Read Varisi Jon 1 Bible Online

Jon 1 - Varisi bible

Jon 1

¹Tarakenaqana kolabana pua iara zari go ‘Seko’ i ko bana so. ‘Seko’ dena i ko tavise God. Mana iru varipada God go.

²I ko tavisi bana meso God kokoso vatupiana na osina pata.

³Mana de ikoego to ‘Seko’ dena, God i vazaria go osina pata i koego kolabana pua dena.

⁴Loborona ia ikoe too. Too nae, iato tatavata i damara qira basoero na kolabana pua ne.

⁵Tatavata dena i damarae de i rodoko go, mana rodoko i makure sivale na iago.

⁶God i turine ne kameka valeke vitoṉo na Jon,

⁷tina lama sine ne qira basoero ne sauna tatavata dena, go osiqira basoero tarina gata mana vaogote go.

⁸Valeke dena iki tatavata kaega, do ia i lama go tina sine de go zazao na tatavata.

⁹Iato dena tatavata ogoto, tatavata i lama ego kolabana pua ne mana i damara qira osiqira basoero ne.

¹⁰‘Seko ne’ i koe kolabana pua ne, mana loborona to ia, God i vazari ze go kolabana pua ne, do kolabana pua dena iki mia rove kaega ia.

¹¹I lamae vudu ia, do basoero na komala ia, iriki soko kaega ia

¹²Do ria iri soko go ia, iri vaogote ia, ria nae i teke qira vatoqe go tarina salesalero ia God.

¹³Iriki podo gere kaega salero iri podo ego parasa qiru valeke mana qole, do God i zazu ne qira go, iva gere qirae salero ia.

¹⁴‘Seko’ dena i lama taitana mana i basoe, i purake Mana mana seko ogoto mana iko tavisi qita go. Remu qi mia karaputa mazala ia, ia to i kameka so Tuna go i pala go karaputa mazala nae de ikoego Tamana.

¹⁵Jon na bapitema tane i sine ne qira basoero sauna valeke dena, ia i koru valavata me igo, ‘Tato dena basoe qa pepeu ne qamu go,” qa sine go, “Basoe tina lama go taramuziqu era, i lete mazala sivala nava era, tanego basoe nae i ko bana so ia qara podo go era.”

¹⁶Mana loborona nanao na, i purake kula ia de qata koego, osina ṉalu i teke ne qita manava ia.

¹⁷God i tekene Tamana ia de ikoego Mosese, do Mana mana seko ogoto i reqe me de ikoego Jesu Kristo.

¹⁸Kaega kaki basoe i miasoba God. Do Jesu kameka minena so Tuna God mana i God napu go, mana i koe rikisina Tamana, iato iva sadaka me God de qata koego ita.

¹⁹Iato dena seko ia Jon na bapitema i sine ne qira go vano Jiu iri koego Jerusalema, ṉalu iri turine qira go vano patere ro mana vano Livai ro, go tarina za tana ne Jon, “Ake na tane ia?”

²⁰Jon iki kasi kaega vataule ne qira, do i sine vatatavata velaka ne qira, igo, “Era qaki Mesia kaega.”

²¹Gonae iri tana napu, “Akena bana go aro na? Aro go propeta Ilaiza?” Jon i vataule, igo, “Era qaki propeta Ilaiza kaega.” Iri tana napu, “Aro to propeta qi piri ne go remu?” Jon igo, “Kaega.”

²²Ṉalu gonae, “Sine ne qemu akena tane aro,” iri go. “Remu timuna pala vaule, taule na tana dena de iri koego basoero iri turine qemu mego, iago avana tono sine sauna tanumu?”

²³Jon i vataule ne qirae seko i sine bana go propeta Isaia, “Era qa gere kaki ovaṉa na kaki basoe i za korukoru me de i kaega go pata podopodo lavata na, igo vatotoloṉe zuka go tina goe go Batu ne!”

²⁴Ria basoero iri turine qira mego, vano Parisio iri tana

²⁵napu ne Jon, “Ṉalu aro qoki Mesia kaega, propeta Ilaiza kaega, ba kakia propeta kaega gogo ne, avigo tane qo bapitema qira basoero ne?”

²⁶Jon i vataule ne qira igo, “Era qa vari va bapitema ne besi, do kameka valeke i koe loboro qamu, mana ramu qamuki rove kaega.

²⁷Ia tina lama taramuziqu era, do era iki ara torava kaega patavolomo lupase na qolo na makebotu ia.”

²⁸Osina pataro dena i sadake loborona Betani, tepa uguru Jodan, de i za keba ne go saṉa ne, de goto i vari va bapitema ego Jon.

²⁹Bakubaku na ne Jon i mia Jesu i lamae de ikoego, mana igo, “Iato dona Sipi ia God i vakuziki ne go vasakata pata na kolabana pua ne.

³⁰Iato dena valeke qa pepeua go qa go, ‘Valeke tina lama taramuziqu era, i mazala sivala nava era, tanego valeke dena i ko bana so ia, qara podo go era.

³¹Patavolomo qaki rove go kaega ia, do era qa lama variva bapitema ne so besi, go basoero na Izirel tarina rove ia.’ ”

³²Gonae Jon i seko e de iri koego basoero ne, “Qa mia Spirit tabo i qoqoro ne tepa rani ne, i gere kurukuru mana i lama koe de ikoego ia.

³³Era qaki rove kaega akena tane valeke dena, do God ni turi nava era tuna variva bapitema ne besi, i sine bana nava igo de, ‘Tono mia Spirit tabo tina qoqoro me mana koe de ikoego Valeke ne. Valeke nae to tina bapitema qira e go basoero ne Spirit tabo.’

³⁴Tanuqu qa miasoba bana to, mana iato qa sine ne qira go basoero, valeke dena i Tuna God.”

³⁵Bakubaku na napu Jon i ko napue so dego mana i degere tavisi qiru karua disipolo ia,

³⁶ṉalu i miasoba go Jesu i lama sivala go, igo de, “Iato dona Sipi ia God.”

³⁷Ṉalu karua disipolo ne iru gata go seko i sine go Jon, iru kasi ne ia mana kale muzi ne Jesu iru go.

³⁸Jesu i tabali mana i mia qiru iru kale muzi ne, i tana ne qiru, “Avana tane qaburu taqia go?” Iru vataule ne, “Rabae! Ade tepa tane qo koego na?” Seko ‘Rabae’ dena talupasana, “basoe vari vatatana.”

³⁹Jesu i sine ne qiru, “Lama mana mia go.” Torana nae i vele kavasi kiloko to kikinaka raravi bago. Iago iru lulua ia mana iru za mia to de ikoego, gonae iru ko tavise ia kuse so.

⁴⁰Kaki kameka riru disipolo ne vitoṉona Aduru, kaena Saimon Pita.

⁴¹Aduru i za soba togana, Saimon mana i sine ne, “Remu qi miasoba to Mesia.” Seko dena talupasana Kristo.

⁴²Gonae i lulu me Saimon de ikoego Jesu. Ṉalu Jesu i reṉa ne Saimon igo dena, “Aro vitoṉomu Saimon sale ia Jon, do vitoṉomu tina Kepas to ninidena.” Vitono dena i gere napua so Pita, talupasana bakoso.

⁴³Bakubaku na napu Jesu i nanao mara zae Qalili igo. I soba Pilipi mana i sine ne, “Lulu ava era.”

⁴⁴Pilipi i reqe napu meso Betsaida komala iri koego Aduru mana Pita.

⁴⁵Pilipi i soba Natanel mana i sine ne, igo, “Valeke ni karo valu bana ne Mosese loborona buka na Tamana ne, mana karo ro ria propeta ro go ne, qi soba to remu. Vitonona Jesu, sale ia Josepo i reqe me komala Nazaret.”

⁴⁶Natanel igo, “Kaega so kaki pata velaka tina mazala go reqe me Nazaret?” Do Pilipi i vataule ne ia, “Lama mana ono mia.”

⁴⁷Ṉalu Jesu i mia Natanel i lamae go de ikoego, i vane ia de, “Valeke dena i basoe ogotona to Izirel, mana iki rove kaega poqe go.”

⁴⁸Natanel i tana ne Jesu, “Avigo tane qo rove ava era?” Jesu i vataule, “Tarakenaqana Pilipi iara garetu koru go aro, era ga mia go aro qo kolokue polana moki iri vitoṉo ze piqi.”

⁴⁹Natanel i vataule, “Valeke vari vatatana, aro qo Tuna God! Aro to qo Batu lavata na Izirel.”

⁵⁰Do Jesu i sine ne ia, “Qo vaogoto tanego qa sine nigo, qa mia go ṉalu qo koloku ego polana moki piqi ne. Do tono ara mia pata lavata ro, i sivala ne ianae.”

⁵¹Mana i sine napu ne qira igo, “Ma sine ne qamu pata ogoto, tamuna mia zakazaka ne tina papaqa mana aqelo ro ia God tarina popoka za rani mana qoqoro me de qa koego era, Tuna Basoe.”