Read Varisi Zazu Ria Apostoloro 24 Bible Online

Zazu Ria Apostoloro 24 - Varisi bible

Zazu Ria Apostoloro 24

¹I sivala to kalima musaqara, batu lavata ria vano patere vitoṉona Ananaisi i zae Kaesaria, i lulu qira kavia vano kazigarata, mana kameka basoe vivine vitoṉo na Tetulius. Iri za degere tarakenaqana Qavuna Pilix, mana iri sine ne pataro iri va paqo ze go Pol.

²Gonae iri koru va keba Pol, mana Tetulius i vatupia to vasadake na seko, igo, “Batu velaka! Ko va batubatu qo vae go aro i lete umata sakata, mana remu qi ko velaka so, pataro qova degere go aro, itora va velake to vudu remu.

³Osina dia mana osina ṉalu go, remu qi kula ne pataro dena, mana qi kula nigo aro go.

⁴Era qaki soko kaega pala vaumata na ṉalu aro, iago era qa ppen go aro ono gata, seko pusi remu de.

⁵Remu qi soba ze valeke dena, ia i vasadake vatovato ni sakata go, ia i vatupia vari vaiqi de iri koego vano Jiu loborona kolabana pua ne, mana iato valeke dena i kenaqa ne qira kaki koko iri vitoṉo qira e vano Nazaret.

⁶Ia iki vatabotabo kaega Pade Lotu ne, iato go qi pala ze go remu.

⁸Ṉalu to tana ne valeke dena, aro qo mazala so gata na, mana rove na go, pataro qi sine go remu sauna valeke dena.”

⁹Osiqira vano Jiu iri vari toqe ne, mana iri sine, osina pataro qi sine zatu go remu sauna valeke dena, i pata ogoto.

¹⁰Qavuna ne i va vizua karisina, go Pol tina seko igo, gonae Pol igo, “Era qa rove aro qo zazu ne vivine mana varitanae, loborona kena qo miasoka go topu na ave. Iago era qa kula tuna mazala sine na pata ogoto de igogo too era, tarakenaqamu aro.

¹¹Iago qo mazala so rove na tanumu, iki sapu ne kaega manoga karua musaqara, era qa zae Jerusalema go tuna za vazaka go God.

¹²Vano Jiu iri rove ṉalu iri miava era, era qaki vari va legu e kaega Pade Lotu ne, ba ve qa zazu ne vari muma de iri koego basoero ne loborona Pade Lotu ria vano Jiu, ba kaki dia loborona komala lavata ne.

¹³Ria ne iriki mazala kaega tarina vasadake ogotona pata ro iri va paqo ve era.

¹⁴Era ma sine nigo pata ogoto, i ogoto sivala era qa vazaka God, iato God iri vazaka bana go vanovano bana ro ita ne, era qa lulua zuka ia Batu ne, iato iri sine go vano Jiu, iri go iki totoloṉo go kaega. Do era qa vaogote, seko Tamana i reqe me dekoe Mosese mana kero ne buka ro Iri karo go vano propetaro.

¹⁵Ria to mana era go, i varitora so piri qivae nego Batu ne, qi rove God tina vatoo qira e tepa le ne vano vatovato velaka mana vano vatovato sakata go.

¹⁶Mana iato go era qa pada taru neso go mava totoloṉo nanaoqu mana vatavato era, dekoe tarakenaqana God mana basoero ne.

¹⁷Topu ave era qa kasi bana ne Jerusalema, iago ninidena era qa ule napu me, qa pala me kavia kesa go tuna tavisi ne qira basobasoero era iri situ go, mana tuna tavatavara ne zaqe God go.

¹⁸Torana qa zazu ne to era pataro dena, ria iri soba ve era Pade Lotu ne, taramuzina era qa valupo go zazu nena vavadalo, go tuna velaka go. De qa koego era, i kaega bana so ka basoe na, mana i kaega bana so ka basoero iri poro naki go.

¹⁹Do kakiaro vano Jiu iri reqe me kolabana Esia iri ko go ṉalu nae, ria to tara lamae tarakenaqa mu aro, go tara ria lama sine go, ṉalu go i ko kaki pata iri va paqo ve era.

²⁰Bana i tora qira basoero dena, tarina sine ava ka pata sakata qa zazu ne go era, ṉalu qa degere go tarakenaqa qira basoero iri zazu ne go vivine,

²¹ba era ne kameka so ovaṉa qa sine go ṉalu qa degere go tarakenaqa qira basoero ne ṉalu nae. Qa koru ne, “Ramu qamu va makuru ava era ninidena, tanego era qa vaogote vano le tarina too napu me.”

²²Goto nae Pilix, i rove velaka bana, de igogo zuka ia Batu ne, i va mamanava to gata na seko ro ria, i sine ne qira, “Ṉalu tina lama doka to batu lavata Laisiasi, era tunara sine go akena ni ogoto ba, akena ni poqe go.”

²³Pilix gonae i sine ne basoe ni kenaqa nego miasoka na Pol, tarina zamiasoka ia, do mara kasi lete va makureria ia, go vakitaka ro ia, iri mazala lama teke ne na ia kapata iri soko go.

²⁴Taramuzina kavia musaqara, Pilix mana qole ia Drusila, qole ia i qole Jiu. Pilix i koru zaqe Pol, tanuna mana qole ia iru gatagata pasi Pol i pepeua de igogo vaogoto na Jesu Kristo.

²⁵Do ṉalu Pol i sine napua de igogo, too totoloṉo, too ia tanuna basoe, mana ṉalu muzi God tina zazu nego vivine, Pilix i sareki, mana i sine ne Pol, “Aro mo ule tekere ninidena. Era tunara koru napu go, ṉalu go i ko napu nava ṉalu.”

²⁶Pilix i nanao, Pol tina teke ne ia kavia kesa igo, iago i koru tarua Pol mana i pepeu e de ikoego.

²⁷Taramuzina karua ave i sivala, Ponsio Pestusi i lama kavale Pilix, i lama qavuna napu. Pilix i soko mara va kula qira vano Jiu igo, iago iki lupase kaega Pol, i taru ze so ia bara ne.