Read Varisi Zazu Ria Apostoloro 20 Bible Online

Zazu Ria Apostoloro 20 - Varisi bible

Zazu Ria Apostoloro 20

¹Pasi i lupo to vari vaiqi ne, Pol i koru qira vano iri vaogoto go, i sine qira kavia seko go tarina gasi mana va mogere qira, taramuzina nae i va tarutaru qira mana i kasi ne komala ni gogo ne, mana i zae Masedonia.

²Pol i goe kolaba ro nae, i vatalasara ze nanaoqira basoero ne, sauna Tarama Velaka i vari vagata nego. Goto nae i za dokae Akaia.

³I za koe de go torana kapisa inaqa. I vanamanama ne tina zaza go za tepa Siria, ia i gata soba vano Jiu iri vato ne vae vale na ia, iago i nanao tina ule napu za Masedonia.

⁴Sopata sale ia Praius, basoe na Berea, i lulu tavise ia, mana ria iri lulu tavisi napu ne ia Aristakus mana Sekundus, karua basoe na Tesalonika, Qaiusi basoe na Debe, Taisikus mana Tropimus, iru reqe me kolabana Esia, mana Timoti go.

⁵Ria dena iri kenaqa bana za, mana iri za piri ne qemue Troas.

⁶Qi kasi ne Pilipae taramuzina kelo na musaqara bureri i kaega go istina, mana taramuzina kalima musaqara, qi lama vosoro e komala na Troas, de go qi lama koe kameka vuiki.

⁷Raravi na ṉalu sarere, remu qi kameka teṉo mana ṉaṉa vari kulae. Pol i sekoe de iri koego basoero ne, Pol i seko vaumata, go i doka so loboro kuse, tanego ia tina zaza sarusaruku na.

⁸Topu pazi iri vakamu ze go kova zakazaka na pade, de qi teṉo pepeu ego.

⁹Kaki valeke gavere vitoṉona Eutikus, i koloku e vuida na pade ne, mana ṉalu Pol i seko ia i totoda, go i za dokae to ṉalu Eutikus i taunuku zato, ireqe me pade i kapisa go varilapo na, Eutikus i soru me pua ne. Ṉalu iri za sua ia, valeke ne i le bana to.

¹⁰Do Pol i qoqoro za, i soru poka mana i kana ne ia “Kasi manava sakata valeke dena i too.”

¹¹Gonae i popoka ule za kova zakazaka ne, i pasia bureri mana i ge. Taramuzina i seko tabe vaumata qira, i doka to ṉalu i vele tavuara, Pol i kasi ne qira to.

¹²Gonae iri lulu vagado valeke gavere ni too napu go mana iri lete kula sivala.

¹³Qi age koluka mana qi toka za Asos, de go timunara ruana zego Pol, i sine bana ne qemu, “Tanuna ne tina piqata atu.”

¹⁴Ṉalu i garetu soba qemu e Asos, qi ruane ia mana qi sivala za Miteleni.

¹⁵Qi kasi ne Miteleni mana qi toka za Kios, qi za dokae Kios kene musaqara na. Zarika na to ia, qiara za dokae Samos, mana kene musaqara na qi za dokae Miletus.

¹⁶Pol i nanao niki ara toka ule za kaega Epesus, go niki za valoda ze ṉalu ro ia tepa kolabana Esia. Pol i zaza nonopa, go mara za doka katikili Jerusalema, go mara ko tavisi ṉalu musaqara Pentikoste ne, igo.

¹⁷Remu qi za koe Miletus, gonae Pol ivazao seko ne qira kazigarata na ro eklesia iri koego Epesus go tarina lama soba ia.

¹⁸Ṉalu iri lama doka, Pol i sine ne qira, “Ramu qamu rove, de qa gogo era, ko tavisi qa vae ne qamu go, tupi me to musaqara kenaqa na lama doka qa vae go kolaba Esia dena.

¹⁹Loborona ṉalu qa maqata mana qa dae, era qaki vazakanapu kaega loborona makuru ro qa soba go, tanego nanao ro ria vano Jiu iri soko vae vale ava, do era qa zazu ne so zazu ia Batu ita, Jesu.

²⁰Ramu qamu rove, era qaki pala vaule kaega kaki pata, go i mazala go tavisi ne qamu ramu, loborona ṉalu ro qa tarama ne, mana vari vatatana e de teṉoteṉo ro mana pade ro ramu go.

²¹De qamu koego ramu vano Jiu mana vano iriki Jiu go kaega, qa sine va moqere ne qamu, muna vanane vasakata pata ro ramu mana tabali za de ikoego God, mana taru ze ruruqe ramu de ikoego Jesu Batu ita go.

²²Mana ninidena, era qa vaogote to Spirit tabo ne, era tuna zae Jerusalema, mana qaki rove kaega kapata tina doka va era, za ko tuna vaego Jerusalema.

²³Pata qa rove go era ne, osina komala ne, Spirit tabo ne i va banabana ve era, era tuna soba topu na makuru mana tarina pala va zao vae bara ne go.

²⁴Do era qa nanao rove, too era i patavolomo so, era qa soko so vavotona zazu ni turi nave Batu ita Jesu ni teke nava, go tuna zazu ne, zazu igogo ne, era tuna vatatavata go Tarama Velaka na dego velaka ia God.

²⁵“Era qa go lupoe de gamu koego, qa tarama ne de igogo vari miasoka ia God, mana ninidena qa rove, kaega kakia ramu basoero dena tamunara mia va era.

²⁶Iago qa sine ne qamu musaqara dena, bana kake ramu basoero qamu ara rove go, ianae iki ara vatovato era kaega.

²⁷Tanego era ikaega kaki pata qa pala vaule go, sine qa vae ne qamu go zazu ro ba, pataro i nanao go God tinara zazu nego.

²⁸Muna miasoka tanuqamu mana osiqira kero ne basoero, tanego Spirit tabo ne i taru ze vari miasoka ramu, tamuna miasoka eklesia ia God, gere qira vano miasoka sipi, to ia i toṉove go, tanego Sale ia i teke ne too ia, i voli bana zego parasana.

²⁹Era qa rove taramuzina zaza tuna vae era, basoero tarina lama e de qamu koego, tarina gere qira sika piru kabakabala ro, mana tarina lama va makuru lupo qira vano iri vaogoto go.

³⁰Tina lama doka ṉalu kakiaro basoero qamu kameka zazu go, tarina sine seko poqe ro, mana kakiaro basoero iri vaogoto go tarina zaza kakavata napu.

³¹Muna miasoka basoero gere qira ria nae, mana nanao tarua, era qa lete ko makuru kuse, mana musaqara qa vatatana qamu go osiqamu loborona kapisa ave.

³²Mana ninidena era qa taru qamue to vari miasoka ia God, tarama na de igogo velaka na God, go tina vazaza popoka qamu mana vakaraputa qamu, go tamuna pala vatabo i vanama bana go God, tina tekene qira go basoero ia.

³³Era qaki soko kaega tuna pala ze kaki basoe siliva, qolu ba poga.

³⁴Ramu qamu rove, era qa va zazua so karisiqu go i sadaka mego osina pataro qa toṉove go, mana ria iri lulu ava go.

³⁵Era qa va mia lupo bana qamu e osina pataro, tanego ṉalu qata zazu vokara ne ia dena, ita qata mazala to tavisi ne qira vano iri pela go. Muna nanao tarua seko i sine go tanuna Jesu Batu ne ego, T topue kulakula ṉalu qo soso ne, gerena so ṉalu qo pala go.’ ”

³⁶Ṉalu Pol i seko lupo, i koloku tutuṉu tavisi qira mana i pene.

³⁷Iri dae lupo ṉalu iri kana ne ia, mana iri kuna vatarutarua ia go.

³⁸Iri lete maqata sivala tanego i sine ne qira, tamuniki ara mia soba napu ava kaega. Iri lulua ia mana iri za ule ne ze ia koluka tina goe go.