Read Varisi Jon 8 Bible Online

Jon 8 - Varisi bible

Jon 8

¹Taramuzina iri gadogado lupo to basoero ne, Jesu i popoka za Kubolo na Olivi.

²Bakubaku na ne iara sarusaruku lolotoro ia, Jesu i ule bana za Pade Lotu ne, basoero ne iri lama teṉo kolo ia, i koloku mana iva tatana qira go.

³Vano vari vatatana na Tamana mana vano Parisio iri lulu me kameka qole iri soba i taunata, mana iri lama va degere ze tarakenaqa qira basoero ne.

⁴Gonae iri sine ne Jesu, iri go, “Valeke vari vatatana, qole dena qi soba i taunata.

⁵Loborona Tamana ia Mosese, igo de, ‘Qole i taunata go tina vana vale ze ipaka.’ Iago avana to qo mazala go sine na aro sauna pata dena.”

⁶Go iri tana vane go de Jesu, tanego iri soko vasoru na ia go tarina mazala go pala na ia. Do Jesu i tudu mana i karo e pua ne.

⁷Iri degere mana iri tana ne ze ia topuna ro tana, iago Jesu i koloku totoloṉo me mana i sine ne qira, “Ṉalu kakia ramu nae i kaega ne to ka vasakata pata, iato mara vana kenaqa ze qole nae ipaka.”

⁸Gonae i tudu mana karo napue pua ne.

⁹Ṉalu iri gata seko igogo ne, koko kakia zaza so iri go, tupi to ria ke kazigarataro go osiqira to zaza lupo to iri go.

¹⁰Jesu i koloku totoloṉo me mana i sine ne qole ne, “Ade iri goe to ria na? Avigo i kaega to ka basoe i sine nigo aro qo kebu?”

¹¹Qole ne ivataule igo, “Kaega to ka basoe,” igo. “I velaka sivala,” igo Jesu, “Era do tuniki sine nigo kaega aro qo kebu, ono gado ule za, mana oniki ara zazu napu ne kaki pata kebu.”

¹²Jesu i seko e de iri koego basoero ne, igo de, “Era to qa tatavatana kolabana pua ne, ka basoe i luluava era, ia tina toṉove tatavata na too, mana tiniki ara koe kaega rodoko go.”

¹³Vano Parisio ne iri sine ne ia, “Tanumu so qo sine go pataro i voto go tanumu, iago i makuru qemu remu vaogote na.”

¹⁴Do Jesu igo, “Patavolomo tane qa sine vasadake de qa gogo tanuqu, do pata qa sine go i pata ogoto, tanego qa rove de qa reqe me, mana de qa vele zae go.

¹⁵Ramu qamu taru ze vivine loborona too rera, gerena so de qamu vane qira go basoero ne, ba era qaki taru ze kaega vivine loborona too ra ramu.

¹⁶Do ṉalu go tu zazu nego era, iato i pata ogoto go, tanego iki tanuqu kaega, do Mamae ni turi nava mego.

¹⁷Seko Tamana ramu i sine bana igo, ‘Ṉalu karua basoe iru sine kameka so pata, ramu muna vaogote pata iru sine go.

¹⁸Era ne qa sine de igogo tanuqu, mana Mamae i turi nava mego i varuaqu go.’”

¹⁹Iri tana ne ia, iri go, “Adi goe to Tamamu.” Jesu i vataule ne qira igo, “Ramu qamuki rove ava kaega era, mana qamuki rove napu so kaega Mamae, go ṉalu go tamu rove ava era, qamu tamu rove napua so Mamae go.”

²⁰Jesu i sine ze pataro dena vari vatatana i vaego Pade Lotu ne, loborona kova ikoego bokese iri vanavana ze kesa basoero ne. Do i kaega so ka basoe i pala go ia, tanego ṉalu ia iara kaebo lama doka.

²¹Jesu i sine napu ne qira, “Era tuna zaza, ramu tamuna taqiava era, do ramu tamuna le ne vasakata pata ro ramu, mana i makuru qamu zae na de tuna zae go era.”

²²Iago batubatu ria vano Jiu iri vari goe de tanuqira, “I sine i makuru qita zae na de tina zae go, avigo i nanao vae vale na tanuna?”

²³Do Jesu i vataule ne qira, igo, “Ramu qamu basoero na sokasoka dena, do era qa reqe me zakazaka, ramu qamu basoero na kolabana pua de, do era qaki kiana kaega kolabana pua dena.

²⁴Iato go qa sine ne qamu, tamuna le ne sauna vasakata pata ro ramu. Ṉalu qamuki vaogoto ava kaega, ‘Era To Qa Basoe Qa Ko Osina Ṉalu,’ ramu tamuna le, tanego vasakata pata ramu i ko taru so.”

²⁵Gonae iri tana ne ia, “Akena tane aro go?” Jesu i vataule, “Era to iato qa sine bana ne qamu go tutupiana me.

²⁶I topu sasakata pataro qa mazala sine na sauqamu ramu, mana taru ze vivine loborona too ramu. Do era tuna sine vasadaka ne qira so basoero na vudu pua dena, pataro qa gata ze go ia i turi nava mego. Tanego iato ikoego ogoto.”

²⁷Basoero ne iriki nanao rove kaega, Jesu i pepeua de igo Tamana.

²⁸Iago i vane qira dena, “Ṉalu tamuna vaidoko ve era Tuna basoe koluse ne, ramu tamunara rove, ‘Era To Qa Basoe Qa Ko Osina Ṉalu.’ Mana tamuna rove napua era qaki zazu ne kaega pata i lulua go nanaoqu tanuqu, do qa sine so pataro iva tatana ve Mamae.

²⁹Mana ia ni turinava go, i ko tavisi ava, iki taru vamiki ava kaega, tanego era qa zazu neso pataro i vakula go ia.”

³⁰Topu ria basoero iri gata go vari vatatana ia Jesu, iri vaogote ia.

³¹Jesu i sine ne qira vano Jiu iri vaogote go ia, “Ṉalu qamu vaogote go vari vatatana era, ramu qamu disipolo ogoto era.

³²Tamuna rove pata ogoto de ikoego God, mana pata ogoto dena, tina va talupasa qamu.”

³³Vano Jiu ne, iri vataule ne Jesu iri go, “Remu qi reqe me popodo ia Abra-am, mana qiki seka ia kaega ka basoe go, avana tane qo vatalupasa zego, ‘Ko talupasa qo sine go na?’ ”

³⁴Jesu i sine ne qira, “Ma sine ne qamu pata ogoto, ka basoe i vasakata pata, basoe nae i seka ia to vasakata pata,

³⁵Basoe seka iki onotona kaega ko tatamana ia batu ia do, sale ia batu ne tane i onoto na go ko tatamana nae.

³⁶Ṉalu sale ia God i vatalupasa qamu, ramu tamuna talupasa ogoto to.

³⁷Era qa rove, ramu qamu reqe me popodo ia Abra-am. Do ramu qamuki soko kaega lulu na vari vatatana era, mana qamu taqia zuka go mamu vae vale ava era go.

³⁸Qa vatatana qamue pataro i va mia ve Mamae, do ramu, qamu lulua so pataro iri sine ne qamu go tamaqamu ro.”

³⁹Iri vataule ne ia, iri go, “Remu tamaqemu Abra-am.” Do Jesu i vane qira dena, “Ṉalu qamu salesalero ogoto ia Abra-am, ramu tamu zazu napu neso pataro i zazu nego ia.

⁴⁰Era qa lama sine ne qamu so ramu pata ogoto qa gata ze go God, do ramu qamu taqia zuka go mamu vae vale ava era, qamu nanao vatovato ia Abra-am tane qamu lulua go?

⁴¹Ramu qamu zazu neso pataro iri zazu ne go tamaqamu ro.” Do iri vataule, “I kaega napu kakia, tanuna so God i Tamaqemu, mana remu qi salero ogoto iago.”

⁴²Gonae Jesu i vane qira dena, “Ṉalu go God i Tamaqamu ogoto, ramu tamu mamaligara nava era, tanego era qa reqe me de ikoego God, mana iato i turi nava mego. Era qaki lama ne kaega luluna nanaoqu tanuqu, do qa lulua nanao na ia i turi nava go.

⁴³Avigo tane qamuki nanao rove go kaega pataro qa sine ne qamu go na? Ianae ne i sadaka, tanego ramu qamuki soko kaega gatana vari vatatana era.

⁴⁴Vatovato qamu lulua go i gere so vatovato ia tamaqamu Satana, mana osina ṉalu qamu soko so zazu ne na pata i soko go ia. Zazu i zazu kenaqa ne Satana ne, vae vale na basoe, mana iki soko kaega pata ni ogoto go, tanego i kaega pata ogoto ikoego ia. Ṉalu ia i sine pata ni poqe go, i luluato pata i soko go, tanego i basoe poqepoqe mana i tamana to poqe ro go.

⁴⁵Era ne, qa sine ne qamu pata ni ogoto go, iato go, qamuki vaogoto ava go kaega.

⁴⁶Avigo kakia ramu dena, qamu mazala vasadake na, era qa vasakata pata? Ṉalu era qa sine so pata ni ogoto go? Avigo tane qamuki vaogoto ava go kaega era na?

⁴⁷Basoero iri ke iago God, iri gata sekoro ia, do ramu, qamuki ke ia kaega God, iato go qamuki soko go kaega gatana ia.”

⁴⁸Vano Jiu ne iri go, “Remu qi ogoto ṉalu qi go, aro qo valeke Samaritano, mana manuru i koe loboromu go.”

⁴⁹Do Jesu i vataule ne qira, “I kaega ka manuru i koe loboroqu era, era qa vazakazaka Mamae, do ramu qamu vasakate vitoṉoqu era.

⁵⁰Era qaki pada ne kaega vazakazaka va tanuqu, do ia i ko go, ivazakazaka va, mana iato tina zazu ne vivine ia de qata koego ita.

⁵¹Ma sine ne qamu pata ogoto, ka basoe i vaogote mana i lulua vari vatatana ro era, tiniki le kaega.”

⁵²Vano Jiu ne iri vane de ia, “Ninidena to qiara lete rove, aro i ko ogoto banae to manuru tokamamu, tanego Abra-am ile, mana propetaro iri le, do aro qo go, ka basoe i vaogote mana lulua vari vatatana aro, tiniki le kaega.

⁵³Avigo qo nanao qo sivala ne Abra-am tamaqemu remu? I le bana go, mana propetaro go iri le lupo bana. Qo nanao akena tane aro na?”

⁵⁴Do Jesu i vataule ne qira, igo, “Ṉalu go tu vazakazaka va tanuqu so, vazakazaka nae ne i patavolomo so. Do Mamae, iato i vazakazaka va era, iato qamu go i God ramu go.

⁵⁵Ramu qamuki rove kaega ia, do era qa rove ia, ṉalu go tu sine qaki rove kaega ia, era tu gere to poqepoqe qamu ramu. Do era qa rove ia, mana qa vaogote seko ro iago.

⁵⁶Tamaqamu Abra-am i lete kula sivala i nanao go tina mia go musaqara tuna lama go era. I mia bana to musaqara nae mana i lete kula sivala go.”

⁵⁷Do iri vane de ia, “Valeke! Aro qo go qo mia Abra-am? Aro iara kaebo neqo ave mu.”

⁵⁸Jesu i sine ne qira, “Tarakenaqana Abra-am iara podo go, ‘Era To Qa Basoe Qa Ko Osina Ṉalu.’ ”

⁵⁹Pasi nae to ia, iri soqe ipaka go mara vana Jesu iri go, do ipipika mana i kasi ne Pade Lotu ne.