Read Varisi Zazu Ria Apostoloro 23 Bible Online

Zazu Ria Apostoloro 23 - Varisi bible

Zazu Ria Apostoloro 23

¹Pol ireṉa totoloṉo za de iri koe go vano pepeu ne, mana igo dena, “Ramu turaquro na Izirel! Puṉuqu qa nanao vaogote too era i totoloṉoe tarakenaqana God i dokae go musaqara ninidena.”

²Batu ria vano patere Ananaisi, i sine ne qira ria iri degere garogaro go pol mara ria posare saqena Pol igo.

³Pol i vane dena ia, “God tina posari go aro qo gere bari iri saboro va kakase go, qo kolukue nae qo toereve era Tamana, do aro tanumu qo vae Tamana go qo sine ne qira ria go mara posarava era qo gogo!”

⁴Ria basoero iri degere garogaro go Pol iri vane de ia, “Aro go seko sakate Patere ia God iri, go.”

⁵Pol ivataule zaqe, igo, “Ramu onotoquro, era qaki rove bana kaega ia i patere go. Buka tabo ne, igo, ‘Oniki seko sakate batu ria basoero aro.’ ”

⁶Ṉalu Pol i mia basoero iri lama teṉoe go pepeu ne, kakiaro iri vano Sadusi, mana kakia ro iri vano Parisio, iago ia iseko vamazala age loboro qira vano iri koego pepeu ne. “Ramu Onotoquro na Izirel! Era qa kaki valeke Parisio qa sale ria vano Parisio go. Era qa lama go qamu pada nave go loborona pepeu dena, tanego qa vaogote ria iri le bana go tarina too napu me tepa le ne!”

⁷Iara sine lupo so ia seko dena vano Parisio mana vano Sadusi iri tupia to vari valegu, mana ria vano gatagata pepeu do iri tavota napu to go.

⁸Tanego ria vano Sadusi iri go vano le tariniki too napu me kaega tepa le ne, mana iri go i kaega aqelo mana i kaega madau go. Do ria vano Parisio iri vaogote kapisa pata dena.

⁹Karua tepa ne iri koru valavata, gonae vano iri koego tepa ria vano Parisio iri degere me, mana iri seko go dena, “Remu qimu ki soba ze kaega ka pata i vasakate go valeke dena! Kadigo kaki spirit ba aqelo go tane i seko tabe mego valeke dena.”

¹⁰Pera mana vari valegu i zaza karaputa, iago batu ria vano Soldia ne i sareki ne qira basoero ne niki go vae vale ria Pol i Go, iago i sine ne qira Soldia ro ia mara ria qoqoro za mana pala vakuziki ne me Pol de iri koego ria, mana za taru vaule napu ze ia pade nadu ne.

¹¹Kuse na nae Batu Jesu i degere tavise Pol mana i vane dena, “Ono karaputa oniki sareki! Aro qo degere bana nava era komala Jerusalema dena mana ono zazu go napu so nae tepa komala Rom go.”

¹²Sarusaruku na ne, kakia ro ria vano Jiu iri teṉo mana iri vatovato. Iri pui ne to seko ria tariniki ge kaega pata gege mana besia kaega besi, go tina doka so ṉalu tarina vae vale go Pol, iri go.

¹³Vasiṉaulu seki basoero iri kameka vato ne go pata dena.

¹⁴Gonae iri zae de iri koego batu ria patere ro ne mana kazigarata ro go, mana iri sine ne qira. “Remu qimu pui vanadu bana to nanao qemu de ikoe God timuniki ṉaṉa kaega mana qe besi kaega go tina doka so ṉalu timuna vae vale go Pol.

¹⁵Iago ramu, mana vano iri tavise go pepeu ne muna vazao seko ne batu ria vano Soldia na Rom, go mara lulu vaqoqoro me de qamu koego ramu Pol. Muna sine vamuraka ne ia, ramu qamu soko tana napu ne na ia, go mamu rove va velake zazao na too ia muna vane zaqe. Remu timuna vanama mana vae vale ia torana iara kaebo go lama dokae na de qamu koego ramu,” iri go.

¹⁶Do sale valeke ia vavanina Pol i gata bana vanamanama tatakiu ria, iago i keba popoka za pade nadu ria vano Soldia ne, mana i sine ne Pol.

¹⁷Gonae, Pol i korua kaki kameka valeke kenaqa ria vano Soldia ne, mana i sine ne ia, “Ono lulu vazao sale valeke dena de ikoego batu ramu vano Soldia, tanego i soko vele sine ne ia kaki pata.”

¹⁸Valeke kenaqa ria soldia ro ne i lulu vazao ze ia de ikoego batu ria, mana i sine ne ia, “Pol basoe qo taruze qo bara ne i sine nava era lulu me na sale valeke dena de qo koego aro, tanego i soko sine nigo aro kaki pata,” igo.

¹⁹Batu ria vano Soldia ne i pala tarua karisina sale valeke ne ilulu vamikia mana i tana ne ia, “Avana tane qo soko go sine nava era na?”

²⁰Sale valeke ne igo, “Vano batu ro ria vano Jiu iri varitoqe ne mara ria pene go aro bakubaku, mana lulu vazao napu ze Pol de pepeu ne, go mara poqe go aro, go mara ria tana ne ze ia kaki pata go mara vatotoloṉe iri go.

²¹Do oniki gata mana vaogote seko nae, iseko poqe mana tatakiu, tanego vasiṉaulu seki ria basoero iri vanama ne go vae kovaṉa Pol. Ria basoero nae iri varitoqe ne to vatovato ria tariniki ṉaṉa kaega ba besi kaega go tina doka so ṉalu tarina vae vale go Pol, iri go. Pasi ninidena iri piri vanamanama ne so toqemu aro, igo sale valeke ne.”

²²Gonae batu ria vano Soldia ne i sine ne sale ne, “Oniki sine ne kakia basoe noqo valame nava go era seko dena.” Mana ituri vaule ne sale valeke ne.

²³Batu ria vano soldia i koru qiru karua basoe kenaqa ia, mana i vane qiru dena, “Vanama qira torana karua vasa Soldia go mara ria zae Kaesaria mana va lulu tavisi qamue vituṉaulu Soldia tarina age ose mana karuavasa basoero iri varitora ne go bele, mana muna kasi ne so dena torana kaia koloko kuse ninidena.

²⁴Vanama napua kavia ose tina age go Pol mana vazao velaka ze ia de ikoego Qauna Pilix.”

²⁵Mana batu ria vano Soldia ikaro kameka leta, igo dena seko na.

²⁶“Era Kolodias Laisiasi qa karo ni go aro batu velaka Qauna Pilix, i kaki musaqara velaka era qa karo nigo aro.

²⁷Vano Jiu iri pala valeke dena mara vae vale ia iri go. Era qa gata ia i kaki basoe talupasa mana qa gata ia i basoe ogotona Rom, iago era qa valulu girae Soldia ro era go qimu miasoka ze go ia de iri koego ria.

²⁸Era qa soko rove na ava pata na tane i zazu ne go, go iri pala ze go ia, iago qa lulu vazao ze ia pepeu ria tanuqira vano Jiu.

²⁹Mana qa soba ze ia iki zazu ne kaega kaki pata go tina tora go le ne na ia, ba taru ze na bara ne go. Pata iri vapala ze go ia i sauna so Tamana ria tanuqira vano Jiu.

³⁰Mana ṉalu era qa gata ria iri tatakiu nava go era mara ria vae vale iri go. Era qa turine ne zatu ia de qo koego aro. Mana qa sine ne qira mara ria garetu sine lukasa ze tarakenaqamu aro pata i vasakate go.”

³¹Soldia ro iri lulua to tamana ia batu ria vano Soldia ne. Gonae iri lulua Pol kuse nae vadoka ze komala lavata Atipatrisi.

³²Bakubaku na ria Soldia ro iri zaza make go iri gado ule komala ria. Mana ria Soldia ro iri age go ose ne so iri lulu za vadoka go Pol.

³³Iri vadoka ze Pol komala lavata Kaesaria mana iri teke ne leta ia Qauna Pilix mana iri taruze Pol vari miasoka iago.

³⁴Qauna Pilix i toere leta ne mana itana ne Pol, “Ade tepa tane qo reqeme go aro.” Ṉalu ia igata Pol i sine ne ia ireqeme Silisia,

³⁵i vane dena, “Era ṉara gata seko aro. Ṉalu tarina lama dokae go dena vana iri vapala zigoe sakata.” Gonae i sine ne qira vano soldia ne, tarina miasoka ze Pol Loborona pade lavata ia ne.