Read Varisi Zazu Ria Apostoloro 18 Bible Online

Zazu Ria Apostoloro 18 - Varisi bible

Zazu Ria Apostoloro 18

¹Taramuzina pataro dena, Pol i kasi ne Ateni mana i zae komala Korint.

²De go i za soba kameka valeke Jiu vitoṉona Akuila, i podo e kolabana Pontus, Akuila iara reqe meso Itali, i lulu ne qole ia Pirisila go, tanego batu lavata Kolodias, i vadegere tamana igo, osiqira vano Jiu iri na kasi lupo ne Rom, iago Pol i za mia qiru.

³Iza ko mana i zazu tavisi qiru, zazu ria iri sira kadisi na pade iri pala zaza ne, go tarina soba ze desuka kesa.

⁴Nogotona musaqara Sabat Pol i zae Pade Lotu ria vano Jiu, i pada ne go mara itane nanaoqira vano Jiu mana vano Qrik, go tarina vaogoto go.

⁵Ṉalu Saelas mana Timoti iru reqe me Masedonia iru lama doka, Pol i teke lupo ne ṉalu ia, i tarama ne Tarama Velaka ia Batu ne, mana i sine vatatavata ne qira vano Jiu, igo, Jesu to i Mesia go.

⁶Ṉalu basoero ne iriki gata kaega tamana ro ia, mana iri sine seko sakata ro de ikoego ia, Pol i seko vamoqere de iri koego, i tavore lodu ikoego roku ia mana i sine ne qira, “Ṉalu ramu tamuna zaza kakavata e de ikoego God, ikoe to riqo ramu tanuqamu, iki riqo era kaega. Ninidena era tuna kasi ne qamu mana tuna zae de iri koego vano iriki Jiu go kaega.”

⁷Iago Pol i kasi ne qira mana i zakoe pade ia kaki valeke iki Jiu go kaega, vitoṉona Taetius Justus, valeke dena i vazaka God, mana pade ia i garogaro so Pade Lotu ria vano Jiu.

⁸Kripus vitoṉona valeke ni kenaqa nego Pade Lotu ria vano Jiu, i vaogote Batu ne, osiqira to ria tatamana ro, mana topu napu ria basoero na Korint iri gata Tarama Velaka ia Batu ne iri vaogoto mana iri bapitema go.

⁹Kaki kameka kuse Pol i miadua Batu ne i lama i sine ne ia, “Oniki sareki ne qira basoero nae, ono seko e de iri koego, mana oniki mamanava zazu ne na zazu aro,

¹⁰tanego era qa ko tavisi go. Kaega kaki basoe tina lama va sakati go, tanego basoero iri koego komala dena, iri basoero era so.”

¹¹Iago Pol i koe komala igogo ne, torana kameka mana takoboro na ave, i vari va tatana ne seko ia God de iri koego basoero ne.

¹²I lama doka to ṉalu vano batubatu na Rom iri vine go Qalio tina kenaqa ne go miasoka na kolabana Akaia, vano Jiu iri teṉo, mana iri pala vazao ze Pol varitanae.

¹³Iri go “Valeke dena i pada ne pala qira basoero, go tarina vazaka go God, loborona zuka ba vatovato i tabo ego tamana.”

¹⁴Iara vele seko Pol, do Qalio i sine ne qira vano Jiu, “Ṉalu valeke dena i zazu ne kaki pata sakata, i tora era tuna piri ne qamu ramu vano Jiu go qa mazala gata na pata tamuna sine go.

¹⁵Do ia dena qamu vari valegu neso seko, vitoṉo, mana tamana ro ramu, ianae i tora so tanuqamu vatotoloṉe, era tuniki zazu ne kaega vivine sauna vatotoloṉe na, pataro nae!”

¹⁶Mana i kakale vasiporo qirae loborona pade varitanae.

¹⁷Basoero ne iri pala Sostinesi, ia ni kenaqa ne go Pade Lotu ria vano Jiu, mana iri vari sima ze ia, tarakenaqana pade varitanae ne. Do Qalio, iki va kapata so kaega pata iri zazu ne go.

¹⁸Pol i ko vaumate de iri koego vano vaogoto loborona Korint, goto nae i kasi ne qira, i lulu ne qiru Pirisila mana Akuila, iri goe koluka mana iri toka za Siria. Tarakenaqana go tarina ra toka kasi ne Kenikeria, Pol i teria uguruna. Pol i zazu ne ia dena tanego, ia i zazu bana ne kameka pui lavata de ikoego God.

¹⁹Iri lama doka e Epesus, Pol i taru qirue Pirisila mana Akuila de go. Pol i zae Pade Lotu ria vano Jiu, mana i va pepeu qira vano Jiu go.

²⁰Basoero ne iri pene ia mara ko vaumate de iri koego iri go, do iki toqe ne kaega.

²¹Do ṉalu i vele kasi ne qira, i sine ne qira, “Ṉalu tina vamao go God, era tunara lama napu e de qamu koego,” Goto nae i age koluka ne i kasi ne Epesus mana i toka za Kaesaria.

²²Ṉalu i za dokae Kaesaria, ia i zae Jerusalema, i za seko velaka qira vano lotu, mana taramuzina nae, i sivala za Antiok.

²³Pol i za ko vaumata qe komala igogo ne, lupo nae i zaza napu, i piqata za kolabana Qalesia mana Praeqia, i seko vakaraputa e de iri koego vano iri vaogoto go.

²⁴Torana ṉalu nae kameka valeke Jiu vitoṉo na Apolosi, i podo e Alekzadaria i lamae Epesus. Apolosi i kaki valeke sekoseko velaka, mana i rove velake, de go zazao na Buka tabo go.

²⁵Valeke dena, i pala bana kavia vari vatatana, dego vatovato ia Batu ne, mana ṉalu i seko go, i lete seko vakaraputa ne de go totoloṉo na vatovato mana too ia Jesu. Do Apolosi ne, i rove so vari va bapitema ia Jon.

²⁶Gonae Apolosi i va tupia seko vakaraputae loborona pade lotu ria vano Jiu. Ṉalu Pirisila mana Akuila iru gata go sekoro ia, iru lulu vazao ze ia pade riru, mana iru sine vatatavata velaka ne ia, de go totoloṉo na vatovato mana too ia God.

²⁷Apolosi i nanao mara zae Akaia igo. Iago vano vaogoto iri koego Epesus iri tavisi ne ia, iri karo ne qira vano vaogoto iri koego Akaia, iri pene qira qe, tarina kula ne Apolosi ṉalu tina za dokae Akaia. Ṉalu Apolosi i za doka e Akaia, i lete tavisi ne qira basoero iri vaogoto bana go Jesu loborona Mana ia God.

²⁸Loborona to karaputa na seko ro ia, i va qoqoro qirae vano Jiu tarakenaqa qira basoero topu, ṉalu iri vari valegu go, i vasadake seko ogoto ni koego Buka tabo ne, Jesu to i Mesia go.