Read Varisi Zazu Ria Apostoloro 25 Bible Online

Zazu Ria Apostoloro 25 - Varisi bible

Zazu Ria Apostoloro 25

¹Kapisa musaqara Pestusi i za koe kena igogo ne ikasi ne Kaesaria mana i zae Jerusalema.

²Vano batu Patere ro mana kazigarata ro ria vano Jiu iri sine napu ne ia pata iri va paqo bana ze go Pol, mana iri lete pene vamazala ze Pestusi,

³go mara toqe Pol Jerusalema iri go. Tanego ria iri vari vato bana ne go tarina vae vale ze Pol zuka ne iri go.

⁴Do Pestusi i vataule ne qira, “Pol i koe bara ne, tepa komala Kaesaria, mana era qa garogaro ule napu za na komala igogo ne.

⁵Iago, ṉalu igoto ia izazu ne go pata sakata, vano kenaqa ro ramu mara luluava era mana zae Kaesaria mana za vari tanae ze ia de igogo ne.”

⁶Pestusi i za koe kazalu ba manoga musaqara Jerusalema taramuzina nae ia iara zae go Kaesaria. Bakubakuna ia iza koluku me pade varitanae ne, mana i sine ne qira ria mara lulu vakeba me Pol, ivane gira.

⁷Ṉalu Pol i lama doka, ria vano Jiu iri reqeme go Jerusalema iri degere kolo ia, mana iri vatupia vapala zena ia topu pata poqe ro.

⁸Do Pol i degere ne to totoloṉo ia tanuna ia igo. “Era qaki vasakate kaega kaki pata tepa ia Tamana ro ria vano Jiu, ba Pade Lotu mana batu lavata siza go.”

⁹Do Pestusi isoko go mara kula ne tanuna vano Jiu igo, iago itana ne Pol. “Avigo aro qo toqe ne mata zae Jerusalema go mara varitanae nigoe sauna pata ro dena tarakenaqaqu era ba?”

¹⁰Do Pol igo dena, “Varitanae dena, i ke ia batu lavata Siza, nae to qamu mazala go varitanae ne ze go too era go. Ramu qamu rove velake, i kaega kaki pata qa vasakate go era, de iri koego vano Jiu.

¹¹Ṉalu go qa vasakate kaki pata, Tamana igo era tuna le, ṉalu igogo nae, era qa toqe ne tuna le go. Do ṉalu pata iri vapaqo vego era vano Jiu i poqe go, ikaega ka basoe i ko ne karaputa tina va zao ne era de iri koego vano Jiu nae. Iago era qa soko batu lavata Siza tina gata go pata iri vapaqo vaego era vano Jiu.”

¹²Taramuzina Pestusi i za va pepeu lupo qira vano iri tavisi ze go ia sauna nanao ro, ia i vataule ne Pol, igo. ‘Aro qo pene mozae de ikoego batu lavata Siza, iago ivelaka aro ono zae de ikoego Siza sauna varitanae aro dena.”

¹³Taramuzina kavia musaqara i sivala so ia batu lavata Aqripa mana vavanina ia Benis iru lamae Kaesaria iri lama tove Pestusi sauna vasadake na kula riru.

¹⁴I sivala to kavia musaqara iri lama ko go. Pestusi i sine lukasa ne batu lavata ne de igogo Pol, igo dena, “Kaki kameka valeke itaru bana ze bara ne Pilix so iko sivala go dena,

¹⁵mana ṉalu era qa zae Jerusalema paterero ria iri lama sine nava era pataro iri va paqo zego vano Jiu mana kazigarata ro ria go, mana iri pene ava era ma tana ne ia mana vamakure ia, iri go.

¹⁶Do era qa sine ne qira, vatovato reremu vano Rom, iki malumu kaega tarina vae vale go basoe iri vapala volomo ze go kaki pata i vasakate go. Do tarina teke ne ṉalu basoe nae go tina za degere ne ze go pepeu mana sine lukase pata iri vapaqo ze go ia.

¹⁷Iago, ṉalu iri lamae Kaesaria, era qaki ara piri napu kaega, do bakubakuna ne, era qa za kolokue de gatagata pepeu ne, mana qa sine mara ria lulu vakeba me valeke ne.

¹⁸Do vano Jiu iri degere seko loborona ego varitanae ne iriki sine so kaega kaki pata sakata izazu ne go ia, gere de qa nanao vane go era.

¹⁹Do iri valegu ze so ia sauna so lotu ria mana zazao na so valeke Jesu iri vane go, i le bana go do Pol i sine ia i too napu igo.

²⁰Iago era qaki rove va velake kaega dego tuna soba go ogotona zazao na pata ro dena. Mana qa pene Pol mara toqe ne garetu na Jerusalema go ma varitanae ne ze ia sauna pata dena qa qo.

²¹Do Pol i pene, remu mimu miasoka ze ia dena, mana vazao ze ia Rom. Mana batu lavata Siza so tinara toere go varitanae ia dena igo. Ia go era qa taru ze vari miasoka ria vano soldia go tina za doka go ṉalu era tuna vazao ze go ia de ikoego butu lavata Siza.

²²Aqripa i vane dena Pestusi, “Era tanuqu qa soko gata na valeke dena.” “Baku baku ono ara gata go,” igo Pestusi.

²³Bakubaku na ia Aqripa mana Benis iru vakeba malemale batu batu riru iru keba me pade ne, mana basoero ne iri vamazala qiru go. Vano batu ria vano Soldia mana vano batu na komala lavata ne to go iri lama kotavisi go. Gonae Pestusi i sine ne qira ria mara lulu vakeba me Pol, igo.

²⁴Pestusi igo dena, “Batu lavata Aqripa mana ramu osiqamu qamu lama kotavisi go nindena. Qamu mia basoe dena, iri sine vasadaka lupo zazu sakata ro ia. Topu basoero Jiu iri koe go komala dena mana komala Jerusalema go, iri koru ne ia mara le iri go.

²⁵Do era qaki mia kaega kaki pata go i tora go ia tina le ne go, mana tanuna i pene mara zae de ikoego batu lavata Siza go tina za toere ze go varitanae ne, pata iri vapaqo zego ia, igo. Iago era qa nanao vazao na ia.

²⁶Do era qaki rove kaega kapata totoloṉo ikoego de ikoego ia, go tuna karo ne zaqe go batu lavata Siza. Iago era qa pala me ia tarakenaqa qamu ramu, mana torakenaqamu aro batu lavata Aqripa go ia taramuzina muna toqe lupo to ramu sauna pata dena ia, go tunara rove go pata tuna karo go.

²⁷Tanego iki mimia velaka kaega de qa koego era tuna vazao go basoe qolo dena ṉalu qaki sine velake go kaega pata sakata i vasakate go.”