Read Varisi Zazu Ria Apostoloro 1 Bible Online

Zazu Ria Apostoloro 1 - Varisi bible

Zazu Ria Apostoloro 1

¹Ke Tiopilus. Loborona buka kenaqa era qa karo nigo zazaona osina pataro i zazu ne go Jesu, mana i vari vatatana ne go, pasi ṉalu i vatupiana ne go zazu ia,

²mana idokae go musaqara ipopoka za go rani ne. Tarakenaqana Jesu ipopoka za go rani ne, loborona karaputa ia Spirit tabo, ia i vatatana qira basoero i vine bana qira go tarina apostoloro ia.

³Loborona vasiṉaulu musaqara taramuzina le i vae go, Jesu i sadaka taruqira topuna ṉalu mana i vasadake lala roiago tarina vaogote go ia, itoo napu me tepa le ne. Iri mia ze ia mata qira, mana i seko tabe qira sauna Too ikoego vari miasoka ia God,

⁴mana ṉalu iri kameka teṉo go, ia i teke ne qira tamana dena, “Muniki kasi ne Jerusalema, do muna piri ne sosovolomo ia Mamae i pui bana ne go gerena qa sine bana ne qamu go.

⁵Jon i vari va bapitema ne besi, do tina sivala kavia musaqara, God tina vari va bapitema ne Spirit tabo.”

⁶Ṉalu ria apostoloro iri teṉo tavise go Jesu, iri tana ne ia, “Batu! ṉalu to dena aro tono vadegere ule go karaputa ria vano na vudu Izirel ba?”

⁷Jesu i vane qira dena, “Mamae so imazala go vine na ṉalu tina doka go pataro dena, iki ramu kaega tamuna rove go ṉalu na.

⁸Do ṉalu Spirit tabo tina lamae de qamu koego ramu, ramu tamuna toṉove moqere ia, mana tamuna tarama ne sauqu era loborona komala lavata Jerusalema mana osina dia kena ro Judia, Samaria, mana osina dia kolabana pua ne.”

⁹Taramuzina i sine ne qira sekoro dena, iri mia ria God ipala vapopoka za Jesu rani ne, i lama kameka toba i vamidiki ne ia, mana iriki mia to kaega ia.

¹⁰Ṉalu Jesu i kasi ne qira, disipoloro ne iri reṉa taru ne ia i popoka za go rani ne, karua basoe iru varoku ne pata kakasa iru katikili lama degere tavisi qira ria.

¹¹Mana iru go dena, “Ramu vano na Qalili, avigo tane qamu degere nae, mana reṉa popoka qe rani ne na? Iato Jesu i kasi ne qamu, mana izae go rani ne tina za lama napu, gerena so qamu mia go ipopoka za go rani ne ninidena.”

¹²Gonae ria apostoloro iri kasi ne Kubolo na Olivi, mana iri gado ule za Jerusalema, torana takoborona kilomita bago.

¹³Iri za dokae komala Jerusalema iri keba za kova iri koego. Vitono qira, Pita, Jon, Jemisi mana Aduru, Pilipi mana Tomasi, Batolomeu, Matiu, Jemisi sale ia Alepiasi, Saimon Zeolot mana Jiudas sale ia Jemisi go.

¹⁴Osiqira iri kameka ko mana kameka vato, mana osiqira iri kameka lotu tavisi qira qole ro mana Maria sinana Jesu, mana ria iri tamakena go Jesu.

¹⁵I sivala kavia musaqara vano iri vaogote go Jesu iri teṉo go, torana kameka vasa karabete ria, mana Pita i degere i seko.

¹⁶Igo dena, “Ramu turaquro! Buka tabo ne ilama ogoto, Spirit tabo i sine bana ne go Davita go ni sine go sauna Jiudas tina kenaqa ne qira ria iri pala go Jesu.

¹⁷Jiudas i iko tavisi bana qemu remu manoga karua apostoloro, ia to itavine tina zazu tavisi qemu go rernu.”

¹⁸Kesa ipala bana go Jiudas sauna zazu sakata ia ne, i voli ze takoborona pua. De igogo ne to iza sorue i le go, mana italuapa kuabana i siporo go.

¹⁹Osiqira basoero iri koe go komala lavata Jerusalema torana nae iri gata pataro i doka go, seko ria tanuqira iri vitoṉo ze Akeledama, talukasana pua parasa.

²⁰Pita idegere mana i seko napu, igo, “Buka na kera igo de ‘Pade ia tina kakaere, Ikaega basoe ikoe go loborona.’ Mana iri karo napua, ‘Kameka basoe kakavata tina pala kavale go zazu ia.’

²¹Iago, kameka basoe napu tina zazu tavisi bana qemu remu, tina tarama ne too napu ia Jesu Batu ita ne. Basoe igogo ne tina kaki kameka bana so ria iri lulu tavisi bana ne go Jesu kokoso vatupianana me. Tupi me ṉalu Jon i tamana nego vari va bapitema ia, go i doka so ṉalu Jesu i popoka ule za go rani ne.”

²³Iago, iri vanama karua basoe, Josepo iri vitoṉo ze Banabasi, iri vitoṉo napu ze Justus mana Matiasi.

²⁴Gonae iri pene, iri go dena, “Batue aro qo rove lupo puṉu qira osiqira basoero ne, iago ono va mia qemu remu adeke kameka riru dena qo vine go,

²⁵tina zazu ne zazu ria apostolo, tina soka na Jiudas i kasi ne qemu remu, izae go de i tavine ne go ia.”

²⁶Gonae iri vaqiso daisi go tina vine go kaki kameka riru karua basoe dena, mana ivotoe to Matiasi tina vamanoga karua qira go ria apostoloro ne.