Read Varisi Jon 13 Bible Online

Jon 13 - Varisi bible

Jon 13

¹Bakubaku na to tina musaqara kelo na Pasova ne. Gonae Jesu i rove ṉalu ia tina kasi nego kolabana pua dena, mana tina gado ule za de ikoego Tamana, i lama garogaro to. Jesu i mamaligara taru bana ne qira so basoero tavine ia, iri koego vudu pua dena, i mamaligara ne qira go za doka so ṉalu ia i le go.

²Raravi na ṉalu nae, Jesu mana disipoloro ia iri za ṉaṉa go, Satana i keba banae nanao na Jiudas sale ia Saimon Iskariot go tina va besa nego Jesu.

³Jesu i rove, osina karaputa, Tamana iteke lupo ne ia, mana irove napua, tanuna ireqe me de ikoego God, mana tina ule napu za de ikoego God go.

⁴Iago i degere kasi ne tevolo ne, i ozuke roku loda ia, mana i pala taolo i vabaribari ne.

⁵Gonae i zele ze besi kaki disi mana i sabore makeqira disipoloro ia, mana i qusa vakadala ze taolo i vabaribari nego.

⁶I lama dokae de ikoego Saimon Pita, ia i vane de Jesu, “Batu, avigo tono sabore, makequ era ba?”

⁷Jesu i vataule ne ia, “Pata qa zazu ne go era ninidena, aro qoki nanao rove kaega, do taramuzina tono ara nanao rove go.”

⁸Pita igo de, “Qoki mazala kaega tono sabore go makequ era!” Jesu ivataule ne, igo, “Ṉalu tuniki sabore go kaega makemu, aro toniki disipolo era kaega.”

⁹Iago Saimon Pita igo, “Batu, oniki sabore so miki makequ, do ono sabore karisiquro mana kuzukuqu go!”

¹⁰Jesu igo de, “Basoe i seqe bana go, i dalo lupo bana, mana ki ara soko kaega sasaboro go, do makena so tina sabore go. Ramu qamu dalo bana, do kaki kameka ramu iki dalo kaega.”

¹¹Jesu i rove bana ia tina vabesa nego, go ni sine go, “Kaki kameka ramu iki dalo kaega,” ni gogo.

¹²Jesu i saboro lupo makeqira. Ivakeba ne roku loda ia, mana i za koloku ule napu. Gonae i tana ne qira, igo, “Avigo qamu nanao rove tane pata qa zazu ne qamue go era ba?

¹³Ramu qamu koru ve era, valeke vari vatatana mana Batu, ianae i totoloṉo mana i ogoto go, tanego i era to.

¹⁴Era qa Batu mana valeke vari vatatana ramu, do qa sabore makeqamu gere valeke seka ne, ramu muna vari saboro ne makeqamu go.

¹⁵Zazu qa vasadaka ne qamu go era nae, i vasadake too velaka deqamu koego, go ramu tamuna zazu vapadapada napu neso go.

¹⁶Ma sine ne qamu pata ogoto, basoe zazu iki sivala ne kaega batu ia, mana basoe palapala seko iki sivala ne kaega, basoe ni turi nego.

¹⁷Ramu qamu rove to pataro dena, tamuna kula sivala ṉalu qamu lulua go!

¹⁸Era qaki seko ne kaega osiqamu, tanego ria qa vine qira go, qa rove velaka qira. Do go tina voto go seko na Buka tabo ne, ‘Basoe qaru kameka ṉaṉa go, iato tina vasakatava go era!’

¹⁹Era masine bana ne qamu ramu pataro tina doka go, go ṉalu tina za sadaka go ia ne, ramu tamuna vaogote, ‘Era Qa Basoe Qa Koe Osina Ṉalu’.

²⁰Masine ne qamu pata ogoto, basoe i vavelaka ne ia qa turi ne go era, i vavelaka napu nava era go. Mana basoe i vavelaka nava era, i vavelaka napu neso ia ni turi nava go era go.”

²¹Taramuzina Jesu i sine lupo ne qira sekoro dena, nanao na ilete maqata sasakata, mana i sine vasadake, “Masine ne qamu to pata ogoto, kaki kameka ramu dena, tina vabesa nava era.”

²²Pasi nae disipoloro ia iri vari reṉareṉa, iriki rove kaega akena tane ivatalupasa ze go Jesu.

²³Kaki kameka disipolo Jesu i lete mamaligara ne go, i kolokue rikisina Jesu.

²⁴Iago Saimon Pita i tabali za igo, “Tana ne ia, akena tane i va paqo zego na?”

²⁵Gonae disipolo ne i tabali za de ikoego Jesu mana i tana ne, “Akena na Batu?”

²⁶Jesu i vataule ne, igo dena, “Era tuna pasu zaqe tapasi na bureri dena loborona ebata ne, mana basoe tuna teke ne go ne, iato valeke ne.” Iago i pala tapasi na bureri ne, i posu zaqe ebata ne, mana i teke ne Jiudas, sale ia Saimon Iskariot?

²⁷Ṉalu Jiudas i pala bureri nae, Satana ne i kebae ia. Gonae Jesu i sine ne ia, “Zazu vakatikili ne to aro, pata tono zazu nego!”

²⁸Ria kero iri koloku ego tevolo ne, iriki nanao rove so kaega, avigo tane Jesu i sine ne ia sekoro igogo ne.

²⁹Jiudas ne, iato valeke i miasoka go kesa ria ne. Iago disipoloro ne iri nanao Jesu i sine ne Jiudas, go mara za volia kakiaro pata go tarina vazazua ze go musaqara lavata nae, ba, na za teke ne qira kakiaro pata vano iri situ go.

³⁰Jiudas i pala lupo to bureri nae, mana katikili i siporo za. Torana nae ne i kuse to.

³¹Ṉalu Jiudas i siporo kasi nego pade ne, Jesu igo de, “Ninidena karaputa mazala ia Tuna basoe ne tina sadaka me, mana karaputa mazala ia God, tina sadaka me, de ikoego iago.

³²Mana ṉalu iri vazaka ze God sauna Tuna basoe ne, tanuna God do tina vazaka napua ia, mana tina vazaka ia nini de go.

³³Salero era, tuniki kotavisi vaumata qamu kaega. Ramu tamuna taqiava era, seko qa sine bana ne qira go batubatu ria vano Jiu ne, ma sine napu ne qamu, ‘I makuru qamu garetu na de tuna zae go era.’

³⁴Ninidena qa teke ne qamu tamana voru, muna vari mamaligarae gere era qa mamaligara ne qamu go, iago muna vari mamaligarae.

³⁵Ṉalu qamu vari mamaligarae go, basoero ne tarina mia rove, ramu qamu disipoloro era.”

³⁶Saimon Pita i tana ne Jesu, igo, “Batu, adepa tane tono zae go?” Jesu i vataule ne ia, igo, “Ninidena i makuri go luluava era, mana zae na de tuna zae go era go, do taramuzina tono ara lulu ava era.”

³⁷Pita igo de, “Batu avigo tane i makuru ava go era lulu go ninidena? Era qa vanama ne tuna le palu go aro.”

³⁸Jesu ivataule ne ia, igo, “Avigo go lete toqe ne tono le paluava era? Masine nigo pata ogoto sivala, tarakenaqana kokorako tinara dae go, kapisa zaza tono sine, qoki rove ava kaega era.”