Read Varisi Jon 9 Bible Online

Jon 9 - Varisi bible

Jon 9

¹Kameka ṉalu Jesu i goe zuka ne, mana i mia kameka valeke, i kodo, valeke dena i kodo bana so pasi i podo me.

²Ko disipoloro ia iri tana ne ia, “Valeke vari vatatana, ake vasakata pata ia tane i va kodo go valeke dona, tanuna ba vanovano ia?”

³Jesu i vataule ne qira igo, “Iki vasakata pata ia kaega tanuna ba vanovano ia iva kodo go ia. Valeke dena i kodo, go basoero ne tarina mia, karaputa ia God tina zazue go de ikoego ia.

⁴Pasi de iara musaqara go, ita mata zazu ne zazu ia God ni turi navae go era, tanego kuse i lama garogaro to, mana kaega ka basoe i mazala go zazu.

⁵Torana qara koego kolabana pua ne, era to qa tatavatana kolabana pua ne.”

⁶Taramuzina i sine go seko ro dena, Jesu i sue vaboma pua ne mana i va rapia, gonae i pala mana i alu ze matana valeke kodo ne,

⁷mana i sine ne ia igo, “Ono zae besi bolu Siloam mana ono za susumatanae.” Talupasana ‘Siloam’, turi ne zaqe. Gonae valeke ne i za susumatana mana i uleme, matana ne i velaka to mana iara mimia ne to go.

⁸Basoero na komala ia mana basoero iri rove velake go iato tane i valeke penepene kesa go, iri vari goe dena, “Avigo valeke dena to tane i koloku mana pene kesa ego zuka ne osina ṉalu ba?”

⁹Kakiaro iri go, “Iato valeke ne to nae”, do kakiaro iri go, “Iki ia kaega, do i gere so tatalina valeke ne,” du valeke kodo niara mimia go, iza go me de, “Era to dena.”

¹⁰Gonae iri tana ne ia, “Avigo tane qo ara mimia go na?”

¹¹Valeke ne ivataule ne qira, igo, “Valeke iri vitoṉo ze go Jesu, i va rapia desuka pua mana i alu ze mataqu, gonae i sine nava naza susumatanae besi bolu Siloam. Iago qa za, mana pasi qa susumatana lupo, mataqu i velaka to mana qara mimia to go.”

¹²Iri tana ne ia, “Adepa tane ikoego valeke nae na?” Valeke ne i vataule ne qira, igo, “Qaki rove kaega.”

¹³Goto nae iri lulu vazao ze valeke kodo ne de iri koego vano Parisio ne.

¹⁴Tanego musaqara i va rapia go pua ne Jesu mana i va mimia ze valeke kodo ne Jesu, i musaqara Sabat.

¹⁵Iago vano Parisio ne iri tana napu ne ia, avigo tane iara mimia go. Valeke ne igo de, “Valeke dena i alu ze pua rapi mataqu, mana ṉalu qa susumatana, qa mimia go.”

¹⁶Gonae kakiaro vano Parisio iri go dena, “Valeke dena iki reqe me kaega de ikoego God, tanego iki vaogote kaega Tamana na Sabat.” Do kakiaro iri go, “Ṉalu go valeke dena, i valeke vasakata pata i makuru tina zazu ne zazu mazala dena.” Iago vano Parisio ne i tavota nanao qira de ikoego Jesu,

¹⁷Iago vano Parisio iri tana napu ne valeke ne, iri go, “Aro qo go, iva mimia go mana ninidena qo velaka qo go, akena tane valeke nae qo go na?” Valeke ne i vataule ne qira, igo de, “Valeke dena i kakia propeta.”

¹⁸Do batubatu ria vano Jiu, iriki soko kaega vaogote na valeke dena i kodo bana mana ninidena iara mimia go, iago iri vazao seko ne qiru tamana mana sinana valeke ne tiruna lama,

¹⁹gonae iri tana ne qiru, “Sale ra raburu tane dena? podo ivae go, ikodo bana so, do avigo tane iara mimia go na?”

²⁰Vano vano ia iru vataule, “Pata qaru rove go raru ne, valeke dena i sale rararu, mana pasi i podo me, i kodo bana so go.

²¹Do qaruki rove kaega, avigo tane i mimia go, mana akena tane i vamimia go, tana ne tanuna, tanego i lavata to iago tanuna i mazala vataule ne qamu go!”

²²Go iru seko gogo dena vanovano ia valeke ne, tanego iru sareki ne qira batubatu ria vano Jiu, tanego batubatu ria vano Jiu dena, iri varitoqe bana ne, “Ṉalu ka basoe ivaogote Jesu i Mesia go, ria tarina va mamanava ze ia zae na Pade Lotu ne.”

²³Iato go vanovano ia iri go, tana ne tanuna, i lavata to, i mazala seko tanuna.

²⁴Gonae iri koru vaule napua valeke kodo ne varuana zaza, mana iri sine ne ia, “Vanadu ze pui aro de ikoego God, aro tono sine pata ogoto! Remu qi rove valeke i vamimia go aro i valeke vatovato sakata.”

²⁵Do valeke ne i vataule, igo, “Koro valeke vatovato sakata ba kaega, tanego pata qa rove go, kokosona era qa kodo bana, do ninidena qa mimia to.”

²⁶Iri tana napu ne ia, “Avana tane i zazu nigoe aro valeke nae, go qo ara mimia go na?”

²⁷Valeke ne i vataule ne qira, igo, “Qa sine lupo bana ne qamu to, do qamu kasi gatana, avigo qamu soko napua gata velaka na, go muna disipolo ia ba?”

²⁸Do batubatu ria vano Jiu iri seko vasakate ia, iri go, “Aro to qo disipolo ia valeke nae, remu qi disipolo ia Mosese.

²⁹Remu qi rove, God i seko tabe Mosese, do valeke nae, remu qiki rove kaega kade i reqe go!”

³⁰Do valeke ne i vane qira dena, “Kaki pata vari vapoloso bana go, go ramu qamuki rove kaega de i reqe mego, do ia iva mimia va era!

³¹Osiqita qata rove, God i makuru na teke ne qira pata iri pene go vano i sakata go vatovato ria, do God i gata qira ria iri va mazale mana iri zazu ne pataro i soko go tarina zazu ne go.

³²Tupi zari i vae go kolabana pua ne, kaega ka basoe qata gata iva mimia go basoe i kodo, podo i vaego.

³³Do ṉalu go valeke dena iki reqe me kaega de ikoego God, i makuru tina zazu ne kaki pata.”

³⁴Batubatu ria vano Jiu iri vane de ia, “Aro qo bulaṉoi, mana qo podo palua vasakata pata go, avigo tane qo soko go vatatana qemu remu na?” Gonae iri kakale vasiporo ze ia Pade Lotu ne.

³⁵Ṉalu Jesu i gata soba, batubatu ria vano Jiu iri kale vasiporo ze ia Pade Lotu ne, i taqia mana ṉalu i soba ia, i tana ne, “Avigo qo vaogote Tuna basoe ne ba?”

³⁶Valeke ne i vataule, “Batu sine nava, akena bana tane valeke nae, go era ma vaogote ia!”

³⁷Jesu i vataule ne ia, igo, “Iato qo mia go de, mana iato i seko tabe go dena go.”

³⁸Valeke ne i koloku tutuṉue tarakenaqana Jesu mana igo de, “Batu, qa vaogoti go.”

³⁹Gonae Jesu igo de, “Qa lamae vudu pua dena, go tuna zazu ne vivine de iri koego basoero ne, go vano iri kodo go tarina mimia mana vano iri mimia bana go, tarina kodo go.”

⁴⁰Kakiaro vano Parisio iri koego de go, iri gata seko ia Jesu iri vane de ia, “Oniki nanao aro remu qi kodo na!”

⁴¹Do Jesu i vataule ne qira, “Ṉalu go qamu kodo ogoto go, ramu qamuki kebu kaega, do ramu qamu go, qamu mimia, ianae to ivasadake ramu qamu ara kebu so.”