Read Varisi Zazu Ria Apostoloro 16 Bible Online

Zazu Ria Apostoloro 16 - Varisi bible

Zazu Ria Apostoloro 16

¹Pol l zaza mana l za dokae Debe mana Listra, de go i koe kaki basoe i vaogote Jesu, vitoṉo na Timoti. Sinana do i vaogoto napua so Jesu, qole ne i qole na Jiu, do tamana ne i basoe na Qrik.

²Osiqira vano vaogoto na Listra, mana Ikonium iri sine seko velaka ro sauna Timoti.

³Pol gonae i soko ne mara lulua Timoti, gonae i kosia ia. I zazu ne ia dena tanego osiqira vano Jiu iri koego de gogo ne, iri rove tamana Timoti i valeke Qrik.

⁴Ṉalu iri goe go loborona komala lavata ne, iri vatatavata ne qira vano iri vaogoto go, tamana ro iri vanadu bana go apostoloro ne mana vano kazigarata na Jerusalema, mana iri sine ne qira tarina vaogote go tamana ro dena.

⁵Iago vano lotu ne i zaza po karaputa vaogoto ria, mana basoero iri vaogoto napu go nogotona musaqara ro izaza popoka topuqira.

⁶Iri go za loborona kolabana Praeqia mana Qalesia, tanego Spirit tabo ne iki vamao ne qira kaega tarina tarama ze Tarama Velaka ne loborona kena Esia.

⁷Ṉalu iri za dokae vari kuto na pua Maesia, iri pada ne zae na kena na Bitinia, do Spirit ia Jesu iki va mao ne qira so kaega.

⁸Iago iri zaza sivala eso Maesia, mana iri za dokae Troas.

⁹Kuse na ṉalu nae, Pol i mia kameka miadua, i miasoba kaki basoe na Masedonia i degere mana i pene ia, “Lamae Masedonia mana tavisi ne qemu!”

¹⁰Pasi i mia lupo miadua dena Pol, qi vanama go timuna zae Masedonia, tanego qi nanao God i koru qemu timuna za tarama ne Tarama Velaka ia, de iri koego basoero na de gogo ne.

¹¹Qi goe koluka qi kasi ne Troas mana qi za totoloṉo e Samotras, mana bakubaku na ne qi dokae Neapolis.

¹²Reqe me to de go, qi piqata za Pilipae kaki komala lavata ikoe kaki takoboro na kolabana Masedonia, komala igogo ne, iri zazu ne vano Rom, mana iri va komale. Remu qi za koe komala igogo ne torana kavia so musaqara.

¹³Musaqara na ṉalu Sabat, qi kasi ne komala lavata ne mana qi zae rikisina kaki uguru, de go qi nanao kadego i koe kaki dia iri kameka teṉoe vano Jiu ṉalu iri lotu e go. Qi koloku mana qi va pepeu qira qolero iri teṉo ego de igogo ne.

¹⁴Kaki kameka ria, i gata go seko remu, vitoṉona Lidia, i reqe me Taetira, qole dena i volivoli ne poga qore i lete voli makuru go, ia i vazaka God, mana Batu ne i papaqa nanao na ia, go tina vavaroṉo no velaka ne pataro i sine go Pol.

¹⁵Taramuzina nae, tanuna mana basoero iri koego pade ia iri bapitema lupo. Lidia i pene qemu remu igo, “Lama koe pade era, ṉalu qamu nanao era ogotona to qa vaogote Batu ne.” Mana i pene vamoqere qemu go timuna lulu ia.

¹⁶Kaki kameka ṉalu qi zae de iri koego vano iri pepene go, qi za soba kameka qole seka, qole seka dena i kakabua manuru sakata, go iva roverove ia, mana i sine pata tinara sadaka me ṉalu iara ko mego. Vano iri toṉove go qole seka dena, iri pala ze topu na kesa sauna roverove mana sine na pata ro tinara sadaka mego, i zazu nego qole seka ne.

¹⁷I kale muzi ne Pol, mana remu go, ikoru valavata, igo, “Basoero dena iri vano zazu ia God ni lete zakazaka sivala go! Iri sine vasadake, de go qamu mazala go za kavele!”

¹⁸Qole seka ne, i sine tarua so seko ro dena, osina ro musaqara, Pol gonae i vasasakate to gata na seko ni sine go qole ne, i tabali mana i sine ne manuru ne, “Loborona vitoṉo na Jesu Kristo, qa sine nigo ono siporo kasi ne qole nae!” Torana so nae manuru sakata ne i siporo kasi ne qole ne.

¹⁹Ṉalu vano iri toṉove go qole seka ne iri rove, de iri palapala ze go kesa ne i kaega to, iri pala qiru Pol mana Saelas mana iri raqasa vazao qiru e de koego karaputa ria batubatu ro loborona peka lavata ne.

²⁰Iri pala vazao qiru e de iri koego batubatu ro na Rom mana iri go, “Basoero dena iri vano Jiu, mana iri lama zazu ne pataro iki totoloṉo go kaega loborona komala lavata ita dena.

²¹Iri vari vatatana ne vatovato ṉalu bana ro i tabo e go tamana ro ita, remu qi basoero ria vano Rom iago, qiki toqe ne kaega vatovato ria, ba pada ne na go.”

²²Mana osiqira to basoero ne iri vari tavisi ne vasasakata ne qiru Pol mana Saelas go batubatu ro ne iri ridake roku riru Pol mana Saelas ia mana iri vazao qiru go tarina sima qiru go.

²³Taramuzina iri sima lupo qiru, iri vana qiru aqe bara ne, mana iri sine ne valeke ni miasoka go bara ne tina kokogo vanadu qiru.

²⁴Pasi i pala go tamana dena, valeke ni miasoka go bara ne, i taru qiru e Pol mana Saelas, kaki kovo i lete rodoko go, mana i qolo vanadu ze make qiru takoboro na moki lavata ne.

²⁵Torana loboro kuse Pol mana Saelas iru pepene mana iru kera vazaka God, kero ne vano iri koego bara ne iri gata taru qiru.

²⁶Goso nae kameka nunu lavata i lama nasua kutamana bara ne, katikili so osina siporaṉa na bara ne i papaqa lupo mana seni iri qolo ze go makeqira vano iri koego bara ne i talupasa lupo.

²⁷Valeke ni miasoka go bara ne, i dogara mana ṉalu i miasoba go siporaṉa na bara ne i papaqa, i nanao osiqira vano iri koego bara ne iri paqa lupo to bago, igo, iago i toqo rave zaqe pegi loda ia, go mara vae vale tanuna igo.

²⁸Do Pol i lete koru valavata me igo, “Kasi va paleka na tanumu! Remu qiko lupo so dena.”

²⁹Valeke ni miasoka go bara ne i koru qira qe basoero ne mara pala me pazi, i teteṉe keba me, i nenedere mana i sorue makena Pol mana Saelas.

³⁰Gonae i lulu vasiporo qiru, mana i tana ne qiru, “Ke karua valeke, avana to tuna zazu nego era, go tuna kavele go?”

³¹Iru vataule, “Ono vaogote Batu Jesu, go tono za kavele, aro mana osiqamu to tatamana ro.”

³²Gonae iru tarama ne seko ia Batu ne, de ikoego ia mana osiqira to ria iri koego pade ia ne.

³³Torana so kuse na ṉalu nae, valeke ni miasoka go bara ne, i lulu qiru Pol mana Saelas iri zae pade ia, i sabore de i paleka go tokama qiru mana taramuzina nae, tanuna mana osiqira to ria ko tatamana ro ia, iri bapitema lupo.

³⁴Gonae i lulu qiru Pol mana Saelas iri zae pade ia mana i teke ne qiru pata qeqe. Tanuna mana osiqira to ko tatamana ro ia iri lete kula sivala tanego ninidena iri vaogote God.

³⁵Sarusaruku na ne, batubatu ro ria vano Rom iri vazao qira baturo ria vano Pulisi go tarina za sine ne valeke ni miasoka go bara ne, go tina vasiporo qiru Pol mana Saelas loborona bara ne.

³⁶Iago, valeke ni miasoka go bara ne, i sine ne Pol, “Batubatu ro ne, iri valame tamana, iri go, aro mana Saelas qaburu talupasa. Qaburu mazala to kasi ne dena, iago za loborona dalo.”

³⁷Do Pol i sine ne batu ria vano Pulisi, “I kaega kaki pata kebu iri soba qaru e peka lavata ne, mane iri taru qarue bara ne go.” Raru qaru basoe na so Rom. Avigo tane qamu soko go vasiporo pika qaru go, de go iki tora kaega. Iago, za turine qira me vano batubatu na Rom, go tarina lama vasiporo qaru go.

³⁸Batu ria vano pulisi iza sine ne qira batubatu na Rom seko riru Pol mana Saelas, mana ṉalu iri gata go Pol mana Saelas iru basoe na so Rom, iri lete sareki.

³⁹Iago iri za mana iri za seko ule qiru, mana iri lulu vasiporo qirue bara ne, mana iri pene qiru go tiruna kasi ne komala lavata ne.

⁴⁰Pol mana Saelas iru kasi ne bara ne, mana iru zae pade ia Lidia. Dego iru soba qira vano iri vaogoto go, iru sine sekoro go tina vakaraputa qira, mana iru kasi ne qira go.