Read Varisi Zazu Ria Apostoloro 14 Bible Online

Zazu Ria Apostoloro 14 - Varisi bible

Zazu Ria Apostoloro 14

¹Loborona komala Ikonium, Pol mana Banabasi, iru za soba ze so pata iru rove bana ze Antiok na Pisidia. Pol mana Banabasi iru zae pade lotu ria vano Jiu mana vano iriki Jiu go kaega mana iru za tarama ne larama Velaka ne, mana topu ria vano Jiu mana vano iriki Jiu go kaega in vaogote Jesu.

²Do vano Jiu iriki soko go kaega vaogote na Jesu, iri teke seko qira vano iriki Jiu go kaega, iri vakakavata nanao qira, mana iri vasasakata ne qira vano iri vaogoto go.

³Do Pol mana Banabasi iru seko vakaraputa sauna Batu ne, mana iru ko vaumata qe Ikonium, iri tarama ne Mana ia God. Batu ne iteke qiru karaputa go iru zazu ne go zazu vari vapoloso ro mana zazu vari vanureke ro go.

⁴Basoero na komala lavata ne iri tavota, kaki tavota iri lulua vatovato ria vano Jiu, mana kaki tavota ria iri toqe ne lulu na pata velaka iru sine go karua apostoloro ne.

⁵Gonae kakia ro ria vano iriki Jiu go kaega, mana vano Jiu, ria to vano kenakenaqa ro ria gogo ne iri nanao tarina vasakata qira apostoloro ne, mana vana vale qirae ipaka go.

⁶Ṉalu Pol mana Banabasi iru rove ia dena, iru paqa za tepa Listra mana Debe loborona karua komala lavatana Laikania mana kenaro igarogaro go.

⁷De igogo ne, iru za tamana napu ne Tarama Velaka.

⁸Loborona komala Listra i koe kameka valeke i le karua makena, pasi podo i vae me, iki zaza bana so kaega.

⁹I koloku mana i gatagata seko ro i sine go Pol. Pol i mia valeke ne i kone vaogoto, mana i tora tina va velake ia, iago Pol i reṉa vale ne ia,

¹⁰mana i seko valavata, “Degere, vadoke makemu.” Valeke ne i soqa mana i tupi zaza ne.

¹¹Ṉalu basoero ne iri mia pata i zazu ne Pol, iri koru iri vae seko ogoto ria, seko Likaniani, iri go, “God ro iri lama taitana gere qira to basoero, mana iri lama qoqoro me de qata koego!”

¹²Iri vitoṉo ze Banabasi, Zeu, mana iri vitoṉo ze Pol, Emesi, tanego iato i valeke sekoseko go.

¹³De vavarere ia god Zeu ikoe rikisina komala lavata ne, Patere ia god zeu, i pala me buluka mana bubuili ro, iri lama zae siporaṉa na de, iri mazala go lama zae na basoero ne, go tanuna Patere mana basoero ne tarina soso ne qiru karua apostolo ne komakoma ria.

¹⁴Ṉalu Banabasi mana Pol iru gata soba pataro iri vele zazu ne basoero ne, iru ridake roku riru, mana iru teteṉe za loboro qira basoero ne, iru koru valavata,

¹⁵“Ramu, avigo tane qamu vele zazu ne go komakoma dena? Raru qaru basoe gere qamu so ramu! Raru qaru lama, go taruna sine vasadake Tarama Velaka ia God, go tamuna tarua go vazaka na pata volovolomo ro nae, mana vazaka God ni too sivala go, ni vazaria go rani, pua, masi, mana osina pataro ikoego loborona.

¹⁶Ṉalu bana ne, i vamao ne qira so basoero ne tarina goe go zuka iri mao go tanuqira.

¹⁷Do kokoso na me, God i vasadaka vavelaka ne qira basoero ne, de go too ba vatovato velaka ia, mana topu na pataro God i zazu ne, ia i teke ne qamu me nare tepa rani ne, mana pata lebaleba ro ṉalu velaka ria, i teke ne qamu pata gege mana iato i va puraka ze puṉuqamu kulakula go.”

¹⁸Patavolomo iru sine go seko ro dena, do basoero ne i makuru qiru va noto qira, sauna zazu na komakoma ria de mi koego.

¹⁹Kakiaro basoero iri reqe me Antiok loborona Pisidia mana Ikonium, iri pala vakava qira kakiaro basoero go tarina tavisi ne qira, iri vana ze ipaka Pol, mana iri raqasa vasiporo ze ia komala lavata ne, iri nanao Pol i lete.

²⁰Do ṉalu vano vaogoto iri lama (kolo ne) ia, Pol i degere mana i ule za komala lavata ne. Bakubaku na ne, Pol mana Banabasi iru zae Debe.

²¹Pol mana Banabasi iru tamana ne Tarama Velaka ne komala na Debe, mana iru pala vakava qira topu ria basoero iri toqe ne vaogote na Jesu. Taramuzina nae iru ule napu za Listra, iru za napue Ikonium mana Antiok loborona Pisidia.

²²Iru seko vakaraputa qira basoero iri vaogoto go mana iru seko vatalasara qira, go mara ria vanadua vaogoto ria, iru va rove qira e basoero ne, “Ita tatana soba topu na makuru, go tatana ra keba za go de i koe go vari miasoka ia God.”

²³Nogotona komala ne, iru vine qira kazigarata ro tarina kenaqa ne lotu, iri pepene, iri qaniqani mana iri teke ne too ria de ikoego Batu ne, tanego de i koe ia, iri taru ze vaogoto ria.

²⁴Taramuzina, iru goza kolabana Pisidia iru lama za napue Pampilia.

²⁵Dego iru za tarama ze Tarama Velaka ne loborona komala Peqa mana iru za napue Atalia go,

²⁶reqe napu e de igogo ne, iru goe koluka vasele iru ule za Antiok de iru reqe bana e go, komala nae to, iru pala bana ze go seko velaka mana seko vakaraputa go ia, iru ara zaza go.

²⁷Ṉalu iru lama dokae Antiok, iru qoqoṉo qira basoero lotu mana iru pepeu ne qira de igogo osina ro pata, God i zazu ze go de iri koego vano iriki Jiu go kaega, go iara papaqa go nanaoqira, go iri ara vaogoto go.

²⁸Mana iru ko vaumate de iri koego vano iri vaogoto go.