Read Varisi Zazu Ria Apostoloro 21 Bible Online

Zazu Ria Apostoloro 21 - Varisi bible

Zazu Ria Apostoloro 21

¹Remu qimu seko vatarutaru qira, mana qimu zaza to. Qimu toka totoloṉo za qimu za dokae kous, bakubaku na qimu za dokae Rodisi mana qimu kasi ne Rodisi qimu zae Patara.

²Sabarana Patara qimu soba ze kameka koluka i vele zae Ponisia, iago remu qimu age poka mana qimu tokaza.

³Qimu za dokae kaki dia qimu mia zaqe ṉugu na Saeprus, mana qimu goe tepa papara Saot qimu za dokae Siria qimu za vosore Taia de tina vasoru ze patapata ro ria basoero iri ruana ze go koluka ne.

⁴Komala igogo ne qimu za soba qirae kakia ro vano lotu, mana qimu za kotavisi qira torana kameka vuiki loborona karaputa ia Spirit tabo, iri sine ne Pol niki zae Jerusalema.

⁵Do ilama doka to ṉalu remu timuna kasi ne qiraiago qimu zaza to. Osiqira valekero qolero mana salero ria go iri lulu qemu qi siporo me komala lavata ne, iri lama ule ne qemue remu karakoni ne. Osiqemu qimu koloku tutuṉu mana qimu pene.

⁶Gonae qimu vari vatarutaru lupo ia remu qimu za to koluka ne, mana ria iri gado ule za to komala ne.

⁷Qimu kasi ne Taia mana qimu toka napu za Tolemaisi de sogone qimu za kula ne qira vano lotu mana kotavisi qira kameka musaqara.

⁸Bakubakuna qimu kasi ne de gogo ne mana qimu za koe pade ia Pilipi valeke i seseko ne Tarama Velaka. I kaki kameka ria taravitu iri vine bana qirae go Jerusalema iri tavine go zazu lotu ne,

⁹i toṉove kavasi sale qole ia iriki busi kaega mana iri tarama ne seko ia God.

¹⁰Qimu ko tavisi qira ria de igogo ne kavia ro musaqara. Kaki kameka propeta vitoṉona Aqabas ireqe me Judia.

¹¹Ia ilamae de qimu koego remu, i pala beloto ia Pol i vabeloto ze makena mana karisi na tanuna, igo dena, ‘Ta dena to pata i sine go Spirit tabo. Ria vano Jiu iri koego Jerusalema tarina qolo vane dena ia itoṉove go beloto dena, mana tarina vazao ne qira vano iriki Jiu go kaega.”

¹²Ṉalu qimu gata go pata dena, remu mana vano lotu iri koe go de gogo ne qimu sine vakaraputa ne Pol niki zae Jerusalema qimu vane.

¹³Do ia i vataule ne qemu remu, “Avana tane qamu zazu ne go ramu qamu dae go, qamu soko kopule na puṉuqu era? Era qa toqe ne mara qolove Jerusalema mana qa vanama bana ne to le ne na vazakazaka na vitoṉo na Jesu Batu ita ne.”

¹⁴I gonae iago i makuru qemu timuna sida go ia. Iago, qimu mamanava seko mana qimu sine so, mao ia so God tina lama ogoto go pata dena.

¹⁵Taramuzina ko qimu vae go kavia musaqara komala igogo ne, qimu vanama patapata ro remu, mana qimu tasibaka za to Jerusalema.

¹⁶Kavia ro ria basoero iri ruqe go Jesu tepa komala Kaesaria iri tavisi napu qemu, mana iri lulu vazao qemue pade ia Nesoni valeke na Saeprus i vaogoto bana Jesu kokoso na bana me.

¹⁷Ṉalu qimu za dokae go Jerusalema, vano lotu iri kula mana vagado va velaka qemu.

¹⁸Bakubakuna Pol ilulu qemu qimu za mia Jemisi mana osiqira kazigaratana ro lotu go iri lama kotavisi lupo.

¹⁹Pol iseko kula qira ria mana i sine vasadaka lupo ne qira ria osina pataro God izazu ne ze go de iri koe go vano iriki Jiu go kaega loborona zazu ro ia.

²⁰Taramuzina iri gata lupo go ia, osiqira iri vazaka God. Lupo nae ria iri sine ne Pol. “Turaqemu Pol! Aro qo rove topu mao vano Jiu iri lama vaogote Jesu mana iri lulu velake osina Tamana ro ia Mosese.

²¹Do ria iri gata bana pata ro iri sine go basoero ne, aro qo va rove lupo qira vano Jiu iri koe go vudu ria vano iriki Jiu go kaega mara ria tarua Tamana ia Mosese, mana qo sine napu ne qira mara ria kasi kosi qira sale ro ria mana lulu na vatovato ṉalu bana ria vano Jiu go.

²²Iki umata kaega ria tarina rove go aro qo lama dokae go Jerusalema dena iago, avana to mata zazu ne go ita.

²³Remu qimu soko go aro ono lulua so pata timuna sine nigo remu. Kavasi basoe iri koego dena iri odo odo bana ne seko ria tarakenaqana God.

²⁴Iago aro ono lulu qira ria mana tavisi qira ria lotu vari vadalo, mana ono volia pata ro iri komakoma ne ze go lotu vari vadalo ne, go ria tarina mazala go terina uguru qira. Iato nae go basoero ne tarina rove pata ro iri gata bana zigoe aro iki pata ogoto kaega. Do aro tanumu qo lulua Tamana ia Mosese.

²⁵Do sauqira vano iriki Jiu go kaega iri vaogote go Jesu, remu qimu vazao bana ne qira leta de iri koego. Mana qimu sine ne qira mara ria kasi qe na pata gege iri tavatavara ze go god poqepoqe ba kaki pata parasa ba, pata qaraqara iri poṉo vale qira go. Mana mara ria kasi vari vagabu go.”

²⁶Gonae Pol ilulu qira kavasi basoe ne mana bakubakuna ne iza tavisi qira ria zazu na vari va dalo ne. Lupo nae i keba za Pade Lotu ria vano Jiu iza sine ne qira vano Patere torana ava via musaqara tina sivala go tinara lupo go ṉalu iri vatabo go, gogo vano Patere tarina komakoma vamiki ne qira go nogonogoto qira ria taravasi basoe dena.

²⁷Do ṉalu igarogaro to lupo kavitu musaqara iri vine go ria, kavia ria basoero Jiu iri reqe me kena Esia iri mia Pol ikoe go loborona Pade Lotu lavata ne, gonae iri zazu ne seko vari va ṉiṉiri de iri koego basoero topu ne, mana iri pala tarua Pol.

²⁸Iri kara me, iri go dena, “Basoero na Izirel! Lama tavisi qemu remu, ia to valeke dena i goe go osina dia, mana i vatatana qira basoero topu. Mana i seko vaqoqoro qira basoero na Izirel mana Tamana ro ia Mosese, mana Pade Lotu dena go. Mana ninidena ipala me qira kakia ro vano iriki Jiu go kaega loborona pade lotu dena, mana iri lama vakore to de tabo dena go.”

²⁹Iri sine pata dena, tanego iri mia bana Tropimus basoe na Epesus i lulu bana Pol iri zaza ego loborona komala lavata Jerusalema, iago, iri nanao Pol tane i lulu valame ze go ia Pade Lotu ne, iri go.

³⁰Pata makuru sivala to ipuroe go osina dia komala lavata ne, mana basoero ne iri teteṉe me osina dia iri lama vari pala taru ne Pol loborona Pade Lotu ne. Mana iri raqasa vasiporo ze ia pade lotu ne. Mana siporaṉa na Pade Lotu ne iri katikili kckoqua.

³¹Ṉalu ria basoero ne iri pada ne vae vale na Pol, seko i za doka banae de ikoego batu ria vano soldia na Rom. Iri go, vano na Jerusalema iri varitara lupo.

³²Batu ria vano soldia ne i lulu me qira vano soldia ro ne, mana iri katikili lamae de iri koego basoero ne. Ṉalu basoero ne iri mia qira vano soldia ro ne, iri mamanava to vae na Pol.

³³Batu ria vano soldia izae de ikoego Pol i za pala tarua, mana i sine ne qira vano soldia ro go mara qolo ze karua seni. Gonae i tana ne qira basoero ne, “Akena tane valeke dena, mana avana tane i zazu ne go.”

³⁴Kakia ria basoero iri teṉo go iri koru ne kaki pata, kakia ro ria iri koru ne pata kakavata napu go. Iago iri soso seko lupo so go. Mana batu ria vano soldia ne i makure tina pala go totoloṉona pata i doka go dena.

³⁵Iago vano soldia iri lulua Pol za dokae kepakepa na pade nadu ria ne, do basoero ne iri lete ṉiṉiri sasakata, iago vano soldia iri vegore Pol iri ara keba za go kepakepa na pade ne.

³⁶Basoero topu iri muzi mego iri koru iri go, “Vae vale ia nae.”

³⁷Ṉalu vano soldia iri vele vakeba zaqe Pol loborona pade ne, Pol i sine ne valeke batu ria vano soldia, igo, “Avigo qa mazala seko tabe go aro ba?” Valeke batu ne igo, “Avigo qo rove bana seko va Qrik tane aro!

³⁸Avigo aro kaega tane valeke Izipito mara varitarae de i koego batu Qauna ne igo, mana i kenaqa ne qira vasimao vano varitara ia sasaniqa i kaega go pata podopodo lavata na ne mara iri vae vale qira basoero ne igogo?”

³⁹Pol i vataule ne igo, “Era qa basoe Jiu qa podoe komala Tarsus tepa kena Silisia kameka komala lavata iri rove lupo basoe ro topu ne. Vamao ava aro go ma sekoe de iri koego basoero nae.”

⁴⁰Batu ria vano soldia i vamao ia tina seko go. Gonae Pol i degere kepakepa ne i kazara ne karisina go basoero mara ria noto igo. Ṉalu ria iri duduli, Pol iseko tabe qirae ria seko Iburu.