Read Varisi Zazu Ria Apostoloro 17 Bible Online

Zazu Ria Apostoloro 17 - Varisi bible

Zazu Ria Apostoloro 17

¹Pol mana Saelas iru zazu sivale komala Ampipolis mana komala Apolonia go. Mana iru lama dokae komala Tesalonika. Komala nae ikoe kameka Pade Lotu ria vano Jiu.

²De igogo bana so vatovato ia Pol osina ṉalu iago, i zae Pade Lotu igogo ne. Kapisa musaqara Sabat i sine vatatavata ne qira basoero ne seko tabo.

³Mana i sine lukasa vatatavata ne qira ogotona pataro i sine taru bana go seko tabo ne, Mesia tina pala vokara, mana God tina vatoo napu me Jesu tepa le ne. Pol igo dena, “Iato Jesu qa sine vatatavata ne qamu go era dena, iato i Mesia go.”

⁴Kakiaro vano Jiu iri vaogote go sekoro dena iri kamekae to de ikoego Pol, mana Saelas, mana igo napu to vano Qrik iri vazaka bana go God. Mana topu napu qolero mazamazala na kamala lavata dena, do iri kamekae to de ikoego Pol mana Banabasi.

⁵Do vano baturo ria vano Jiu iri qora, iago, iri pala qira basoero sakataro iri koego so zuka lavata ne, mana iri vatupia to vasasakata, mana iri vari vaiqi e to komala lavata ne, mana iri vae pade ia kameka valeke vitoṉona Jesoni, tanego iri soko pala qiru Pol mana Saelas mana vazao qirue de iri koego vano batu lavata ro nez iri go.

⁶Do ṉalu iriki miasoba qiru go kaega, iri raqasa vasipore Jesoni mana kakiaro napu vano lotu, iri pala vazao qirae tarakenaqa qira vano batu na komala ne. Mana iri koru, iri go dena, “Basoero dena, Pol mana Banabasi go iri zazu ne pata makuru ro osina dia. Mana ninidena iri lamae to komala ita,

⁷mana Jesoni to dena i soti qirue go pade ia. Mana osiqira dena iri vae lupo to tamana ia batu lavata Siza. Mana pata iri sine go iri go, iko napu tane kaki batu lavata vitoṉona Jesu,” iri go.

⁸Sekoro dena iri koru ne ze de iri koego basoero topu ne, mana vano batu ro na komala lavata ne go. Ṉalu iri gata go seko ro dena, iri lete muma.

⁹Gonae vano baturo ne iri sine ne Jesoni mana vano lotu ro ne go, mara ria volia kesa bauru iri pene go basoero ne go tarinara talukasa mana go tarinara vazao volomo qira go, iri vane qira.

¹⁰Kuse na so nae, vano lotu iri turi ne qiruaqe Pol mana Banabasi komala Berea. Ṉalu iru za dokae go Berea iru zae Pade Lotu ria vano Jiu.

¹¹Basoero na de gogo ne nanao qira i velaka sivala ne nanao qira vano Tesalonika. Iri lete soko gatana tarama ia Pol. Gonae iri lete gata vavelake mana osina musaqara iri toere tarua mana lukase pata ni sine go Buka tabo ne mana pataro i sine go Pol i ogoto sivala go.

¹²Topu ria vano Jiu iri vaogoto, mana topu ria qolero mazamazala mana valekero Qrik go iri vaogoto napu.

¹³Do ṉalu vano batu ro ria vano Jiu iri koego komala Tesalonika iri gata zaqe Pol i tamana napu ne seko ia God komala Berea, iri lama vagatagata seko qira basoero volomo, gonae iri muma mana pera qiru to riru.

¹⁴Gonae vano lotu iri katikili turi ne zaqe Pol tepa babatena ne. Do Saelas mana Timoti iru koe Berea.

¹⁵Ria iri lulua go Pol iri vazao ze komala Ateni. Lupo nae iri uleme Berea iri pala me seko ia Pol isoko qiru Saelas mana Timoti mara riru katikili zae de ikoego ia, igo.

¹⁶Ṉalu Pol i piri ne qiru Saelas mana Timoti komala Ateni, ilete ṉiṉiri i mia go beku na god poqepoqe iri zazu ne go i purake go komala iavata igogo ne.

¹⁷Iago ipala pepeue de iri koego vano Jiu mana vano iriki Jiu go kaega iri vazaka go God iri koego loborona Pade Lotu ria vano Jiu, mana osina musaqara iseko tabe napu qira basoero iri zaza sivalae go loborona peka lavata na komala ne.

¹⁸Kakia ro vano vari vatatana iri vitoṉo qirae Epikuriani mana Sitoiki go iri vari valegu ne seko de ikoego Pol, gonae kakiaro Iri go dena, “Avana tane valeke vakanata dena i sine go?” Mana kakia ro iri go, “Valeke dena ipepeu so god na de kakavata.” Iri sine pata ro dena, tanego Pol i tamana ne Jesu mana too napu ia tepa le ne.

¹⁹Iago iri pala vazao ze Pol tarakenaqa na de pepeu lavata ria, iri vitoṉo ze Areopaqasi, mana iri sine ne ia, “Remu qimu soko rove na vari vatatana voru qo sine go aro.

²⁰Kakia ro pata qo sine go aro ipata vorue de qimu koego, mana qimu soko rove na talukasana go.”

²¹Tanego ria vano ogotona Ateni, mana vano kakavata iri koego komala, nae iri soko teke ne na ṉalu ria gata na mana pepeu na kakia ro pata voru go.

²²Iago, Pol i degere tarakenaqa qira vano iri teṉo gatagata pepeu go. Mana igo dena, “Era qa mia ramu vano na Ateni de igogo osina zazao na vazaka na god ro ramu.

²³Ṉalu era qa zaza goe loborona komala ramu, qa mia de qamu varerego mana qa soba ze kameka sara i karoe seko dena, “De ikoego kameka god qatiki rove go kaega.” Iato God qamu vazaka go, qamuki rove go kaega nae iato qa sine vasadaka ne qamu go era ninidena.

²⁴God i vazaria vudu pua mana osina pata iri koego loborona. I Batu ne rani mana pua mana iki koe kaega Pade Lotu izazu ne go basoe.

²⁵Mana ia iki soko kaega pata izazu ne go basoe go tina teke ne go, tanego ia so i teke ne go osina basoe marapuga too, mana osina ro pata iri pala go.

²⁶Ireqe me so kameka basoe, God iara vazaria go soso adoadona basoe mana i taru qirae osina dia kolabana pua, mana ia i vine lodana ṉalu ria tarina too mana de tarina koego.

²⁷Ia i zazu ne pata dena go ria mara taqia ia, mana de gogo tarina soba go ia ṉalu iri soru vakakavatae go de ikoego. Do God iki ko valaqalaqae kaega de qata koego ita.

²⁸Gerena kaki basoe ikaro bana mego, igo dena, “Loborona ia tane qata tooe go qata vizuvizu mana qata zazu go. Mana gerena napu so kaki basoe tarove ramu ikaro bana go igo dena, “Ita Osiqita qata sale ro ia.”

²⁹Pasi ita qata sale ro ia God, mata kasi nanao vagere zena ia tatalina kaki pata i gere go beku iri zazu ne qolu siliva ba ipaka. Ia iki gere kaega pata izazu ze go karisina basoe ni reqeme go nanao tarove iago i zazu ne go.

³⁰Ṉalu basoe iki rove go kaega ia, God iki nanao tarua kaega sakata ro ia. Do ninidena ia i soko osina basoero iri koego osina dia mara vana neto sakata ro ria.

³¹Tanego God i vine bana kameka musaqara tina zazu nego varitanae ia de iri koego basoero na kolabana pua ne. Tina zazu ze loborona totoloṉo. Ia tina vazazua kameka basoe i vine bana go, basoe nae to Jesu, mana i vasadaka velaka bana ne qita go, tanego i vatoo bana ze ia tepa le ne.”

³²Ṉalu ria iri gata go Pol i sine go sauna kameka basoe itoo napu mego tepa le ne, kakia ro ria iri vakari ne ia. Do kakia ro iri go, “Remu qimu soko go aro ono sine napu ne qemu sauna pata dena.”

³³Iago Pol i siporo kasi ne de pepeu ne.

³⁴Do kavia ria basoero iri gata pata i sine go Pol iri vaogote Jesu, mana basoero nae kaki kameka valeke vitoṉona Dionisiusi i valeke tavine na pepeu lavata Areopaqasi mana kaki kameka qole vitoṉona Damaris mana kakia napu ria basoero go.