Read Varisi Jon 14 Bible Online

Jon 14 - Varisi bible

Jon 14

¹Jesu i sine ne qira disipoloro ia, “Kasi va pela na nanao qamu, vaogote God, mana vaogoto ava era go.

²Loborona pade ia Mamae i koe topuna kova, ṉalu taraki ogoto go kaega, qaki mazala kaega sine na seko dena. Do i pata ogoto, iata go qa sine go, iago tuna za vanama ne qamu.

³Taramuzina tuna za vanama lupo ne qamu de gogo ne, era tuna ule me mana lama lulu qamu, go tamuna garetu koego de qa reqe mego.

⁴Ramu qamu rove bana zuka igo za go de qa vele zae go era.”

⁵Tomasi i vane de ia, “Batu remu qimuki rove kaega, de qo vele zae go aro, iago avigo timuna rove go remu zuka igo za go de qo vele zae go nae?”

⁶Jesu i vataule, igo, “Era to qa zuka, qa ogoto mana qa too, ka basoe i soko zae na de ikoego Mamae, tina zuka goe me de qa koego era.”

⁷I sine napu ne qira, igo, “Qamu rove ava era, iago qamu rove napua so Mamae go, pasi ninidena popoka gogo ne, ramu qamu rove Mamae mana qamu mia ze Mamae loborona era go.”

⁸Pilipi i sine ne ia, “Batu, va mia qemue Tamamu, go timuna nanao velaka go.”

⁹Jesu i vataule, igo, “I lete umata sasakata to era qa ko tavisi qamu go, do qoki rove ava so kaega ba Pilipi? Ka basoe i miasoba va era, i miato Mamae. Avigo tane qo sine go, vamia qemue Tamamu na?

¹⁰Avigo qoki vaogote so kaega, era qa koe loborona Mamae mana Mamae i koe loboroqu era go? Sekoro qa seseko ne go era, iki reqe kaega nanao era tanuqu, do mamae ikoego loboroqu era izazu ne go pata i soko go.

¹¹Muna vaogoto ava era, ṉalu qa go era qa koe loborona Mamae mana Mamae i koe loboroqu era. Ba ṉalu kaega ne, vaogoto ava so era ramu, tanego qamu mia bana to zazu velakaro qa zazu ne go.

¹²Ma sine ne qamu pata ogoto, basoe i vaogoto ava era, tina zazu napu neso pataro qa zazu nego era. Ove to! Ia tina zazu ne kakiaro pata tina sivala ne zazu ro qa zazu bana ne go, tanego era qa zae de koe Mamae.

¹³Mana ṉalu qamu pene ze kakia pata loborona vitoṉoqu, era tuna teke ne qamu. Go karaputa mazala ia Mamae tina sadake loborona sale ia.

¹⁴Ṉalu qamu pene ze kaki pata, loborona vitoṉoqu, era tuna zazu ne.”

¹⁵“Ṉalu qamu mamaligara nava era, ramu tamuna lulua tamana ro era.

¹⁶Era tuna pene zaqe Mamae, go tina teke ne qamu kameka basoe vari vatatavisi go tina ko tavisi qamu osina ṉalu.

¹⁷Basoe nae to Spirit tabo, iato i vasadake go ogoto na God. Basoero na vudu pua dena iriki toqe ne kaega toṉove na Spirit tabo, tanego iriki miasoba kae mana iriki rove kaega go, do ramu qamu rove ia tanego i ko tarue de qamu koego, mana ikoe loboro qamu go.

¹⁸Era tuna zaza, do ramu tamuniki ko miki kaega, tanego era tuna ule napu me de qamu koego.

¹⁹Kavia to musaqara i ko basoero na vudu pua dena, tariniki mia va kaega era, do ramu tamuna miava era, tanego era to qa too, iago ramu tamuna too go.

²⁰Tina doka go musaqara na ne, ramu tamuna rove era qa koe loborona Mamae mana ramu qamu koe loboroqu era, gere na era qa koe loboro qamu ramu.

²¹Ka basoe i toqe ne mana lulua go tamana era, basoe nae i mamaligara nava era. Mamae tina mamaligara ne iani mamaligara nava era. Era tuna mamaligara ne ia mana tuna vasadaka ne ia tanuqu go.”

²²Jiudas igo de, Jiudas Iskariot kaega. “Batu, avigo tane tono vasadaka zeso tanumu de qemu koego so remu, do basoero na vudu pua dena kaega na?”

²³Jesu ivataule, igo, “Basoe i mamaligara nava go era, tina lulua vari vatatana era. Mamae tina mamaligara ne ia, mana raru Mamae taruna lamae de ikoego ia mana koe loborona iago.

²⁴Do ka basoe iki mamaligara nava go kaega era, iki lulua kaega vari vatatana era. Do vari vatatana qamu gata go ne, iki ke rera kaega, do i ke ia Mamae ni turi nava mego.

²⁵Pataro dena qa sine lupo bana ne qamu, pasi qara ko tavisi qamu go.

²⁶Spirit tabo, i basoe vari vatatavisi, Mamae tina turine me ia loborona vitoṉoqu era, tina vatatana qamue osina pata, mana tina vananaotaru qamu e osina pata qa sine bana ne qamu go.

²⁷Bule qa taru ne qamu, bule era tane qa teke ne qamu go, era qaki soso ne kaega bule de go basoero na vudu pua dena iri soso nego. Iago kasi va pela na nanao qamu mana kasi sareki go.

²⁸Ramu qamu gata, era qa sine bana, ‘Era tuna zaza do tunara ule napu me de qamu koego go!’ Ṉalu qamu mamaligara nava era, ramu tamuna kula, tanego era qa zae de ikoego Mamae, tanego Mamae i kenaqa nava era.

²⁹Era qa sine bana ne qamu, ia tinara doka go pataro igogo ne, go ṉalu tina za sadaka go pataro nae, ramu tamuna vaogote.

³⁰I makuru ava tuna seko tabe vaumata qamu go, tanego Satana ni kenaqa nego vudu pua dena i za lama. I kaega ne karaputa de qa koego era,

³¹Iago basoero na vudu pua dena, mara rove era qa mamaligara ne Mamae, mana qa va voto lupo to pataro i sine nava go Mamae. Degere, mata siporo kasi ne pade dena.”