Read Varisi Jon 2 Bible Online

Jon 2 - Varisi bible

Jon 2

¹Taramuzina karua musaqara, kaki vari va busi i koe komala Kena loborona Qalili. Sinana Jesu i za ko tavisi go,

²mana iri rave napu qira Jesu mana disipoloro ia sauna vari vabusi ne.

³Ṉalu vino iri besia go vano vari vabusi ne i lupo, sinana Jesu i vane de Tuna, “Vino ne i lupo to.”

⁴Jesu i vataule, “Qole, oniki sine nava era avana tuna zazu ne, tanego ṉalu era iara kaebo lama doka.”

⁵Sinana Jesu i sine ne qira vano zazu ne, “Muna zazu ne so pata tina sine ne qamu go.”

⁶Vano Jiu ne i ko ne qira topu tamana de go saboro vadalo na tokamaqira, sauna to ia igogo ne, i ko ne qira go kaonomo pata kukukulu iri palapala besi ne, nogoto na pata kukukulu ne i mazala vapurake na kameka vasa ba kameka vasa neqo lita.

⁷Jesu i sine ne qira vano zazu ne, “Vapuraka ze pata kukukulu ro nae besi,” mana ria iri vapurake za vadoka zeto saqe na,

⁸gonae i sine ne qira, “Nete vakava desuka besi ne mana za teke ne batu na kelo ne.” Iago iri pala vazao, ne ia

⁹besi i kavale go vino ne mana i ge pada. Iki rove kaega adepa tane i reqe mego vino dena, do vano zazu iri kima va kava mego so iri rove go, iago i korua valeke i busi go,

¹⁰mana i sine ne ia, “Osina ṉalu basoero ne iri soso kenaqa ne vino velaka, taramuzina basoero ne iri lete ge va topu to, iri ara soso napu ne vino iki lete velaka go kaega, do aro qo sotia so vino velaka, iato qo ara valama go dena.”

¹¹Jesu i vasadake zazu vari va poloso kenaqa dena loborona kena Qalili komala Kena, de go i vasadaka ze de go mazala na karaputa ia, mana disipoloro ia iri vaogote iago.

¹²Taramuzina to vari va busi dena, Jesu mana sinana, ria togana ro mana kaena ro, disipoloro iago iri zae Kapanaum, iri za koe de go kavia so musaqara.

¹³I garogaro to doka na ṉalu vano Jiu tarina teṉo ne sauna nanao taru na, ṉalu God i vasiporo kasi ne qirae Izipito vanovano bana ria, iri vitoṉo ze Pasova, iago Jesu i zae Jerusalema.

¹⁴Ṉalu i za dokae go, Pade Lotu ne, i mia qira valeke ro iri volivoli ne buluka, sipi mana kurukuru go, mana i mia napu qira basoero iri koloku mana iri kavale kesa ria vano kakavata go.

¹⁵Gonae i za pala qolo mana i zazu va sima ne, i kakale vasiporo lupo qira basoero ne, sipi ro mana buluka ro go, i tubele va sorua tevolo ria vano iri kavakavala kesa go, mana i pero kesa ro ria go,

¹⁶mana i sine ne qira vano iri volivoli nego kurukuru ne, “Pala vakuziki ne qirae pade dena, mamanava to vagere ze na pade ia Mamae dena de vari va volivoli ramui”

¹⁷Pasi nae disipoloro ia, iri nanao zaqe to seko i karo ego Buka tabo ne igo, “God vamazala qavae nego era Pade aro, i gere nako i subi ava go era.”

¹⁸Vano batubatu ria vano Jiu iri lamae de koe Jesu mana iri tana ne ia, “Ava lala na tane qo mazala go vasadaka ne qemu remu, go timuna rove, God tane i teke nigo karaputa go qo zazu ne pataro i gogo nae.”

¹⁹Jesu i vataule ne qira igo, “Ṉalu tamu papate go ramu Pade lotu dena, qa mazala so era vadegere ule napu na torana kapisa musaqara so”.

²⁰Batubatu ro ne iri vane de Jesu, “I sapu ne qirae vasiṉaulu kaonomo ave vano iri vadegere go Pade Lotu dena, do aro qo mazala so vadegere na kapisa musaqara?”

²¹Do tokamana tanuna tane i seko nego Jesu, ni vapadapada ze go Pade Lotu ne.

²²Iago ṉalu Jesu i too ule me tepa le, disipoloro ia iri nanao tarua seko i sine bana go, mana iri vaogote Buka tabo ne mana pataro i sine go Jesu.

²³Torana ko i vae go Jesu Jerusalema, sauna teṉo lavata na kelo nanao taru na Pasova, topu ria iri vaogote ia, tanego iri mia go zazu vari va poloso ro i zazu ne go.

²⁴Do Jesu iki vasadaka lupo ne qira kaega nanao na ro, tanego i rove lupo qira.

²⁵Patavolomo kaega ka basoe i lama sine ne ia sauqira basoero ne, ia i rove lupo bana so pata ikoego loborona nanao qira.