro to ṉalu God tina pala vaule zaqe rani ne Jesu, ia ivanadua nanao na mana i tasibaka za Jerusalema.

⁵²Jesu ivazao kenaqa qira vano palapala seko ia, go tarina zae kaki komala tepa Samaria go tarina za vanama bana ne ia osina ro pata.

⁵³Do basoero na komala nigogo ne, iriki soko kaega Jesu tina zae go komala ria, tanego iri rove Jesu i vele zae Jerusalema.

⁵⁴Ṉalu karua disipolo ia, Jemisi mana Jon iru gata soba seko dena, iru go dena, “Batu qo soko qaru raru maru koru zaqe nako tepa rani ne, go mara lama vasakata qira?”

⁵⁵Do Jesu i tabali mana i seko lavata qiru.

⁵⁶Gonae Jesu mana disipoloro ia iri za napue kaki komala go.

⁵⁷Loborona zaza iri vae go zuka ne, kaki kameka valeke i sine ne Jesu, igo, “Era tuna lulu go aro osina to dia tono goe go.”

⁵⁸Do Jesu i sine ne ia, “Sika piru ro iko de koko ria, palero iko kubasa ro ria, do Tuna basoe i kaega ne kade tina kekele mana kamukue go.”

⁵⁹Jesu i sine napu ne kaki valeke, “Lulu ava era.” Do valeke ne igo, “Batu maza vou a tekere mamae.”

⁶⁰Jesu iva taule ne ia igo, “Taru qira vano le, mara ria vari voru tanuqira, ba aro ne, ono za mana za sine vasadake de igogo Too ikoego vari miasoka ia God.”

⁶¹Kaki valeke napu igo, “Era tuna lulu nigo aro, do pata kenaqa maza va tarutaru qira tekere vanovano era.”

⁶²Jesu i sine ne ia, “Basoe i tatazo ne go mola ne do poro tabali ule i gogo ne, iki tora ze kaega Too ikoego vari miasoka ia God.”