Read Varisi Zazu Ria Apostoloro 27 Bible Online

Zazu Ria Apostoloro 27 - Varisi bible

Zazu Ria Apostoloro 27

¹Ṉalu iri vine, remu timuna goe koluka mana zae vudu Itali, ria iri vazao Pol mana kakia ro vano iri koego bara de ikoego Juliasi, batu lavata ria Soldia na Rom iri vitoṉo ze koko ia batu lavata Siza.

²Qimu aqe kameka koluka ireqeme Adaramitiam ivanama ne zae na sabarana na komala ro na kolaba Esia, iago qimu toka za to, mana Aristakus kameka valaka na Masedonia ireqe me komala Tesalonika ilulu qemu.

³Bakubakuna ne qemu dokae Saidon. Juliasi i nanao Pol, iago i va mao neiago mara za mia qira vakitaka ro ia, go mara teke ne ia kaki pata go tina tavisi ne go.

⁴Qimu kasi ne Saidon seva ilete sota qemu, iago qimu barata goe rikisi na ṉugu Saeprus de i va tabari ne go seva.

⁵Qimu kava sivale Silisia, mana Pampilia mana qimu za likote Maera kena Lisia.

⁶De gogo batu ria vano Soldia i soba kameka koluka ireqe me Alekzadaria mara toka napu za Itali, iri go, iago batu ne i vakava qimue remu koluka igogo ne.

⁷Zaza qimu vae go i sapu ne qimu topu musaqara, tanego qimu soba sokoro, iago i makuru qemu zaza i umata ne qemu to ia qimu ara za dokae go komala Nidasi. Ilete sota qemu sokoro imakuru qemu go zana tepa gogo ne, iago qimu kava qoqoro za ṉugu kereti mana qimu sabarae kena tepa papara na ṉugu Salamoni, de iki mogere go kaega sokoro ne.

⁸Qimu babatae eso ṉugu nae, i karaputa sasakata loka mana sokoro, iago qi losi so, go qimu ara lama dokae to kaki sabarana iri vitoṉo ze “Ioqu velaka” i garogaro go komala Laisia.

⁹Mana qimu za ko vaumate de gogo ne, gonae musaqara lavata na ṉalu God ipala vakuziki ne go vasakata pata ria basoe ro ne i sivala za to go. Mana remu qimu lama dokae to ṉalu na sokoro, imakuru to ara zaza napue na loka ne, iago Pol igo dena.

¹⁰“Ramu basoero! Era qa rove pasi dena popoka za gogo ne, ita tatana soba topuna makuru loborona zaza ita, tina sakata koluka mana patapata ro ramu qamu ruane go mana kadigo kakia basoe tina le go.”

¹¹Do batu ria vano soldia i vaogote seko ia valeke ikenaqa ne go koluka ne, iki vaogote kaega seko ia Pol.

¹²Sabarana nae iki velaka kaega koe na ṉalu sokoro, iago topu ria basoero iri koego koluka ne iri soko toka za mana pada ne za dokae na Ponikisi mana za koe de gogo ne torana ṉalu sokoro. Ponikisi i kaki loqu na kereti i tabali za tepa zununa saṉa.

¹³Kameka seva i kikiru me tepa saot mana basoe na koluka ne iri nanao tiniki moqere kaega iri go. Gonae iri toqo vakeba likotona koluka ne mana iri losi zaza qalaqalate tepa papara na nugu kereti.

¹⁴Do iki umata so kaega kameka sokoro karaputa i kiuru me tepa noti iri vitoṉo ze sokoro siporo.

¹⁵I lama vae paparana koluka ne, mana i makuru va zazao totoloṉona go, iago qimu vatotoloṉe so kaluka ne mana valulu ze so sokoro ne qimu go.

¹⁶Ṉalu qimu vatabari aqe de suka ṉugu suka Kauda, remu qimu riqo ne vakebana diqi suka na kaluka ne.

¹⁷Vano zazu na koluka ne iri vakeba me ze diqi ne, mana qolo vanadu ze koluka ne go. Ria iri sareki bana go za koluku ne qirae koerena masi na Libia, iago iri sipa vaqoqore sele ne ne mana valulu ze so sokoro ne koluka ne.

¹⁸Sokoro ne iara lete karaputa so, iago bakubakuna ne iri tupi vanaqe kakia ro patapata ro iri koego koluka ne.

¹⁹Mana musaqara zarikana ne iri vanaqe napu kakiaro pata zazu na koluka ne go.

²⁰Topu musaqara qimuki mia so kaega saṉa ba domiri, do sokoro ne so ilete karaputa go musaqara ro nae. Iago remu i kaega ne qemu to karaputa. Mana qimu nanao timuna le to qi go.

²¹I sivala topu na musaqara basoero ne iriki ṉaṉa so kaega. Gonae Pol i degere tarakenaqa qira mana igo dena, “vakitaka ro era, ṉalu tamu gata bana go seko era, mana tatako bana meso kereti gogo ne, ita tatiki lama soba kaega makuru ro dena mana patapataro do taraki vale qiso kaega go.

²²Do ninidena qa pene qamu kasi sareki mana vakaraputa nanao qamu. Kaega kaki kameka basoe tina le go, do koluka ne so tina vana go.

²³Tanego kuse ne aqelo ia God ia qa vazaka go era ilama de qa koe go.

²⁴Mana i sine nava. ‘Pol oniki sareki, aro tonu za degere tarakenaqa na batu lavata Siza. Loborona velaka ia God deqo koego aro, ria basoero qamu aqe go koluka nae tarina too lupo so.’

²⁵Iago ramu vakitaka ro era muna karaputa, tanego era qa ruqe God tina vaogote pata i sine nava go.

²⁶Do sokoro dena tina pala qita mana vanaqe qitae kaki nugu.”

²⁷I manoga kavasi kuse to sokoro ne i vatelo qemue go masi na Medeterenia, mana loborona kuse nae vano zazu na koluka ne iri nanao qimu zale garogaro to vudu,

²⁸Iago iri pala tali iri padapada zego kuri na masi ne, iri doki ze kaki pata maqata tumuna ne, mana iri vaqoqoro zaqe masi ne, mana iri togo i torana karabete nava. Iumata aqe desuka iri vaqoqoro napua tali ne mana iri mia i manoga kalima nava kurina masi ne.

²⁹Iri lete sareki niki go za vae neze koere ne koluka ne iri go. Gonae iri vasoru zaqe kavasi likoto tepa muzina koluka ne, mana iri lotu, iri pene sauna tatavata go mara lama katikili.

³⁰Gonae vano zazu na koluka ne iri sareki mara paqa kasi ne koluka ne iri go. Iri vasiporo zaqe diqi masi ne, iri vatatakiu ne qemu remu mara vanaqe loka ne kakia likoto tepa qulana koluka ne iri go.

³¹Do Pol i sine ne batu ria vano soldia mana vano soldia ro ia ne go. Ṉalu vano iri zazu e go koluka ne iriki koe kaega koluka ne, God tiniki va kavele qamu kaega.

³²Iago, vano Soldia ne iri puta tali iri doki vanadu ze go diqi ne, mana iri vazao.

³³Garogaro me tavuara Pol i sine vamazala ne qira ria iri koe go koluka ne go mara ria ṉaṉa igo, “Ninidena i vamanoga kavisi na to musaqara ramu qamu ki ge kaega pata gege, sauna sereki ne na mogere na sokoro ne.

³⁴Iago, qa pene qamu muna ṉaṉa go tamuna too go. Qamu rove, kaega kaki kameka mine na uguru na kuzuku qamu tina vana go.”

³⁵I sine lupo to pata dena, Pol ipala kavia bureri i seko velake God tarakenaqa qira osiqira basoero ne, ipasia mana ivatupia qe na.

³⁶Iva karaputa nanao qira, mana osiqira iri qe to pata gege.

³⁷Torana 276 remu qimu koe go koluka ne.

³⁸Osiqemu qimu ṉaṉa mana kuma lupo ke iko sivala go bage vuiti ne iri vanaqe loka ne, go mara vasasavego le koluka ne, iri go.

³⁹I musaqara me ia, ria iriki mia rove kaega babatena na nugu dena, do iri mia kameka lobuku i sabarana karakoni go, iago iri nanao mara ria pada ne raqasa vasiporo za qe koluka ne lobuku ne iri go.

⁴⁰Iago, iri puta talina likoto ro iri vanaqe zaqe go loka ne, mana puta napua taliro iri qolo ze go karua saropo lavata iri sitia ze go koluka ne. Mana iri vakeba zaqe sele tepa qulana koluka ne go sokoro mara kiuru vazao ze koluka ne rikisi iri go.

⁴¹Do koluka ne ikeba za to koere ne mana qula na koluka ne i za nadu go. Mana moqere na masi ni puaka go, i vae papate tazona koluka nego.

⁴²Gonae ria vano soldia iri nanao to vae vale qira vano iri koego bara ne, niki go qavelo za rikisi mana paqa go iri go.

⁴³Do valeke batu ria vano soldia ne i soko va too na Pol, ia go iva kaega qira mara kasi zazu ne na pata igogo ne, do i sine ne qira, vano iri rove go qavelo mara ria soqa za loka ne mana qavelo za rikisi ne.

⁴⁴Mana vano iri muzi go mara lulu qira, qavelo kopakopala ne tapapatana koluka ne, i vane qira. Iato dena de igogo osiqemu qimu kavele go.