Read Varisi Zazu Ria Apostoloro 10 Bible Online

Zazu Ria Apostoloro 10 - Varisi bible

Zazu Ria Apostoloro 10

¹Loborona komala na Kaesaria, i koe kameka valeke na Rom vitoṉo na Konilias, valeke dena i kenaqa ne qira kameka vasa basoero varitara na Rom, iri vitoṉo qira e, “Vano degere na Itali.”

²Valeke dena i vaogote God mana osiqira ria vano pade ia iri vazaka God. I lete tavisi ne qira vano Jiu iri lete situ go, mana i pene God osina ṉalu.

³Kaki kameka ṉalu kadego torana kapisa kiloko.

⁴Konilias i reṉa taru vanadu ne aqelo ne, i lete sareki mana igo, “Avana Batu?” Aqelo ne i vataule ne ia igo, “God i kula ne pepene ro aro, mana zazu vari nanao ro aro, iago i piri ne tina tavisi nigo.”

⁵Aqelo ne i sine ne ia, “Ono vazao qira kakiaro basoero mara zae Jopa, mara za taqia kaki valeke vitoṉo na Saimon Pita,

⁶i za koe pade ia kaki valeke i vaza zazua kapotona buluka, vitoṉona Saimon, pade ia i koe rikisina masi ne.”

⁷Goto nae aqelo ne i zaza, mana Konilias i koru qiru karua basoe zazu na pade ia, mana kameka valeke soldia ne i valeke lotu, iato basoe Konilias i taru ze ruruqe ia.

⁸I sine ne qira pataro ni sine nego aqelo ne, mana i turine qira tarina zae Jopa.

⁹Bakubaku na ne iri goe go zuka ne, mana iri za garogaro Jopa. Pita i popoka za popokona pade ne, torana kikinaka go tina za pene. Pade ro igogo ne i kaega ropotona, i salutu so.

¹⁰Ia i saqo, i lete soko to ṉaṉa, ṉalu ria iri vanama go pata gege, Pita i mia kaki vavagazama.

¹¹I mia rani ne i papaqa mana i mia kaki pata i gere poga lavata iri va qoqoro me, i gere ṉalu iri pala tarua go kavasi maqa na poga ne, mana iri vaqoqoro me tepa vudu pua ne.

¹²Loborona poga ne, i koe to soso gado na pata qaraqara piru mana pale piru ro.

¹³Kaki ovaṉa i qo me de, “Degere Pita vae vale pataro nae mana ge!”

¹⁴Do Pita igo, Kaega Batu, era kaega kaki ṉalu qa ge go pata ni poṉo ba pata i tabo ego Tamana ne.”

¹⁵Ovaṉa ne i sine napu ne ia, “Pata i vine go God i dalo igogo, oniki nanao aro i poṉo.”

¹⁶Kapisa to sadaka ivaego pataro dena, mana pataro igogo ne i popoka ule za rani ne.

¹⁷Ṉalu Pita iara taqia so avana tane i talupase go vavagazama ne, basoero ni turine qira me Konilias, iri rove to pade ia Saimon mana iri za degere tarakenaqana bara ne.

¹⁸Iri koru za mana iri tana, “Avigo i koe dena kaki basoe iri vitoṉo ze Saimon Pita?”

¹⁹Torana nae ne, Pita iara pada ne so kadego mara nanao rove avana tane talupasana vavagazama i mia go, do Spirit tabo ne i sine ne ia,” Pita, kapisa basoe iri taqi go aro, iri kogo dena.

²⁰Iago ono vanama mana qoqoro za, oniki ara karua nanao ne sauna lulu ne qira, tanego era tane qa turine qira mego.”

²¹Iago Pita i qoqoro za mana i sine ne qira basoero ne, “Era to valeke qamu taqiava go de, avigo tane gamu lama go?”

²²Iri vataule, “Konilias batu ria vano soldia, i turine qemu go, i valeke velaka mana i vazaka God, mana osiqira vano Jiu iri mia vamazale ia. Aqelo ia God i sine ne ia tina koru vakeba zigoe aro pade ia, go mara gata go pataro tono sine go aro.”

²³Pita i koru vakeba qira basoero ne, mana iri kamuku eto komala Jopa. Bakubaku na ne, Pita i vanama mana i lulu qira, kakiaro ria vano Jiu iri vaogote go Jesu iri koego Jopa iri lulu napu ne qira go.

²⁴Kene musaqara to ia iri za dokae Kaesaria. Konilias i piri bana neso lama na Pita, iago i koru teṉo qira sinaqe ro ia mana vakitaka ro ia, go iri lama teṉo tavise go.

²⁵Ṉalu Pita iara vele keba za siporaṉa ne, Konilias i lama soba ia, i koloku tutuṉu mana i tunae tarakenaqana ia,

²⁶do Pita i va degere ia, “Degere, igo, era qa basoe gere goso aro.”

²⁷Pita i seko tabe Konilias ṉalu iri keba za pade ne, dego i mia qira topu na basoero iri teṉoe go.

²⁸Pita i sine ne qira, “Ramu tanuqamu do qamu rove velake vano Jiu i tabo e tamana ria tarina tove ba ko tavisi qira vano iriki Jiu go kaega. Do God iva mia ve era, go makasi nanao vakakata ne basoe ṉalu i dalo, ba ṉalu iki dalo go kaega.

²⁹Iato go ṉalu qamu turine qira atu go basoero ne, tarina garetu lulu ava go, era qaki kasiqu kaega. Iato go qa tana ne qamu ramu, avigo tane gamu garetu lulu ava go era?”

³⁰Konilias i vataule ne Pita igo, “Kapisa musaqara i sivala neto, i gere to torana dena, i kapisa kiloko era qa pepene loborona pade era. Qaki rove so kaega era do i lama sadaka so kaki basoe, iva keba ne poga i lete damara go, i degere tarakenaqaqu era,

³¹mana igo, ‘Konilias! God i gata pepene ro aro, mana i toqe ne zazu vari nanao ro aro’.

³²Vazao ze Jopa kaki basoe, go mara za lulu me kaki valeke vitoṉona Saimon Pita. I koe pade i Saimon, valeke i za zazu ne kapotona buluka, i koe rikisina masi ne.

³³Mana iato go qa vagaretu qira qo basoero nae, mana aro qo toqe velaka ne lama go. Ninidena remu qi lama teṉo ego dena tarakenaqana God, qemu piri ne gata na osina pata tono sine go aro, gerena so God ni teke bana nigo, go tono lama sine go.”

³⁴Pita gonae i vatupia to sine na Tarama Velaka de iri koego basoero ne. “Ninidena era qa rove to, mana i ogoto bana, God iki va soso pata ne kaega basoe, God iva kameka ne qira so.

³⁵Ka basoe i vaogote go God mana i zazu ne pata i totoloṉo, God i toqe ne ia, patavolomo adeki sinaqe i reqe mego.

³⁶Ramu qamu rove tamana ia, i vazao ze de iri koego vano Izirel, i tarama nego Tarama Velaka na bule ia loborona Jesu Kristo, iato i Batu ne qira go osiqira basoero ne.

³⁷Ramu qamu rove pepeu na pata lavata sivala ni sadaka bana ego pua na Izirel, i tupi ego Qalili, taramuzina Jon i tarama nego vari va bapitema ia.

³⁸Ramu qamu rove napua de igogo pepeu na Jesu na Nazaret mana de igogo God ni zuga ze go ia Spirit tabo mana karaputa. I zae osina dia, i zazu ne pata velaka ro mana iva tavoese qira vano iri koego karaputa ia manuru. I zazu ne pataro dena, tanego God i ko tavise ia.

³⁹Remu to qimu ko tavisi mana qi mia go, osina pata ro i zazu ze go pua na Izirel mana loborona Jerusalema. Taramuzina nae, basoero ne iri vae vale ia, iri paqipaqi ze go koluse ne.

⁴⁰Do taramuzina kapisa musaqara, God i va too me ia tepa le ne, mana i va mao ne ia tina lama sadaka go,

⁴¹iki sadake kaega de iri koego basoero topu, do i lama sadake so de qi koego remu, tanego remu to i vine bana qemu go God timuna tarama nego ia, iato go remu qi ṉaṉa mana qe loka tavise ia taramuzina too i vae mego tepa le ne.

⁴²Mana i sine ne qemu, timuna tamana ne Tarama Velaka ia de iri koego basoero ne, mana sine va karaputa napua, tanuna so Jesu ni vine go God tina zazu ne vivine de iri koego vano too mana vano le go.

⁴³Osiqira ria propetaro iri seko bana ne ia, osiqira basoero iri vaogote go loborona ia, vasakata pata ro ria tina talukasa lupoe loborona karaputa na vitoṉo na ia.”

⁴⁴Torana iara sekoseko so Pita, Spirit tabo ne i qoqoro me de iri koego osiqira ria iri gata go seko velaka ne.

⁴⁵Ria vano Jiu iri vaogoto go iri lulu mego Pita iri reqe mego Jopa, iri lete poloso, tanego God i sosovolomo ne Spirit tabo de iri koego vano iriki Jiu go kaega.

⁴⁶Tanego iri gata qira iri seko ne soso seko kakavata, mana iri vazaka karaputa ia God. Pita i seko me igo,

⁴⁷“Basoero dena iri toṉove Spirit tabo gere qita so ita, gata tonovo bana go, avigo i ko kaki basoe i mazala go vakaega ne qira bapitema na besi?”

⁴⁸Iago i sine ne qira tarina bapitema ne vitoṉona Jesu Kristo. Taramuzina nae iri pene napua Pita go mara ko tavisi napu qira kavia musaqara go.