Read Varisi Zazu Ria Apostoloro 15 Bible Online

Zazu Ria Apostoloro 15 - Varisi bible

Zazu Ria Apostoloro 15

¹Kavia basoero na Judia iri lamae Antiok iri vatupia vatatana qira vano kristiano, iri go, “Ṉalu ramu qamuki kosi go kaega gerena i sine go Tamana ia Mosese, God tiniki vakavele qamu kaega.”

²Pol mana Banabasi iru lete vari valegue de iri koe ria sauna pata dena. Iago vano lotu iri koe Antiok iri turi ne qiru Pol mana Banabasi, mana kakiaro napu ria iri koe go Antiok go mara ria za vagata qira apostoloro ne sauna Pata dena.

³Turi ria vano lotu ria iri zaza, mana ṉalu iri zaza sivale go Ponisia mana Samaria, ria iri sine de iri gogo vano iriki Jiu go kaega iri tupia vaogote Jesu. Mana vano lotu iri koego kenaro igogo ne iri lete kula sivala ne tarama igogo ne.

⁴Ṉalu iri za dokae go Jerusalema vano apostolo mana kerone kazigaratana ro lotu iri vagado va velaka qira ria mana iri sine lupo ne qira osina pataro i zazu ne God de iri koego.

⁵Do kavia ro ria vano lotu iri koego Jerusalema iri kameka e de iri koego vano Parisio iri degere, mana iri go dena, “Vano iriki Jiu go kaega tarina kosi bana so mana lulu bana so Tamana ia Mosese,” iri go.

⁶Ria apostoloro mana kazigarataro iri teṉo mana pepeu luluse sauna pata dena.

⁷Taramuzina iri vari vaevae lupo ne sekoro ria, Pita i degere, mana igo dena. “Onotoquro, ramu qamu rove ṉalu bana me God i vine ava era loboro qamu ramu go tuna tamana ne Tarama Velaka de iri koego vano iriki Jiu go kaega, go ria, do tarina vaogoto napua so go.

⁸Mana God i rove go nanao na osina basoe, i vasadaka velaka bana me so i soko napu qira so kerone basoero go. Tanego i teke napu ne qira so ria Spirit tabo gerena i teke bana ne gita go ita.

⁹Iki vine vakakavata qita kaega ita mana ria go. I nanao ulene vasakata pata ro ria, tanego iri vaogote ia, gerena napu so ita.

¹⁰Iago avigo tane qamu soko go pada ne na God? Muniki vatutubo qirae so vano iri vaogote go Jesu luluna Tamana dena, tanego kazigarata bana ro ita, mana ita ninidena, do qatiki lulu bana so kaega.

¹¹Ba ita go qata vaogote tatana za kavele loborona Mana ia Jesu Batu ita, gere napu qira so vano iriki Jiu go kaega.”

¹²Osiqira iri duduli lupo, mana iri gata Pol mana Banabasi iru sine vasadake go osina pata vavagazama mana vari vapoloso ro i zazu ne go God de iri koego basoero iriki Jiu go kaega.

¹³Ṉalu riru iru seko lupo, Jemisi i seko napu me. “Turaquro qatava era,” igo.

¹⁴Saimon iara sine lupo zaqe so de igogo God i vasadaka kenaqe go manava ia de iri koego vano iriki Jiu go kaega, ṉalu i vine go kakia ro vari lobori qira tarina basoero ia, igogo.

¹⁵Sekoro ria propetaro ne i voto lupoe so pata ro dena, gerena i sine bana go Buka tabo ne.

¹⁶“God igo, muzina pataro dena era tuna ule me, Mana vadegere napua komala ia Davita i tapero bana go, mana pala qira tapero na ro ne vadegere vakaraputa qira go.

¹⁷Mana sauna to ia dena, go ia tarinara lama ego de qa koego era osina basoero kakavata. Gerena to vano iriki Jiu go kaega qa koru bana qira go tarina basoero era.

¹⁸Iato dena seko ia God, i vasadaka bana me pataro dena ṉalu bana ne.”

¹⁹Jemisi i seko napu, “Nanao rera mata kasi vamakuru qira vano iriki Jiu go kaega iri tabali mego de ikoego God.

²⁰Do ita mata karo kameka leta, sine ne qira mara ria kasi gena pata gege iri tavatavara ze go god poqepoqe ro ne, i tabo ego lotu. Mana kasi vari vagabu, mana kasi gena pata pupuara iri poṉo go saqena mana parasa go.

²¹Tanego ilete umata bana me to iri toere go Tamana ia Mosese loborona ro Pade Lotu ria vano Jiu musaqara ro Sabat.”

²²Gonae apostoloro mana kazigarataro go iri teṉo tavisi qira vano lotu. Mana iri vine kakiaro vano lotu, go mara lulu qiru Pol mana Banabasi go mara zae Antiok iri go, iago iri vine karua basoe iri lete nanao vamazala qiru go, Jiudas iri vitoṉo ze go Basabasi mana Saelas.

²³Mana iri vapala qira e leta igo dena seko na. “Remu apostoloro mana kazigaratana ro lotu qimu vakitaka ro ramu, qimu seko velaka atu de qamu koe go ramu vakitaka ro remu qamu ki Jiu go kaega, qamu koe go Antiok, Siria mana Silisia.

²⁴Remu qimu gata bana kakiaro basoe iri reqe de qimu koego iri vamakuru qamu mana vamaqata qamue ramu sauna pata iri sine go. Do de qimu koego remu iriki pala ze kaega kaki tamana igogo, go tarina zazu ne go vatovato nae.

²⁵Iato go remu qimu pepeu mana toqe ne karua basoe qiturine zatue de qamu koe go ramu. Mana riru tiruna lulu zatu karua vakitaka velaka remu, Pol mana Banabasi.

²⁶Iru teke nego too riru sauna zazu ia Batu ita Jesu Kristo.

²⁷Iago qi turine zatu Jiudas mana Saelas de qamu koe go tiruna sine ne qamu ramu pataro qimu karo zatu ego leta nae.

²⁸Spirit tabo i toqe tavise nanao remu go timuniki pala kaki pata i papala maqata mana taruze de qamu koego ramu, do kavia tamana dena to i tora go ramu tamuna lulua go.

²⁹Kasi ge na patagege iri tavatavara zego god poqepoqe ro, mana kasi ge na parasa. Kasi ge na pata qaraqara iri poṉo vale qirae go saqe qira go. Kasi zazu nena too vari vagabu go. Ṉalu qamuki zazu neto kaega pataro dena, ramu tamuna ko velaka, Mana velaka sivala atu de qamu koego.”

³⁰Eklesia i turine qira to basoero dena go tarina za go Antiok. Ṉalu iri za doka iri teṉo qira to vano iri vaogote go Jesu, mana iri teke ne qira to leta ne go.

³¹Ṉalu iri toere go leta dena iri lete kula sivala ne seko vari vakaraputa iri teke ne qira go.

³²Jiudas mana Saelas iru karua propeta napu soiago iru seko vaumate de iri koego vano lotu mana vatadagasiri qira mana va karaputa qira go.

³³Taramuzina za ko umata riru de gogo ne, vano lotu iri turine qirue eto riru dalo mana vari vatatarutaru ria de iru koe go. Mana riru iru gado ule napu zato de iri koego vano iri turi bana me qiru go. [

³⁴Do Saelas i nanao mara koe de iri koego ria igo.]

³⁵Pol mana Banabasi iru koe so Antiok mana topu napu ria iri ko tavisi qiru, iri vari vatatana mana tamana ne seko ia God.

³⁶Taramuzina pataro dena, Pol i sine ne Banabasi, “Ituru, maturu ule mana za tove qira kaeqituru ro iri koego osina komala ro qaturu tamana qirae go seko ia God Batu ne, mana za mia de iri gogo.”

³⁷Banabasi i lete soko bana so Jon Maka mara lulu qiru igo.

³⁸Do Pol iki nanao velake kaega tiruna lulua go. Tanego iki valupo kaega zaza kenaqa iri vae go, i za dokae Pampilia, mana i gado ule.

³⁹Riru iru lete vari valegu ne pata dena mana iru soso zaza. Iago Banabasi i ilulua to Jon Maka iru goe kameka koluka mana toka za to nugu Saeprus.

⁴⁰Do Pol i vine Saelas go tina lulua go. Mana vano lotu iri pene ne qiru, go vari miasoka na karisina Batu ne mana Mana ia mara ko tavisi qiru.

⁴¹Iru zaza liqute kena Siria mana Silisia mana iru vakaraputa napu qira vano lotu na de igogo ne.