Read Varisi Jon 20 Bible Online

Jon 20 - Varisi bible

Jon 20

¹Sarusaruka lolotoro ṉalu Sade, iara rodorodoko go, Maria Madalena i zae leṉa ne, mana izamia ipaka iri kokoqu zego leṉa ne i kuziki.

²Gonae i teteṉe za de koe Saimon Pita mana kene disipolo Jesu ni lete mamaligara nego, mana i sine ne qiru, “Ke! iri pala vakuziki ne ze leṉa ne tokamana Batu ne, mana qaki rove to kaega kade iri za taru zego!”

³Iago Pita mana kene disipolo ne, iru teteṉe za leṉa ne.

⁴Osiqiru iru teteṉe za, do kene disipolo ne i teteṉe moqere ne Pita mana i za doka kenaqe leṉa ne.

⁵I tudu za mana i mia zaqe poga kakasa ne, do iki keba za kaega loboro leṉa ne.

⁶Saimon Pita i teteṉe muzi me, ṉalu i lama doka go, i keba sivala za so loborona leṉa ne, mana i mia poga kakasa ro ne iri kekele go,

⁷mana poga ni kade go kuzuku na Jesu i piqu bana mana i kekele va kakavatane poga kakasa ro ne.

⁸Goto nae, kene disipolo ni za doka kenaqa bana go, iara keba napu za leṉa ne, iza mia to osina pata mana i vaogote go.

⁹Ria disipoloro ne iriki nanao rove so kaega, seko ni sine go Buka tabo ne, igo, “Jesu tina too napu me tepa le ne.”

¹⁰Taramuzina to nae, karua disipolo ne iru gado ule za komala ne.

¹¹Maria idegere tepa peka na leṉa ne mana i dae. Torana iara dae go i tudu za mana i reṉa qe loborona leṉa ne,

¹²mana i mia karua aqelo iru varoku kakasa, iru koloku e de i kekele go tokamana Jesu, kakia tepa kuzukuna mana kakia tepa makena go.

¹³Karua agelo ne iru tana ne Maria, iru go, “Qole, avigo tane qo dae go na?” Maria ivataule, “Kake ria iri lama pala vakuziki ne Batu era, mana qaki rove kaega kade iri za taru ze go!”

¹⁴Gonae i tabali mana i mia Jesu i degere go, do iki mia rove kaega ia.

¹⁵Jesu i tana ne ia, igo, “Qole avigo tane qo dae go? Akena tane qo taqia go? Ia i nanao bana valeke i miasoka go degogo ne igo, iago i sine ne ia, Batu, ṉalu go qo pala go ia, sine nava de qo za taru zego, go ma za pala.”

¹⁶Jesu igo de, “Maria!” Maria i tabali za de ikoego ia mana igo, “Raboni!” Seko Iburu ne italupase, ‘Valeke vari vatatana.’

¹⁷Jesu i sine ne ia, “Oniki siba va, tanego qara kaebo ule za na de ikoego Mamae. Do ono zae de iri koego vakitaka ro era mana sine ne qira, era tuna ule za de koe Mamae iato i Tamaqamu, mana i God era, iato i God ramu go.”

¹⁸Goto nae Maria Madalena igado ule, mana i za sine ne qira disipoloro ne, tanuna i miasoba to Batu ne. Maria i pepeu lupo ne qira pataro i sine go Jesu go.

¹⁹Raravi na musaqara Sade nae, disipoloro ne in teṉoe so kameka pade, mana siporaṉa ro ne iri kokoqu vanadu lupo, tanego iri sareki ne qira batu batu ro ria vano Jiu. Goso nae Jesu i lama degere vari lobori qira mana i sine ne qira, “Dalo ina kotavisi qamu.”

²⁰Taramuzina i sine ne qira seko dena i vamia qirae karua karisina mana orapana go. Disipoloro ne iri lete kula sivala tanego iri miasoba Batu ria.

²¹Gonae Jesu i sine napu ne qira, “Dalo ina kotavisi qamu. Era qa turine qamu ramu, gerena so Mamae ni turi nava go era”.

²²Gonae i kiuru qirae marapugana mana i sine ne qira, “Muna toṉove Spirit tabo.

²³Ṉalu ka basoe qamu nanao ule ne vasakata pataro ia, God tina nanao ule ne ia, mana God tiniki nanao ule ne kaega, basoe qamuki nanao ule nego kaega vasakata pata ro ia.”

²⁴Kaki kameka ria disipoloro ne, Tomasi iri vitoṉo napu ze so Pabaka, iki ko tavisi qira kaega disipoloro ne ṉalu Jesu ni za sadaka qira go.

²⁵Iago disipoloro ne iri sine ne ia, “Remu qi mia Batu ne!” do Tomasi igo de, “Ṉalu tuna miasoba so kilipana de iri paqipaqi zego nila ne karua karisina mana siba ze kakaraputuna karisiqu paleka nae, mana tuna siba napua so orapa iri paqo ze go bele ne, tunara vaogote go!”

²⁶Taramuzina kameka vuiki i sivala, disipoloro ne iri teṉo napue so pade ne mana Tomasi i kotavisi qira go. Siporaṉa na pade ne i kokoqu vanadu, do Jesu i lama degere loboro qira mana i sine ne qira, “Dalo ina kotavisi qamu.”

²⁷Gonae i sine ne Tomasi, “Siba ze kakaraputumu dena, mana reṉa ne karisiqu de, Siba napu me orapaqu de, mana kasi ruama, do vaogoto!”

²⁸Pasi nae Tomasi igo de, “Batu erae mana God erae!”

²⁹Jesu i sine ne Tomasi, “Aro qo vaogoto, tanego qo miasoba va era. Kula sivala ria basoero iriki miasoba va kaega era, do iri vaogote go!”

³⁰Topu napu zazu vari vapoloso izazu ne Jesu iri mia go disipoloro ia, do iki karo e kaega buka dena.

³¹Do pataro iri karo go dena, tina tavisi qamu ramu vaogote na, Jesu to i Mesia go mana i Tuna go God. Iago ṉalu qamu vaogote go ia, tamuna pala too iki rove go kaega lupo loborona vitoṉo na ia.