Read Varisi Jon 19 Bible Online

Jon 19 - Varisi bible

Jon 19

¹Gonae Pilato i sine ne qira vano soldia tarina pala mana za sima Jesu go.

²Vano soldia ne iri zazu vatopatopa ne kaki qolo paqopaqo mana iri vatopatopa ze Jesu, gonae iri varoku napu ze ia roku loda qore go.

³Iri zae de ikoego Jesu mana iri go, “Aro to qo batu lavata ria vano Jiu!” Gonae iri posare tarakenaqana go.

⁴Pilato i siporo napu me, mana i sine ne qira basoero, “Era tuna vasiporo me de Jesu, go ramu tamuna rove, era qaki soba ze kaega kaki pata sakata de ikoego valeke dena.”

⁵Iago Jesu i siporo me, i vatopatopa ne qolo paqopaqo mana i varoku ne roku loda i qore go. Pilato i sine ne qira basoero ne, igo, “Valeke ne to dena!”

⁶Ṉalu batu ria patere ro, mana vano iri miasoka go pade lotu ne, iri miasooa zage Jesu, iri koru valavata iri go, “Paqipaqi ze ia koluse ne! Paqipaqi ze ia koluse ne!” Do Pilato i vataule ne qira, igo, “Muna pala za tanuqamu mana paqipaqi ze ia koluse ne, ba era ne, qaki soba ze kaega kaki pata sakata de i koego valeke dena.”

⁷Basoero ne iri vataule me, iri go, “Remu i ko ne qemu tamana, iago valeke nae tina le bana so, tanego tanuna i Tuna God igo.”

⁸Ṉalu Pilato i gata soba seko igogo ne, i lete sareki napu.

⁹Gonae i keba ule za pade lavata ne, mana i tana ne Jesu, “Adepa tane qo reqe mego na?” Do Jesu iki seko kaega.

¹⁰Pilato ivane de Jesu, “Avigo tane qo kasimu go seko tabe ava era? Qoki rove kaega, era iko nava karaputa tu lupasi go aro, mana tu paqipaqi qe aro koluse ne go?”

¹¹Jesu i vataule ne ia, igo, “Ṉalu taraki teke nigo kaega God karaputa nae, i makuri go tono sivala nava era, do basoe i valama ve era deqo koego aro tane iri lete kebu go.”

¹²Ṉalu Pilato i gata seko dena, i lete soko to vakavele na Jesu. Do basoero ne iri koru valavata me iri go, “Ka basoe igo, tanuna i batu lavata go, basoe nae i vasasakata ne Siza, iago ṉalu qo vaqalupase valeke nae, aro qoki vakitaka ia kaega batu lavata Siza ikoego Rom!”

¹³Pilato i gata seko ro nae, gonae i lulu vasipore Jesu. Pilato gonae i za kolokue, de kolokoloku ia ṉalu i zazu nego Vivine, pata igogo ne iri vitoṉo ze, ‘Sara ipaka,’ vano Iburu iri vitoṉo ze ‘Gabata.’

¹⁴Torana nae ne, i kikinaka raravi na musaqara vavanama na musaqara Pasova ne. Iago Pilato i sine ne qira basoero ne, igo, “Iato dena batu lavata ramu!”

¹⁵Basoero ne iri koru me, iri go, “Vae vale ia! Vae vale ia! Paqipaqi ze koluse ne!” Pilato i tana napu ne qira, igo, “Avigo qamu soko era na paqipaqi ze koluse ne batu lavata ramu?” Do batu ria patere ro iri vataule me iri go, “Valeke nae iki batu lavata reremu kaega! Batu lavata Siza i koego so Rom ni batu lavata remu!”

¹⁶Iago Pilato i vazao ze Jesu de iri koego basoero ne go tarina vae vale ze ia koluse ne. Goto nae vano soldia iri lama lulua ia.

¹⁷Loborona zaza ria ne, Jesu i vagore koluse ia mana iri za dokae kaki dia iri vitoṉo ze ‘Kovila na kuzuku’, vano Iburu iri vitoṉo ze ‘Qolqota.’

¹⁸De go iri paqipaqi ze Jesu koluse ne, mana kaki karua basoe napu go, koluse ia Jesu i degere vari lobori qiru.

¹⁹Pilato i karo bana kaki moki betera mana i taru zaqe zakazaka na koluse ne, karo ne igo dena, “Jesu na Nazaret batu lavata ria vano Jiu.”

²⁰Topu ria vano Jiu iri toere karo igogo ne, tanego de iri paqipaqi zego Jesu iki laqalaqa ne kaega komala lavata ne, mana karo ne iva Iburu, iva Latin mana iva Qrik go.

²¹Batu ro ria patere ro iri sine ne Pilato, “To kasi karo na, ‘Batu lavata ria vano Jiu’, do to karo, ‘Valeke dena igo, tanuna i batu lavata ria va Jiu.’”

²²Do Pilato i vataule ne qira, igo, “Pata qa karo bana to, ki ara kavala kaega.”

²³Taramuzina vano soldia iri paqi-paqi ze Jesu koluse ne, iri pala poga ro ia mana iri kena vakavasia nogoto qira vano soldia ne. Iri pala napua roku loda ia, iri zazu ne zeso kameka poga loda go.

²⁴Vano soldia ne iri vari sine ne, “Mata kasi ridake na, do mata va qiso daisi, go mata mia akena tina pala go.” Iadena i sadaka, go seko i sine bana go Buka tabo ne tina lama ogoto, igo, “Iri vari kena kena ne poqaro era, iri va qiso daisi ne roku loda era.” Pataro dena soldia ro iri zazu neto.

²⁵Ria iri degere go garogaro na koluse ne, sinana, mana, kaena sinana Jesu, Maria qole ia Kilopas mana Maria Madalena go.

²⁶Jesu i reṉa ne Sinana mana disipolo ia i lete mamaligara ne go iru degere go, iago i sine ne sinana, “Qole, valeke nae i sale aro.”

²⁷Gonae i sine napu ne disipolo ne, “Qole dena i sinamu aro.” Pasi to ṉalu nae disipolo ne i lulu vagado zaqe pade ia sinana Jesu mana i miasoka go.

²⁸Taramuzina nae Jesu i rove osina zazu ia ivalupo to. Mana go tina voto go seko na Buka tabo ne, ia igo, “Era qa kaṉoso!”

²⁹Iri pala zaza bana ne kaki disi i purake vino pani, iago iri pala moki iri soma ze kaki pata, iri posu zaqe vino pani ne mana iri va siba zaqe saqe na Jesu.

³⁰Ṉalu Jesu i besi lupo vino pani dena, igo dena, “Era qa va lupo to zazu dena.” Goto nae i tudu mana i le go.

³¹Musaqara dena i purare, mana i musaqara vanamanama na musaqara Sabat, mana Sabat dena ne i lete mazala sivala. Iago batubatu ro ria vano Jiu, iri za pene Pilato go mara vamao ne qira kopule na makeqira, ria tarapisa iri paqipaqi qirae go koluse ne, mana sipa qirae koluse ne go. Iri zazu ne iadena tanego iriki soko kaega tokama qira tarapisa ne, tina idoke go koluse ne musaqara Sabat.

³²Iago soldia ro ne, iri za kopulu kenaqe make qiru karua valeke iri paqipaqi tavisi ze Jesu koluse ne.

³³Do ṉalu iri vele za kopulu napua makena Jesu, iri mia Jesu i le bana to, iago iriki kopule kaega makena.

³⁴Do kaki kameka ria soldia ne, i paqo zaqe bele ne orapana Jesu, katikili so parasa mana besi iru siporo me.

³⁵Valeke i miasoba go pata dena tane i pepeua go, go ramu do tamuna vaogoto napua. Pataro i pepeua go i pata ogoto, mana irove pata i sine go, ipata ogoto go.

³⁶Pataro dena i sadaka, go sekoro i sine go Buka tabo ne tina lama ogoto go, igo de ‘kaega kaki kameka uriqu tarina kopule go.’

³⁷Mana kaki dia napu loborona Buka tabo ne, igo, ‘Osiqira basoero ne tarinara mia zaqe valeke iri paqo zego bele ne.’

³⁸Taramuzina iadena, Josepo valeke na Arematia, i lama pene ze Pilato tokamana Jesu, mana Pilato i vamao ne ia. Josepo i lulu pipika so Jesu, tanego i sareki ne qira batubatu ria vano Jiu.

³⁹Nikodemus, i za mia bana go Jesu kaki kuse ne i lulua Josepo, ia i pala me torana pisaṉaulu kilo maqatana spaes i lomiri ze lodu nonoli go mana aloes go.

⁴⁰Karua valeke ne iru pala tokamana Jesu, iru kade ze poga kakasa mana karua pata nonoli ne, tanego iru valulu ze vatovato ria vano Jiu dego iri vele voua go basoe le ne.

⁴¹Garogaro na de iri paqipaqi ze go Jesu i koe kaki barue, mana barue igogo ne i koe kaki leṉa voru, iri ara kaebo vou zena ka basoe.

⁴²Tanego i musaqara vanamanama na Sabat, mana leṉa ne i ko garogaro so iago, iru za taru ze tokamana Jesu loborona leṉa igogo ne.