Read Varisi Zazu Ria Apostoloro 11 Bible Online

Zazu Ria Apostoloro 11 - Varisi bible

Zazu Ria Apostoloro 11

¹Ria apostoloro mana vano lotu iri koe go kolabana Judia, iri gata vano iriki Jiu go kaega iri pala mana vaogote seko ia God.

²Iago, ṉalu Pita izae Jerusalema kakiaro vano lotu iri lete vamazale go kosi ne, iri vari valegue de ikoego Pita

³iri go, “Aro qo zae pade ria vano iriki Jiu go kaega, iriki kosi go kaega mana qo za ṉaṉa tavisi napu qira go.”

⁴Gonae Pita i sine vasadaka lupo ne qira osina pataro i sadaka bana mego kokosona ne.

⁵“Ṉalu era qa lotue komala Jopa, qa miadua kameka pata igere kameka poqa lavata iri dokia kavasi maqana, iri vaqoqoro me rani ne mana ilama notoe tarakenaqaqu era.

⁶Era qa reṉa velake loborona, mana qa mia pata pupuara manakama ro, pata qaraqara piru ro mana soso sinaqena pale ro go.

⁷Gonae qa gata kameka ovaṉa iseko me igo dena, ‘Degere Pita! Vae vale qira pataro nae mana ge go.’

⁸Do era qa go, ‘Kaega Batu! era qaki ge kaega pata iki dalo go kaega mana pataro iki torago kaega gena go.’

⁹Ovaṉa i reqe mego rani ne igo, ‘Osina pata ro i zazu ne go God iri dalo luposo, oniki nanao aro iriki dalo kaega.’

¹⁰Kapisa to sadaka i vaego pataro dena, mana pataro igogo ne i popoka ule za rani ne.

¹¹Torana so nae kapisa basoe iri turine me, qirae Kaesaria iri lama kebae pade qa koego era.

¹²Spirit tabo i sine nava oniki kasimu luluqiraiago taraonomo ria vano lotu iri luluava, qimu zaego Kaesaria mana osiqemu qimu za kebae loborona pade ia Konilias.

¹³Ia i sine ne qemu de igogo i mia kameka aqelo, i degere go loborona pade ia, mana i sine ne ia, ‘Ono turine kakia basoe go mara za lulume kameka valeke vitoṉona Saimon Pita.

¹⁴Ia tina sine nigo aro sekoro go tina vakaveligo aro mana ria iri koego pade aro go.’

¹⁵Mana ṉalu era qa vatupiana ne to seko, Spirit tabo i qoqoro me i lama koe de iri koego ria, gerena siporo nivae bana mego, ilama koego de qata koego ita kokosona ne.

¹⁶Gonae era qa nanao zaqe to pata ni sine bana go Batu ne, igo, ‘Jon i bapitema qamue ramu besi, do era tuna bapitema qamue ramu Spirit tabo.’

¹⁷I tatavata velaka meso, God iteke napu ne qira so vano iriki Jiu go kaega sosovolomo i teke ne qita go ita, ṉalu gata vaogote go Jesu Kristo. Ia go akena tane era, gogo tuna pada ne go va mamanava na God na?”

¹⁸Ṉalu iri gata go seko ia Pita ne, iri mamanava to vari valegu. Iri vazaka God mana iri go dena, “Pata ogoto, God iteke napu ne qira so vano iriki Jiu go kaega nanao uleule mana too voru go!”

¹⁹Kavia ro ria iri paqa bana torana ṉalu iri vaevale go Sitivini iri za dokae kena Ponisia mana Saeprus mana komala lavata Antiok go. Mana iri tarama ne Tarama Velaka de iri koego so vano Jiu.

²⁰Mana kakia ro napu vano lotu iri koego Saeprus mana Saerina iri za dokae de iri koego vano iriki Jiu go kaega, mana iri tamana qirae Tarama Velaka ia Jesu Batu ne.

²¹Karaputa ia Batu ne iko tavisi qira mana i topu sasakata to basoero iri lama vaogote mana tabali de ikoego Batu ne.

²²Tarama na pataro dena idokae de iri koego vano lotu iri koe go Jerusalema. Iago iri turi vazao ze Banabasi komala Antiok.

²³Ṉalu i zadoka i mia de igogo God i vamakolo qira go basoero ne, ia i kula sivala, mana i seko vatalasara ne qira. I vane qira dena muma ko vanadu mana ruqe ze Batu ne loborona puṉuqamu.

²⁴Banabasi i kameka valeke velaka sivala mana Spirit tabo ikotavise ia mana vaogoto ia ilete karaputa, mana torana nae basoero ne iri lete vaogote to Batu ne.

²⁵Taramuzina nae Banabasi izae Tarsus iza taqia Sol.

²⁶Ṉalu i za soba go ia, ilulu vaule me ze ia Antiok. Mana tutukununa kameka ave nae iru kotavisi qira vano na komala igogo, ne iru vari vatatana de iri koego basoero topu. Mana vano na to komala lavata Antiok iri koru kenaqa qirae go vano vaogoto.

²⁷Torana ṉalu nae kakiaro propeta ro iri reqeme Jerusalema iri lamae Antiok.

²⁸Mana kaki kameka ria propetaro nae, vitoṉona Aqabus, loborona karaputa ia Spirit tabo, ia i degere, mana i sine vasadake kaki kameka saqo lavata i garogaro lama dokae na vudu pua. Mana saqo nae ilama ogoto to ṉalu Kolodias i batu lavata ego Rom ave nae.

²⁹Iago nogoto qira disipoloro ne, iri toqe ne vazao na kesa, go tina tavisi ne qirae go vano lotu iri koego Judia.

³⁰Gonae iri qoqone kesa, mana iri vapala qirue Banabasi mana Sol mana iru za teke ne qira to kazigarata na ro lotu iri koego Jerusalema.