Read Varisi Jon 18 Bible Online

Jon 18 - Varisi bible

Jon 18

¹Taramuzina Jesu i pene lupo, i lulu ne qira disipoloro ia mana iri piqata kava e ovona kedron. Kaki barui i koe de go, iago Jesu mana disipoloro ia iri za koe de go.

²Jiudas valeke tina vabesa nego Jesu i rove bana barue igogo ne, tanego topu na ṉalu Jesu i soba qirae disipoloro ia de igogo ne.

³Iago Jiudas i lulu qira me kaki taotao na soldia ria vano Rom mana vano iri miasoka go Pade Lotu ne, iri turine me qira go vano batu ria patere ro mana vano Parisio go, iri pala me pazi mana pata varitara ro go.

⁴Jesu i rove bana osina pataro tina doka go, iago i za soba qira mana i tana ne qira, igo, “Akena tane qamu taqia go na?”

⁵Iri vataule ne iri go, “Remu qi taqia Jesu na Nazaret.” Jesu igo de, “Era to dena.” Jiudas valeke ni vabesa nego Jesu i degere tavisi qira go.

⁶Pasi Jesu i sine go, “Era to dena.” Osiqira ne iri tanokoro ule mana iri sorue pua ne.

⁷Gonae Jesu i tana napu ne qira, igo, “Akena tane qamu taqia go na?” Iri vataule, iri go, “Jesu na Nazaret”.

⁸Jesu igo, “Qa sine bana ne qamu, era to dena, ṉalu go qamu taqiava go era vagado qira ria kero ne.”

⁹Jesu i sine seko ro dena, go sekoro i sine bana go, tina lama sadaka ogoto go, igo, “Mamae, basoero qo teke nava go kaega kakia qava rore go.”

¹⁰Saimon Pita i pala bana kameka peqi loda, irave vasipore mana i puta siva ne zaqe qeqele matauna basoe zazu ia batu ria patere ro, vitoṉona valeke ne Malkusi.

¹¹Do Jesu i sine ne Pita igo, “Roku vaule zaqe peqi loda aro! Era ne qa toqe bana, tuna pala vokara go tina lulua go de i soko go Mamae!”

¹²Gonae taotao na soldia ria vano Rom mana batu ria, vano iri miasoka go padelotu ne iri vari pala neto Jesu, mana iri qolo vari palu ne karua karisina go.

¹³Mana iri lulu vazao kenaqa ze ia de ikoego Anas, tanego Anas i ravana go Kaipas, i Batu lavata ria patere ro ave nae.

¹⁴Iato Kaipas dena tane i sine bana ne qira go batubatu ria vano Jiu igo, ‘i velaka so kameka basoe tara le ne sauqira basoero topu.’

¹⁵Saimon Pita mana kene disipolo iru lulu muzi ne Jesu. Kene disipolo ne, batu lavata ria patere ro i rove velake ia, iago i lulu muzi ne Jesu mana i keba za de koko na pade lavata ia batu ria patere ne.

¹⁶Do Pita i ko meso pekapeka ne tepa siporaṉa ne. Gonae kene disipolo ne, i siporo ule me, ilama seko tabe qole ni miasoka go siporaṉa ne, mana i lulu vakeba Pita go.

¹⁷Qole ikoego siporaṉa ne ivane de Pita, “Aro to qo kakia disipolo ia valeke ne ba?” Pita i vataule ne igo, “Kaega, era kaega.”

¹⁸Ṉalu nae, i ṉalu na lolomu, iago vano zazu mana vano iri miasoka go de igogo ne, iri subo nako mana iri kakasiru go. Iago Pita i za kakasiru tavisi qira.

¹⁹Gonae batu ria patere ro i tana ne ze Jesu sauqira disipoloro ia mana sauna vari vatatana ro iago.

²⁰Jesu i vataule ne ia, igo de, “Era qa seko vasadaka mana qa vatatavata lupo osina ro pata de iri koego basoero ne, vari vatatana ro era qa zazu ze loborona Pade Lotu mana de koko na Pade Lotu go, de iri mazala go kameka teṉoe go basoero ne. Kaega kaki pata qa sine pika go era.

²¹Avigo tane qo tana nava go era? Tana ne qira basoero iri gata go pataro qa vari vatatana nego, ria to iri rove go.”

²²Taramuzina Jesu i sine go sekoro dena, kaki kameka ria vano iri miasoka go dego, i posare Jesu mana igo de, “Avigo tane qoki vamazale go kaega batu ria patere na?”

²³Jesu i vataule ne ia, igo, “Ṉalu go pataro qa sine go era i kebu, vasadaka ne qira basoero dena. Do ṉalu go pataro qa sine go era i totoloṉo go, avigo tane qo posara va go era na?”

²⁴Gonae Anas i vazao ze Jesu de ikoego Kaipas, qolo ikoego karisina iara osia so.

²⁵Pita iara degere mana kakasirue rikisina nako ne, go nae iri vane de ia, “Aro to qo kakia disipolo ia valeke ne ba?” Do Pita i legua igo, “Kaega, era kaega.”

²⁶Kaki kameka ria vano zazu ia batu ria patere, onotono valeke i puta siva ne Pita qeqele na, i seko me igo, “Kadego aro to bago qa mia ge barue ne ba?”

²⁷Do Pita i lequ vakaega napua igo, “Kaega, era qaki ko tavise kaega ia,” torana so nae kokorako ne i dae to.

²⁸I tavuara me ia, vano Jiu iri kasi ne pade ia Kaipas, iri lulua Jesu mana iri zae pade ia Qavuna ria, Batubatu ria vano Jiu iriki keba za kaega loborona pade ne, tanego iriki soko kaega va poṉo na too ria, qo tarina mazala go ge na pata gege na Pasova ne.

²⁹Iago Pilato i za siporo me pekapeka ne mana i tana ne qira, igo, “Avana to qamu mia ze ba rove ze ramu i vakebua go valeke dena na?”

³⁰Iri vataule me iri go, “Remu i makuru qemu timuna pala me ze deqo koego aro valeke dena, ṉalu go iki zazu ne kaega kaki pata, do valeke dena, i valeke sakata.”

³¹Pilato i vane qira dena, “Pala za tanuqamu mana valulu ze de igogo vatovato na tamana ramu go.” Do iri vataule ne, iri go, “Do tamana remu iki vamao ne qemu kaega vae vale na basoe.”

³²Seko ro dena i sadaka, go de tina gogo le ia igo Jesu tina lama ogoto go.

³³Gonae Pilato i keba ule za loborona pade ia mana i tana ne Jesu, “Avigo aro to qo batu lavata ria vano Jiu ba?”

³⁴Jesu i vataule igo, “Avigo tana nae ireqe me nanao aro tanumu, ba basoero ne tane iri sine nigo sauqu era?”

³⁵Pilato i vataule napua, igo, “Avigo qo nanao era qa valeke Jiu? Basobasoero aro mana batu ro ria patere ro go iri valame ge aro de qa koego era, iago avana tane qo vakebua go aro na?”

³⁶Jesu i vataule ne ia, igo, “Era qaki batu lavata gere qira kaega batu lavata na ro vudu pua dena. Ṉalu tu batu lavata ego vudu pua dena, basobasoero era tara lama varitara bana so, go batubatu ria vano Jiu taraki palava kaega era. Ba era ne qaki batu lavata na kaega vudu pua dena.”

³⁷Pilato i tana napu ne, igo, “Iago aro qo batu lavata?” Jesu i go, “Aro to qo sine, era qa batu lavata mana i ogoto go. Era qa podo me vudu pua dena go tuna sine vasadake pata ni ogoto go, ka basoe i toqe ne lulu na pata ni ogoto go, i mazala gata na pataro qa sine go era.”

³⁸Pilato i tana napu, “Avana tane i pata ogoto go?” Gonae Pilato i siporo napu me de iri koego vano Jiu mana i sine ne qira, igo, “Era qaki soba ze kaega kaki pata sakata de ikoego valeke dena.

³⁹Do vatovato ṉalu bana ramu, ṉalu musaqara Pasova ne, ramu qamu rove era tuna va siporo bana ze so bara ne kaki kameka basoe. Iago, avigo qamu soko nava siporo ne qamu batu lavata ramu vano Jiu?”

⁴⁰Iri koru valavata me, iri go, “Kaega, valeke nae kaega! Remu qi soko Barabasi tono vasipore go!” Barabasi i valeke vae vale basoe.