Read Varisi Zazu Ria Apostoloro 19 Bible Online

Zazu Ria Apostoloro 19 - Varisi bible

Zazu Ria Apostoloro 19

¹Torana iara koe Korint, Apolosi, Pol i piqata za sasaniqa na kolabana Praeqia mana i za sipore Epesus, de go i soba qira kavia ro disipoloro,

²mana i tana ne qira, ‘Avigo qamu toṉove Spirit tabo ṉalu qamu vaogote go Jesu ba?” Iri vataule ne Pol, iri go, “Remu qimuki gata bana so kaega ka Spirit tabo iko, go.”

³Pol i tana ne qira, di gonae iago, “Ava bapitema na tane qamu toṉove go ramu?” Iri vataule, “Remu qi pala so vari va bapitema ia Jon.”

⁴Pol i sine ne qira, “Vari va bapitema ia Jon, i ke ria vano iri nanao ule ne vasakata pata ro ria, Jon i sine ne qira basoero na Izirel, go tarina vaogote ia tina za lama go taramuzina tanuna, basoe dena to, Jesu”.

⁵Ṉalu iri gata go ia dena, iri bapitema lupo ne so vitoṉona Jesu Batu ne.

⁶Pol i siba qirae karisina mana Spirit tabo i lama e de iri koego, iri seko ne soso seko ro iriki rove bana go kaega, mana iri sine vasadake Tarama Velaka ia God.

⁷Varipalu qira ne, torana manoga karua ria valeke ro.

⁸Torana kapisa inaqa nae Pol i zae Pade Lotu ria vano Jiu mana i seko vakaraputae de iri koego basoero ne, iri kameka pepeu mana i pada ne varove qirae, de igogo zazao na Too ikoego vari miasoka ia God.

⁹Do kakiaro basoero, iriki gata pata kaega, mana iriki vaogoto kaega, ria dena, iri sine ze seko sakata ro tarakenaqa qira basoero ne, de igogo vatovato ia Batu ne. Iago Pol i kasi ne qira, mana i pala qira so vano iri vaogoto, osina musaqara iva pepeu qirae loborona pade pepeu ia Taeranus.

¹⁰Karua ave to i vari vatatana ne Pol pataro dena loborona Epesus, iago osina basoero iri koego kolabana Esia, vano Jiu mana vano iriki Jiu go kaega iri gata seko ia Batu ne.

¹¹God i teke mazala Pol, go tina zazu ne zazu vari vapoloso kakavata ro.

¹²Patavolomo aqisi mana roku ia, iva zazua so, ṉalu iri pala vazao ze de iri koego basoero iri mokoso go, iri tavoesi lupo, mana vano i siqane qira manuru sakata ro, iri velaka lupo go.

¹³Kakiaro vano Jiu iri telotelo go, iri kakale qira manuru sakata ro, iri pada napu neso vazazuna vitoṉo na Jesu Batu ne, iri sine ne manuru sakata ne, “Qa teke nigo tamana dena, loborona vitoṉo na Jesu, ni vari vatatana nego Pol.”

¹⁴Tamakena taravitu, salero ia batu na patere ria vano Jiu vitoṉo na sikiva, iri zazu nego pata ro igogo ne.

¹⁵Do manuru sakata ne, i sine ne qira, “Era qa rove Jesu, mana qa gata bana zazu ia Pol, do akena ramu bana tane nae?”

¹⁶Valeke i siqana nego manuru sakata ne, i moqere sivala ne qira mana i vae vasakata qira, iri paleka lupo, roku ro ria i taridaka lupo mana iri paqa siporoe pade iago.

¹⁷Osiqira vano Jiu mana vano iriki Jiu go kaega, iri koego Epesus iri gata soba tarama dena, iri lete sareki lupo, mana iri lete Mia vamazale, vitoṉona Jesu Batu ne.

¹⁸Topu ria vano iri vaogoto go iri lama vasadaka ze teṉoteṉo ne, osina to pata kebu ro iri zazu bana ne go.

¹⁹Topu ria vano iri pada ne zazu manumanuru ro iri pala me buka ro ria, iri kameka teṉo ne, mana iri subi ze tarakenaqa qira basoero iri teṉo go. Iri va todo voli na nogotona buka i za doka e neqo mao dola.

²⁰Loborona zuka mazala dena, seko ia Batu ne i zaza popoka karaputa na.

²¹Taramuzina pataro dena i sadaka, Spirit tabo i lete vanadua nanao na Pol, go tina zae Masedonia mana Akaia mana tina za doka e Jerusalema. Iago Pol igo, “Taramuzina tuna zae go Jerusalema, era tuna za doka Rom.”

²²Iago i vazao qiru Timoti mana Erastus, karua valeke iru zazu tavise ia, tiruna zae Masedonia, do tanuna ne iara za koe tekere loborona kolabana Esia.

²³Torana to ṉalu igogo ne, kameka makuru lavata i lama sadaka e komala na Epesus tanego i sauna to vatovato ia Batu ne.

²⁴Kaki basoe i va zazua siliva, vitoṉo na Demetrimus, i zazu va siliva ne de iri vavazaka ze god qole iri vitoṉo ze Daeana, tanuna mana vano zazuiago, iri pala ze vavagado lavata sivala zazu dena.

²⁵Iago Demetrimus, i koru teṉo qira vano zazu ia, mana vano iri zazu napu ne kakiaro pata i todo go god qole Daeana, mana i vane qira dena, “Valeke ro qamu rove ramu, vavagado ro ita, i reqe meso zazu dena.

²⁶Qamu mia mana qamu gata go, pataro i zazu ne go valeke Pol dena. Iago, god ro iri zazu ne go basoero iki god ogoto kaega, iato go topuna basoero na Epesus mana garogaro to osina vudu na Esia iri vaogote seko ro ia.

²⁷Pata mata sareki ne go ita ne, basoero ne tarina seko vasakate zazu ro ita, do miki pata nae so kaega, basoero ne tarina vapatavolomo napua so de iri vavavere ze god qole Daeana, mana karaputa ro ia tina pata volomo, do god qole dena to iri vazaka go osiqira vano na Esia mana kolabana pua ne go.”

²⁸Basoero iri gata go seko ro dena iri lete ṉiṉiri, iri koru valavata iri go, “god Daeana na Epesus i lete karaputa!”

²⁹Topu napu basoero na komala lavata ne, iri koru tavisi me. Gonae iri pala qiru Qaiusi mana Aristakus, karua valeke na Masedonia, iru lulua Pol zaza i vae go, iri raqasa vazao qirue pade iri teṉo ego basoero topu ne.

³⁰Pol i lete soko mara za sekoe de iri koego basoero ne igo, do vano iri vaogoto go, iri vakaega ne ia.

³¹Kakiaro ro napu vano batubatu na de igogo ne, iri vakitaka ro ia Pol iri vazao seko ne ia, iri pene ia niki ara zae pade iri teṉo ego basoero ne.

³²Torana nae basoero iri za kebae go pepeu ne, iri za vari vaeqi so, kakiaro basoero iri koru ne kaki pata, kakiaro vano iri koru ne kene pata, tanego topu ria basoero ne iriki rove kaega, ava patana tane iri lama kameka teṉo ne go.

³³Kavia ria basoero iri teṉo go iri nanao Alekzada tane i vatupia go pata dena, tanego vano Jiu iri turine ia tina zae go tarakenaqa qira basoero topu ne. Alekzada i pae vanoto qira basoero ne tarina duduli, go tina seko midiki ne tepa ia, mana tepa ria vano Jiu, sauna pataro dena.

³⁴Do ṉalu basoero ne iri mia rove Alekzada i valeke Jiu iri koru valavata iri sine so kameka pata ne, torana karua aoa, iri go “god Daeana na Epesus i lete karaputa!”

³⁵Goto nae ia valeke karokaro na komala lavata ne, iara va noto qira basoero ne, mana i sine ne qira “Basoero na Epesus! Basoero ne iri rove komala lavata na Epesus, iato iri vine ze go tina miasoka go de va vazaka ia god qole Daeana, mana i paka tabo ni soru me tepa rani ne.

³⁶Kaega kaki basoe tina valegua go pataro dena, iago ramu amuna duduli mana kasi nanao na zazu ne na kaki pata makuru go.

³⁷Ramu qamu lulu ne qira basoero dena, ria dena iriki siko kaega de vavarere, mana iriki sine ne kaega kaki seko sakata de ikoego god qole ita go.

³⁸Ṉalu Demetrimus mana vano zazu ia, tara ko kaki basoe tara vari va legu ne kakia pata, varitanae ne i papaqa taru so, mana karaputa i ko ne qira basoero iri mazala go vine na akena i poqe ba akena i ogoto go.

³⁹Do ṉalu i ko kaki pata, bana qamu soko go, qamu mazala vatotoloṉo ze na pepeu ria basoero na komala ita dena.

⁴⁰Ba gerena pata i sadaka go ninidena, batubatu ro na Rom iri mazala so sine ne qita, qata vano vaivato. I kaega kaki basoe i mazala sine na, o, iko kaki pata velaka tane iri vari vaiqi ne go basoero dena, mana ita do i kaega ne qita so kaki pata velaka, go tatana sine go sauna pata ro dena.”

⁴¹I sine lupo ne qira to seko ro dena mana i va mamanava to pepeu ne.